ಮ್ಹಜೊ ಪಪ್ಪ ಲೆಕ್ಕಾಂತ್ ಹುಷಾರ್. ಹಾಂವ್ ತಾಚ್ಯಾ ಹ್ಯಾ ಜಾಣ್ವಾಯೆಕ್ ಮೆಚ್ವಾಲಾಂ. 

ಹಾಯರ್ ಪ್ರೈಮರಿಚೆಂ ಮೇಟ್ ತೊ ಚಡೊಂಕ್ ನಾ ತರೀ 1960 ಚ್ಯಾ ಸುರ್ವೆರ್ ತಾಣೆ ಪ್ರೈಮರಿ ಸಂಪಯ್ಲಿ ಆನಿ ತಾಜಾ ಇಸ್ಕೊಲಾಚ್ಯಾ ವಾಟೆಕ್ ಫಾಸ್ ಪಡ್ಲೊ. ಕುಡ್ಸುನ್, ಕಳ್ವುನ್, ಬಾಗ್ಸುನ್ ಆನಿ ಗುಣ್ಸುನ್ ದಿಲೆಲ್ಯಾ ಸವಾಲಾಕ್ ಜಾಪ್ ಸೊದ್ಚಾಂತ್ ತೊ ಶಾಣೊ. ಲಾನ್ಪಣಾರ್ ಮಾಕಾ ಕೆದಾಳಾಯ್ ಮಗ್ಗಿ ಶಿಕೊಂಕ್ ಲಾಯ್ತಾಲೊ. ತೊ ಕಿತ್ಲೆಂ ಶಿಕ್ಲಾಗೀ ತಾಂತುನ್ ತಾಣೆ ಪ್ರಾವಿಣ್ಯತಾ ಆಪ್ಣಾಯ್ಲ್ಯಾ. ಮಾಪ್-ಮೆಜ್ಪಾಂತ್ ತೊ ’ಸ್ಮಾರ್ಟ್’ ಆನಿ ’ಎಕ್ಸ್ಪರ್ಟ್’!

ಹಾಂವೆಂ ಮ್ಹಜೆಂ ಇಸ್ಕೊಲಾಚೆಂ ಲಿಸಾಂವ್ ಶಿಕ್ಚೆಂ ಪರೀಕ್ಷೆಚ್ಯಾ ಅದ್ಲ್ಯಾ ದಿಸಾ, ಶೆರ್ಮಾಂವ್ ಸಾಂಗ್ಚಾ ಆವಾಜಾನ್. ನಾ ತರ್ ಮ್ಹಜ್ಯಾ ತಕ್ಲೆಂತ್ ರಿಗಾನಾ. ಇಕ್ರಾವೆಂತ್ ಆಸ್ತಾನಾ ವಡ್ಲ್ಯಾ ಆವಾಜಾನ್ ಹಾಂವ್ ಕ್ಯಾಲ್ಕುಲೆಟರ್ ಘೆವ್ನ್ ಟ್ರಾಯಲ್ ಬ್ಯಾಲೆನ್ಸಾಚೆಂ ಲೇಖ್ ಕರ್ತಾಲೊಂ. ಪಪ್ಪ ಬಗ್ಲೆನ್ ಬಸೊನ್ ಆಸ್‍ಲ್ಲೊ. ಪಪ್ಪಾನ್ ತಕ್ಲಿ ಆಟವ್ನ್ ಹಾಂವೆಂ ಕ್ಯಾಲ್ಕುಲೆಟರಂತ್ ಜಾಪ್ ಆಪ್ಣಾಂವ್ಚೆಂ ಆದಿಂಚ್ ಟೊಟಲ್ ಬ್ಯಾಲೆನ್ಸ್ ಸಾಂಗುನ್ ಜಾಲ್ಲೆಂ. 

ಮ್ಹೊಜೊ ಪಪ್ಪ ತಾಲೆಂತ್‌ವಂತ್. ತಾಣೆ ಮ್ಹಜ್ಯಾ ತಾಲೆಂತಾಂಕ್ ಪಾಟಿಂಬೊ ದಿಲಾ. ಪಂಚ್ವೆಸಾಟ್ ವರ್ಸಾಂ ಸಂಪ್ಲಿಂ ತರೀ, ಆವ್ಕಾಸ್ ಮೆಳ್ತಾನಾ ಆತಾಂಯ್ ಸ್ಪರ್ಧ್ಯಾನಿ ಭಾಗ್ ಘೆತಾ. ಇನಾಮಾಂಯ್ ಆಪ್ಣಾಯ್ಲ್ಯಾಂತ್. ಕೊಂಕ್ಣಿ ಭಾಸ್ ತಾಕಾ ಮೊಗಾಚಿ. ಕಾಣ್ಯೊ, ವಿಡಂಬನಾ, ವಿನೋದ್ ವಾಚುನ್ ವಿಮರ್ಸೊ ಕರ್ಚೊ ಹಾಂವೆಂ ಆಯ್ಕಲಾಂ. ಸದಾಂ ಸಾಂಜೆರ್ 6-15ಕ್ ರೇಡಿಯೋಚೆರ್ ಯೆಂವ್ಚೆಂ ಕೊಂಕ್ಣಿ ಕಾರ್ಯೆಂ ಚುಕಾನಾಸ್ತಾಂ ಆಯ್ಕತಲೊ. ಹೆನ್ರಿಯಾಬ್, ಜೆರೊಮ್ ಡಿಸೋಜ, ವಿಲ್ಫಿಯಾಬಾಚಿಂ ಕೊಂಕ್ಣಿಂ ಪದಾಂ ತಾಕಾ ಮೊಗಾಚಿಂ. ಘರಾಂತ್ ಕಾಂಯ್ ಚುಕೊನ್ ಆಮಿ ಇಂಗ್ಲಿಷ್ ಉಲಾಯ್ಲ್ಯಾರ್ ತಾಕಾ ಆತಾಂಯ್ ರಾಗ್ ಯೆತಾ! ಲಾನ್ಪಣಾರ್ ಆವ್ಕಾಸ್ ಮೆಳ್‍ಲ್ಲೆ ತರ್ ಮ್ಹಜೊ ಪಪ್ಪಾ ಸಯ್ತ್ ’ಸ್ಟಾರ್’ ಜಾತೊ ಕೊಣ್ಣಾ!

ಪಪ್ಪಚೆಂ ಲೇಕ್ ಚುಕಾನಾ! ಚುಕ್ಲ್ಯಾರೀ ಸಾರ್ಕೆಂ ಕರ್ಚಿ ಶಾತಿ ಆಸಾ! ಕುಟಾಮ್ ಬಾಂಧುನ್ ಹಾಡ್ಚ್ಯಾಕ್ ತಾಣೆ ತಾಚಿಂಚ್ ಮ್ಹಳ್ಳಿಂ ಸೂತ್ರಾಂ ಸೊಧುನ್ ಕಾಡ್ಲ್ಯಾಂತ್, ಹಜಾರ್ ರುಪ್ಯಾಂಚಿ ಆಶಾ ಮತಿಂತ್ ಆಸೊನ್, ಶೆಂಭರ್ ರುಪಾಯ್ ಹಾತಿಂ ಅಸ್ತಾನಾ ಕುಟಾಮ್ ಕಶೆಂ ಸಾಂಬಾಳಿಜಯ್ ತೆಂ ಹಾಂವ್ ತಾಚೆ ಥಾವ್ನ್ ಶಿಕ್ಲಾಂ. ಮರ್ಜೆಚ್ಯಾ ಸಂಗ್ತಿಂಕ್ ಹಾತ್ ಲಾಯ್ನಾಸ್ತಾಂ, ಗರ್ಜೆಚ್ಯಾ ಸಂಗ್ತಿಂಕ್ ಪ್ರಾಮುಖ್ಯತಾ ದೀವ್ನ್ ತಾಣೆ ಆಮ್ಕಾಂ ವಾಗಯ್ಲಾಂ. ಹಾಂವ್‍ಯೀ ಎಕಾ ಭುರ್ಗ್ಯಾಚೊ ಬಾಪಯ್ ಜಾವ್ನ್, ಪಪ್ಪಾನ್ ಚಮ್ಕಲ್ಲಿ ವಾಟ್ ನಿಯಾಳ್ತಾನಾ ಆಶೆಂ ಭೊಗ್ತಾಕೀ ಏಕ್ ಜೊಕ್ತೆಂ ಕುಟಾಮ್ ರೂಪಿತ್ ಕರಿಜಯ್ ತರ್, ಉಂಚ್ಲ್ಯಾ ಮಟ್ಟಾಚೆಂ ಶಿಕಾಪ್ ಆನಿ ವ್ಹಡ್ ಸಾಂಬಾಳಾಚೆಂ ಕಾಮ್ ಗರ್ಜ್ ನಂಯ್, ಜಿವಿತಾಂತ್ ಆಪುಣ್ ಕಿತೆಂ ಕರ್ನ್ ಆಸಾಂ ಮ್ಹುಣೊನ್ ಸಮ್ಜೊಂಚೆಂ ಆಧಿಕ್ ಗರ್ಜೆಚೆಂ. ತಾಜ್ಯಾ ಲೆಕ್ಕಾಂಚ್ಯಾ ಜಾಣ್ವಾಯೆನ್ ತೊ ಮಾಕಾ ’ಹೀರೋ ಜಾಲಾ!

ಜಿವಿತಾಂತ್ಲ್ಯಾ ಘುಂವ್ಡ್ಯಾನಿ ಪಪ್ಪಾಚಿಂ ಸೂತ್ರಾಂ ಆಧಾರ್ ಜಾತಾತ್. ಪಪ್ಪಾನ್ ಜಿಯೆಂವ್ಚಿ ಜಿಣಿ ನಿಯಾಳ್ತಾನಾ, ಸಲ್ವಣೆಂತೀ ಜೀಕ್ ಲಾಭ್ತಾ. ಹ್ಯಾ ಸಂಸಾರಾಂತ್ ಜಿಯೆಂವ್ಕ್ ಮ್ಹಜ್ಯಾ ಲಾನ್ಪಣಾರ್ ಥಾವ್ನ್ ಮ್ಹಾಕಾ ವೊಳ್ಸಾವ್ನ್ ಪ್ರೇರಿತ್ ಕೆಲ್ಲ್ಯಾ ಮೊಜ್ಯಾ ಪಪ್ಪಾಕ್ ಎಕ್ ’ಸಲಾಮ್’.

ಸನ್ನು ನಿಡ್ದೋಡಿ.