ಆರ್ಸೊ ವಿಶೇಸ್ ಅಂಕ್ಡ್ಯಾರ್ ಮ್ಹಜೊ ಮಿತ್ರ್ ಕಿರಣ್ ನಿರ್ಕಾಣ್ ಹಾಣೆ ಬರಯ್ಲಲೊ “ಹಾಂವ್‍ಯೀ ಪೋಸ್ಟ್‌ಮೇನ್ ಜಾಲ್ಲೊಂ” ಪ್ರಬಂದ್ ವಾಚುನ್ ಮ್ಹಾಕಾ ಮ್ಹಜ್ಯಾ ಲಾನ್ಪಾಣಾಚೆ ಯಾದಿ ಜಿವಾಳ್ಳೆ. ಘರಾನಿಂ ಯಾ ಹಾತಾನಿಂ ಫೋನಾಂ ನಾತ್‌ಲ್ಲ್ಯಾ ವೆಳಾರ್ ಪಯ್ಶಿಲ್ಯಾ ಗಾವಾನಿಂ ಆಸ್ಚ್ಯಾ ಮೊಗಾಚ್ಯಾಂಕ್ ಆನಿ ಕುಟ್ಮಾಕ್ ಲಾಗ್ಶಿಲ್ಯಾಂಕ್ ಎಕಾ ಮೆಕಾ ಥಂಯ್ ಆಸ್ಚಿಂ ಭೊಗ್ಣಾಂ, ಖಬ್ರೊ ಪತ್ರಾನಿಂ ಲಿಖ್ಣೆ ರುಪಾರ್ ಆಶಾರ್ ಪಾಶಾರ್ ಕರುಂಕ್ ಪೋಸ್ಟ್‌ಮೇನಾಚೊ ವಾವ್ರ್ ಪ್ರಮುಖ್ ಆಸ್‌ಲ್ಲೊ. ಕಾಗ್ದಾಂ, ಪತ್ರಾಂ, ಮನಿ ಓರ‍್ಡಾರಾಂ ಘರಾಂ ಘರಾನಿಂ ಪಾವಿತ್ ಕರ್ಚೊ ಪೋಸ್ಟ್‌ಮೇನ್ ಸರ್ವಾಂಕ್ ವಳ್ಕಿಚೊಚ್ ಜಾತಾ!

ಪೋಸ್ಟ್ ಮ್ಹಣ್ತಾನಾ ದೊಳ್ಯಾಂ ಮುಕಾರ್ ದಿಸ್ಚೊ ರಂಗ್ ತಾಂಬ್ಡೊ. ಚ್ಯಾರ್ ಜಣಾನಿಂ ಸಾಂಗಾತಾ ಮೆಳ್ಚಾ ಜಾಗ್ಯಾನಿಂ ಕಾಗ್ದಾಂ ಪೋಸ್ಟ್ ಕರುಂಕ್ ಮ್ಹಣ್ ತಾಂಬ್ಡೆ ಡಬ್ಬೆ ಉಮ್ಕಾಳಾಯ್ತಾಲೆ. ಆಂಗ್ಡಿ ಬಾಗ್ಲಾನಿ, ಇಸ್ಕೊಲಾನಿ, ಬಸ್ ಸ್ಟಾಂಡಾನಿ ಪಳೆಂವ್ಕ್ ಮೆಳ್ತಾಲೆ. ಥೊಡ್ಯಾ ಘಡಿತಾನಿಂ ಕಾಗ್ದಾರ್ ಲಿಕ್ಲೆಲ್ಯಾ ಪ್ರ‍ೇಮಿಚ್ಯಾ ಭೊಗ್ಣಾಂಕ್ ತಾಂಬ್ಡ್ಯಾ ಡಬ್ಬ್ಯಾ ಭಿತರ್ ಜಿವ್ದಾಳಿನಿ ರಿಗೊನ್ ಊಬ್ ದಿಲ್ಲಿ ಆಸಾ ತರ್ ಪ್ರೇಮಿಕಾಂಚ್ಯಾ ಭೊಗ್ಣಾಂಕ್ ಉಂದ್ರಾನಿ ಕಾಂತುನ್ ಕಾಳಿಜ್ ಪಾಂರ‍್ಕಿಲ್ಲೆಂಯ್ ಆಸಾ!

ಹಾಂವ್ ಪೋಸ್ಟ್‌ಮೇನ್ ಜಾಂವ್ಕ್ ನಾ ತರೀ ಆಮ್ಚ್ಯಾ ಗಾಂವ್ಚೊ ಪೋಸ್ಟ್‌ಮೇನ್ ಖುಶಾಲಿ  ಜಾಲ್ಲ್ಯಾನ್ ಥೊಡೆ ಉಗ್ಡಾಸ್ ಆತಾಂಯ್ ಜಿವಾಳ್ ಆಸಾತ್. ಪರ್ಗಾವಾಂತ್ ಆಸ್‌ಲ್ಲ್ಯಾ ಭುರ್ಗ್ಯಾನಿಂ ಬರಯ್ಲಲಿಂ ಪತ್ರಾಂ ಪ್ರಾಯೆಸ್ತಾಂಕ್ ವಾಚುನ್ ಸಾಂಗ್ತಾಲೊ. ಥೊಡೆಪಾವ್ಟಿಂ ಜಾಪಿ ಸಯ್ತ್ ತೊಚ್ ಬರಯ್ತಾಲೊ. ಆಕ್ರಿಸ್ತಾಂವಾಚೊ ತರೀ ಕೊಂಕ್ಣಿ ಉಲಾಯ್ತಾ ಜಾಲ್ಲ್ಯಾನ್ ಕ್ರೀಸ್ತಾಂವ್ಚ್ಯಾ ಕುಟ್ಮಾಂಕೀ ಆಧಾರ್ ಜಾತಾಲೊ. ಆಮ್ಚ್ಯಾ ಭೊವಾರಾಂತ್ ಪೆಂಟೆಕ್ ವಚುಂಕ್ ಜಾಯ್ನಾತ್‌ಲ್ಲ್ಯಾ ಜಾಯ್ತ್ಯಾ ಭಾಂವ್ಡಾಂಕ್ ಖಾಣಾ ವೊರ್ವಿ ಪಾವಿತ್ ಕರ್ಚೊ ತಾಚೊ ವಾವ್ರ್ ಮೆಚ್ವಣೆಚೊ. ಲ್ಹಾನಾ ಭುರ್ಗ್ಯಾಂ ಥಂಯ್ ತಾಕಾ ಕೆದಾಳಾಯ್ ಮೋಗ್.

ಪೋಸ್ಟಾಚೊ ಏಕ್ ಡಾಬ್ಬೊ ಲಾಗ್ಶಿಲ್ಯಾ ಪ್ರಾಥಮಿಕ್ ಇಸ್ಕೊಲಾಂತ್ ಆಸ್‌ಲ್ಲೊ ಜಾಲ್ಲ್ಯಾನ್ ತೊ ಸರ್ವ್ ಭುರ್ಗ್ಯಾಂಕ್ ಜಾಣಾ. ಕಾಂಯ್ ಥೊಡೊ ವೇಳ್ ಇಸ್ಕೊಲಾಂತ್ ಭುರ್ಗ್ಯಾಂ ಸಾಂಗಾತಾ ಖರ್ಚಿತಾಲೊ. ಭುರ್ಗ್ಯಾಂಚ್ಯಾ ಘರಾ ಯಾ ಸೆಜಾರಾ ಕಾಗ್ದಾಂ ಪಾವಿತ್ ಕರುಂಕ್ ಆಸಾ ತರ್ ಹಳೂ ಇಸ್ಕೊಲಾಚ್ಯಾ ಪೊತ್ಯಾಂತ್ ದವರ್ತಾಲೊ ಆನಿ ಜಾಗ್ರುತ್ಕಾಯ್ ಸಾಂಗ್ತಾಲೊ ಅಶೆಂ ತಾಚಿ ಪಾಂಯ್ ವಾಟ್ ಉರಯ್ತಾಲೊ.

ಏಕ್ ದೀಸ್ ಕಾಗ್ದಾಂ ವಾಂಟುಕ್ ಇಸ್ಕೊಲಾಕ್ ಪಾವ್‌ಲ್ಲೊ ಪೋಸ್ಟ್‌ಮೇನ್ ಸದಾಂಚೆ ಸವಯೆ ಪರ್ಮಾಣೆ  ಭುರ್ಗ್ಯಾಂ ಸಾಂಗಾತಾ ಮೆಳೊನ್ ಪಾಟಿಂ ಘುಂವ್ತಾ. ತಾಚ್ಯಾ ಹಾತಿಂ ಆಸ್ಚಿಂ ಸರ್ವ್ ಪತ್ರಾಂ ಘೆವ್ನ್ ಪೆಂಟೆಂತ್ಲ್ಯಾ ಹೆಡ್ ಓಫಿಸಾಕ್ ಭಿತರ್ ರಿಗ್ತಾನಾ ಥಂಯ್ಸರ್ ಕಾಮ್ ಕರ್ಚ್ಯಾ ಚೆಡ್ವಾನಿಂ ಆಪ್ಣಾಕ್ ಪಳೆವ್ನ್ “ಪೋಸ್ಟ್‌ಮೇನ್ ಏನು ಇವತ್ತು ಬೊಟ್ಟು ಇಟ್ಟು ಬಂದದ್ದು” ಮ್ಹಣ್ ನಕ್ಲಾಂ ಕರ್ನ್ ಹಾಸ್ತಾನಾ ಗಾಲಾರ್ ಚರಯ್ಲಲ್ಯಾ ಆಪ್ಣಾಚ್ಯಾ ಬೊಟಾಕ್ ಮಾತ್ರ್ ಏಕ್ ಬೊಟ್ಟು ಆದಳ್ತಾ! ಇಸ್ಕೊಲಾಂತ್ ಭುರ್ಗ್ಯಾಂ ಸಂಗಿಂ ತಂಗಣೆ-ಮಂಗಣೆ ಕರ್ತಾನಾ ಮ್ಹಜ್ಯಾ ವಡ್ಲ್ಯಾ ಭಯ್ಣಿನ್ ತಾಚ್ಯಾ ಘಾಲಾರ್ ಚಿಡ್ಕಾಯಿಲ್ಲೊ ಬೊಟ್ಟು ಮಾತ್ರ್ ತೊ ಕಾಡುಂಕ್ ವಿಸ್ರಲ್ಲೊ. ಹೊ ಉಗ್ಡಾಸ್ ಮಾತ್ರ್ ತೊ ಆಜೂನ್ ಕಾಡ್ತಾ!

ಮ್ಹಜಿ ಮಾಮಿ ಥೊಡ್ಯಾ ತೆಂಪಾಕ್ ಆಮ್ಗೆರ್ ರಾವ್ತಾಲಿ. ತಾಂಚ್ಯಾ ನವ್ಯಾ ಘರಾಚಿ ಬುನ್ಯಾದ್ ಆಮ್ಚಾ ಘರಾ ಲಾಗಿಂಚ್ ಪಡ್‌ಲ್ಲಿ. ಹಾಂವ್ ತವಳ್ ಪ್ರಾಥಮಿಕ್ ಇಸ್ಕೊಲಾಂತ್ ಶಿಕ್ತಾಲೊಂ. ಮಾಮಿಯೆಚ್ಯಾ ಸೂಚನಾಕ್ ಸಯ್ ಮ್ಹಣೊನ್ ತಿಕಾ ಯೆಂವ್ಚಿಯ್ ಪತ್ರಾಂ ಪೋಸ್ಟ್‌ಮೇನ್ ಮ್ಹಜ್ಯಾ ಪೊತ್ಯಾಂತ್ ಚೆಪ್ತಾಲೊ. ಭುರ್ಗ್ಯಾಂಚೊ ಪೊಕ್ರಿ ಜಾಣಾ ಆಸ್ಚಾ ತಾಣೆ ಪತ್ರಾಂ ನೋಟ್ಸ್ ಬುಕಾ ಮಧೆಂ ದವ್ರುನ್ ಸಾಂಬಾಳುನ್ ವರಿಜಯ್ ಮ್ಹಣ್ ಜಾಗ್ವಣಿ ದಿತಾಲೊ.

ಏಕ್ ದೀಸ್ ಮಾಮಿಯೆಕ್ ಆಯಿಲ್ಲೆಂ ಕಾಗದ್ ಮ್ಜಜಾ ನೋಟ್ಸ್ ಬುಕಾಂ ಮಧೆಂ ಮೆಳೊನ್ ಘರಾ ಪಾವ್ಲೆಂ. ಥೊಡ್ಯಾಚ್ ವೆಳಾನ್ ಮಾಮಿ ಮ್ಹಜೆರ್ ಚಿಡ್ಲಿ. ಹಾವೆಂ ಪತ್ರ್ ಉಗ್ತೆಂ ಕರ್ನ್ ವಾಚ್ಲಾಂ ಮ್ಹಣ್!  ತಿಜ್ಯಾ ಉತ್ರಾಂಕ್ ಭುಲೊನ್ ಮಮ್ಮಿ ಮ್ಹಜೆರ್ ಉಪ್ರಾಟ್ಲಿ. ಹಾಂವ್ ಕಾತ್ರಿಂತ್ ಶಿರ್ಕಾಲ್ಲೊಂ. ಮ್ಹಾಕಾ ಆಲ್ತಾರಿ ಮುಕಾರ್ ದಿಂಬಿ ಘಾಲುನ್, ಸತ್ ಸಾಂಗಜಯ್ ಮ್ಹಣ್  ಹಾತಾಕ್ ಮೆಳ್‌ಲ್ಲ್ಯಾ ಸುಕ್ಯಾ ವಾಲಿಚ್ಯಾ ಕುಟ್ಕ್ಯಾನಿ ಸುಶೆಗಾತ್ ಮಾರ್! ವಿಷಯ್ ಪೋಸ್ಟ್‌ಮೇನಾಕ್ ಕಳ್ಳಿ. ತಾಣೆ ಮಾತ್ರ್ ಮ್ಹಜೆ ಪಕ್ಷೆನ್ ಸ್ಪಷ್ಟೀಕರಣ್ ದಿಲೆಂ. ತೆಂ ಕಾಗದ್ ಪೋಸ್ಟಾರ್ ಯೆತಾನಾಂಚ್ ಪಿಂಜೊನ್ ಆಯ್ಲೆಂ ಆನಿ ಗಮ್ ಚಿಡ್ಕಾವ್ನ್ ಕಾಗ್ದಾಂ ಕೊವೊಳ್ತಾನಾ ಭಿತರ್ ವಾರೆಂ ಆಸಾತ್ ತರ್ ಜಡಾಯೆಕ್ ಕಾಗ್ದಾಂ ಪಿಂದ್ತಾತ್ ಮ್ಹಣ್ ತೀರ್ಪ್ ದಿಲೆಂ. ಬುಕಾಂಚಾ ವೊಜ್ಯಾಂ ಸಾಂಗಾತಾ ಮಾಮಿಯಾಚ್ಯಾ ಕಾಂಗ್ದಾಂಚೊ ಭೊರೊ ವಾಂವೊಂವ್ಚೆ ಕಾಮ್ ಜಾಯ್ ಆಸ್‌ಲ್ಲೆಂಗೀ ಮ್ಹಣ್ ಮಾಕಾ ಭೊಗ್ಲೆಂ!

ಪೋಸ್ಟ್‌ಮೇನಾನ್ ಘರಾ ಘರಾನಿಂ ಪಾವಿತ್ ಕರ್ಚೊ ಖಬ್ರೊ ಜಾಯ್ತ್ಯೊ ಆಸ್‌ಲ್ಲೊ. ಕಾಗ್ದಾನಿಂ ಮಾತ್ರ್ ನಂಯ್ ಆಸ್ತಾಂ ಗಾಂವಾರ್ ಜಾಂವ್ಚ್ಯಾ ಬರ‍್ಯಾ ಕಾರ್ಯಾಂಚಿ ಖಬಾರ್, ಕಸಲೆಂಯ್ ಅನಾಹುತ್ ಘಡ್ಲ್ಯಾರ್ ತಿ ವಿಷಯ್ ಘರಾ ಘರಾನಿಂ ಪಾವ್ತಲಿ. ಲಾಗ್ಶಿಲ್ಯಾ ಗಾಂವ್ಚಿ ಸಯ್ರಿಕ್ ಆಯ್ಲಿ ತರ್ ಘರಾಣೆಂ ಕಶೆಂ ಮ್ಹಣ್ ವಿಚಾರ್ ಪೋಸ್ಟ್‌ಮೇನಾ ಲಾಗಿಂಚ್ ಜಾತಾಲೊ. ಜಾಯ್ತ್ಯಾ ಘರಾನಿ ಪೋಸ್ಟ್‌ಮೇನಾಂಕ್ ಕಾಫಿ ಫಳಾರಾಚೊ, ಜೆವ್ಣಾ ಖ್ಹಾಣಾಚೊ ಸತ್ಕಾರ್ ಮೆಳ್ತಾಲೊ. ಕಾಂಯ್ ಥೊಡ್ಯಾ ಪೋಸ್ಟ್‌ಮೇನಾಂಚೊ ಠಿಕಾಣೊ ಥಂಡ್ ಪೀವನಾಕ್ ಯಾ ಭುಕ್ ಥಾಂಬಂವ್ಕ್ ಏಕಾಚ್ ಘರಾ ಜಾತಲೊ ತರ್ ತಿ ಖಬರ್ ಸೆಜಾರ್ಚಾನಿ ಪಾಯ್ಸ್ ಕೆಲ್ಲಿಯ್ ಆಸಾ!

ಆತಾಂ ಹಾತಾನಿಂ ಮೊಬಾಯ್ಲಾಂ ಸೊಭ್ತಾತ್ ಜಾಲ್ಲ್ಯಾನ್ ಪೋಸ್ಟ್‌ಮೇನಾಚೆಂ ಕಾಮ್ ಜಾಯ್ತೆಂ ಉಣೆಂ ಜಾಲಾಂ. ಡಿಜಿಟಲ್ ಕಾಳಾರ್ ಪೋಸ್ಟ್‌ಮೇನಾಚಾ ವಾವ್ರಾಕ್ ಕಾತರ್ ಪಡ್ಲ್ಯಾ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಗಡಿರ್ ಝಜ್ಚಾ ಪುತಾಚಿ ಖಬರ್, ಪಯ್ಶಿಲ್ಯಾ ಕಡೆನ್ ಕಾಜಾರ್ ಕರ್ನ್ ದಿಲ್ಲ್ಯಾ ಧುವೆಚಿ ಖಬರ್, ವಾವ್ರಾಕ್ ಪಯ್ಸ್ ಪಾವ್‌ಲ್ಲ್ಯಾ ಕುಟ್ಮಾಂಚಿ ಖಬರ್, ಮೊಂತಿ ಫೆಸ್ತಾಕ್ ನವೆಂ, ನತಾಲಾಂ ಫೆಸ್ತಾಚಿಂ ಆನಿ ಪಾಸ್ಕಾಂ ಫೆಸ್ತಾಂಚಿಂ ಕಾರ‍್ಡಾಂ, ಮನಿ ಒರ‍್ದಾರಾಂ ಘೆವ್ನ್ ಭೊಂವ್ಚ್ಯಾ ಪೋಸ್ಟ್‌ಮೇನಾಚೆಂ ಪೊತೆಂ ಆಜ್ ಲಾನ್ ಜಾಲಾಂ. ಪುಣ್ ಪೋಸ್ಟ್‌ಮೇನ್ ಆನಿ ತಾಚೊ ವಾವ್ರ್ ಮಾತ್ರ್ ಮ್ಹಜ್ಯಾ ಉಗ್ಡಾಸಾಂತ್ ಶಾಶ್ವತ್ ಜಿರ‍್ಲಾ!

- ಸನ್ನು ನಿಡ್ದೋಡಿ.