Naveen Kulshekar ಲಿಖ್ಣೆಂ ನಾಂವಾನ್ ಬೊರೊಂವ್ಚೊ ಲೊರೆನ್ಸ್ ಆಲ್ವಾರಿಸ್ ಹೊ ಜಲ್ಮಾನ್ ಕೆಲರಾಯ್ ಫಿರ್ಗಜೆಚೊ. ಆಪ್ಲ್ಯಾ ಪದ್ವೆ ಶಿಕ್ಪಾ ಉಪ್ರಾಂತ್ ಚಡುಣೆ ಪನ್ನಾಸ್ ವರ್ಸಾಂ ಮುಂಬಂಯ್ತ್ ವಸ್ತಿ. ಕೆನರಾ ಬ್ಯಾಂಕಾಂತ್ ದೀರ್ಘ್ ಕಾಳಾಚೊ ವಾವ್ರ್ ದೀವ್ನ್ ಆತಾಂ ಆಪ್ಲಿ ಪತಿಣ್ ಆಪೊಲಿನ್ ಸಾಂಗಾತಾ ದೆರೆಬಯ್ಲ್ ಫಿರ್ಗಜೆಂತ್ ಆಪ್ಲೆಂ ನಿವ್ರತ್ತಿ ಜೀವನ್ ಸಾರುನ್ ಆಸಾ. ನವೀನ್ ಕುಲ್ಶೆಕರ್ ಹಾಣೆ ಕೊಂಕ್ಣೆಂತ್ ಮಾತ್ರ್ ನಹಿಂ ಆಸ್ತಾಂ ಕನ್ನಡ, ಮರಾಠಿ, ಹಿಂದಿ ತಶೆಂ ಇಂಗ್ಲಿಶ್ ಭಾಶೆಂತ್ ಸಕಾಳಿಕ್ ಲೇಕನಾಂ, ಕಾಣಿಯೊ ಆನಿ ಕವಿತಾ ಪಾಟ್ಲ್ಯಾ ಪನ್ನಾಸ್ ವರ್ಸಾಂ ಥಾವ್ನ್ ವಿವಿಧ್ ಭಾಶೆಂಚ್ಯಾ ಪತ್ರಾಂಕ್ ಲಿಖ್ಲ್ಯಾಂತ್.

1966 ವ್ಯಾ ವರ್ಸಾ ಮುಂಬಯ್ ಪಾವ್ಲ್ಯಾ ತಾಣೆ 1982 ವ್ಯಾ ವರ್ಸಾ ದೆವಾಧಿನ್ ಎಮಿಯಾರ್ ಹಾಚೆ ಸಂಗಿಂ ಮೆಳೊನ್ ಮುಂಬಯಾಂತ್ಲ್ಯಾ ಮುಲುಂಡ್ ಹಾಂಗಾಸಾರ್ "ಕಲಾ ಸಾಗರ್" ಸಂಸ್ಥೊ ಸ್ಥಾಪನ್ ಕರುನ್ ಸುಮಾರ್ ಆಟ್ರಾ ಕೊಂಕ್ಣಿ ಕಾರ್ಯಿಂ ಮಾಂಡುನ್ ಹಾಡ್ಲ್ಯಾಂತ್. ಆಪ್ಲ್ಯಾ ಕಲಾಸಾಗರ್ ಪ್ರಕಾಶನಾಖಾಲ್ 17 ಪುಸ್ತಕಾಂ ಪರ್ಗಟ್ಲ್ಯಾಂತ್. ಸಭಾರ್ ನಾಟ್ಕುಳೆ ಬರವ್ನ್, ದಿಗ್ದರ್ಶನ್ ದೀವ್ನ್ ತಶೆಂಚ್ ನಟನ್ ಕರುನ್ ಮುಂಬಯಾಂತ್ಲ್ಯಾ ಕೊನ್ಶಾ, ಕೊನ್ಶಾಂತ್ಲ್ಯಾ ಕೊಂಕ್ಣಿ ಪ್ರೆಕ್ಷಕಾಂಚಿಂ ಮ್ಹನಾಂ ದಾದೊಶಿ ಕೆಲ್ಯಾಂತ್. ಮೊಗಾಚೊ ಪಿಸೊ, ಮೊಗಾಚಿ ಕಾಣಿಕ್ ಆನಿ ಇಮಾಜ್ ತಾಚ್ಯಾ ಲಿಕ್ಣೆ ಥಾವ್ನ್ ಉದೆಲ್ಲೆ ಕೊಂಕ್ಣಿ ಸಾಮಾಜಿಕ್ ನಾಟಕ್ ಜಾವ್ನಾಸಾತ್. ಆಕಾಶ್ವಾಣಿಚ್ಯಾ ಮುಂಬಯ್ ಕೇಂದ್ರಾಂತ್ ಜಾಯ್ತಿಂ ಕಾರ್ಯಕ್ರಮಾಂ ದಿಲ್ಯಾಂತ್. ಸಭಾರ್ ಕಾರ್ಯಾಂಚೆಂ ನಿರ್ವಾಹಣ್ ಕೆಲಾಂ. ತರ್ಜಣ್ ಕ್ಷೇತ್ರಾಂತ್ ಸಯ್ತ್ ತಾಣೆ ಜಾಯ್ತೊ ವಾವ್ರ್ ದಿಲಾ.

ಆಶೆಂ ಕೊಂಕ್ಣಿ ಸಾಹಿತ್ಯ್ ಕ್ಷೇತ್ರಾಂತ್ ಸಭಾರ್ ದಶಕಾಂಚೊ ಜೂನ್ ಆನ್ಭೊಗ್ ಆಸೊನ್ ಆತಾಂ ಜಾಲ್ಯಾರಿ ಕ್ರೀಯಾಳ್ ಜಾವ್ನಾಸ್ಚ್ಯಾ ನವೀನ್ ಕುಲ್ಶೆಕರ್ ಹಾಕಾ ಆಂಕ್ರಿ ಪಂಗಡ್ ಸ್ವಾಗತ್ ಕರ್ತಾ ಆನಿ ತಾಚೆ ಥಾವ್ನ್ ಆನಿಕಿ ಧಾರಾಳ್ ಮಾಪಾನ್ ಸಾಹಿತಿಕ್ ಕ್ರಷಿ ಜಾಂವ್ದಿ ಮುಣೊನ್ ಆಶೆತಾ.