Vincy Pinto, Angelore ಲಿಖ್ಣೆಂ ನಾಂವಾನ್ ಬೊರೊಂವ್ಚೊ ವಿನ್ಸೆಂಟ್ ಎಂ. ಪಿಂಟೊ, ಆಂಜೆಲೊರ್ ಫಿರ್ಗಜೆಚೊ ಜಾವ್ನಾಸೊನ್ ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಕೊಂಕ್ಣೆಂತ್ ಸರ್ವಾಂಗಿಣ್ ವಾವ್ರ್ ಕೆಲ್ಲೊ ಏಕ್ ನಾಮ್ಣೆಚೊ ವಾವ್ರಾಡಿ. ಮುಂಬಯ್ ತಶೆಂಚ್ ಗಲ್ಫ್ ರಾಷ್ಟ್ರಾಂಚ್ಯಾ ರಿಯಾದ್, ಆಬುದಾಬಿ ತಶೆಂಚ್ ದುಬಾಯ್ ಶಹರಾಂತ್ ವಾವ್ರ್ ಕರುನ್ ಪ್ರಸ್ತುತ್ ಆಪ್ಲ್ಯಾ ಕುಟ್ಮಾ ಸಂಗಿಂ ಮಂಗ್ಳೂರಾಂತ್ ವಸ್ತಿ ಕರುನ್ ಆಸಾ.

ಆಪ್ಲ್ಯಾ ಲ್ಹಾನ್ ಪ್ರಾಯೆರ್ ಥಾವ್ನ್ಂಚ್ ರಾಕ್ಣೊ, ಮಿತ್ರ್, ಝೆಲೊ, ಕುರೊವ್, ಕಾಣಿಕ್, ದಿವೊ, ನಮಾನ್ ಬಾಳೊಕ್ ಜೆಜು, ಆಮ್ಚೊ ಸಂದೇಶ್, ಉಜ್ವಾಡ್ ಆಶೆಂ ಕೊಂಕ್ಣೆಂತ್ಲ್ಯಾ ಹರ್ಯೆಕ್ ಪತ್ರಾಂನಿ ಆಪ್ಲ್ಯೊ ಮಟ್ವ್ಯೊ ಕಥಾ, ಕವಿತಾ, ಲೇಖನಾಂ, ವಿನೋದ್, ಲಲಿತ್ ಪ್ರಬಂದ್, ಚುಟುಕಾಂ, ವ್ಯಕ್ತಿ ಪರಿಚಯ್, ಆಂಕಣಾಂ ಪ್ರಕಟ್ ಜಾಲ್ಯಾಂತ್.

ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ ಮಂಗ್ಳೂರ್, ದಾಯ್ಜಿ ದುಬಾಯ್ ತಶೆಂಚ್ ಕವಿತಾ ಟ್ರಸ್ಟ್ ಮಂಗ್ಳೂರ್ ಹ್ಯಾ ಸಂಸ್ಥ್ಯಾಂಚೊ ಸಾಂದೊ ಜಾವ್ನ್ ಕೊಂಕ್ಣೆಂತ್ ಆಪ್ಲೊ ವಾವ್ರ್ ಕರುನ್ ಆಸ್ಚ್ಯಾ ವಿನ್ಸಿ ಪಿಂಟೊನ್ ಮಂಗ್ಳೂರ್, ಮುಂಬಯ್, ದುಬಾಯ್ ತಶೆಂಚ್ ಗೊಂಯಾಂತ್ ಜಾಯ್ತ್ಯಾ ಕವಿಘೊಷ್ಟಿಂನಿ ಭಾಗ್ ಘೆತ್ಲಾ ಮಾತ್ರ್ ನಂಯ್ ಆಸ್ತಾಂ ತಾಚ್ಯಾ ಮುಖೆಲ್ಪಣಾರ್ ಜಾಯ್ತ್ಯೊ ಕವಿಘೊಷ್ಟ್ಯೊ ಆಯೋಜಿತ್ ಕೆಲ್ಯಾತ್. ಮಂಗ್ಳೂರ್ ಆಕಾಶ್ವಾಣಿಚೆರ್ ಕವಿತಾಂ, ಲೇಖನಾಂ, ರೆಡಿಯೊ ಸಾರಂಗಾರ್ ಸಂದರ್ಶನ್ ತಶೆಂಚ್ ಕಾರ್ಮೆಲ್ ಕಿರಣಚ್ಯಾ "ದೆಣ್ಯಾಚೆಂ ಜಿಣೆಂ" ಕಾರ್ಯಾಂತ್ ಸಂದರ್ಶನ್ ನಿರ್ವಾಹಕ್ ಜಾವ್ನ್ ಕಾರ್ಯಿಂ ಪ್ರಸಾರ್ ಜಾಲ್ಯಾಂತ್.

ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ಆಸಾ ಕೆಲ್ಲ್ಯಾ ಕವಿಘೊಷ್ಟಿಂತ್ "ಮಹಿನ್ಯಾಚೊ ಕವಿ", ದಾಯ್ಜ್ ಡೊಟ್ ಕೋಮ್ ಪಂಗ್ಡಾನ್ ಆಸಾ ಕೆಲ್ಲ್ಯಾ "ತಿಂತೆರಾಂತ್ ಪಿಂತುರ್" ಮುಳ್ಳ್ಯಾ ವೊಳಿಂತ್ "ಮಹಿನ್ಯಾಚೊ ಕವಿ", 2004 ಇಸ್ವೆಂತ್ ರಾಕ್ಣೊ ಪತ್ರಾನ್ ಆಸಾ ಕೆಲ್ಲ್ಯಾ ವಿನೋದ್ ಸ್ಪರ್ದ್ಯಾಂತ್ ಪಯ್ಲೆಂ ಸ್ಥಾನ್, 2005 ಇಸ್ವೆಂತ್ ದುಸ್ರೆಂ ಸ್ಥಾನ್ ತಶೆಂಚ್ ಲೇಖಕಾಂಚೊ ಎಕ್ತಾರ್ ಹಾಣಿಂ ಆಸಾ ಕೆಲ್ಲ್ಯಾ ಸಾಹಿತ್ಯ್ ಸ್ಪರ್ದ್ಯಾಂತ್ ಪೋತ್ಸಾಹಕ್ ಬಹುಮಾನ್ ಆಶೆಂ ಸಭಾರ್ ಸ್ಪರ್ದ್ಯಾಂನಿ ಬಹುಮಾನ್ ಆಪ್ಣಾಯಿಲ್ಲಿ ಕೀರ್ತ್ ವಿನ್ಸಿಕ್ ಫಾವೊ ಜಾತಾ.

ತಾಚಿಂ ಕವಿತಾ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣೆ ಸಂಪಾದನ್ ಕೆಲ್ಲ್ಯಾ "ಕುಪಾಂ ಮದ್ಲಿಂ ಮುಖಾಂ", ವಲ್ಲಿ ಕ್ವಾಡ್ರಸ್ ಆಜೆಕಾರ್ ಹಾಣೆ ಸಂಪಾದನ್ ಕೆಲ್ಲ್ಯಾ "ಮೊತಿಯಾಂ ಆನಿ ತಾರಾಂ" ತಶೆಂಚ್ "ಸಾಗೊರಾಚ್ಯಾ ವಾಟೆಚ್ಯೊ ಝರಿ" ಹ್ಯಾ ಪುಸ್ತಕಾಂನಿ ಪಾಯ್ಸ್ ಜಾಲ್ಯಾಂತ್ ಮಾತ್ರ್ ನಹಿಂ ಆಸ್ತಾಂ "ದಾಕ್ತೆರಾಚೊ ಘುಟ್" ಮಟ್ವ್ಯಾ ಕಾಣಿಯಾಂ ಪುಸ್ತಕ್, "ಕಾತ್ಕುತ್ಲಿ" ಚುಟುಕಾಂ ಪುಸ್ತಕ್, "ಕಣ್ ಕಣ್ ಕಾಣಿಯ್" ನ್ಯಾನೋ ಕಾಣಿಯಾಂ ಪುಸ್ತಕ್ ತಾಣೆಂ ಪರ್ಗಟ್ ಕೆಲ್ಯಾಂತ್. ಕವಿತಾ ಡೊಟ್ ಕೋಮ್, ಮಾಂಯ್‍ಭಾಸ್ ಡೊಟ್ ಕೊಮ್, ದಾಯ್ಜ್ ಡೊಟ್ ಕೊಮ್, ಕಿಟಾಳ್ ಡೊಟ್ ಕೊಮ್ ತಶೆಂಚ್ ಸಕಾಳಿಕ್ ಡೊಟ್ ಕೊಮ್ ಹಾಂತುಂ ಸರಾಗ್ ಬೊರೊವ್ನ್ ನಿರಂತರ್ ಕೊಂಕ್ಣೆಚೊ ವಾವ್ರ್ ಕರುನ್ ಆಸ್ಚ್ಯಾ ವಿನ್ಸೆಂಟ್ ಪಿಂಟೊ ಆಂಜೆಲೊರ್ ಹಾಕಾ "ಆಂಕ್ರಿ" ಪಂಗಡ್ ಸ್ವಾಗತ್ ಕರ್ತಾ ಆನಿ ತಾಚ್ಯಾ ಮುಖ್ಲ್ಯಾ ಸರ್ವ್ ಸಾಹಿತ್ಯ್ ವಾವ್ರಾಂತ್ ಬೊರೆಂ ಮಾಗ್ತಾ.

**********

Vincy Pinto, Angelore likhnnem namvan boromvcho Vincent M. Pinto, Angelore firgojecho zaunason pattlea sobhar vorsam thaun konknnent sorvanginn vaur kel'lo ek namnnecho vauraddi. Mumboi toxench golf raxttranchea riad, abudabi toxench dubai xohorant vaur korun prostut aplea kuttma songim mongllurant vosti korun asa.

Aplea lhan prayer thaun'nch raknno, mitr, jhelo, kurovo, kannik, divo, noman ballok jezu, amcho sondex, ujvadd axem konknnentlea horyek potramni apleo mottveo kotha, kovita, lekhonam, vinod, lolit probond, chuttukam, vyokti porichoi, ankonnam prokott zaleant.

Konknni lekhokancho ektar mongllur, daiji dubai toxench kovita ttrostt mongllur hea somstheancho sando zaun konknnent aplo vaur korun aschea Vincy Pinton mongllur, mumboi, dubai toxench gõyant zaitea kovighoxttimni bhag ghetla matr nom-i astam tachea mukhelponnar zaiteo kovighoxtteo ayojit keleat. Mongllur akaxvannicher kovitam, lekhonam, reddio sarongar sondorxon toxench karmel kironnochea "denneachem jinnem" kareant sondorxon nirvahok zaun karyim prosar zaleant.

Mandd sobhann somsthean asa kel'lea kovighoxttint "mohineacho kovi", daiz ddott kom' pongddan asa kel'lea "tinterant pintur" mull'llea vollint "mohineacho kovi", 2004 isvent raknno potran asa kel'lea vinod spordeant poilem sthan, 2005 isvent dusrem sthan toxench lekhokancho ektar hannim asa kel'lea sahity spordeant potsahok bohuman axem sobhar spordeamni bohuman apnnayil'li kirt Vincyk favo zata.

Tachim kovita kovi Melvyn Rodrigues hanne sompadon kel'lea "kupam modlim mukham", Valley Quadras Ajekar hanne sompadon kel'lea "motiam ani taram" toxench "sagorachea vattecheo zhori" hea pustokamni pais zaleant matr nohim astam "dakteracho ghutt" mottvea kanniam pustok, "katkutli" chuttukam pustok, "konn konn kanniy" neano kanniam pustok tannem porgott keleant. Kovita ddott kom', mam-i‍bhas ddott kom', daiz ddott kom', kittall ddott kom' toxench sokallik ddott kom' hantum sorag boroun nirontor konknnecho vaur korun aschea Vincy Pinto, Angelore haka "ankri" pongodd svagot korta ani tachea mukhlea sorv sahity vaurant borem magta.