ಮೆಲ್ವಿನ್ ಕಲಾಕುಲ್, ಲಿಖ್ಣೆ ನಾಂವಾಂಖಾಲ್ ಬೊರೊಂವ್ಚೊ ಮೆಲ್ವಿನ್ ಆವಿನಾಶ್ ಪಾಯ್ಸ್ ಗಾಂವಾಂತ್ ಬಂಟ್ವಾಳ್ಚ್ಯಾ ಆಲ್ಲಿಪಾದೆಚೊ ಜಾವ್ನಾಸೊನ್,  ಕೊಂಕ್ಣಿ ಸಂಸಾರಾಂತ್ ಪ್ರತ್ಯೇಕ್ ಜಾವ್ನ್ ಕೊಂಕ್ಣಿ ನಾಟಕ್ ಕ್ಷೇತ್ರಾಂತ್ ಬೊರೊಚ್ ವಾವ್ರ್ ಕೆಲ್ಲೊ ಕಾರ್ಭಾರಿ. ಆಪ್ಲೆಂ B.C.A ಶಿಕಾಪ್ ಗಾಂವಾಂತ್ ಸಂಪೊವ್ನ್ ಥೊಡಿಂ ವರ್ಸಾಂ ಥಂಯ್ ಕಾಮ್ ಕರುನ್ ದುಬಾಯ್ ಪಾವ್‍ಲ್ಲೊ ಮೆಲ್ವಿನ್ ಆಜ್ ಎಕ್ ಆದ್ಭುತ್ ನಾಟಕಿಸ್ತ್ ಆನಿ ಬೊರೊ ಕವಿ ಜಾವ್ನ್ ಕೊಂಕ್ಣಿ ಸಂಸಾರಾಂತ್ ಸರ್ವಾಂಕ್ ವ್ಹಳ್ಕಿಚೊ ಜಾಲಾ.

ತಾಣೆ ಜಾಯ್ತ್ಯೊ ಕವಿತಾ ಬೊರೊವ್ನ್ "ಆರ್ಸೊ" , "ನಮಾನ್ ಬಾಳೊಕ್ ಜೆಜು" "www.kavitaa.com"  ತಸಲ್ಯಾ ಪತ್ರಾಂ ಆನಿ ಜಾಳಿ ಜಾಗ್ಯಾಂನಿ ಪರ್ಗಟ್ಲ್ಯಾಂತ್ ಮಾತ್ರ್ ನಂಯ್ ಆಸ್ತಾಂ ಜಾಯ್ತ್ಯಾ ಕವಿಘೊಷ್ಟಿಂನಿ ತಾಣೆ ಸಾಧರ್ ಕೆಲ್ಯಾಂತ್.

ಮಾಂಡ್ ಸೊಭಾಣ್ ಸಂಸ್ಥ್ಯಾಚ್ಯಾ "ಕಲಾಕುಲ್" ನಾಟಕ್ ಪಂಗ್ಡಾಂತ್ ಚಾರ್ ವರ್ಸಾಂ ತರ್ಭೆತಿ ಜೋಡ್ನ್ ಎದೊಳ್ ಪರ್ಯಾಂತ್ ಲಗ್ಭಗ್ 20 ಚ್ಯಾಕಿ ಚಡ್ ನಾಟಕಾಂನಿ 100  ವಯ್ರ್ ದೇಶ್ ವಿದೇಶಾಂನಿ ಪ್ರದರ್ಶನಾಂ ತಶೆಂಚ್ 150 ವಯ್ರ್ ರಸ್ತ್ಯಾ ನಾಟಕಾಂಚಿಂ ಪ್ರದರ್ಶನಾ ದಿಲ್ಯಾಂತ್. ಗೀತ್ ಗಜಾಲ್ ಪಂಗ್ಡಾನ್ ಸಾಧರ್ ಕೆಲ್ಲ್ಯಾ ಗೀತ್ ಗಜಾಲ್ 1.0 ಆನಿ ಗೀತ್ ಗಜಾಲ್ 2.0  ಆವ್ರತ್ತ್ಯಾಂಚ್ಯಾ ಕಾವ್ಯರಂಗ್ ವಿಭಾಗಾಚೆಂ ಸಾಹಿತ್ಯ್ ಲಿಖುನ್, ಆಪ್ಲ್ಯಾ ಪ್ರಬುದ್ದ್ ಆಭಿನಯ್ ತಶೆಂಚ್ ನಿರ್ದೇಶನಾ ದ್ವಾರಿಂ ಕೊಂಕ್ಣಿ ಲೋಕಾಂಚ್ಯಾ ಮೆಚ್ವೊಣೆಕ್ ಪಾತ್ರ್ ಜಾಲಾ.

ಮೆಲ್ವಿನ್ ಕಲಾಕುಲ್, ಹಾಚ್ಯಾ ಲಿಖ್ಣೆಂ ಥಾವ್ನ್ ಭುಂಯ್ ಪಡ್‍ಲ್ಲೆಂ ಹರ್ಯೆಕ್ ಕವಿತಾ ಕೊಂಕ್ಣಿ ಕವಿತಾ ಮೊಗಿಂಚ್ಯಾ ಕಾಳ್ಜಾಂನಿ ದಾದೊಸ್ಕಾಯೆಚೆಂ ಸಂಚಲನ್ ಹಾಡುಂದಿ ಆನಿ ನವೆಸಾಂವಾಂಚಿ ಝರ್ ತಾಚೆ ಥಾವ್ನ್ ನಿರಂತರ್ ವ್ಹಾಳೊಂದಿ ಮುಣೊನ್ ಆಶೇವ್ನ್ "ಆಂಕ್ರಿ" ಪಂಗಡ್ ತಾಕಾ ಸ್ವಾಗತ್ ಕರ್ತಾ ಆನಿ ಸರ್ವ್ ಬೊರೆಂ ಮಾಗ್ತಾ.