‘ಸಾಹಿತಿ ಸಮಾಜಿಕ್ ಸುಧ್ರಾಪಾಚೆ ಸೂತ್ರ್‌ದಾರ್’ – ಎಮ್. ಎಲ್. ಸಿ ಐವನ್ ಡಿ’ಸೊಜಾ

ಕಿರಣ್ ನಿರ್ಕಾಣ್ ಹಾಕಾ ಲಿಯೊ ರೊಡ್ರಿಗಸ್ ಕುಟಮ್ ಕಿಟಾಳ್ ಯುವ ಪುರಸ್ಕಾರ್ ಪ್ರದಾನ್

“ಸಮಾಜೆಂತ್ ಸುಧ್ರಾಪ್ ಹಾಡ್ಚಿ ಸಕತ್ ಸಾಹಿತ್ಯಾಕ್ ಆಸಾ. ರಾಜಕಾರಣಿಂ ಪರಿಂ ಬರಯ್ಣಾರಾಂನಿ ಮುಲಾಜೆಕ್ ಪಡಾಜೇ ವಾ ಮಿತಿ ವಿಶ್ಯಾಂತ್ ಚಿಂತಿಜೆ ಮ್ಹಣ್ ನಾ. ಹ್ಯಾ ಕಾರಣಾಕ್ ಲಾಗೊನ್ ಸಾಹಿತಿಂಕ್ ಸಮಾಜ್ ಸುಧ್ರಾಪಾಚೆ ಸೂತ್ರ್‌ದಾರ್ ಮ್ಹಣ್ಯೆತ್. ಸಾಹಿತ್ಯ್ ಅನಿ ಸಮಾಜ್ ವಾಡೊಂಕ್ ವಿಮರ್ಸೊ ಬೋವ್ ಗರ್ಜೆಚೊ ಜಾಲ್ಲ್ಯಾನ್ ಆಮಿ ಉಗ್ತ್ಯಾ ಮನಾನ್ ವಿಮರ್ಸೊ ಘೆಂವ್ಕ್ ಶಿಕಾಜೆ” ಮ್ಹಣಾಲೊ ಮಾನೆಸ್ತ್ ಐವನ್ ಡಿ’ಸೊಜಾ, ಕರ್ನಾಟಕ ವಿದಾನ್ ಪರಿಶದೆಚೊ ಶಾಸಕ್.

ಮಾನೆಸ್ತ್ ಐವನ್ ಡಿ’ಸೊಜಾ, ಸನ್ವಾರಾ, ಅಕ್ತೋಬರ್ 5 ವೆರ್, ಹಂಪನ್‌ಕಾಟ್ಯಾರ್ ಎಂಸಿಸಿ ಬ್ಯಾಂಕಾಚ್ಯಾ ಫಿ.ಎಪ್.ಎಕ್ಸ್ ಸಲ್ಡಾನ್ಹಾ ಅಡಿಟೋರಿಯಮಾಂತ್ ಕಿರಣ್ ನಿರ್ಕಾಣ್ ಲಿಕ್ಣೆನಾಂವಾನ್ ಬರಂವ್ಚ್ಯಾ ನಿರ್ಕಾಣ್ ಫಿರ್ಗಜೆಚ್ಯಾ ಫ್ಲೊಯ್ಡ್ ಕಿರಣ್ ಮೊರಾಸ್ ಹಾಕಾ 2024 ವ್ಯಾ ವರ್ಸಾಚೊ, ಅಬುದಾಬಿಚೊ ಉದ್ಯಮಿ ಆನಿ ಕೊಂಕ್ಣಿ ಸಮರ್ಥಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಕುಟ್ಮಾನ್ ದಿಂವ್ಚೊ ಕಿಟಾಳ್ ಯುವ ಪುರಸ್ಕಾರ್ ಪ್ರದಾನ್ ಕರುನ್ ಉಲಯ್ತಾಲೆ.

ಪ್ರಶಸ್ತೆಚೊ ಪೋಶಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಹಾಣಿ ಅಬುದಾಬಿ ಥಾವ್ನ್ ವಿಡಿಯೊ ಸಂದೇಶಾ ಮುಕಾಂತ್ರ್ ಕಿರಣ್, ನಿರ್ಕಾಣ್ ಹಾಕಾ ಕುಟ್ಮಾ ತರ್ಫೆನ್ ಉಲ್ಲಾಸ್ ಪಾಟಯ್ಲೆ ಆನಿ ಸಯ್ರ್ಯಾಂಕ್ ಬರೆಂ ಮಾಗ್ಲೆಂ. ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾ ಖಾತಿರ್ ಆಪ್ಲ್ಯಾ ಕುಟ್ಮಾಚೊ ಸಹಕಾರ್ ಸದಾಂಚ್ ಆಸ್ತಲೊ ಮ್ಹಣ್ ಭಾಸಾಯ್ಲೆಂ.

ಎಂಸಿಸಿ ಬ್ಯಾಂಕಾಚೊ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊ ಹಾಣಿ ಕಿರಣ್, ನಿರ್ಕಾಣ್ ಹಾಕಾ ಉಲ್ಲಾಸ್ ಪಾಟವ್ನ್ “ಲಿಯೊ ರೊಡ್ರಿಗಸ್ ಪಾಟ್ಲ್ಯಾ ಇಕ್ರಾ ವರ್ಸಾಂ ಪಾಸುನ್ ಕೊಂಕ್ಣಿ ಸಾಹಿತ್ಯಾಂತ್ಲ್ಯಾ ಯುವ ಪ್ರತಿಭೆಂಕ್ ಮಾನ್ ಕರುನ್ ಆಸಾತ್. ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾಚಾ ವಾಡಾವಳೆಚ್ಯಾ ದಿಶೆನ್ ಹಿ ಬೋವ್ ವರ್ತಿ ಗಜಾಲ್. ಅಜ್ ಮೆರೆನ್ ಲಿಯೊ ರೊಡ್ರಿಗಸ್ ಕುಟ್ಮಾ ಥಾವ್ನ್ ಯುವ ಪುರಸ್ಕಾರ್ ಜೊಡ್‌ಲ್ಲೆ ಕೊಂಕ್ಣೆಂತ್ ವ್ಹಡ್ಲೆ ಸಾಹಿತಿ ಜಾಲ್ಯಾತ್. ಭಾಸ್, ಸಾಹಿತ್ಯ್, ಸಂಗೀತ್, ಕಲಾ ಹಿಂ ಶೆತಾಂ ಫುಲಜೆ ತರ್ ಯುವ ಪ್ರತಿಭೆಂಕ್ ಪ್ರೊತ್ಸಾಹ್ ದೀಜೆ” ಮ್ಹಳೆಂ.

ಪುರಸ್ಕಾರ್ ಸ್ವೀಕಾರ್ ಕರುನ್ ಉಲಯಿಲ್ಲ್ಯಾ ಕಿರಣ್ ನಿರ್ಕಾಣ್ ಹಾಣಿ “ಪ್ರಶಸ್ತೆನ್ ಮ್ಹಜಿ ಜವಾಬ್ದಾರಿ ವಾಡಯ್ಲ್ಯಾ. ಗಲ್ಪ್, ಕೆನಡಾ, ಆಸ್ಟೇಲಿಯಾ ಅಶೆಂ ಜಾಯ್ತ್ಯಾ ದೇಶಾಂನಿ ಆಜ್ ಕೊಂಕ್ಣಿ ಭಾಸ್ ವಿಸ್ತಾರ್ಲ್ಯಾ ಆನಿ ಜಾಯ್ತಿಂ ಸಂಘಟನಾಂ ಕೊಂಕ್ಣೆಚೆಂ ಕಾಮ್ ಕರುನ್ ಆಸಾತ್. ಪೂಣ್ ಹೆಂ ಕಾಮ್ ಫಕತ್ ಸಾಂಸ್ಕೃತಿಕ್ ಕಾರ್ಯಿಂ ಆನಿ ಕಲೆಕ್ ಮಾತ್ ಸೀಮಿತ್ ಜಾಯ್ನಾಯೆ. ಸಾಹಿತ್ಯಾಚೆಂ ಕಾಮ್‌ಯೀ ಜಾಲ್ಯಾರ್ ಕೊಂಕ್ಣಿ ಭಾಶೆಕ್ ಚಡಿತ್ ಬಳ್ ಮೆಳ್ತೆಲೆಂ. ಹ್ಯಾ ವಾಟೆನ್ ಮ್ಹಜ್ಯಾ ತಾಂಕಿ ಭಿತರ್ಲೆಂ ಪ್ರೇತನ್ ಹಾಂವ್ ಕರ್ತಲೊಂ” ಮ್ಹಳೆಂ. ಪ್ರಶಸ್ತಿ ಸ್ವೀಕಾರ್ ಕರ್ಚ್ಯಾ ಸಂದರ್ಬಾರ್ ಕಿರಣಾಚಿಂ ವ್ಹಡಿಲಾಂ ಶ್ರೀ ಫೆಲಿಕ್ಸ್ ಮೊರಾಸ್ ಆನಿ ಶ್ರಿಮತಿ ಕ್ರಿಸ್ತಿನ್ ಲೋಬೊ ಪತಿಣ್ ಶ್ರೀಮತಿ ಪ್ರೀತಿಕಾ ಆನಿ ಭುರ್ಗಿಂ ಜೋಆನ್ ನೈರಾ ಅನಿ ಡೇವ್ ಕೀತ್ ಹಾಣಿ ಕಿರಣಾಕ್ ಸಾಂಗಾತ್ ದಿಲೊ.

ಕಿಟಾಳ್ ಸಂಪಾದಕ್ ಎಚ್ಚೆಮ್ ಪೆರ್ನಾಲ್ ಹಾಣಿ ಪ್ರಾಸ್ತಾವಿಕ್ ಉತ್ರಾಂ ಉಲವ್ನ್, ಮುಕೆಲ್ ಸಯ್ರ್ಯಾಂಚಿಂ ಒಳಕ್ ಕರುನ್ ದಿಂವ್ಚೆ ಸವೆಂ ಯೆವ್ಕಾರ್ ಮಾಗ್ಲೊ. ಸಾಂಗಾತಿ ಸಂಪಾದಕ್ ಕವಿ ವಿಲ್ಸನ್ ಕಟೀಲ್ ಹಾಣಿ ಪುರಸ್ಕಾರ್ ವಿಜೇತಾಚಿ ಒಳಕ್ ಕರುನ್ ದೀವ್ನ್ ಮಾನ್ ಪತ್ರ್ ವಾಚ್ಲೆಂ. ವಿಂಚ್ಣುಕೆ ಸಮಿತಿಚೊ ಅಧ್ಯಕ್ಷ್ ಟೈಟಸ್ ನೊರೊನ್ಹಾ ಹಾಣಿ ಸಮಾರೋಪಾಚ್ಯಾ  ಉತ್ರಾಂ ಸಂಗಿ ದಿನ್ವಾಸ್ ಪಾಟಯ್ಲೆ. ವಿಲ್ಸನ್ ಕಿನ್ನಿಗೋಳಿ ಹಾಣೆ ಆಪುರ್ಬಾಯೆನ್ ಕಾರ್ಯೆಂ ಚಲವ್ನ್ ವೆಲೆಂ.

ವಿಶನ್ ಕೊಂಕಣಿ ಯೆವ್ಜಣೆಚೊ ಪ್ರವರ್ತಕ್ ಶ್ರಿ ಮೈಕಲ್ ಡಿ’ಸೊಜಾ, ಯುವ ಉದ್ಯಮಿ ರೋಹನ್ ಮೊಂತೇರೊ, ಉದ್ಯಮಿ ರಮೇಶ್ ನಾಯ್ಕ್, ಕೊಮೆಡಿ ಕಿಂಗ್ ಫ್ರಾನ್ಸಿಸ್ ಫೆರ‍್ನಾಂಡಿಸ್ ಕಾಸ್ಸಿಯಾ, ಗೀತ್ - ಗಜಾಲ್ ಪಂಗ್ಡಾಚೊ ಮುಕೆಲಿ ಆಂಕ್ರಿ ಸಂಪಾದಕ್ ಶ್ರೀ ಸನ್ನು ಮೋನಿಸ್, ಬೊಳಿಯೆ, ಸಮುದಾಯಾಚೆ ಮುಕೆಲಿ ಮಾನೆಸ್ತ್ ಪೀಯೂಸ್ ಎಲ್. ರೊಡ್ರಿಗಸ್, ನವೀನ್ ಆರ್ ಡಿ’ಸೊಜಾ, ಮಾರ್ಸೆಲ್ ಮೊಂತೇರೊ ಆನಿ ಜಾಯ್ತೆ ಮಾನೆಸ್ತ್ ಕಾರ್ಯಾಕ್ ಹಾಜರ್ ಆಸೊನ್ ಕಾರ್ಯಾಚೊ ಭರಮ್ ಚಡಯ್ಲೊ.

■ ತಸ್ವಿರ‍್ಯೊ: ರೋಶನ್ ಮಾಡ್ತಾ, ವಿಟ್ಲ

…………………

‘sahiti somajik sudhrapache sutr‌dar’ – MLC Ivan D'Souza

Kiran Nirkan haka 'Leo Rodrigues kuttom' Kittall yuvo puroskar prodan

“somajent sudhrap haddchi sokot sahiteak asa. Razokaronnim porim boroinnaramni mulajek poddaje va miti vixeant chintije mhonn na. Hea karonnak lagon sahitink somaz sudhrapache sutr‌dar mhonnyet. Sahity oni somaz vaddonk vimorso bovo gorjecho zal'lean ami ugtea monan vimorso gheunko xikaje” mhonnalo manest Ivan D'Souza, Karnataka vidan porixodecho xasok.

Manest Ivan D'Souza, sonvara, October 5 ver, Hampankatta MCC Bankachea P.E.X. Saldanha Auditoriumant Kiran Nirkan liknnenamvan boromvchea Nirkan firgojechea Floyd Kiran Moras haka 2024 vea vorsacho, Abu Dhabi udyomi ani Konkani somorthok manest Leo Rodrigues kuttman dimvcho Kittall yuvo puroskar prodan korun uloitale.

Proxostecho poxok manest Leo Rodrigues hanni Abu Dhbai thaun viddio sondexa mukantr Kiran Nirkan haka kuttma torfen ul'las pattoile ani soireank borem maglem. Konkani bhas ani sahitea khatir aplea kuttmacho sohokar sodanch astolo mhonn bhasailem.

MCC Bankacho odhyokx manest Anil Lobo hanni Kiran Nirkan haka ul'las pattoun “Leo Rodrigues pattlea ikra vorsam pasun konkani sahiteantlea yuvo protibhenk man korun asat. Konkani bhas ani sahiteacha vaddaullechea dixen hi bovo vorti gozal. Oz meren Leo Rodrigues kuttma thaun yuvo puroskar zodd‌l'le konkanent vhoddle sahiti zaleat. Bhas, sahity, songit, kola him xetam fuloje tor yuvo protibhenk protsah dije” mhollem.

Puroskar svikar korun uloyil'lea Kiran Nirkan hanni “proxosten mhoji zovabdari vaddoilea. Gulf, Canada, Australia oxem zaitea dexamni az konkani bhas vistarlea ani zaitim songhottonam konkanechem kam' korun asat. Punn hem kam' fokot samskritik karyim ani kolek mat simit zainaye. Sahiteachem kam'‌yi zalear konkani bhaxek choddit boll melltelem. Hea vatten mhojea tanki bhitorlem preton hamv kortolom” mhollem. Proxosti svikar korchea sondorbar Kiranachim vhoddilam xri Felix Moras ani xrimoti Christina Lobo potinn xrimoti Preethika ani bhurgim Joanne Knira oni Dave Keth Kirannak sangat dilo.

Kittall sompadok H.M. Pernal hanni prastavik utram uloun, mukel soireanchim ollok korun dimvche sovem yeukar maglo. Sangati sompadok kovi Wilson Kateel hanni puroskar vijetachi ollok korun diun man potr vachlem. Vinchnnuke somiticho odhyokx Titus Noronha hanni somaropachea utram songi dinvas pattoile. Wilson Kinnigoli hanne apurbayen karyem choloun velem.

Vison Konkani yeuzonnecho prourtok xri Michael Dsouza, yuvo udyomi Rohon Montero, udyomi Ramesh Nayak, Comedy King Francis Fernandes, Cascia, Geet Gazaal pongddacho mukeli ani Aankri sompadok xri Sannu Monis, Boliye, somudayache mukeli manest Pius L. Rodrigues, Naveen R. Dsouza, Marcel Montero ani zaite manest kareak hazor ason kareacho bhorom' choddoilo.

■ tosviro‍eo: Roshan Madtha, Vittla.

…………………

‘साहिती समाजीक सुध्रापाचे सूत्र‌दार’ – एम. एल. सी ऐवन डी’सोजा

किरण निर्काण हाका लियो रोड्रिगस कुटम किटाळ यूव पुरसकार प्रदान

“समाजेंत सुध्राप हाडची सकत साहित्याक आसा. राजकारणीं परीं बरयणारांनी मुलाजेक पडाजे वा मिती विश्यांत चिंतिजे म्हण ना. ह्या कारणाक लागोन साहितिंक समाज सुध्रापाचे सूत्र‌दार म्हण्येत. साहित्य अनी समाज वाडोंक विमर्सो बोव गर्जेचो जाल्ल्यान आमी उग्त्या मनान विमर्सो घेवंक शिकाजे” म्हणालो मानेसत ऐवन डी’सोजा, कर्नाटक विदान परिशदेचो शासक.

मानेसत ऐवन डी’सोजा, सन्वारा, अक्तोबर ५ वेर, हंपन‌काट्यार एंसिसी ब्यांकाच्या फी.एप.एक्स सलडान्हा अडिटोरियमांत किरण निर्काण लिकणेनांवान बरंवच्या निर्काण फिर्गजेच्या फ्लोयड किरण मोरास हाका २०२४ व्या वर्साचो, अबुदाबिचो उद्यमी आनी कोंकणी समर्थक मानेसत लियो रोड्रिगस कुटमान दिंवचो किटाळ यूव पुरसकार प्रदान करून उलयताले.

प्रशसतेचो पोशक मानेसत लियो रोड्रिगस हाणी अबुदाबी थावन विडियो संदेशा मुकांत्र किरण, निर्काण हाका कुटमा तर्फेन उल्लास पाटयले आनी सयऱ्यांक बरें मागलें. कोंकणी भास आनी साहित्या खातीर आपल्या कुटमाचो सहकार सदांच आसतलो म्हण भासायलें.

एंसिसी ब्यांकाचो अध्यक्ष मानेसत अनील लोबो हाणी किरण, निर्काण हाका उल्लास पाटवन “लियो रोड्रिगस पाटल्या इक्रा वर्सां पासून कोंकणी साहित्यांतल्या यूव प्रतिभेंक मान करून आसात. कोंकणी भास आनी साहित्याचा वाडावळेच्या दिशेन ही बोव वर्ती गजाल. अज मेरेन लियो रोड्रिगस कुटमा थावन यूव पुरसकार जोड‌ल्ले कोंकणेंत व्हडले साहिती जाल्यात. भास, साहित्य, संगीत, कला हीं शेतां फुलजे तर यूव प्रतिभेंक प्रोत्साह दीजे” म्हळें.

पुरसकार स्वीकार करून उलयिल्ल्या किरण निर्काण हाणी “प्रशसतेन म्हजी जवाब्दारी वाडयल्या. गल्प, केनडा, आसटेलिया अशें जायत्या देशांनी आज कोंकणी भास विसतारल्या आनी जायतीं संघटनां कोंकणेचें काम करून आसात. पूण हें काम फकत सांसकृतीक काऱ्यीं आनी कलेक मात सीमीत जायनाये. साहित्याचें काम‌यी जाल्यार कोंकणी भाशेक चडीत बळ मेळतेलें. ह्या वाटेन म्हज्या तांकी भितरलें प्रेतन हांव कर्तलों” म्हळें. प्रशसती स्वीकार कर्च्या संदरबार किरणाचीं व्हडिलां श्री फेलिक्स मोरास आनी श्रिमती क्रिसतीन लोबो पतीण श्रीमती प्रीतिका आनी भुर्गीं जोआन नैरा अनी डेव कीत हाणी किरणाक सांगात दिलो.

किटाळ संपादक एच्चेम पेर्नाल हाणी प्रासतावीक उत्रां उलवन, मुकेल सयऱ्यांचीं ओळक करून दिंवचे सवें येवकार मागलो. सांगाती संपादक कवी विल्सन कटील हाणी पुरसकार विजेताची ओळक करून दीवन मान पत्र वाचलें. विंचणुके समितिचो अध्यक्ष टैटस नोरोन्हा हाणी समारोपाच्या  उत्रां संगी दिन्वास पाटयले. विल्सन किन्निगोळी हाणे आपुरबायेन काऱ्यें चलवन वेलें.

विशन कोंकणी येवजणेचो प्रवर्तक श्री मैकल डी’सोजा, यूव उद्यमी रोहन मोंतेरो, उद्यमी रमेश नायक, कोमेडी किंग फ्रान्सीस फेर‍्नांडीस कास्सिया, गीत - गजाल पंगडाचो मुकेली आंक्री संपादक श्री सन्नू मोनीस, बोळिये, समुदायाचे मुकेली मानेसत पीयूस एल. रोड्रिगस, नवीन आर डी’सोजा, मार्सेल मोंतेरो आनी जायते मानेसत काऱ्याक हाजर आसोन काऱ्याचो भरम चडयलो.

■ तस्वीर‍्यो: रोशन माडता, विटल