ನಿರ್ಭಾಗಿ (ಮುಖಾರ್ಸಿಲ್ಲೊ ಭಾಗ್ )

ಮ್ಹಜೆಂ ಭಯ್ಣ್ ಶಾಭಿತಾಚೊ ನಿರ್ಧಾರ್ ಮ್ಹಾಕಾ ಫಾಯ್ದ್ಯಾಚೊ ಆನಿ ಬಾಬಾಕ್ ಕುಮ್ಕೆಚೊ ತರೀ ಮ್ಹಜ್ಯಾ ಭಯ್ಣಿಕ್? ಸವಾಲಾಕ್ ಜವಾಬ್ ಸುಲಭ್ ತರೀ, ತ್ಯಾಗಾಚೆಂ ಜೀವನ್ ಜಿಯೆಂವ್ಕ್ ಸಲೀಸ್ ನಂಯ್.

ಹಾವೆಂ ಮ್ಹಜ್ಯಾ ಭಯ್ಣಿಕ್ ಅನ್ಯಾಯ್ ಕೆಲ್ಲೆಬರಿ ಜಾತಾ ನಂಯ್‌ಗೀ? ತಾಣೆಂ ಅವೇಶಾನ್ ಭರೊನ್ ಮ್ಹಜೆ ಖಾತಿರ್ ಅಪ್ಲೊ ನಿರ್ಧಾರ್ ಗುರ್ಕಾರಾ ಮುಕಾರ್ ದವರ್‌ಲ್ಲಿ ರೀತ್, ತೆಂ ಅಪ್ಲ್ಯಾ ನಿರ್ಧಾ‍ರಾಥಾವ್ನ್ ಪಾಟಿಂ ಸರ್ಚ್ಯಾ ಬರಿ ದಿಸಾನಾತ್‌ಲ್ಲೆಂ. ಮ್ಹಜೆಂ ಭಯ್ಣ್ ಮಾಂಯ್ ಬರಿಚ್ ಧರ್ಯಾಧಿಕ್, ಚಿಂತುನ್ ನಿರ್ಧಾರ್ ಘೆಂವ್ಚೆ ತಸಲೆಂ ಆನಿ ಖಂಯ್ಚಿಯೀ ಪರಿಸ್ಥಿತಿ ಅಯ್ಲ್ಯಾರೀ ಅಪ್ಲ್ಯಾನಿರ್ಧಾರಾ ಥಾವ್ನ್ ಪಾಟಿಂ ಸರಾನಾ ತಸಲೆಂ.

ಹಾಂವೆ ಅತಾಂ ಮ್ಹಜ್ಯಾ ಭಯ್ಣಿಕ್ ಹೊಗಳ್ಸುಂಚೆ ನಂಯ್. ತಾಚೆಂ ನಡ್ತೆಂ, ಧೈರ್, ಅಖ್ಯಾ ವಾಡ್ಯಾಂತ್ ತಶೆಂಚ್ ಕುಟ್ಮಾಂತ್ ಮೊಗಾ ಪಾತ್ರ್ ಜಾಲ್ಲೆಂ. ತಾಕಾ ಸರ್ವಾಂಯಿ ಹೊಗಳ್ಸಿತಾಲಿಂ ಕಿತ್ಯಾಕ್ ಮಾಲ್ಗಡ್ಯಾ ಥಂಯ್ ತಾಕಾ ಆಸ್ಚೊ ಮೋಗ್ ಮಾಯ್ಪಸಿಪಣ್, ಭಾಂದವ್ಪಣ್, ಚುರುಕ್ ಚಾಲ್, ಕಾಮಾಂತ್ ನಾ-ಆಳ್ಸಾಯ್ ತಾಕಾ ದುರ್ಸೊಂಕ್ ಕಾರಣಾಂಚ್ ನಾತ್‌ಲ್ಲಿಂ ಮ್ಹಣ್ಯೆತ್.

ಮಾಂಯ್ ಆಸ್ತಾನಾ ಇಸ್ಕೊಲಾ ಥಾವ್ನ್ ಆಯಿಲ್ಲ್ಯಾ ಉಪ್ರಾಂತ್ ಮಾಂಯ್ ಸಾಂಗಾತಾ ಬಸೊನ್ ತಿಣೆಂ ಭಾಂದ್ಚ್ಯಾ ಬಿಡಿಯಾಂಕ್ ಸುತ್ ರೆವ್ಡಾಯ್ತಾನಾ ಪಳೆಂವ್ಚಿ ಸೆಜಾರ್ಚಿ ಎಲ್ಲು ಬಾಯ್ ಅಪ್ಲ್ಯಾ ಧುವೆಕ್ ದುರ್ಸುನ್ ಮ್ಹಜ್ಯಾ ಭಯ್ಣಿಚಿ ವಡ್ವಿಕಾಯ್ ಉಲಯ್ತಾಲಿ. “ಮ್ಹಜಿ ಧುವ್ ಸಗ್ಳೊ ದೀಸ್ ಮೊಬಾಯ್ಲ್ ದಾಂಬುನ್ ಬಸ್ಲ್ಯಾರ್ ತಾಕಾ ಮೊಳಾಬ್ ಕೊಸ್ಳೊನ್ ಪಡ್ಲ್ಯಾರಿ ಕಳಾನಾ, ಇತ್ಲೆಂ ಸುಡ್ಸುಡಿತ್ ತುಕಾ ಧುವ್ ಆಸ್ಚೆಂ ತುಂ ನಿಜಾಯ್ಕಿ ಭಾಗಿ ಸೆಲ್ಲು" ಮಾಂಯ್ಕ್ ಎಲ್ಲುಬಾಯ್ ಹೊಗಳ್ಸಿತಾನಾ ಮ್ಹಜ್ಯಾ ಮಾಂಯ್ಚ್ಯಾ ದೊಳ್ಯಾಂನಿ ಉಜ್ವಾಡ್ ಪರ್ಜಳ್ತಾಲೊ ತರ್ ಮ್ಹಜ್ಯಾ ದೊಳ್ಯಾನಿಂ ಭಯ್ಣಿಂ ಖಾತಿರ್ ಅಭಿಮಾನ್ ಜಳ್ಕತಾಲೊ.

ಮ್ಹಜೆಂ ಜಿವಿತ್ ಮಾಂದ್ರೆಕ್‌ಚ್ ಸೀಮಿತ್ ತರ್ ಶಿಕ್ಪಾಂತ್ ಹುಷಾರ್ ಆಸ್‌‍ಲ್ಲ್ಯಾ ಭಯ್ಣಿಕ್ ಟೀಚೆರ್ ಕರಿಜಾಯ್ ಮ್ಹಣುನ್ ಮ್ಹಜ್ಯಾ ಬಾಬಾಕ್ ಆಶಾ ಆಸ್‌ಲ್ಲಿ. ಮಾಂಯ್ ಜಿವಂತ್ ಆಸ್ತಾನಾ ಬಾಬ್ ತವಳ್ ತವಳ್ ಮಾಂಯ್ ಲಾಗಿಂ ಸಾಂಗ್ತಾನಾ ಹಾಂವೆ ಆಯ್ಕಲಾಂ. ಪೂಣ್ ಅತಾಂ ಭಯ್ಣಿಚ್ಯಾ ನಿರ್ಧಾರ್ ಥಾವ್ನ್ ಬಾಬ್ ನಿರಾಸ್ ಜಾಲ್ಲೊ, ಮಾಂಯ್ಚ್ಯಾ ಅಕಾಲಿಕ್ ಮರ್ಣಾಂ ವರ್ವಿಂ ಘರ್ಚಿ ಪರಿಸ್ಥಿತಿ ಬದ್ಲಲ್ಲಿ.

ಭಯ್ಣ್ ಬಾಬಾಚಿ ಆಶಾ ಜಾಣಾ ಆಸ್‌ಲ್ಲೆಂ ಜಾಲ್ಲ್ಯಾನ್ ತಪ್ಪಲಾ ಮುಕಾಂತ್ರ್ ಡಿಗ್ರೆಚೆಂ ಶಿಕಪ್ ಶಿಕಾಲಾಗ್ಲೆಂ. ವಟಾರಾಂತ್ಲ್ಯಾ ಭುರ್ಗ್ಯಾಂಕ್ ಟ್ಯೂಶನ್ ದೀಂವ್ಕ್ ಲಾಗ್ಲೆಂ. ಘರ್ಚಿಂ ಕಾಮಾಂ ವೆಗ್ಗಿಂ ವೆಗ್ಗಿಂ ಸಂಪವ್ನ್ ಗಾಂವ್ಚ್ಯಾ ಲಾನ್ ಭುರ್ಗ್ಯಾಂಕ್ ಟ್ಯೂಷನ್ ದೀವ್ನ್ ಪಯ್ಶ್ಯಾಂನಿ ಬಾಬಾಕ್ ಆಧಾರ್ ಜಾತಾಲೆಂ.

ಕಾಮಾಥಾವ್ನ್ ಯೆಂವ್ಚ್ಯಾ ಬಾಬಾಕ್ ಖಂಚಿಯ್ ಕಾಮ್ ದವರಿನಾಸ್ತಾನಾ ರಾಂದಾಪ್, ನಿತಾಳಾಯ್ ಕರುನ್ ನಾಜೂಕಾಯೆನ್ ಘರ್ ಸಾಂಬಾಳ್ತಾಲೆಂ. ಭಯ್ಣ್ ಮಾಂಯ್ಚ್ಯಾಚ್ ಸ್ವರೂಪಾಯೆಚೆಂ, ತಶೆಂಚ್ ಕಾಮಾಂತ್‌ಯಿ ತಿಚ್ ಚುರುಕಾಯ್ ಮಾಂಯ್‌‍ಚೊ ಉಗ್ಡಾಸ್ ಹಾಡಯ್ತಾಲೆಂ.

ದೀಸ್, ಮ್ಹಹಿನೆಂ, ವರ್ಸಾಂ ಧಾಂವ್ತಲಿಂ, ಆಮ್ಚಿಂ ಘರ್ಚಿ ಅರ್ಥಿಕ್ ಪರಿಸ್ಥಿತಿ ಸುಧ್ರೊನ್ ಯೆತಾಲಿ. 

ಬಾಬಾನ್ ಪೋಟ್ ಮಾರ್ನ್ ಮ್ಹಳ್ಳೆಬರಿ ಭಯ್ಣಿಚ್ಯಾ ಕಾಜಾರಾಕ್ ಮ್ಹಣುನ್ ಥೊಡೆ ಕಾಸ್ ಜಮೊವ್ನ್ ದವರ್‌ಲ್ಲೆ, ತವಳ್ ತವಳ್ ಭಯ್ಣಿಕ್ “ಅಳೆಗೊ ಬಾಯೆ, ತುಜ್ಯಾ ಪುಢಾರಾ ವಿಶ್ಯಾಂತ್ ವಿಚಾರ್ ಕರ್‌ಗೊ ಪುತಾ, ಪಲ್ತಡಿಚ್ಯಾ ಅಬುಟಾಮಾನ್ ಬರಿ ಸೈರಿಕ್ ಹಾಡ್ಲ್ಯಾ, ಆಮ್ಚ್ಯಾ ಕುಟ್ಮಾ ವಿಶ್ಯಾಂತ್ ಚೆಡ್ಯಾಗೆಲ್ಯಾಂಕ್ ಅಬುಟಾಮಾನ್ ಸಮ್ಜಾಯ್ಲಾಂ”. ಭಯ್ಣಿಕ್ ಸಮ್ಜಯ್ತಾಲೊ ತರೀ ತೆಂ ಕಾಜಾರಾಕ್ ಬಿಲ್ಕುಲ್ ರಾಜಿ ನಾತ್‌ಲ್ಲೆಂ. ಆಮ್ಚ್ಯಾ ಘರ್ಚ್ಯಾ ಪರಿಸ್ಥಿತೆನ್ ತಾಚೆ ಹಾತ್ ಭಾಂದುನ್ ಘಾಲ್ಯಾತ್ ಮ್ಹಣುನ್ ಮ್ಹಕಾ ಸಮ್ಜತಾಲೆಂ. 

"ಆಮ್ಚಿಂ ಖಂತ್ ತುಂ ಕರಿನಾಕಾಗೊ, ರಚ್‍ಲ್ಲೊ ದೇವ್ ಪೊಸ್ತಾ" ಮ್ಹಜೆ ದೊಳೆ ತಾಕಾ ಸಮ್ಜಂವ್ಕ್ ಪ್ರಯತನ್ ಕರ್ತಾಲೆ ತರ್ ಬಾಬ್ ತಾಳೊ ವರ್ಯ್ ಉಬಾರುನ್ ತಾಕಾ ಸಮ್ಜಯ್ತಾಲೊ, ಅಶೆಂ ಬಾಬಾಚ್ಯಾ ವತ್ತಾಯೆಕ್ ಸೈರಿಕೊ ಯೆತಾನಾ ನೆಸುನ್ ರಾವ್ತಾಲೆಂ ತರೀ ಆಯಿಲ್ಲೊ ಸೈರಿಕ್ಯೊ ಆಮ್ಚಿ ಪರಿಸ್ಥಿತಿ ಪಳೆವ್ನ್ "ಫೋನ್ ಕರ್ನ್ ಸಾಂಗ್ತಾಂವ್" ಮುಣುನ್ ನಿಕಾಳ್ತಾಲೆ, ಮಾಗಿರ್ ಫೋನ್‌ಯೀ ನಾ ಯಾ ತಾಂಚೊ ಪಾತ್ತೊಯಿ ಆಸಾನಾ‍ತ್‌ಲ್ಲೊ

ಮ್ಹಜೆಂ ಭಯ್ಣ್ ಸೊಭಿತ್, ಶಿಕ್ಪಿ, ಗುಣೆಸ್ತ್ ತರೀ ಆಯಿಲ್ಲ್ಯೊ ಸಯ್ರಿಕೊ ಒಪ್ಪಾನಾಂತ್ ಮ್ಹಣ್ತಾನಾ ಬಾಬಾಕ್ ವಿರಾರ್ ಜಾತಾಲೆಂ. ಇತ್ಲ್ಯಾ ಸೊಭಿತ್, ಭಾಂಗ್ರಾಳ್ಯಾ ಗುಣಾಂಚ್ಯಾ ಮ್ಹಜ್ಯಾ ಭಯ್ಣಿಕ್ ನಾಕಾರ್ತಲ್ಯಾಂಚಿ ಧುರ್ಬಾಗ್ಪಣ್ ಪಳೆವ್ನ್ ಮ್ಹಕಾ ಖರಸ್ ಯೆತಾಲಿ. ಸೈರಿಕ್ ನಾಕಾ ಮ್ಹಣುಂಕ್ ತಾಂಕಾಯಿ ಕಾರಣ್ ಆಸ್‌ಲ್ಲೆಂ ಮ್ಹಣ್ಯೆತ್. ಮ್ಹಜೆಂ ಭಯ್ಣ್ ಕಾಜಾರಾ ಉಪ್ರಾಂತ್ ಬಾಬಾಚಿ ಆನಿ ಭಾವಾಚಿ ಜವಾಬ್ದಾರಿ ಅಪುಣ್ ಚ್ ಖಾಂದ್ ಮಾರ್ತಾ ಮುಣುನ್ ಆಯಿಲ್ಲ್ಯಾ ಮುಕಾರ್ ಚ್ ಸಾಂಗ್ತಾಲೆ ಜಾಲ್ಲ್ಯಾನ್, ಚೆಡುಂಯ್ ನಾಕಾ, ಜವಾಬ್ದಾರಿಯಿ ನಾಕಾ ಮ್ಹಣೊನ್ ನಿಸಾರ್ತಾಲೆ.

ಆಮ್ಚ್ಯಾ ಗರ್ಜಾಂ ಖಾತಿರ್ ಅಪ್ಲ್ಯಾ ಖುಶೆಚಿ ಸಮಾಧಿ ಬಾಂದ್ಚ್ಯಾ ಮ್ಹಜ್ಯಾ ಭಯ್ಣಿಕ್ ಪಳೆತಾನಾ ಮ್ಹಕಾ ಬೆಜಾರ್ ಜಾತಾಲೆಂ. ತೆಂ ಮ್ಹಾಕಾ ಪೊಟಾಕ್ ದಿತಾನಾ, ಮ್ಹಜಿ ಚಾಕ್ರಿ ಕರ್ತಾನಾ ಮ್ಹಜ್ಯಾ ದೊಳ್ಯಾಂನಿ ದೆಂವ್ಚ್ಯಾ ತ್ಯಾ ದುಖಾಂನಿ ಹಾಂವ್ ಉಲಯ್ತಾನಾ ತಾಚೆ ದೊಳೆ ಮ್ಹಾಕಾ "ಹಾಂವ್ ಆಸಾಂ ದಟ್ಟೂ ಭಿಯೆನಾಕಾ" ಮ್ಹಣುನ್ ಭುಜಾಯ್ತಾಲೆ.

"ಹಾಂವ್ ಅಸ್ರ್ಯಾಕ್ ವಚುಂಕೀ ತಯಾರ್, ಪುಣ್ ಮ್ಹಜ್ಯಾ ಭಯ್ಣಿಕ್ ಹಾಂವ್ ಕಶೆಂ ಸಮ್ಜಂವ್".

ದೀಸ್ ಧಾಂವ್ತಲೆ, ಗುರ್ಕಾರಾಚೊ ಪೂತ್ ಕೋನಿ ಆಮ್ಗೆರ್ ತವಳ್ ತವಳ್ ಯೆತಾಲೊ. ಬಾಬಾಕ್ ಕಾಮಾಕ್ ಅಪಂವ್ಕ್ ಯಾ ಅಪ್ಲ್ಯಾ ವಡ್ಲ್ಯಾ ಭಾವಾಚ್ಯಾ ಭುರ್ಗ್ಯಾಂಕ್ ಟುಶ್ಯಾನಾ ಥಾವ್ನ್ ಹಾಡುಂಕ್, ವರುಂಕ್ ಅಪ್ಲ್ಯಾ ಬುಲೆಟಾರ್ ಯೇವ್ನ್ ಕರ್ನ್ ಆಸ್ತಾಲೊ. ತಾಚೊ ತ್ಯಾ ಘಡ್ಗಡ್ಲ್ಯಾ ಅವಾಜಾಚ್ಯಾ ಬೈಕಾಚೊ ಅವಾಜ್ ಮ್ಹ್ಯಜ್ಯಾ ಕಾನಾಂತ್ ಪಡ್ತಾನಾ ಮ್ಹಕಾಯಿ ತಾಂತು ಏಕ್ ಪಾವ್ಟಿಂ ಭೊವ್ಯಾಂ ಮ್ಹಣುನ್ ಭೊಗ್ ಲ್ಲೆಂ ಆಸಾ ಪುಣ್ ಹಾಯ್ ಮ್ಹಜ್ಯಾ ನಶಿಬಾ.....

ಭಯ್ಣ್ ಆನಿ ಕೋನಿ ಸಳ್ಗೆನ್ ಉಲಯ್ತಾಲಿಂ. ಘರ್ಚ್ಯಾ ಸೊಪ್ಯಾರ್ ಬಸೊನ್ ಗಜಾಲಿ ಕಾಡ್ತಾನಾ ಮ್ಹಕಾ ಭಿತರ್ ಅಯ್ಕತಾಲೆಂ. ಭಯ್ಣಿಚ್ಯಾ ಮ್ಹತಿಂತ್ ಕಿತೆಂ ಆಸ್‌ಲ್ಲೆಂ ಮ್ಹಾಕಾ ಕಳಿತ್ ನಾ ಪುಣ್ ಕೋನಿನ್ ಮ್ಹಜ್ಯಾ ಭಯ್ಣಿಲಾಗಿಂ ತಮಾಶೆ ಉಲೊಂವ್ಚೆ, ಹಾಸ್ಚೆಂ, ಆಯ್ಕಾತಾನಾ ಮ್ಹಕಾ ವರ್ತಿ ದಾಧೊಸ್ಕಾಯ್ ಜಾತಾಲಿ. ಮ್ಹಜೆ ಭಯ್ಣ್ ಹ್ಯಾ ಕೋ‍ನಿಲಾಗಿಂ ಕಾಜಾರ್ ಜಾಲ್ಯಾರ್ ಕಿತ್ಲ್ಯಾ ಸಂತೊಸಾನ್ ಆಸತ್? ಆಶೆತಾಲೊಂ ಹಾಂವ್. ಮ್ಹಜಿ ಮತ್ ಭಯ್ಣಿಚ್ಯಾ ಫುಡಾರಾಚಿ ರಾವ್ಳೆರ್ ಬಾಂದ್ತಾಲಿ.

ಕೊನಿ ಸಾವ್ಳೊ ತರೀ ಲಕ್ಷಣ್ ತರ್ನಾಟೊ, ರಿಗ್ಗಾರ್ ಕಾಮಾರ್ ತೊ ಆಸಾ, ತೀನ್ ಮ್ಹಹಿನ್ಯಾಕ್ ಎಕ್ ಪಾವ್ಟಿಂ ಗಾವಾಂತ್ ದೆಂವ್ತಾ, ಮಾಯ್ಪಾಸಿ ತರ್ನಾಟೊ. ಮ್ಹಜೆಂ ಭಯ್ಣ್ ಆನಿ ತೊ ಎಕಾಚ್ ಇಸ್ಕೊಲಾಂತ್ ಶಿಕ್‌ಲ್ಲಿಂ ಜಾಲ್ಲ್ಯಾನ್ ವಳಕ್ ಪಯ್ಲೆಥಾವ್ನ್‌ಚ್ ಆಸ್‌ಲ್ಲಿ. ಪುಣ್ ಸಳ್ಗಿ ಮಾತ್ರ್ ಹ್ಯಾ ದಿಸಾನಿಂಚ್ ಚಡಿತ್ ಜಾಲ್ಲೆ ಬರಿ ದಿಸ್ತಾಲಿ, ಆನಿ ಗೆಲೆತ್ಯಾ ಮ್ಹಹಿನ್ಯಾಂತ್ ಜಾಲ್ಲ್ಯಾ ಘಡಿತಾಂತ್ ತೀ ಆನಿಕಿಯಿ ಘಟ್ ಜಾಲ್ಲಿ. 

ಬಾಬ್ ಗುರ್ಕಾರಾಚ್ಯಾ ತೊಟಾಂತ್ ಮಾಡ್ಯೆಚಿಂ ಮುಳಾಂ ಸೊಡವ್ನ್ ಸಾರೆಂ ಘಾಲ್ಚ್ಯಾ ಕಾಮಾಕ್ ಗೆಲ್ಲೊ ಥಂಯ್ಚ್ ಹಿತ್ಲಾಂತ್ ತಕ್ಲಿ ಘುಂವೊನ್ ಪಡ್‌ಲ್ಲೊ. ತಕ್ಷಣ್ ಕೋನಿನ್ ತಾಕಾ ಆಸ್ಪತ್ರೆಕ್ ಅಪವ್ನ್ ವೆಲ್ಲೊ. ಬಾಬ್ ಪಡ್ತಾನಾ ತಾಚೊ ಪಾಂಯ್ ಫಾತ್ರಾಕ್ ಮಾರ್ನ್ ಗೆಲ್ಲೆ ವರ್ವಿಂ ಹಾಡಾಕ್ ಮಾರ್ ಜಾಲ್ಲ್ಯಾನ್ ದೋನ್ ದೀಸ್ ಆಸ್ಪತ್ರೆಂಚ್ ದಾಖಲ್ ಜಾಯ್ಜಯ್ ಮ್ಹಣೊನ್ ದಾಕ್ತೆರಾನ್ ಸಾಂಗ್‌ಲ್ಲೆಂ. ಮ್ಹಜ್ಯಾ ಭಯ್ಣಿಚೆ ಕಷ್ಟ್ ಪಳೆವ್ನ್ ಕೋನಿಚ್ ಬಾಬಾ ಸಾಂಗಾತಾ ಅಸ್ಪತ್ರೆಂತ್ ರಾವುಲ್ಲೊ. ಸಾಂಗಾತಾಚ್ ಬಾಬಾಚೆಂ ಆಸ್ಪತ್ರೆಚೆಂ ಬಿಲ್ಲ್‌ಯ್ ತಾಣೆಂಚ್ ಫಾರಿಕ್ ಕೆಲ್ಲೆ. ಹ್ಯಾ ತಾಚ್ಯಾ ವರ್ತ್ಯಾ‍ಪಣಾಕ್ ಆಮ್ಚೆ ಲಾಗಿಂ ಉತ್ರಾಂ ನಾತ್‌ಲ್ಲಿಂ.

ತೊ ದೀಸ್ ಆಯ್ತಾರ್. ಬಾಬಾಚೊ ಪಾಂಯ್ ದೂಖ್ ಆಸ್‌ಲ್ಲ್ಯಾನ್ ಬಾಬ್ ಮಿಸಾಕ್ ವಚುಂಕ್ ನಾತ್‌ಲ್ಲೊ.  ಭಯ್ಣ್ ಮಿಸಾ ಥಾವ್ನ್ ಆಯಿಲ್ಲ್ಯಾ ಮುಸ್ತಾಯ್ಕೆರ್‌ಚ್ ಚಾ ಕರುಂಕ್ ಕುಜ್ನಾಕ್ ಭಿತರ್ ರಿಗ್ಲೆಂ.  ಚಾ ಕರುನ್ ಮ್ಹಾಕಾ ಆನಿ ಬಾಬಾಕ್ ಚಾಯೆಚೊ ಗೊಬ್ಳೊ ಆನಿ ಪೊಳೆ ಆಮ್ಚೆಂ ಮುಕಾರ್ ದವರಿಜಯ್ ತರ್ ಗುರ್ಕಾರ್, ತಾಚಿ ಬಾಯ್ಲ್ ಜಾನೆಟ್ ಬಾಯ್, ಪೂತ್ ಕೋನಿ ಆನಿ ಎಕ್ಲೊ ತರ್ನಾಟೊ ಆಮ್ಚ್ಯಾ ಘರಾ ಭಿತರ್ ರಿಗ್ಲಿಂ.

ಟಾಮಿ ತಾಳೊ ಪಿಂಜುನ್ ಮ್ಹಳ್ಳ್ಯಾಬರಿ ಘೊಂಕ್ತಾಲೊ. ಹಾಂವ್ ನಿದ್‌ಲ್ಲ್ಯಾ ಥಾವ್ನ್‌ಚ್ ಆಮ್ಚ್ಯಾ ಘರ್ಚ್ಯಾ ಬಾಂಕಾರ್ ಬಸ್‌ಲ್ಲ್ಯಾಂಕ್ ಪಳೆಂವ್ಚ್ಯಾರ್ ಪಡ್ಲೊ. ತಿಂ ತೆಗಾಂ ಅಮ್ಕಾಂ ಸದಾಂಚಿ ಪುಣ್ ತೊ ಅಪರಿಚಿತ್ ತರ್ನಾಟೊ ಮ್ಹಾಕಾಚ್ ಪಳೆಯ್ತಾಲೊ. ತಾಚೆ ದೊಳೆ ಮ್ಹಾಕಾ ಪಳೆವ್ನ್ ದಯಾಳಾಯೆನ್ ಭರ್‌ಲ್ಲೆ ಬರಿ ದಿಸ್ಲೆ.

ಬಾಬ್ ಲೋವ್ ಪಾಂಯ್ ವೊಡ್ನ್ ಯೇವ್ನ್ ತಾಂಚ್ಯಾ ಮುಕ್ಲ್ಯಾ ಪರ್ನ್ಯಾ ಕದೆಲಾರ್ ಬಸ್ಲೊ. ಭಯ್ಣ್ ಭಿತರ್ ತಾಂಕಾ ಪಿಯೆಂವ್ಕ್ ಹಾಡುಂಕ್ ಕುಜ್ನಾಕ್ ಘುಂವ್ತಾನಾ ಗುರ್ಕಾರಾಚ್ಯಾ ಬಾಯ್ಲೆನ್ ತಾಕಾ ರಾವವ್ನ್ ಥಂಯ್ಸರ್‌ಚ್ ಬಸಯ್ಲೆಂ. ಮ್ಹಾಕಾ ಮಿಸ್ತೆರ್ ಜಾಲ್ಲೊ. ಕಿತೆಂ ಘಡುಂಕ್ ಆಸಾ ತೆಂ ಅಯ್ಕುಂಕ್, ಪಳೆಂವ್ಕ್ ಮ್ಹಜೆ ಕಾನ್ ಆನಿ ದೊಳೆ ಭೋವ್ ಅತ್ರೆಗ್ತಾಲೆ.

ಕೋನಿಕ್ ಹಾಂವೆ ಪಳೆಯ್ಲೆಂ. ಬರೊ ನವ್ರೊ ಸೊಭ್‌ಲ್ಲೆ ಬರಿ ಸೊಭ್ತಾಲೊ. ಗುರ್ಕಾರ್ ಅಪ್ಲ್ಯಾ ಪುತಾಕ್ ಮ್ಹಜ್ಯಾ ಭಯ್ಣಿಚೊ ಹಾತ್ ವಿಚಾರುಂಕ್ ಆಯ್ಲಾ ಜಾಯ್ಜಯ್ ಮ್ಹಜೆಂ ಮತಿಂತ್ಲಿ ಮೆಷಿನಾಂ ಕಾಮಾಕ್ ಲಾಗ್‌ಲ್ಲಿಂ. ಜೆಂ ಕಿತೆಂ ಹಾಂವ್ ಚಿಂತುನ್ ಆಸಾಂ ತೆಂಚ್ ಘಡುನ್ ಯೇಂವ್ದಿ ದೆವಾ" ಹಾಂವೆ ದೆವಾಕ್ ಉಲೊ ಮಾರ್ಲೊ.

ಮೌನ್ ಜಾಲ್ಲ್ಯಾ ವಾತಾವರಣಾಕ್ ಗುರ್ಕಾರಾನ್ ತಾಳೊ ಸದೀಳ್ ಕರ್ನ್ ಬ್ರೇಕ್ ಘಾಲಿ, “ಸಿರ್ಲಾಬಾ ತುಕಾ ಎಕ್ ಬರಿ ಖಬರ್ ಹಾಡುನ್ ಅಯ್ಲ್ಯಾಂವ್". ಹಾಂವ್ ಅಯ್ಕುಂಕ್ ಉತ್ಸಾಹಿತ್ ಜಾಲೊಂ.  ಬಾಬಾಚೆಂ ಖುಶೆನ್ ವೋಂಟ್ ರುಂದಾಲೆ. 

"ಹೊ ಡೆಸ್ಮಂಡ್, ಆಮ್ಚ್ಯಾ ಕೋನಿಚೊ ಈಷ್ಟ್. ಕೋನಿ ಸಾಂಗಾತಾಚ್ ಕಾಮ್ ಕರ್ತಾ, ಬರೊ ಭುರ್ಗೊ" ಗುರ್ಕಾರಾನ್ ಅಯಿಲ್ಲ್ಯಾ ತರ್ನ್ಯಾಟ್ಯಾಚಿ ವಳಕ್ ಸಾಂಗ್ಲಿ. ಹಾಂವ್ ನಿದ್‌ಲ್ಲ್ಯಾ ಥಾವ್ನ್‌ಚ್ ತಾಚೆ ವರ್ಯ್ ಮ್ಹಜಿ ದೀಶ್ಟ್ ಚರಯ್ಲಿ. ಲಾಂಬ್ ಜೀವ್, ಖಾಡ್ ಮಿಶಿ ತಾಸ್‌ಲ್ಲೆಂ ಗೊರೆಂಚ್ ಸೊಭಿತ್ ಮುಕಾಮಳ್, ವಿಶಾಲ್ ಹರ್ಧೆಂ ಗೊಮ್ಟ್ಯಾಂತ್ ಮೊಟಿ ಚೈನ್. ಗುಂಗುರ್ ಕೇಸ್ ಪಳೆಂವ್ಕ್ ಅಕರ್ಶಿತ್ ದಿಸ್ತಾಲೊ.

“ಜರ್ ತುಮ್ಚೆಂ ಶಾಭಿತಾ ಮನ್ ಕರಿತ್ ತರ್, ಹ್ಯಾಚ್ ವರ್ಸಾ ಕಾಜಾರ್ ಜಾಂವ್ಕ್ ಡೆಸ್ಮಂಡ್ ತಯಾರ್ ಆಸಾ”. ಬಾಬಾಕ್ ಸಮ್ಜಂಕ್ ನಾ ಜಾಯ್ಜಯ್, ಬಾಬಾಚ್ಯೊ ಆಸ್ಡ್ಯೊ ಗಾಂಟಾಲ್ಲ್ಯೊ ಪಳೆವ್ನ್, ಬಾಬಾಚ್ಯಾ ಮತಿಂತ್ ಧಾಂವ್ಚೆಂ ಸವಾಲ್ ಜಾಣಾ ಜಾಲ್ಲೊ ಗುರ್ಕಾರ್, "ಡೆಸ್ಮಂಡಾಚಿ ಅವಯ್ ಬಾಪಯ್ ತೊ ಕಾಲೇಜಿಂತ್ ಆಸ್ತಾನಾಂಚ್ ಎಕಾ ಎಕ್ಸಿಡೆಂಟಾಂತ್ ಮರಣ್ ಪಾವ್ಲ್ಯಾಂತ್. ಅವಯ್ ಬಾಪಯ್ಕ್ ಎಕ್ಲೊಚ್ ಪೂತ್ ತೊ, ತಾಂಚ್ಯಾ ಮರ್ಣಾ ನಂತರ್ ಸರ್ಯಾ ಧೈರಾಂಚ್ಯಾ ಆಧಾರಾನ್ ಶಿಕಪ್ ಶಿಕುನ್ ಎಕಾ ಪಾಂವ್ಡಾಕ್ ಪಾವ್ಲಾ. ಕೋನಿಕ್ ತೊ ಭೋವ್ ಮೊಗಾಚೊ ಈಷ್ಟ್. ಆಮ್ಚ್ಯಾ ಕೋನಿನ್ ತುಮ್ಚ್ಯಾ ಘರ್ಚಿ ಆನಿಂ ಶಾಭಿತಾಚಿ ವಿಷಯ್ ಸಗ್ಳಿ ತಾಕಾ ಸಾಂಗ್ಲ್ಯಾ. ತೊ ತುಜ್ಯಾ ಧುವೆಲಾಗಿಂ ಕಾಜಾರ್ ಜಾಂವ್ಕ್ ಮನಪೂರ್ವಾಕೀ ಒಪ್ವಲಾ" ಮ್ಹಣ್ತಾನಾ ಆಮ್ಕಾಂ ಜಾಲ್ಲೊ ಸಂತೊಸ್ ಇತ್ಲೊ ಆನಿಂ ತಿತ್ಲೊ ನಂಯ್.

ಭಯ್ಣಿಚ್ಯಾ ಗಾಲಾರ್ ತಾಂಬ್ಸಾನ್ ಚರ್‌ಲ್ಲಿ. ಭಯ್ಣ್ ಧರ್ನಿಕ್ ಪಳೆವ್ನ್ ಪಾಯಾನಿಂಚ್ ಧರ್ಣಿರ್ ಚಿತ್ರ್ ಸೊಡಯ್ತಾಲೆಂ.

"ಅಂಕಲ್ ತುಮಿಂ ಭಿಯೆನಾಕಾತ್. ಕಾಜಾರಾ ಉಪ್ರಾಂತ್ ಡೆಸ್ಮಂಡ್ ತುಮ್ಚೆಂ ಸಾಂಗಾತಾಚ್ ತುಮ್ಚ್ಯಾಚ್ ಘರಾ ಆಸ್ತಲೊ. ಹಾಂವ್ ಭಯ್ಣ್ ಮುಣುನ್ ಮಾಂದ್ಚ್ಯಾ ಶಾಭಿತಾಚೆಂ ಕಾಜಾರ್ ಹಾಂವ್‌ಚ್ ಮುಕಾರ್ ರಾವುನ್ ಮ್ಹಜ್ಯಾ ಮೊಗಾಚ್ಯಾ ಈಷ್ಟಾಲಾಗಿಂ ಕರಯ್ತಾಂ" ಕೋನಿನ್ ಸಾಂಗ್ತಾನಾ ಮ್ಹಜೆ ದೊಳೆ ಉಪ್ಕಾರಿ ಮ್ಹನಾಚಿಂ ದುಖಾಂ ಗಳಯ್ ಲಾಗ್ಲೆಂ.

ಡೆಸ್ಮಂಡಾನ್ ಯೇವ್ನ್ ಬಾಬಾಲಾಗಿಂ ಬೆಸಾಂವ್ ಮಾಗ್ಲೆಂ. ಭಯ್ಣ್ ಸಗ್ಳೆಂಚ್ ಲಜೆನ್ ಭುದ್‌ಲ್ಲ್ಯಾಬರಿ ದಿಸ್ತಾಲೆಂ.‍ ಭಯ್ಣಿಚ್ಯಾ ತ್ಯಾಗಾಕ್ ದೆವಾನ್ ತಾಕಾ ಖರೆಂಚ್ ವರ್ತೆಂ ಇನಾಮ್ ದಿಲ್ಲೆಂ. ಭಾವ್ ಜಾವ್ನ್ ಹಾಂವೆ ಕರಿಜಾಯ್ ಜಾಲ್ಲೆಂ ಕಾರ್ಯೆಂ ಕೋನಿನ್ ಶಾಭಿತಾಕ್ ಅಪ್ಲ್ಯಾ ಭಯ್ಣಿಚೊ ಮಾನ್ ದೀವ್ನ್ ಜವಾಬ್ದಾರೆಕ್ ಖಾಂದ್ ಮಾರ್ತಾನಾ ಮ್ಹಜೆಂ ಕಾಳಿಜ್ ಭರುನ್ ಆಯ್ಲೆಂ.

ಆಮ್ಕಾಂ ಬೆಸಾಂವಾ ಮಾಗುನ್ ಧಾಡ್ನ್ ದಿಲ್ಲ್ಯಾ ಮಾಂಯ್ಕ್ ನಿಯಾಳ್ನ್ ಮ್ಹಜೆ ದೊಳೆ ವಣ್ತಿರ್ ಉಮ್ಕಾಂಳ್ಚ್ಯಾ ಮಾಂಯ್ಚಾ ತಸ್ವೆರೆಚೆರ್ ಧಾಂವ್ಲೆ.  

ಪ್ರೀತಾ ಮಿರಾಂದ, ವಾಲೆನ್ಸಿಯಾ.