ಕವಿ ಸಮಾಜಿಕ್ ಬದ್ಲಾಪಾಚೆ ಶಿಲ್ಪಿ – ಮಾ। ಬಾ। ಅನಿಲ್ ಸೊಜ್

'ನಿರಂತರ್ ಉದ್ಯಾವರ್' ಆನಿ 'ಆಂಕ್ರಿ' ಥಾವ್ನ್ ಕವಿತಾ - ಲೇಖನ್ ಕಾರ್ಯಾಗಾರ್ ಆನಿ ಕವಿತಾ ಸಂವಾದ್

- ನಾನು ಮರೋಲ್, ತೊಟ್ಟಾಮ್  

“ಬದ್ಲಾವಣ್ ಏಕ್ ಮಾತ್ ಶಾಶ್ವತ್ ಆನಿ ಪ್ರಕೃತೆಚೆಂ ನಿಯಮ್ ಮ್ಹಣ್ಚೆಂ ಆಮಿ ಅಯ್ಕಾಲಾಂ. ಪುಣ್ ಸಮಾಜೆಂತ್ ಬದ್ಲಾವಣ್ ಅಪಾಪಿಂ ಜಾಯ್ನಾ, ಬದ್ಲಾವಣೆಕ್ ಚಾಲನಾಚಿ ಗರ್ಜ್ ಪಡ್ತಾ. ಆನಿ ಚಡಾವತ್ ಸಮಾಜಿಕ್ ಬದ್ಲಾವಣೆಕ್ ಚಾಲನ್ ದಿಲ್ಲಿ ಬರ್ಪಾಂನಿ ಮ್ಹಣ್ ಆಮ್ಕಾಂ ವಾಚುಂಕ್ ಮೆಳ್ತಾ. ಸಮಾಜಿಕ್ ವಿಶಯಾಂಚೆರ್ ಬರವ್ನ್ ಸಮಾಜೆಕ್ ಜಾಗೃತ್ ಕರ್ಚೆ ಕವಿ/ಬರಯ್ಣಾರ್ ಜಾವ್ನಾಸಾತ್ ಸಮಾಜಿಕ್ ಬದ್ಲಾವಣೆಚೆ ಖರೆ ಶಿಲ್ಪಿ” ಮ್ಹಣಾಲೊ ಮಾ। ಬಾ। ಅನಿಲ್ ಸೊಜ್, ವಿಗಾರ್, ಸಾಂ. ಫ್ರಾನ್ಸಿಸ್ ಸಾವೆರಾಚಿ ಫಿರ್ಗಜ್, ಉದ್ಯಾವರ್.

ಮಾ। ಬಾ। ಅನಿಲ್ – ನಿರಂತರ್ ಉದ್ಯವಾರ್ ಆನಿ ಆಂಕ್ರಿ ಜಾಳಿಜಾಗೊ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್, ಆರ್ಸೊ ಪತ್ರಾಚ್ಯಾ ಸಹಕಾರಾನ್, ಸ್ನೇಹಾಲಯ, ಪಾಲೊಟ್ಟಿ ಕಾನ್ವೆಂಟ್, ಸಂಪಿಗೆನಗರ್, ಉದ್ಯಾವರ್ ಹಾಂಗಾಸರ್ ಆಯ್ತಾರಾ, ಜೂನ್ 15 ದನ್ಪಾರಾಂ 3 ವ್ಹರಾರ್ ಮಾಂಡುನ್ ಹಾಡ್‌ಲ್ಲಿ  ‘ಕವಿತಾ / ಲೇಖನ್ ಕಾರ್ಯಾಗಾರ್’  ಆನಿ ‘ಕವಿತಾ ವಾಚನ್ – ಸಂವಾದ್’ ಕಾರ್ಯಾವಳ್ ಉಗ್ತಾವ್ನ್ ಉಲಯ್ತಾಲೊ.

ಮುಕಾರುನ್ ಮಾ। ಬಾ। ಅನಿಲ್ ಮ್ಹಣಾಲೊ “ಎಕಾ ಕಾಳಾರ್ ಆಮ್ಚೆಲಾಗಿಂ ತೀನ್ ವರಾಂಚೆಂ ಫಿಲ್ಮ್ ಪಳೆಂವ್ಕ್ ಆಸ್‌ಲ್ಲೊ ‘ವೇಳ್’ ಆಜ್ ಎಕಾ ಮಿನುಟಾಚ್ಯಾ ರೀಲಾಕ್ ದೆಂವ್ಲಾ. ಮನ್ಶ್ಯಾಕ್ ತಾಚೆಚ್ ವಿಶ್ಯಾಂತ್ ಚಿಂತೂಂಕೀ ವೇಳ್ ನಾ ಜಾಲಾ. ಅಸಲ್ಯಾ ಎಕಾ ಸಂದರ್ಭಾರ್ ಕವಿ, ಸಾಹಿತಿ ಸಮಾಜೆ ವಿಶ್ಯಾಂತ್ ಚಿಂತೂಂಕ್ ಆಪ್ಲೊ ವೇಳ್ ಕಾಡ್ತಾತ್ ಆನಿ ನಿರಂತರ್, ಆಂಕ್ರಿ ತಸಲಿಂ ಸಂಘಟನಾಂ ಆನಿ ಹ್ಯಾ ಸಂಘಟನಾ ಪಾಟ್ಲ್ಯಾನ್ ವಾವುರ್ಪಿ ಮನಿಸ್ ಆಪ್ಲೊ ಮೊಲಾದೀಕ್ ‘ವೇಳ್’ ಸಮಾಜೆ ಖಾತಿರ್ ಕಾಡ್ತಾತ್ ತಿ ಗಜಾಲ್ ನೀಜ್ ಜಾವ್ನ್ ವಾಖಣ್ಣೆಕ್ ಪಾವೊ”

ಆಪ್ಲ್ಯಾ ಸಂದೇಶಾಂತ್ ಯುವಜಣಾಂಕ್ ಆನಿ ವಿದ್ಯಾರ್ಥಿಂಕ್ ವಾಟ್ಸಪ್ ಯುನಿವರ್ಸಿಟಿ ಥಾವ್ನ್ ಪಯ್ಸ್ ರಾವೊಂಕ್ ಆನಿ ನಿರಂತರ್, ಆಂಕ್ರಿ ತಸಲ್ಯಾ ಸಮಾಜ್‌ಮುಖಿ ಸಂಘಟನಾಂನಿ ತವಳ್ ತವಳ್ ಮಾಂಡುನ್ ಹಾಡ್ಚಿಂ ಕಾರ್ಯಾಗಾರಾಂ – ಗೋಶ್ಟಿ – ಸಂವಾದ್ ಅಸಲ್ಯಾ ಕಾರ್ಯಕ್ರಮಾಂ ಮುಕಾಂತ್ರ್ ದಿಂವ್ಚ್ಯಾ ಅವ್ಕಾಸಾಂಚೊಂ ಬರೊ ಉಪಯೋಗ್ ಕರುಂಕ್ ಮಾ। ಬಾ। ಅನಿಲ್ ಹಾಣಿ ಉಲೊ ದಿಲೊ.

ಉಡುಪಿ ದಿಯೆಸೆಜೆಚ್ಯಾ ಕರಾವಳ್ ಪ್ರದೇಶಾಂತ್ ಕೊಂಕ್ಣೆಕ್ ಏಕ್ ನವೆಂ ರೂಪ್ ದಿಲ್ಲೆಂ ಸಂಘಟನ್ ನಿರಂತರ್ ಉದ್ಯಾವರ್ ಹಾಣಿಂ ಆಪ್ಲ್ಯಾ ಆಸ್ಥಿತ್ವಾಚ್ಯಾ ಆಟ್ವ್ಯಾ ವರ್ಸಾಕ್ ಪಾಂಯ್ ತೆಂಕ್ಚ್ಯಾ ಉಗ್ಡಾಸಾಕ್, ತರ್ನ್ಯಾ ಕವಿಂಕ್ ಉತ್ತೇಜನ್ ದಿಂವ್ಚ್ಯಾ ಉದ್ದೇಶಾನ್ – ಆಂಕ್ರಿ ಜಾಳಿಜಾಗೊ ಆನಿ ಕೊಂಕ್ಣಿ ಸಾಹಿತಿಕ್ ಬರ್ಪಾಂನಿ ಸದಾಂಚ್ ನವೆಸಾಂವ್ ದಿಂವ್ಕ್ ಪ್ರೇತನ್ ಕರ್ಚೆಂ ಪತ್ರ್ ಆರ್ಸೊ ಹಾಂಚ್ಯಾ ಸಹಕಾರಾನ್ “ಕೊಂಕ್ಣಿ ಕವಿತಾ/ ಲೇಖನ್ ಬರೊವ್ಪ್ಯಾಂಕ್ ಕಾರ್ಯಾಗಾರ್ ಆನಿ ಕೊಂಕ್ಣಿ ಕವಿಗೋಶ್ಟಿ” ಕಾರ್ಯೆಂ ಆಸಾ ಕೆಲ್ಲೆಂ. ಶಿರಾಧಾರಿಂಚೊ ಪಾವ್ಸ್ ಆಸ್ಲೊ ತರೀ, ಕೊಂಕ್ಣೆಚ್ಯಾ ಮೊಗಾನ್ ಸಾಲ್‍ಭರ್ ಸಾಹಿತ್ಯ್ ಪ್ರೇಮಿ ಹಾಜರ್ ಆಸೊನ್, ಕಾರ್ಯಾವಳ್ ಯಶಸ್ವಿ ಜಾಲಿ.

ಮಾನಾಚ್ಯಾ ಸಯ್ರ್ಯಾಂ ಸವೆಂ ಮುಖೆಲ್ ಸಯ್ರೊ ಜಾವ್ನ್ ಆಯಿಲ್ಲ್ಯಾ ಉದ್ಯಾವರ್ ಫಿರ್ಗಜೆಚೊ ವಿಗಾರ್ ಮಾ। ಬಾ। ಆನಿಲ್ ಡಿ’ಸೋಜಾ ಹಾಣಿಂ ದಿವೊ ಪೆಟೊವ್ನ್ ಹ್ಯಾ ಕಾರ್ಯಾಚೆಂ ಉದ್ಘಾಟನ್ ಕೆಲೆಂ. ಸಹಾಯಕ್ ವಿಗಾರ್ ಬಾ। ಸ್ಟೀಫನ್ ರೊಡ್ರಿಗಸ್ ಆನಿ ಪಾಲೊಟ್ಟಿ ಕೊವೆಂತಾಚಿ ವ್ಹಡಿಲ್ನ್ ಮಾ। ಭ। ಲೀನಾ ಹಿಣೆ ಸಾಂಗಾತ್ ದಿಲೊ. ‘ನಿರಂತರ್ ಉಧ್ಯಾವರ್’ ಹಾಚೊ ತಾಂಡೆಲಿ ಮಾನೇಸ್ತ್ ರೊಶನ್ ಕ್ರಾಸ್ಟಾ ಹಾಣೆ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ. ವಿಗಾರ್ ಮಾ। ಬಾ। ಆನಿಲ್ ಡಿ’ಸೋಜಾ ಹಾಣಿಂ ಆಪ್ಲ್ಯಾ ಉಲವ್ಪಾಂತ್ ದೆಣ್ಯಾಂ ವಿಶ್ಯಾಂತ್ ಬರಯಿಲ್ಲಿ ಕವಿತಾ ಸಾದರ್ ಕೆಲಿ ಆನಿ ಕಾರ್ಯಾಕ್ ಬರೆಂ ಮಾಗ್ಲೆಂ.

ಉಪ್ರಾಂತ್ ಕೊಂಕ್ಣಿ ಕವಿತಾ ಬೊರೊಂವ್ಚೆ ವಿಶಿಂ ಕವಿಂಕ್ ರಚ್ಚೊ ಕವಿ ಮೆಲ್ವಿನ್ ರೊಡ್ರಿಗಸ್ – ನಿಮಂತ್ರಕ್, ಕೊಂಕಣಿ ಸಲ್ಲಾಗಾರ್ ಮಂಡಳ್ ಸಾಹಿತ್ಯ್ ಆಕಾಡೆಮಿ, ನ್ಯೂ ಡೆಲ್ಲಿ ಹಾಣೆ ಕಾರ್ಯಾಗಾರ್ ಚಲೊವ್ನ್ ವೆಲೆಂ. ಹ್ಯಾ ಕಾರ್ಯಾಗಾರಾಂತ್ ಕವಿತಾ ಬೊರೊಂವ್ಕ್ ಜಾಯ್ ಜಾಲ್ಲಿಂ ಮುಳಾವಿಂ ಆನಿ ಗರ್ಜೆಚಿಂ ಸೂಚನಾಂ ತಾಣೆಂ ಹಾಜರ್ ಆಸ್‍ಲ್ಲ್ಯಾಂ ಸವೆಂ ವಾಂಟುನ್ ಘೆತ್ಲಿಂ. ಎಕ್ ಕವಿತಾ ಬೊರಯ್ತಾನಾ ಸಾವ್ಳಿ ರುಪಾಂ ಆನಿ ಜೊವ್ಳಿ ರುಪಾಂ ಕಿತ್ಲಿಂ ಗರ್ಜೆಚಿಂ ತೆಂ ದಾಕ್ಲ್ಯಾ ಸಮೇತ್ ವಿವರ್ಸಿಲೆಂ. ಹಾಜರ್ ಆಸ್‍ಲ್ಲ್ಯಾ ಸಮೇಸ್ತಾಂಕ್ ಕವಿತಾ ಸಂಪೂರ್ಣ್ ಕರುಂಕ್ ಪ್ರಾಯೋಗಿಕ್ ರಿತಿನ್ ಮೆತೆರ್ ಕರುನ್ ಹಾಜರ್ ಆಸ್‍ಲ್ಲ್ಯಾಂಕ್ ಕವಿತಾ ವಯ್ರ್ ಚಡ್ತಿಕ್ ಆಸಕ್ಯ್ ಉಬ್ಜಾಶೆಂ ಕೆಲೆಂ.

ಉಪ್ರಾಂತ್ ಕಿಟಾಳ್ ಜಾಳಿಜಾಗ್ಯಾಚೊ ಸಂಪಾದಕ್ ಎಚ್ಚೆಮ್ ಪೆರ್ನಾಳ್ – ವಾಂಗ್ಡಿ, ಕೊಂಕಣಿ ಸಲ್ಲಾಗಾರ್ ಮಂಡಳ್, ಸಾಹಿತ್ಯ್ ಆಕಾಡೆಮಿ, ನ್ಯೂ ಡೆಲ್ಲಿ ಹಾಣೆ ಲೇಖನಾಂ ಬೊರೊಂವ್ಚ್ಯಾ ವಿಶಿಂ ಕಾರ್ಯಾಗಾರ್ ಚಲೊವ್ನ್ ವೆಲೆಂ. ಏಕ್ ಪರಿಣಾಮ್‍ಕಾರಿ ಲೇಖನ್ ಬೊರೊಂವ್ಕ್ ಕಿತೆಂ ಸರ್ವ್ ಸಂಗ್ತಿ ಮತಿಂತ್ ದವರುಂಕ್ ಜಾಯ್ ತೆಂ ಸಾದ್ಯಾ ರಿತಿನ್ ಲೋಕಾಕ್ ಸಮ್ಜಾಸಾರ್ಕೆಂ ವಿವರ್ಸಿಲೆಂ.

ಕಾರ್ಯಾಗಾರಾ ಉಪ್ರಾಂತ್ ಅರ್ಸೊ ಸಂಪಾದಕ್ ಫಾಮಾದ್ ಕವಿ ವಿಲ್ಸನ್ ಕಟೀಲ್ ಹಾಚ್ಯಾ ಮುಕೆಲ್ಪಣಾರ್ ಕವಿತಾ ವಾಚನ್ – ಸಂವಾದ್ ಕಾರ್ಯಾವಳ್ ಚಲ್ಲಿ. ನಾಮ್ಣೆಚೆ ಕವಿ ಸನ್ನು ಮೊನಿಸ್ ಬೊಳಿಯೆ, ಕ್ಯಾಥರಿನ್ ರೋಡ್ರಿಗಸ್, ಕಟ್ಪಾಡಿ, ಸ್ಟ್ಯಾನಿ ಬೆಳಾ, ಪ್ರಮಿಳಾ ಫ್ಲಾವಿಯಾ, ಕಾರ್ಕೊಳ್, ಪಿ.ಜೆ.ಕರುಗಳ್ನಡೆ ಆನಿ ಜೀತಾ ಗೊನ್ಸಾಲ್ವಿಸ್, ಬಾರ್ಕುರ್ ಹಾಣಿಂ ತಾಂಚ್ಯೊ ವಿಂಚ್ಣಾರ್ ದೊದೋನ್ ಕವಿತಾ ವಾಚ್ಲ್ಯೊ ಆನಿ ತ್ಯೆ ಕವಿತೆಂಚೇರ್ ವಿಲ್ಸನ್ ಕಟೀಲ್ ಹಾಣೆಂ ಕವಿಲಾಗಿಂ ಸಂವಾದ್ ರಚ್ಲೊ. ಬಾಪಯಾಂಚ್ಯಾ ದಿಸಾಕ್ ಸರಿ ಜಾವ್ನ್ ಕವಿ ವಿಲ್ಸನ್ ಕಟೀಲಾನ್ ಬಾಪಯ್ ಆನಿ ಬಾಂಕಾಕ್ ಸರ್ ಕರ್ನ್ ಬರಯಿಲ್ಲಿ ಆಪ್ಲಿ ಬಾಂಕ್ ಕವಿತಾ ಪೇಶ್ ಕೆಲಿ.

ಉಪ್ರಾಂತ್ ಚಲ್‍ಲ್ಲ್ಯಾ ಸಮಾರೋಪ್ ಕಾರ್ಯಾಂತ್ ಉದ್ಯಾವರ್ ಫಿರ್ಗಜೆಚ್ಯಾ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ವಿಲ್ಫ್ರೆಡ್ ಡಿ’ಸೋಜಾ ಹಾಣಿ ಕಾರ್ಯೆಂ ಆಯೋಜನ್ ಕೆಲ್ಲ್ಯಾಂಕ್ ಆಪ್ಲೆ ಶುಭಾಶಯ್ ಪಾಟಯ್ಲೆ. ಕೊಂಕ್ಣೆಚ್ಯಾ ಸಮಗ್ರ್ ವಾಡಾವಳೆ ಖಾತಿರ್ ಆನಿ ಆಮ್ಚ್ಯಾ ತಾಲೆಂತಾಂಕ್ ಸಹಕಾರ್ ದಿಂವ್ಚ್ಯಾ ಪಾಸೊತ್ ಆಸಲಿಂ ಕಾರ್ಯಿಂ ತವಳ್ ತವಳ್ ಆಸಾ ಕರುಂಕ್ ಜಾಯ್ ಮ್ಹಣ್ ತಾಣಿ ಉಲೊ ದಿಲೊ. ಕಾರ್ಯಾಗಾರಾಂತ್ ವಾಂಟೊ ಘೆತ್‍ಲ್ಲ್ಯಾ ಸರ್ವಾಂಕ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ. ಕವಿಂಕ್, ಕಾರ್ಯಾಗಾರ್ ಚಲೊವ್ನ್ ವೆಲ್ಲ್ಯಾಂಕ್ ಉಪ್ಕಾರ್ ಆಟವ್ನ್ ಮಾನ್ ಕೆಲೊ. ಉದ್ಯಾವರ್ ಆಸ್‌ಪಾಸ್ ಫಿರ್ಗಜಾಂ ಥಾವ್ನ್ ಸರಿಸುಮಾರ್ ಸತ್ತರ್ ಲೊಕಾನ್ ಕಾರ್ಯಾವಳಿಚೊ ಫಾಯ್ದೊ ಜೊಡ್ಲೊ.

ಆಂಕ್ರಿ ಜಾಳಿ ಜಾಗ್ಯಾಚೊ ಮುಖೆಲಿ ಸನ್ನು ಮೊನಿಸ್ ಹಾಣೆ ದಿನ್ವಾಸ್ ಪಾಟವ್ನ್ ಸಾಹಿತ್ಯ್ ಸಂಬಂದಿ ಕಾರ್ಯಾಂಕ್ ಆಂಕ್ರಿಚೊ ಸಹಕಾರ್ ಸದಾಂಚ್ ಆಸಾ ಮ್ಹಣ್ ಭಾಸಾಯ್ಲೆಂ. ನಿರಂತರ್ ಉದ್ಯಾವರ್ ಹಾಚೊ ಸ್ಥಾಪಕಾಧ್ಯಕ್ಷ್ ಸ್ಟೀವನ್ ಕುಲಾಸೊ ಹಾಣೆ ಅರ್ಥಾಭರಿತ್ ರಿತಿನ್ ಕಾರ್ಯೆಂ ಚಲವ್ನ್ ವೆಲೆಂ.

……………………..

Kovi somajik bodlapache xilpi – ma। ba। Anil Soz

'Nirantatr Udyavar' ani 'Aankri' thaun Kovita - Lekhon Kareagar ani Kovita Somvad

- Nanu Morol, Tottam' 

“Bodlaunn ek mat xaxvot ani prokritechem niyom' mhonnchem ami oykalam. Punn somajent bodlaunn opapim zaina, bodlaunnek chalonachi gorz poddta. Ani choddaut somajik bodlaunnek chalon dil'li borpamni mhonn amkam vachunk mellta. Somajik vixoyancher boroun somajek zagrit korche kovi/boroinnar zaunasat somajik bodlaunneche khore xilpi”  mhonnalo ma । ba । Anil D’Souza, vigar, sam. St. Francis Xavier firgoz, Udyavar.

Ma। ba। Anil – Nirantatr, Udyavar, Ankri zallizago hanchea zodd asreakhal, ‘Arso’ potrachea sohokaran, Snehalaya, Pallotti Convent, Sampge Nagar, Udyavar hangasor aitara, zun 15 donparam 3 vhorar manddun hadd‌l'li  ‘kovita / lekhon kareagar’  ani ‘kovita vachon – somvad’  kareavoll ugtaun uloitalo.

Mukarun ma। ba। Anil mhonnalo “eka kallar amchelagim tin voranchem film' polleunko as‌l'lo ‘vell’  az eka minuttachea rilak demvla. Monxeak tachech vixeant chintunki vell na zala. Osolea eka sondorbhar kovi, sahiti somaje vixeant chintunk aplo vell kaddtat ani Nirantatr ani Ankri tosolim songhottonam ani hea songhottona pattlean vavurpi monis aplo moladik ‘vell’  somaje khatir kaddtat ti gozal niz zaun vakhonn'nnek pavo”

Aplea sondexant yuvozonnank ani videarthink WhatsApp University thaun pois ravonk ani nirontor, ankri tosolea somaz‌mukhi songhottonamni toull toull manddun haddchim kareagaram – goxtti – somvad osolea karyokromam mukantr dimvchea ovkasanchom boro upoyog korunk ma। ba। Anil hanni ulo dilo.

Udupi diesejechea koraull prodexant konknnek ek novem rup dil'lem songhotton Nirantatr, Udyavar hannim aplea asthitvachea attvea vorsak pam-i tenkchea ugddasak, tornea kovink ut'tezon dimvchea ud'dexan – Aankri zallizago ani konknni sahitik borpamni sodanch novesamv divonko preton korchem potr ‘Arso’  hanchea sohokaran “konknni kovita/ lekhon boroupeank kareagar ani konknni kovigoxtti”  karyem asa kel'lem. Xiradharincho paus aslo tori, konknnechea mogan sal‍bhor sahity premi hazor ason, kareavoll yoxosvi zali.

Manachea soiream sovem mukhel soiro zaun ayil'lea Udyavar firgojecho vigar ma। ba। Anil D’Souza hannim divo pettoun hea kareachem udghatton kelem. Sohaik vigar ba। Stephen Rodrigues ani Pallotti Conventachi vhoddiln ma। bho। Leena hinne sangat dilo. ‘Nirantatr, Udyavar’ hacho tanddeli manest Roshan Crasta hanne soireank yeukar maglo. Vigar ma। ba। Anil Dsouza hannim aplea uloupant denneam vixeant  boroyil'li kovita sador keli ani kareak borem maglem.

Uprant konknni kovita boromvche vixim kovink rochcho kovi Melwyn Rodrigues – nimontrok, konkonni sol'lagar monddoll sahity akaddemi, New Delhi hanne kareagar choloun velem. Hea kareagarant kovita borounko zai zal'lim mullavim ani gorjechim suchonam tannem hazor as‍l'leam sovem vanttun ghetlim. Ek kovita boroitana saulli rupam ani zoulli rupam kitlim gorjechim tem daklea somet vivorsilem. Hazor as‍l'lea somestank kovita sompurnn korunk prayogik ritin meter korun hazor as‍l'leank kovita voir choddtik asoky ubzaxem kelem.

Uprant ‘Kittall’ zallizageacho sompadok HM Pernal – vangddi, konkonni sol'lagar monddoll, sahity akaddemi, New Delhi hanne lekhonam boromvchea vixim kareagar choloun velem. Ek porinnam'‍kari lekhon borounko kitem sorv songti motint dourunk zai tem sadea  ritin lokak somzasarkem vivorsilem.

Kareagara uprant ‘Arso’ sompadok famad kovi Wilson Kateel hachea mukelponnar kovita vachon – somvad kareavoll chol'li. Namnneche kovi Sannu Monis, Boliye, Catherine Rodrigues-Katapadi, Stany Bela, Pramila Flavia, Karkala, P.J. Karugalnade ani Zeeta Gonsalves-Barkur hannim tancheo vinchnnar dodon kovita vachleo ani tye kovitencher Wilson Kateel hannem kovilagim somvad  rochlo. Bapoyanchea disak sori zaun kovi Wilson Kateel bapoi ani bankak sor korn boroyil'li apli ‘Baank’  kovita pex keli.

Uprant chol‍l'lea somarop kareant Udyavar firgojechea goullik porixodecho upadhyokx Wilfred D’Souza hanni karyem ayozon kel'leank aple xubhaxoi pattoile. Konknnechea somgr vaddaulle khatir ani amchea talentank sohkar dimvchea pasot aslim karyim toull toull asa korunk zai mhonn tanni  ulo dilo. Kareagarant vantto ghet‍l'lea sorvank promann potram vanttlim. Kovink, kareagar choloun vel'leank upkar attoun man kelo. Udyavar as‌pas firgozam thaun sorisumar sot'tor lokan kareavollicho faido zoddlo.

Ankri zalli zageacho mukheli Sannu Monis hanne dinvas pattoun sahity sombondi kareank ankricho sohkar sodanch asa mhonn  bhasailem. Nirantara Udyavar hacho sthapkadhyokx Stephen Colaco hanne orthabhorit ritin karyem choloun velem.

………………….

कवी समाजीक बदलापाचे शिल्पी – मा। बा। अनील सोज

'निरंतर उद्यावर' आनी 'आंक्री' थावन कविता - लेखन काऱ्यागार आनी कविता संवाद

- नानू मरोल, तोट्टाम

“बदलावण एक मात शाश्वत आनी प्रकृतेचें नियम म्हणचें आमी अयकालां. पूण समाजेंत बदलावण अपापीं जायना, बदलावणेक चालनाची गर्ज पडता. आनी चडावत समाजीक बदलावणेक चालन दिल्ली बर्पांनी म्हण आमकां वाचुंक मेळता. समाजीक विशयांचेर बरवन समाजेक जागृत कर्चे कवी / बरयणार जावनासात समाजीक बदलावणेचे खरे शिल्पी”  म्हणालो मा। बा। अनील सोज, विगार, सां. फ्रान्सीस सावेराची फिर्गज, उद्यावर.

मा। बा। अनील – निरंतर उद्यवार आनी आंक्री जाळिजागो हांच्या जोड आसऱ्याखाल, आर्सो पत्राच्या सहकारान, स्नेहालय, पालोट्टी कान्वेंट, संपिगेनगर, उद्यावर हांगासर आयतारा, जून १५ दनपारां ३ व्हरार मांडून हाड‌ल्ली ‘कविता / लेखन काऱ्यागार’ आनी ‘कविता वाचन – संवाद’ काऱ्यावळ उग्तावन उलयतालो.

मुकारून मा। बा। अनील म्हणालो “एका काळार आमचेलागीं तीन वरांचें फिल्म पळेवंक आस‌ल्लो ‘वेळ’ आज एका मिनुटाच्या रीलाक देंवला. मनश्याक ताचेच विश्यांत चिंतूंकी वेळ ना जाला. असल्या एका संदर्भार कवी, साहिती समाजे विश्यांत चिंतूंक आपलो वेळ काडतात आनी निरंतर, आंक्री तसलीं संघटनां आनी ह्या संघटना पाटल्यान वावुर्पी मनीस आपलो मोलादीक ‘वेळ’ समाजे खातीर काडतात ती गजाल नीज जावन वाखण्णेक पावो”

आपल्या संदेशांत युवजणांक आनी विद्यार्थिंक वाटसप युनिवर्सिटी थावन पयस रावोंक आनी निरंतर, आंक्री तसल्या समाज‌मुखी संघटनांनी तवळ तवळ मांडून हाडचीं काऱ्यागारां – गोश्टी – संवाद असल्या काऱ्यक्रमां मुकांत्र दिंवच्या अवकासांचों बरो उपयोग करुंक मा। बा। अनील हाणी उलो दिलो.

उडुपी दियेसेजेच्या करावळ प्रदेशांत कोंकणेक एक नवें रूप दिल्लें संघटन निरंतर उद्यावर हाणीं आपल्या आस्थित्वाच्या आटव्या वर्साक पांय तेंकच्या उगडासाक, तर्न्या कविंक उत्तेजन दिंवच्या उद्देशान – आंक्री जाळिजागो आनी कोंकणी साहितीक बर्पांनी सदांच नवेसांव दिवंक प्रेतन कर्चें पत्र आर्सो हांच्या सहकारान “कोंकणी कविता / लेखन बरोवप्यांक काऱ्यागार आनी कोंकणी कविगोश्टी” काऱ्यें आसा केल्लें. शिराधारिंचो पावस आसलो तरी, कोंकणेच्या मोगान साल‍भर साहित्य प्रेमी हाजर आसोन, काऱ्यावळ यशस्वी जाली.

मानाच्या सयऱ्यां सवें मुखेल सयरो जावन आयिल्ल्या उद्यावर फिर्गजेचो विगार मा। बा। आनील डी’सोजा हाणीं दिवो पेटोवन ह्या काऱ्याचें उदघाटन केलें. सहायक विगार बा। स्टीफन रोड्रिगस आनी पालोट्टी कोवेंताची व्हडिलन मा। भ। लीना हिणे सांगात दिलो. ‘निरंतर उध्यावर’ हाचो तांडेली मानेसत रोशन क्रासटा हाणे सयऱ्यांक येवकार मागलो. विगार मा। बा। आनील डी’सोजा हाणीं आपल्या उलवपांत देण्यां विश्यांत बरयिल्ली कविता सादर केली आनी काऱ्याक बरें मागलें.

उपरांत कोंकणी कविता बोरोंवचे विशीं कविंक रच्चो कवी मेलवीन रोड्रिगस – निमंत्रक , कोंकणी सल्लागार मंडळ साहित्य आकाडेमी, न्यू डेल्ली हाणे काऱ्यागार चलोवन वेलें. ह्या काऱ्यागारांत कविता बोरोवंक जाय जाल्लीं मुळावीं आनी गर्जेचीं सूचनां ताणें हाजर आस‍ल्ल्यां सवें वांटून घेतलीं. एक कविता बोरयताना सावळी रुपां आनी जोवळी रुपां कितलीं गर्जेचीं तें दाकल्या समेत विवर्सिलें. हाजर आस‍ल्ल्या समेसतांक कविता संपूर्ण करुंक प्रायोगीक रितीन मेतेर करून हाजर आस‍ल्ल्यांक कविता वयर चडतीक आसक्य उबजाशें केलें.

उपरांत किटाळ जाळिजाग्याचो संपादक एच्चेम पेर्नाळ – वांगडी, कोंकणी सल्लागार मंडळ, साहित्य आकाडेमी, न्यू डेल्ली हाणे लेखनां बोरोंवच्या विशीं काऱ्यागार चलोवन वेलें. एक परिणाम‍कारी लेखन बोरोवंक कितें सर्व संग्ती मतिंत दवरुंक जाय तें साद्या रितीन लोकाक समजासार्कें विवर्सिलें.

काऱ्यागारा उपरांत अर्सो संपादक फामाद कवी विल्सन कटील हाच्या मुकेल्पणार कविता वाचन – संवाद काऱ्यावळ चल्ली. नामणेचे कवी सन्नू मोनीस बोळिये, क्याथरीन रोड्रिगस, कटपाडी, स्ट्यानी बेळा, प्रमिळा फ्लाविया, कार्कोळ, पी.जे.करुगळनडे आनी जीता गोन्सालवीस, बार्कूर हाणीं तांच्यो विंचणार दोदोन कविता वाचल्यो आनी त्ये कवितेंचेर विल्सन कटील हाणें कविलागीं संवाद रचलो. बापयांच्या दिसाक सरी जावन कवी विल्सन कटीलान बापय आनी बांकाक सर कर्न बरयिल्ली आपली बांक कविता पेश केली.

उपरांत चल‍ल्ल्या समारोप काऱ्यांत उद्यावर फिर्गजेच्या गोवळीक परिषदेचो उपाध्यक्ष विलफ्रेड डी’सोजा हाणी काऱ्यें आयोजन केल्ल्यांक आपले शुभाशय पाटयले. कोंकणेच्या समग्र वाडावळे खातीर आनी आमच्या तालेंतांक सहकार दिंवच्या पासोत आसलीं काऱ्यीं तवळ तवळ आसा करुंक जाय म्हण ताणी उलो दिलो. काऱ्यागारांत वांटो घेत‍ल्ल्या सर्वांक प्रमाण पत्रां वांटलीं. कविंक, काऱ्यागार चलोवन वेल्ल्यांक उपकार आटवन मान केलो. उद्यावर आस‌पास फिर्गजां थावन सरिसुमार सत्तर लोकान काऱ्यावळिचो फायदो जोडलो.

आंक्री जाळी जाग्याचो मुखेली सन्नू मोनीस हाणे दिन्वास पाटवन साहित्य संबंदी काऱ्यांक आंक्रिचो सहकार सदांच आसा म्हण भासायलें. निरंतर उद्यावर हाचो स्थापकाध्यक्ष स्टीवन कुलासो हाणे अर्थाभरीत रितीन काऱ्यें चलवन वेलें.