ಆಜ್ ಕಾಂಯ್ ಪಾಂಚ್ ಪಾವ್ಟಿಂ ಫೋನ್ ಕೆಲೊ ಜೋಯೆಲಾನ್, ಹಾಂವ್ ಏಕ್ ಪಾವ್ಟಿಂ ಕುವೈಟ್ ವಚೊನ್ ಪಾವ್ತಾಂ ಪರ್ಯಾಂತ್ ತಾಕಾ ಸುಶೆಗ್ ನಾಂ.

ಬಾವ್ಡ್ಯಾಕ್ ಖಂತ್ ಹಾಂವ್ ಎಕ್ಲಿಂಚ್ ಕುವೈಟ್ ಯೆತಾಂ, ತೇಂಯಿ ಪಯ್ಲೆ ಪಾವ್ಟಿಂ! ಕೊಣ್ ನಾಂ ತರ್ ಕೋಣ್ ಮೆಳ್ತಾ ಏರ್ಪೊರ್ಟಾಂತ್ ತುಂ ಕಾಂಯ್ ಖಂತ್ ಕರಿನಾಕಾ ಮ್ಹಳ್ಯಾರೀ ತಾಕಾ ಸುಶೆಗ್ ನಾಂ!

ಜಾಂವ್ಯಾಂ ಲಾಗಿಂ ಉಲೊವ್ನ್ ಬಾಯ್ಲ್ ಮ್ಹಜಿ, ಪ್ಯಾಕ್ ಕರುಂಕ್ ಆನಿಕಾಂಯ್ ತರೀ ಉರ್ಲಾಂಗೀ ಮ್ಹಣ್ ಸೊಧುನ್ ಭಿತರ್ ಗೆಲಿ!

ಜಾಂವ್ಯಾನ್ ವೀಸಾ ಆನಿ ಟಿಕೆಟ್ ಧಾಡ್ಲ್ಯಾ ಧುವೆಚ್ಯಾ ಪಯ್ಲ್ಯಾ ಬಾಂಳ್ತೆರಾಕ್! ತಶೆಂ ಮ್ಹಣ್ ಪಯ್ಲೆ ಪಾವ್ಟಿಂ ಕುವೈಟ್‌ಚಿ ವಾಟ್ ಧರ್ಲ್ಯಾ ಮೇರಿನ್. ಕುವೈಟಾಕ್ ಡೈರೆಕ್ಟ್ ಪ್ಲೇನ್ ಆಸ್’ಲ್ಲ್ಯಾನ್ ಬರೆಂ ಜಾಲೆಂ.

ಭುರ್ಗ್ಯಾಕ್ ಜಾಯ್ ಪಡ್ಚ್ಯೊ ವಸ್ತು ಸಂಗಿಂ ಬಾಂಳ್ತಿಚೆಂ ಖಾಣ್ ಸಗ್ಳೆಂ ವೆವೆಗ್ಳೆಂ ಕರ್ನ್ ಬಾಂದುನ್ ತೀಸ್ ಕಿಲ್ಯಾಚಿ ಲಗೇಜ್!

ಫಾಲ್ಯಾಂ ಫಾಂತ್ಯಾರ್ ಉಟೊನ್ ದುಕ್ರಾಮಾಸ್ ಬಾಂದ್ಲ್ಯಾರ್ ಸಾರ್ಕೆಂ ಜಾಯ್ತ್. ದುಕ್ರಾಮಾಸ್ ಕುವೈಟ್ ಮೆಳಾನಾ, ಮೆಳ್ಳ್ಯಾರೀ ಚೊರ್ಯಾಂ, ತಿತ್ಲೆಂ ಬರೆಂ ಆಸಾನಾ. ತಶೆಂ ಜೋಯೆಲಾಕ್ ದುಕ್ರಾಮಾಸ್ ಮ್ಹಳ್ಯಾರ್ ಜಿವಾಚಿ ಗಾಂಟ್. ಆನಿ ಮಜ್ಯಾ ಧುವೆಕ್ ಭಾಕ್ರ್ಯೊ ಮ್ಹಳ್ಯಾರ್ ಜೀವ್, ಮಾಸ್ಳೆಚ್ಯಾ ಕಡಿಯೆಂತಿಯ್ ಬುಡೊನ್ ಖಾತಾ ತೆಂ.

ಕುವೈಟ್ ವೆಚ್ಯಾ ಪಯ್ಲೆಂ ಮೆಳೊನ್ ವೆತಾಂ ಮ್ಹಣ್ ಆಯಿಲ್ಲ್ಯಾ ವೈಲೆಟ್ ಬಾಯೆಲಾಗಿಂ, ಮೇರಿ ಆತುರಾಯೆನ್ ಸಾಂಗ್ತಾಲೆಂ, “ಜಾಯ್ ಜಾಲ್ಲೆಂ ಮಾತ್ ವ್ಹರ್ ಮೇರಿಬಾಯೆ, ವೆತಾನಾಂ ಕೊಣೆಂಯ್ ಕಾಂಯ್ ದಿಲ್ಯಾರ್ ಘೆನಾಕಾ. "ಥಂಯ್ಚೆಂ ಕಾನೂನ್ ಬಾರಿಚ್ ಕಠೀಣ್ ಆಸಾ ಮ್ಹಣ್ ಆಯ್ಕಲಾಂ ಹಾಂವೆಂ"

ವ್ಹಯ್ ಧುವೆನ್ ಆನಿ ಜಾಂವ್ಯಾನ್ ಕಾಂಯ್ ಕಿತ್ಲೆ ಪಾವ್ಟಿಂ ಫೋನ್ ಕೆಲಾಂ ತಿತ್ಲೆ ಪಾವ್ಟಿಂ ತೆಂಚ್ ಸಾಂಗ್ಲಾಂ" ಹಾಂವೆಂ ಮಧೆಂಚ್ ಸಾಂಗ್ಲೆಂ.

“ಸಾಂಭಾಳ್ನ್ ವಚೊನ್ ಯೇ, ಯೆತಾನಾ ನಾತ್ವಾಕ್ ವಾ ನಾತಿಕ್ ಸಾಂಗಾತಾ ಘೇವ್ನ್ ಯೇ, ಆಮಿ ವಾಟ್ ಪಳೆವ್ನ್ ಆಸ್ತಾಂವ್. ಹಾಂಗಾಚಿ ಖಂತ್ ಕರಿನಾಕಾ, ಆಮಿ ಸೆಜಾರಿ ಏಕಾಮೆಕಾ ಯೇವ್ನ್ ಪಳೆವ್ನ್ ಆಸ್ತಾಂವ್. ಬರೆಂ, ಕಾಳೊಕ್ ಜಾವ್ನ್ ಆಯ್ಲೊ ಆನಿ ತುಮ್ಕಾಂಯ್ ವೆಗ್ಗಿಂ ನಿದಾಜೆ, ಫಾಂತ್ಯಾರ್ ಉಟೊನ್ ಏರ್ಪೊರ್ಟಾಕ್ ವಚೊಂಕ್ ಜಾಯ್, ಬರ‍್ಯಾನ್ ವಚೊನ್ ಯೇ ಮೆರಿಬಾಯೆ ಮ್ಹಣೊನ್ ವೈಲೆಟ್ ಬಾಯ್ ಆಪ್ಲ್ಯಾ ಘರಾ ತೆವ್ಶಿಂ ಚಲ್ಲಿ.

ಸಗ್ಳೆಂ ತಯಾರ್ ದವರ್ನ್ ಆಮಿ ನಿದೊಂಕ್ ಗೆಲ್ಯಾಂವ್.

ಬಾಯ್ಲ್ ಪಯ್ಲೆ ಪಾವ್ಟಿಂ ಪರ್ಗಾಂವಾಂಕ್ ವೆತಾ!

ಏಕಾ ವಾಟೆನ್ ಕೊಂಕಣಿ, ತುಳು ಆನಿ ಕನ್ನಡ ಸೊಡ್ಲ್ಯಾರ್ ದುಸ್ರಿ ಭಾಸ್ ಕಳನಾ, ದುಸ್ರ್ಯಾನ್ ಉಡುಪಿ - ಕೊಡ್ಯಾಳ್ ಸೊಡ್ನ್ ಎಕ್ಲೆಂಚ್ ಪಯ್ಸ್ ಗೆಲ್ಲೆಂಯ್ ನಾ. ಅಶೆಂ ಚಿಂತ್ನಾಂನಿ ಮ್ಹಾಕಾ ನೀದ್ ಯೇಂವ್ಕ್ ನಾ ತರ್, ಮೇರಿಕ್ ಕುವೈಟ್ ವೆಚ್ಯಾ ಆತುರಾಯೆನ್ ಆನಿ ಏಕ್ಲ್ಯಾನ್ ವಚಜಾಯ್ ಮ್ಹಳ್ಳ್ಯಾ ಭಿಂಯಾನ್ ನೀದ್ ಯೇಂವ್ಕ್’ಚ್ ನಾ!

ಸಕಾಳಿಂ ತಿನಾಂಕ್ ವಾಜ್ಲೆಲ್ಯಾ ಫೋನಾನ್, ನಿದೆಕ್ ವೆಂಗ್ಲೆಲ್ಯಾ ಆಮ್ಕಾಂ ಜಾಗಾಯ್ಲೆಂ.

"ತುಕಾಯ್ ನೀದ್ ನಾಂ ಮ್ಹಣ್ ದಿಸ್ತಾ ಪುತಾ, ಆಮ್ಕಾಂ ಸಗ್ಳಿ ರಾತ್ ನೀದ್ ನಾ! ತಿಕ್ಕೆಶೆ ದೊಳೆ ಆಡ್ ಜಾತಾನಾ ಫೋನ್ ವಾಜ್ಲೆಂ. ಮ್ಹಳೆಂ ಹಾಂವೆಂ ಧುವೆ ಲಾಗಿಂ. "ಮಾಮ್ಮಾ ಯೇವ್ನ್ ಪಾವ್ಲ್ಯಾ ಉಪ್ರಾಂತ್ ಸುಶೆಗಾತ್ ನಿದ್ಯೇತ್ ಪಪ್ಪಾ” ಮ್ಹಣಾಲೆಂ ಮ್ಹಾಕಾ ಸಮಾಧಾನ್ ಕರ್ನ್.

ಹಾಂವೆಂ ಫೋನ್ ಮೇರಿಕ್ ದಿಲೆಂ, “ಏರ್ಪೊರ್ಟಾಕ್ ಪಾವೊನ್ ಆಪ್ಣಾಕ್ ಫೋನ್ ಕರುಂಕ್ ಸಾಂಗ್ಲಾಂ” ಉಲವ್ನ್ ಜಾತಚ್ ಮೇರಿ ಮ್ಹಜ್ಯಾ ಹಾತಾಂತ್ ಫೋನ್ ದೀವ್ನ್ ಮ್ಹಣಾಲೆಂ. "ಆವಯ್-ಬಾಪಾಯ್ಕ್ ಭುರ್ಗ್ಯಾಂಚಿ ಆನಿ ಭುರ್ಗ್ಯಾಂಕ್ ಆವಯ್-ಬಾಪಾಯ್ಚಿ ಖಂತ್!!. ಆನಿ ಹೊಚ್ಚ್ ನೇ ಕುಟ್ಮಾ ಬಾಂದ್, ಕುಟ್ಮಾ ಮೋಗ್" ಹಾಂವೆ ಮೇರಿಕ್ ಫುಸ್ಲಾಯ್ಲೆಂ.

ಠರಾಯಿಲ್ಲ್ಯಾ ವೆಳಾರ್ ಗಾಡಿ ಆಂಗ್ಣಾಕ್ ಯೇವ್ನ್ ಪಾವ್ಲಿ.

ಮ್ಹಜಿ ಬಾಯ್ಲ್ ಆಜ್ ಪಯ್ಲೆ ಪಾವ್ಟಿಂ ವೆಳಾರ್ ನೆಸೊನ್ ತಯಾರ್ ಜಾಲ್ಲೆಂ. ತಶೆಂಚ್, ವೆಳಾರ್ ವಚೊನ್ ಏರ್ಪೊರ್ಟಾಕ್ ಪಾವ್ಲ್ಯಾಂವ್.

“ಕೊಣೆಂಯ್ ಕಿತೆಂಚ್ ದಿಲ್ಯಾರ್ ಘೆನಾಕಾ, ಸಂಭಂದಿತ್ ಅಧಿಕಾರಿಂಕ್ ವಾ ಏರ್ಪೊರ್ಟ್ ಸಿಬ್ಬಂದಿ ಲಾಗಿಂ ದೀಂವ್ಕ್ ಸಾಂಗ್, ಕೊಣಾಯ್ ಲಾಗಿಂ ಉಲೊಂಕ್ ವಚನಾಕಾ” ಮ್ಹಣ್ ಬೂದ್ ಬಾಳ್ ಸಾಂಗ್ಲಿ. ಶಾಲೆಟಾನ್ ಏರ್ಪೊರ್ಟಾಕ್ ಪಾವೊನ್ ಫೋನ್ ಕರುಂಕ್ ಸಾಂಗ್’ಲ್ಲೊ ಮ್ಹಣ್ ಪಯ್ಲೆಂ ಧುವೆಕ್ ಫೋನ್ ಕರುಂಕ್ ಲಾಗ್ಲೆಂ ಮೇರಿ. ಟಿಕೆಟ್, ಪಾಸ್ಪೋರ್ಟ್ ಮೇರಿಚ್ಯಾ ಹಾತಿಂ ದೀವ್ನ್, ಕುವೈಟ್ ವೆಚ್ಯಾ ಏಕಾ ತರ್ನಾಟ್ಯಾಚಿ ವಳೊಕ್ ಕರ್ನ್ ತಾಚೆಂ ಗಾಂವ್ಚೆಂ ಫೋನ್ ನಂಬರ್ ತಶೆಂಚ್ ಕುವೈಟ್‌ಚೆಂ ಫೋನ್ ನಂಬರ್ ಘೆವ್ನ್ ಮೇರಿಕ್ ತಾಚ್ಯಾ ಸಂಗಿಂ ಧಾಡ್ಲೆಂ. ಪ್ಲೇನಾರ್ ಬಸೊನ್ ಸಾಧ್ಯ್ ತರ್ ಏಕ್ ಫೋನ್ ಕರ್ ಪುತಾ ಮ್ಹಳೆಂ ಹಾಂವೆಂ ಮಜೆಂ ನಂಬರ್ ದೀವ್ನ್. ತುಂ ಕಾಂಯ್ ಖಂತ್ ಕರಿನಾಕಾ ಅಂಕಲ್ ಹಾಂವ್ ಸಾಂಭಾಳ್ನ್ ಆಪವ್ನ್ ವರ್ತಾಂ ಮ್ಹಣಾಲೊ ತೊ ಭಿತರ್ ಸರ್ತಾನಾ.

ಪ್ಲೇನ್ ವೆಳಾರ್ ಆಸಾ ಆನಿ ತಶೆಂಚ್ ತ್ಯಾ ತರ್ನಾಟ್ಯಾಚೆಂ ಕುವೈಟ್ ಫೋನ್ ನಂಬರ್ ಜಾಂವ್ಯಾಂಕ್ ಮೆಸೇಜ್ ಕರ್ನ್ ತಿಳ್ಸಿಲೆಂ. ಆನಿ ಹಾಂವ್ ಗಾಡಿಯೆಚ್ಯಾ ಡ್ರೈವರಾ ಸಂಗಿ ಪಾಟಿಂ ಘರಾ ಯೇವ್ನ್ ಪಾವ್ಲೊಂ.

ಕುವೈಟ್‌‌ಚ್ಯಾ ಸಾಡೆ ಇಕ್ರಾಂಕ್ ಮ್ಹಳ್ಯಾರ್ ಗಾಂವ್ಚ್ಯಾ ದೋನ್ ವೊರಾಂಕ್ ಪಾವ್ತಾ ಫ್ಲಾಯ್ಟ್, ಲಗೇಜ್ ಘೆವ್ನ್ ಭಾಯ್ರ್ ಯೆತಾನಾ ಕಾಂಯ್ ಅಡೇಜ್ ವೊರಾಂ ಜಾತಿತ್, ತವಳ್ ಜೋಯೆಲಾಕ್ ಫೋನ್ ಕೆಲ್ಯಾರ್ ಪುರೊ. ತೊ ವೆಳಾರ್ ಮುಕಾರ್ ಯೆತಲೊ. ಅಶೆಂ ಮತಿಂತ್‌ಚ್ ಲೇಕ್ ಘಾಲ್ನ್, ಮ್ಹಜ್ಯಾ ದಿಸ್ಪಡ್ತ್ಯಾ ಕಾಮಾಂತ್ ಮಗ್ನ್ ಜಾಲೊಂ ಹಾಂವ್.

ಸಾರ್ಕೆಂ ಅಡೇಜ್ ವೊರಾರ್ ಹಾಂವೆಂ ಜೋಯೆಲಾಕ್ ಫೋನ್ ಕೆಲೊ, "ಫ್ಲಾಯ್ಟ್ ವೇಳಾರ್ ಪಾವ್ಲಾಂ, ಕಾಂಯ್ ಲಗೇಜ್ ಯೇಂವ್ಕ್ ತಡವ್ ಜಾಲೊ ದಿಸ್ತಾ. ಹಾಂವ್ ಭಾಯ್ರ್ ರಾಕೊನ್ ಆಸಾಂ. ಮಾಮ್ಮಿ ಭಾಯ್ರ್ ಆಯಿಲ್ಲಿಚ್ ಫೋನ್ ಕರ್ತಾಂ ಮ್ಹಣಾಲೊ." ಬರೆಂ ಪುತಾ, ಜಾಯ್ತ್ ಮಾಗಿರ್ ಫೋನ್ ಕರ್ ಮ್ಹಳೆಂ ಹಾಂವೆಂ.

ರಾಕೊನ್ ರಾಕೊನ್ ಥಕ್ಲೊಂ ಹಾಂವ್ ಫೊನಾಕ್, ಸಾಡೆ ತೀನ್ ಜಾಲಿಂ ವೊರಾಂ ಕಾಂಯ್ ಘರಾ ಗೆಲ್ಯಾ ಉಪ್ರಾಂತ್ ಫೋನ್ ಕರ್ಯಾಂ ಮ್ಹಣ್ ಚಿಂತುನ್ ಬಸ್ಲ್ಯಾಂತ್ ಅಸ್ತೆಲಿಂ. ಜೋಯೆಲ್ ಡ್ರೈವಿಂಗ್ ಕರ್ತಾನಾ ಫೋನ್ ಕಾಡಿನಾ. ತೆಂ ಹಾಂವ್ ಜಾಣಾಂ, ಪುಣ್ ಮೇರಿಕ್ ತರಿ ಫೋನ್ ಕರ್ಯೆತೆಂ.!

ಗಜಾಲಿ ಉಲವ್ನ್ ವಿಸ್ರಲಿಂ ಜಾಯ್ಜೆ. ಅಸೊಂ, ಮಾಗಿರ್ ಫೋನ್ ಕರ್ತಲಿಂ!

ಪೂಣ್, ಮತಿಕ್ ಸಮಾಧಾನ್ ಜಾಲೆಂ ನಾಂ ಆನಿ ಹಾಂವೆಂ ಜೋಯೆಲಾಕ್ ಪರ್ತ್ಯಾನ್ ಫೋನ್ ಕೆಲೊ. ಜೋಯೆಲಾಚ್ಯಾ ಆವಾಜಾಂತ್ ಬದ್ಲಾವಣ್ ದಿಸ್ಲಿ ಮಾಕಾ, ಮ್ಹಜೊಯ್ ಜೀವ್ ಚಿವಾಳ್ಳೊ. "ಕಿತೆಂ ಜಾಲೆಂ ಜೋಯೆಲ್? ಖಂಯ್ ಪಾವ್ಲ್ಯಾತ್ ತುಮಿ ಹಾಂವ್ ಫೊನಾಕ್ ರಾಕ್ತಾಂ" ವಿಚಾರ್ಲೆಂ ಹಾಂವೆಂ.

"ಹಾಂವ್ ಭಾಯ್ರ್ ರಾಕೊನ್ಂಚ್ ಆಸಾ ತ್ಯಾ ಫ್ಲಾಯ್ಟಾರ್ ಆಯಿಲ್ಲಿಂ ಸಗ್ಳಿಂ ಭಾಯ್ರ್ ಆಯ್ಲಿಂ ಮಾಮ್ಮಿ ಮಾತ್ ಆನಿಕೀ ಯೇಂವ್ಕ್ ನಾ." ತಾಚೊ ತಾಳೊ ಕಾಂಪ್ತಾಲೊ.

"ತಾಚ್ಯಾ ಸಾಂಗಾತಾ ಅಸಲ್ಲ್ಯಾ ತರ್ನಾಟ್ಯಾಕ್ ಫೋನ್ ಕೆಲೊಯೇ, ಕಿತೆಂ ಮ್ಹಣಾಲೊ ತೋ?” ಮ್ಹಣ್ ಆತುರಾಯೆನ್ ಆನಿ ಅಮ್ಸೊರಾನ್ ವಿಚಾರ್ಲೆಂ ಹಾಂವೆಂ.

"ವ್ಹಯ್ ಪಪ್ಪಾ, ತಾಕಾ ಫೋನ್ ಕೆಲೊ ಆನಿ ಥೊಡ್ಯಾ ವೇಳಾ ಆದಿಂ ತೊ ಭಾಯ್ರ್ ಆಯ್ಲೊ. ಮಾಮ್ಮಿಕ್, ಲಗೇಜಿ ಸಾಂಗಾತಾ ಪೋಲೀಸ್ ಇನ್ಕ್ವಾಯರಿ ರೂಮಾಕ್ ವರ್ನ್ ಗೆಲೆ ಮ್ಹಣಾಲೊ!

ಮಾಮ್ಮಿಕ್ ಭಾಸ್ ಯೇನಾ ಆನಿ ಲಗೇಜಿಂತ್ ದುಕ್ರಾಮಾಸ್, ಭುರ್ಗ್ಯಾಕ್ ಮುಲ್ಕಿಚೆಂ ವೊಕಾತ್, ಬಾಳ್ಟಿಚೆಂ ತಿಕ್ಲೆಂ ಆನಿ ಆಲೆಂ ಮ್ಹಣ್ ಜಾಯ್ತೆಂ ಆಸಾ. ತೆ ಕಿತೆಂ ಕರ್ತಿತ್ ಗೀ ಮ್ಹಳ್ಳಿ ಖಂತ್.

“ದುಕ್ರಾಮಾಸ್ ಹಾಡ್ಚೆಂಚ್ ನಾಕಾ ಆಸ್’ಲ್ಲೆಂ" ಜೋಯೆಲ್ ಕಾಂಪ್ಚಾ ತಾಳ್ಯಾಂತ್ ಮ್ಹಣಾಲೊ."

ದುಕ್ರಾಮಾಸ್ ಪೋಲಿಸಾಂನಿ ಪಳೆಯ್ಲ್ಯಾರ್, ಚಡ್ತಾವ್ ಉಡೊಂವ್ಕ್ ಸಾಂಗ್ತಾತ್. ತುಂ ಖಂತ್ ಕರಿನಾಕಾ ಯೆತಾಲೆಂ ತೆಂ", ಮಣ್ ಕುಂಬು ಧಯ್ರ್ ದಿಲೆಂ ಹಾಂವೆಂ.

ಮ್ಹಾಕಾ ಏಕ್ ಫೋನ್ ಯೆತೇ ಆಸಾ ಪಪ್ಪಾ, ಮಾಗಿರ್ ಫೋನ್ ಕರ್ತಾಂ ಮ್ಹಣಾಲೊ ಜೋಯೆಲ್.

ಗಾಂವಾಂತ್ ಸಾಂಜೆಚಿಂ ಸಾತ್ ಜಾವ್ನ್ ಆಯಿಲ್ಲಿಂ, ಶಾಲೆಟಾನ್ ಫೋನ್ ಕೆಲೊ." ಪಪ್ಪಾ, ಮಾಮ್ಮಿ ಪಾವ್ಲಿ ಹಾಂಗಾ ಕಾಂಯ್ ಖಂತ್ ಕರಿನಾಕಾ ಮಣಾಲೆಂ".

ಏಕ್‌ಚ್ ಸ್ವಾಸಾಂತ್. "ಜಾಲ್ಲೆಂ ಕಿತೆಂ ಪುತಾ? ಇತ್ಲೊ ತಡೊವ್ ಕಸೊ ಜಾಲೊ? ಕಸ್ಟಮಾಂತ್ ಕಾಂಯ್ ಚಡ್ ಉಣೆಂ ಜಾಲೆಂ ಗೀ? ಪೋಲಿಸಾಂನಿ ಕಿತೆಂ ವಿಚಾರ್ಲೆ ಖಂಯ್?” ಮ್ಹಣ್ ಸವಾಲಾಂ ವಯ್ರ್ ಸವಾಲಾಂ ಕೆಲಿಂ ಹಾಂವೆಂ ಆತುರಾಯೆನ್.

"ಮಾಮ್ಮಿನ್, ಭಾರಿ ವಡ್ಲೆಂ ಕಾಮ್ ಕೆಲಾಂ ಪಪ್ಪಾ, ಕೊಣೆಂಚ್ ಕಾಂಯ್ ದಿಲ್ಯಾರಿ ಘೆನಾಕಾ ಮಣ್ ಹಾಜಾರ್ ಪಾವ್ಟಿಂ ಸಾಂಗ್ಲ್ಯಾರೀ, ಏಕಾ ಬಾಯ್ಲೆನ್ ದಿಲ್ಲೆಂ ವೊಕಾತ್ ಹಾಡ್ನ್ ಆಯಿಲ್ಲಿ ಮಾಮ್ಮಿ.

"ದೆವಾ ಸರ್ವೆಸ್ಪರಾ” ಮ್ಹಣ್ ಆಕ್ಲಾಸ್ ಸೊಡ್ಲೊ ಹಾಂವೆಂ ಆಯ್ಕೊನ್.

"ಮಾಗಿರ್ ಕಿತೆಂ ಜಾಲೆಂ? ದೆಕುನ್ ಕಸ್ಟಮಾಂತ್ ತಡವ್ ಜಾಲೊ ದಿಸ್ತಾ? ಮಾಗಿರ್ ಪೋಲಿಸಾಂನಿ ಸೊಡ್ಲೆಂಗೀ?” ಆತುರಾಯ್ ಆನಿ ಆಕಾಂತಾನ್ ವಿಚಾರ್ತಾನಾ...

"ಮಾಮ್ಮಿಕ್’ಚ್ ದಿತಾಂ ತಿಚ್ ಸಾಂಗ್ತಾಲಿ ವಿಚಾರ್" ಮ್ಹಣ್ ಮೇರಿಚ್ಯಾ ಹಾತಿಂ ದಿಲೆಂ ಫೋನ್.

"ಕಿತೆಂ ಕೆಲೆಂಯ್ ಸಾಯ್ಬಿಣಿ, ಇತ್ಲೆಂ ಸಾಂಗೊನ್‌ಯ್, ಬೂದ್ ನಾತ್’ಲ್ಲ್ಯಾ ಪರಿಂ ಕಾಮ್ ಕೆಲಾಂಯ್ ನೆ, ಕಿತೆಂ ಸಾಂಗೊಂ?

"ತೀ ಸ್ತ್ರೀ, ಪರತುಂಕ್ ಲಾಗ್ಲಿ, ರಡೊಂಕ್ ಲಾಗ್ಲಿ.  “ಹೆಂ ವೊಕಾತ್ ಜರ್ ಕೊರಿಯರ್ ಕೆಲೆಂ ಪಾವ್ತಾನಾ ತಡೊವ್ ಜಾಯ್ತ್ ಆನಿ ಆಪ್ಣಾಚ್ಯಾ ಪತಿಕ್ ಕಾಂಯ್ ಚಡ್ ಉಣೆಂ ಜಾಯ್ತ್, ದೆಕುನ್ ತುಂ ವ್ಹರ್ ಆನಿ ಕುವೈಟ್ ಪಾವ್ತಚ್ ಹ್ಯಾ ನಂಬ್ರಾಕ್ ಫೋನ್ ಕರ್ ಆನಿ ಮ್ಹಜ್ಯಾ ನವ್ರ್ಯಾಚೊ ಈಶ್ಟ್ ಯೇವ್ನ್ ವರ್ತಲೊ” ಮ್ಹಣ್ ಪರಾತ್ತುಂಕ್ ಲಾಗ್ಲಿ.

"ಹೆಂ, ಕೆದಾಳಾ ಜಾಲೆಂ? ಹಾಂವ್ ಸಾಂಗಾತಾಚ್ ಆಸಲ್ಲೊಂ, ಮಾಗಿರ್ ತ್ಯಾ ತರ್ನಟ್ಯಾ ಬರಾಬರ್ ತುಕಾ ಏರ್ಪೊರ್ಟಾ ಭಿತರ್ ಧಾಡ್ಲೆಂ. ತಿ ಬಾಯ್ಲ್ ತುಕಾ ಖಂಯ್ಸರ್ ಮೆಳ್ಳಿ?!

ತುಂ ಫೋನಾರ್ ಶಾಲೆಟಾಲಾಗಿಂ ಉಲೊವ್ನ್ ಆಸ್ತಾನಾ ಹಾಂವ್ ಬಾತ್ ರೂಮಾಕ್ ಮ್ಹಣ್ ಗೆಲಿಂ ಪಳೆ ತವಳ್!

ಬಾತ್ ರೂಮ್ ಮೆಳ್ಳೆಂ ನಾಂ, ಪುಣ್ ಹಿ ಬಾಯ್ಲ್ ಆದಳ್ಳಿ ಮ್ಹಾಕಾ! ಆಮ್ಕಾಂ ಇಲ್ಲಿ ಪಾಪ್ ಬಿರ್ಮೊತ್ ಚಡ್ ನೆ ತಶೆಂ.."

"ತುಜ್ಯಾ ಪಾಪ್ ಬಿರ್ಮೊತೆನ್, ಜಿಣ್ ಭರ್ ಜೈಲಾಂತ್ ಬಸಾಜೆ ಆಸ್‌ಲ್ಲೆಂ" ಮಧೆಂಚ್ ಶಾಲೆಟ್ ಶಿಣ್ಲೆಂ.

"ದೇವಾ ಮಜ್ಯಾ, ತಿತ್ಲ್ಯಾ ಭಿತರ್ ಇತ್ಲೆಂ ಸಗ್ಳೆಂ ಘಡ್ಲೆಂ?” ಹಾಂವ್ ಸಗ್ಳೊಚ್ ಶೆರ್ಮೆಲೊಂ.

"ಮಾಗಿರ್ ಥಂಯ್ ಪೋಲಿಸಾಂನಿ ಕಿತೆಂ ಮ್ಹಳೆಂ?” ವಿಚಾರ್ಲೆಂ ಹಾಂವೆಂ ಆತುರಾಯೆನ್.

ತಿಣೆಂ ದಿಲ್ಲೆಂ ವಕತ್ ಹಾಂವೆಂ, ಮ್ಹಜ್ಯಾ ವೆನಿಟಿ ಬ್ಯಾಗಾಂತ್ ದವರ್ಲೆಲೆಂ.

ಕಸ್ಟಮ್ ಚೆಕ್ ಕರ್ತಾನಾ ಮ್ಹಾಕಾ ಕುಶಿನ್ ರಾವಯ್ಲೆಂ ಆನಿ ಸಗ್ಳಿ ಲಗೇಜ್ ಘೇವ್ನ್ ಭಿತರ್ ಆಪವ್ನ್ ವೆಲೆಂ. ಥಂಯ್ಸರ್ ಹಿಂದಿ ಉಲೊಂವ್ಚ್ಯಾ ಏಕ್ಲ್ಯಾಕ್ ಆಪವ್ನ್ ಹಾಡ್ಲೊ ಆನಿ ತೊ ಮ್ಹಣಾಲೊ ’ಹೆಂ ವೊಕಾತ್ ಹಾಂಗಾಸರ್ ಬ್ಯಾನ್ ಆಸಾ ತುಂವೆಂ ಕಶೆಂ ಆನಿ ಕಿತ್ಯಾಕ್ ಹಾಡ್ಲೆಂಯ್’? ಮ್ಹಣ್ ವಿಚಾರುಂಕ್ ಲಾಗ್ಲೊ.

"ಮ್ಹಾಕಾ ಹಿಂದಿ ಉಲೊಂವ್ಕ್ ಯೇನಾ ತರಿ ತಾಣೆಂ ಸಾಂಗ್’ಲ್ಲೆಂ ಆನಿ ವಿಚಾರ್ಲೆಲೆಂ ಸಮ್ಜಾಲೆಂ ಮ್ಹಾಕಾ. ಹಾಂವೆಂ ಪಯ್ಲೆಂ ಪಾವ್ಟಿಂ ಯೆಂವ್ಚೆಂ, ಧುವೆಚ್ಯಾ ಬಾಂಳ್ತೆರಾಕ್ ಲಾಗೊನ್ ಆನಿ ಹೆಂ ವಕತ್ ಮ್ಹಜೆಂ ನಂಯ್. ಪುಣ್ ಹಾಂಗಾ ಪಾವೊನ್ ಫೋನ್ ಕರುಂಕ್ ಸಾಂಗ್ಲಾಂ, ಆನಿ ತಾಚೆ ವಾರೆಸ್ದಾರ್ ತೆಂ ವರುಂಕ್ ಯೆತಾತ್ ಮಣ್ ಸಾಂಗ್ಲಾಂ" ಮ್ಹಳೆಂ ಹಾಂವೆಂ.... ಮ್ಹಾಕಾ ಆಯಿಲ್ಲ್ಯಾ ಹಿಂದಿಕ್ ಕೊಂಕ್ಣಿ ಭರ್ಸುನ್. ಥೊಡೊ ವೇಳ್ ತಾಣಿ ಆಪ್ಲೆ ಮಧೆಂ ಮೀಟಿಂಗ್ ಕೆಲೆಂ ಆನಿ ತುಕಾ ಕೋಣ್ ಆಪವ್ನ್ ವರುಂಕ್ ಆಯ್ಲಾ ಹಾಂಗಾಸರ್ ಮ್ಹಣ್ ವಿಚಾರ್ಲೆಂ. ಹಾಂವೆಂ ಜೋಯೆಲಾಚೆಂ ನಂಬರ್ ದಿಲೆಂ. ತಾಣಿ ಜೋಯೆಲಾಕ್ ಭಿತರ್ ಆಪಯ್ಲೊ.

"ತುಂ ಜೋಯೆಲಾಕ್ ದಿ ಫೋನ್ ಹಾಂವ್ ತಾಕಾಚ್ ವಿಚಾರ್ತಾಂ" ಮ್ಹಳೆಂ ಹಾಂವೆ ಮಧೆಂಚ್.

ಪಪ್ಪಾ, ತುಂ ಕಾಂಯ್ ಖಂತ್ ಕರ್ನಾಕಾ ಸಗ್ಳೆಂ ಸಾರ್ಕೆಂ ಜಾಲೆಂ" ಮ್ಹಣಾಲೊ ಜೋಯೆಲ್ ಮ್ಹಾಕಾ ಭುಜಾವ್ನ್.

ಮ್ಹಾಕಾ ಭಿತರ್ ಆಪೊವ್ನ್ ಪೋಲಿಸಾಂನಿ ಮ್ಹಳೆಂ, "ಹಿ ಬಾಯ್ಲ್ ಪಯ್ಲೆ ಪಾವ್ಟಿಂ ಕುವೈಟ್ ಆಯ್ಲ್ಯಾ ಆನಿ ತಿಣೆಂ ಆಶೆಂ ಕಾಮ್ ಕೆಲಾಂ. ಆತಾಂ ಆಪ್ಣಾಂಚೆ ನಂಯ್ ತೆಂ ದುಸ್ರ್ಯಾಂಚೆ ಮಣ್ತಾ!! ತೆಂ ಆಯ್ಕೊನ್ ಮ್ಹಾಕಾ ಘಾಮ್ ಸುಟ್ಲೊ.

"ತಿಣೆಂ ಪಯ್ಲೆ ಪಾವ್ಟಿಂ ಯೆಂವ್ಚೆಂ ಆನಿ ತಿಕಾ ಪಳೆತಾನಾ ತಿಚ್ಯಾ ಉತ್ರಾಂನಿ ಸತ್ ದಿಸ್ತಾ. ತಶೆಂ ಆಮಿ ಏಕ್ ಆವ್ಕಾಸ್ ದೀಂವ್ಕ್ ಚಿಂತ್ಲಾ. ತುಂ ಏಕ್ ಕಾಮ್ ಕರ್ ಹಿಕಾ ಘೆ ಆನಿ ವ್ಹಚ್, ಭಾಯ್ರ್ ವಚೊನ್ ತಾಣಿಂ ದಿಲ್ಲ್ಯಾ ನಂಬರಾಕ್ ಫೋನ್ ಕರ್, ಜರ್ ತಾಣಿಂ ಯೇವ್ನ್ ತೆಂ ವಕತ್ ಘೆತ್ಲೆಂ ತರ್, ಹಿಕಾ ಆಮಿ ಸೊಡ್ತೆಲ್ಯಾಂವ್. ಜರ್ ತರ್ ಕೋಣ್ ಯೇಂವ್ಕ್ ನಾಂ ತರ್, ಮುಖ್ಲೆ ದೀಸ್ ಹಿಚೆ ಜೈಲಾಂತ್ ಸರಜಯ್ ಪಡ್ತೆಲೆ ಮ್ಹಣಾಲೊ.’

ಹಾಂವೆಂ ಪೋಲಿಸಾನ್ ಸಾಂಗ್’ಲ್ಲ್ಯಾ ಬರಿಂಚ್ ಕೆಲೆಂ. ಮಾಮ್ಮಿಕ್ ಘೆವ್ನ್ ಭಾಯ್ರ್ ಆಯಿಲ್ಲೆಂಚ್, ನಂಬರಾಕ್ ಫೋನ್ ಕೆಲೊ ಆನಿ ಆಮ್ಚ್ಯಾ ಘರಾಚಿ ವಾಟ್ ತಾಕಾ ಸಾಂಗ್ಲಿ. ತೊ ಮ್ಹಾಕಾ ಆಮ್ಚ್ಯಾ ಘರ್ಚ್ಯಾ ಬಿಲ್ಡಿಂಗಾ ಲಾಗಿಂ ಆಮಿಂ ಪಾವ್ತಾನಾಂಚ್ ಆಪುಣ್ ಪಾವ್ತಾಂ ಮ್ಹಣಾಲೊ. ಮಾಮ್ಮಿ ವಾಟ್ ಸಗ್ಳಿ ಮಾಗೊನ್ಂಚ್ ಆಸ್’ಲ್ಲಿ. ಸಾಂತಾಕ್ ಏಕ್ ಆಂಗೊಣ್ ಸಯ್ತ್ ಸಾಂಗ್ಲಿ. ಏಕ್ ಪಾವ್ಟಿಂ ವಾಂಚಯ್ ದೆವಾ ಆನಿ ಮುಖಾರ್ ಕುವೈಟ್ ಯೆಂವ್ಚಿಂ ನಾ ಮ್ಹಣ್ ಹಾಕ್-ಬೋಬ್ ಮಾರ್ತಾಲಿ ಮಾಮ್ಮಿ.

ಆಮಿ, ಆಮ್ಚಾ ಘರಾ ಲಾಗಿಂ ಪಾವೊನ್, ಪರ್ತ್ಯಾನ್ ಹಾಂವೆಂ ತ್ಯಾ ನಂಬರಾಕ್ ಫೋನ್ ಕೆಲೊ, ಆನಿ ಆಮಿ ಥಂಯ್ಚ್ ತಾಕಾ ರಾಕೊನ್ ರಾವ್ಲ್ಯಾಂವ್, ಥೊಡ್ಯಾಚ್ ಘಡಿಯಾಂನಿ ತೊ ಮನಿಸ್ ಆಯ್ಲೊ ಹಾಂವೆ ತೆಂ ವಕತ್ ತಾಚ್ಯಾ ಹಾತಾಂತ್ ದಿಲೆಂ ಆನಿ ತೊ ಆಪ್ಲ್ಯಾ ಕಾರಾರ್ ಬಸ್ತಾಂ ಮಣ್ತಾನಾ, ಪಾಟ್ಲ್ಯಾನ್ ಸಿವಿಲ್ ವಸ್ತುರಾರ್ ಆಸ್’ಲ್ಲ್ಯಾ ಪೋಲಿಸಾಚೊ ಹಾತ್ ತಾಚಾ ಗೊಮ್ಟ್ಯಾರ್ ಪಡ್ಲೊ!!

ಮ್ಹಾಕಾಯ್ ತವಳ್‌ಚ್ ಕಳ್ಳೆಂ ಪೋಲಿಸ್  ಆಮ್ಕಾಂಚ್ ಫೊಲೊ ಕರುನ್ ಆಸಾತ್ ಮ್ಹಣ್!!

“ಹಾಂಚಿ, ತುಕಾ ವಳೊಕ್ ಆಸಾಯೆ?” ಮ್ಹಣ್ ಪೋಲಿಸಾನ್ ತಾಕಾ ವಿಚಾರ್ಲೊ ಆನಿ ತಾಣೆಂ ನಾಂ ಮ್ಹಣ್ ಸಾಂಗ್ತಾನಾ ಮತಿಕ್ ಸುಶೆಗ್ ಭೊಗ್ಲೊ!

ವಳಕ್ ಆಸಾ ಮಳ್ಳೆಂ ತರ್, ದೇವ್ ಜಾಣಾಂ ಕಿತೆಂ ಜಾತೆಂ ತೆಂ!

"ಕಿತೆಂಯ್ ಜಾಂವ್, ದೇವ್ ಪಾವ್ಲೊ!! ಬರ‍್ಯಾ ಮನ್ಶಾಂಕ್ ಬರೆಂಚ್ ಜಾತಾ! ಮ್ಹಳೆಂ ಹಾಂವೆಂ ದೆವಾಕ್ ಅರ್ಗಾಂ ದೀವ್ನ್.

"ಉಪ್ರಾಂತ್ ಪೋಲಿಸ್ ತಾಕಾ ಘೆವ್ನ್ ಗೆಲೆ. ಎನ್ಕ್ವಾಯರಿಕ್ ಆಪಯ್ತಾನಾ ಮಾಮ್ಮಿಕ್ ಯೇಂವ್ಕ್ ಜಾಯ್ ಮ್ಹಣಾಲೆ ಮ್ಹಾಕಾ.

ಮಾಗಿರ್ ಘರಾ ಯೇವ್ನ್ ಸವ್ಕಾಸ್ ಶಾಲೆಟಾಕ್ ವಿಶಯ್ ಸಗ್ಳೊ ವಿವರ್ಸುನ್ ಸಾಂಗ್ಲೊ.

ಭರ್ಲೆಲೆಂ ಗುರ್ವಾರ್ ತೆಂ ಕಾಂಯ್ ಚಡ್ ಉಣೆಂ ಜಾಯ್ತ್ ದೆಕುನ್ ತಾಕಾ ಪಯ್ಲೆಂ ಕಿತೆಂಚ್ ಸಾಂಗೊಂಕ್ ನಾತ್’ಲ್ಲೆಂ" ಹೆಂ ಸಗ್ಳೆಂ ಆಯ್ಕೊನ್ ಮ್ಹಾಕಾ ಉತ್ರಾಂಚ್ ಸುಟ್ಲಿಂ ನಾಂತ್.

ಇತ್ಲೆಂ ವಡ್ಲೆಂ ಕಾರ್ಬಾರ್ ಕೆಲೆಂ ಮೇರಿನ್ ಪಯ್ಲೆ ಪಾವ್ಟಿಂ ಕುವೈಟ್ ವಚೊನ್!!

ದುಸ್ರ್ಯಾ ದಿಸಾ, ಜೋಯೆಲಾನ್ ಫೋನ್ ಕೆಲೊ ಆನಿ ಮ್ಹಳೆಂ "ಪಪ್ಪಾ, ಕಾಲ್ ಮಾಮ್ಮಿನ್ ಹಾಡ್’ಲ್ಲೆಂ ತೆಂ ವಕತ್ ನಯ್, ಗಾಂಜಾ ಖಂಯ್ ಆಯ್ಚಾ ಪೇಪರಾರ್ ದಿಲಾಂ." ಮಣ್ತಾನಾ ಏಕಾಚ್ಚಾಣೆಂ ಝಗ್ಲಾಣೆಂ ಮಾರ್’ಲ್ಲ್ಯಾ ಬರಿಂ ಜಾಲೆಂ.

ಪಾತ್ರೊನ್ ಸಾಂತಾನ್ ಸಾಂಭಾಳ್ಳೆಂ, ಮಾಗ್ಣೆಂ ವ್ಯರ್ಥ್ ಜಾಂವ್ಕ್ ನಾ. ಮ್ಹಣ್ ಮತಿಂತ್’ಚ್ಚ್ ಚಿಂತ್ಲೆಂ ಆನಿ ದೆವಾಕ್ ಅರ್ಗಾಂ ದಿಲಿಂ.

ಕ್ಲೈವ್ ಸೋಜ್