ಚೆಡುಂ ಯೆತಾ

ಕಾಳ್ಯಾ ಮೊಡಾಂನಿ ಭರ್ಲಾ ಆಕಾಸ್

ಥೊಡ್ಯಾಚ್ ವೆಳಾನ್ ವೊತ್ತಾ ಪಾವ್ಸ್

ವ್ಹರಾಂ ಜಾಲಿಂ ಸಾಡೆ ಪಾಂಚ್

ಚೆಡುಂ ಮ್ಹಜೆಂ ಯೆತಾ ಆಜ್

ಪಾವ್ಸಾ ಮ್ಹಜಿ ಭಿರ್ಮತ್ ಪಾವ್

ಇಲ್ಲೊ ವೇಳ್ ವಯ್ರ‍್ಚ್ ರಾವ್

ಚೆಡ್ವಾಕ್ ಮ್ಹಜ್ಯಾ ಭಿಜಯ್ನಾಕಾ

ಲಜೆನ್ ತಾಕಾ ಬುಡಯ್ನಾಕಾ

ವಾರ‍್ಯಾ, ತುಕಾ ಕಿತ್ಯಾಕ್ ಆಮ್ಸೊರ್

ಪಾವಾನಾಕಾ ಆಮ್ಚೆರ್ ಮೊಸೊರ್

ಆಂಗ್ಲೆಂ ತಾಚೆಂ ಉಬಯ್ನಾಕಾ

ಧುಳಿನ್ ತಾಕಾ ವೆಂಗಯ್ನಾಕಾ

ಆಯ್ಕಾ ಸ್ತ್ರಿಯಾಂನೊ ಏಕ್ ಘಡಿ

ಕಾಡಾ ಮೆರೆವಯ್ಲಿ ನೆಜೆ ಪೆಂಡಿ

ಚೆಡುಂ ಮ್ಹಜೆಂ ಗಾದ್ಯಾಂತ್ ಪಡಿ

ನೆಜೆ ವಯ್ರ್ ಉಡ್ತಚ್ ಉಡಿ

ಕೊಸ್ಚ್ಯಾ ರೆಡ್ಯಾಂನೊ ಧಾಂವಾನಾಕಾತ್

ಆಂಗಾರ್ ಚಿಕೊಲ್ ಉಸ್ಳಾಯ್ನಾಕಾತ್

ಚೆಡ್ವಾಕ್ ಮ್ಹಜ್ಯಾ ಬೆಶ್ಟಾಯ್ನಾಕಾತ್

ಗುಂರ್ಕುನ್ ತಾಕಾ ಪಳಯ್ನಾಕಾತ್

ಚೆಡ್ವಾ ಹಳು ದೆಂವೊನ್ ಯೆಗೊ

ಗಾದೆ, ಮೆರೊ ಉಡೊನ್ ಯೆಗೊ

ವಾಳೊ, ನಂಯ್ ಉತ್ರೊನ್ ಯೆಗೊ

ಲೊಕಾಂ ನದರ್ ಚುಕವ್ನ್ ಯೆಗೊ

ಕಿತ್ಯಾಕ್ ಆಜ್ ಹೆಂ ವೇಳ್ ಕಾಡ್ತಾ

ಕಾಳ್ಜಾಂತ್ ಹಾಂಗಾ ದಾಳ್ ಶಿಜ್ತಾ

ದೊಳ್ಯಾ ಖಾಂಚಿಯೆರ್ ಉದಕ್ ದೆಂವ್ತಾ

ಲೋಕ್ ನಾಕಾ ಜಾಲ್ಲೆಂ ಚಿಂತ್ತಾ

ತುಕಾಚ್ ಚಿಂತುನ್ ಆಸಾ ಮನ್

ದೀಸ್ ರಾತ್ ತುಜೆಂಚ್ ಧ್ಯಾನ್

ಬುಡಯ್ನಾಕಾ ಹಿ ಮೊಗಾ ದೊಣ್

ಏಕ್ ಜಾತಾನಾಂ ಹಿಂ ಕಾಳ್ಜಾಂ ದೋನ್

ರೋಶು ಬಾಬಾ, ಬಾರ್ಕುರ್

**********

Cheddum yeta

kallea moddamni bhorla akas

thoddeach vellan vot'ta paus

vhoram zalim sadde panch

cheddum mhojem yeta az

pausa mhoji bhirmot pavo

il'lo vell voiro‍ch ravo

cheddvak mhojea bhizoinaka

lojen taka buddoinaka

varo‍ea, tuka kiteak amsor

pavanaka amcher mosor

anglem tachem uboinaka

dhullin taka vengoinaka

aika striamno ek ghoddi

kadda mereuyli neje penddi

cheddum mhojem gadeant poddi

neje voir uddtoch uddi

koschea reddeamno dhamvanakat

angar chikol usllainakat

cheddvak mhojea bexttainakat

gumrkun taka polloinakat

cheddva hollu demvon yego

gade, mero uddon yego

vallo, nom-i utron yego

lokam nodor chukoun yego

kiteak az hem vell kaddta

kallzant hanga dall xijta

dollea khanchier udok demvta

lok naka zal'lem chint'ta

tukach chintun asa mon

dis rat tujench dhean

buddoinaka hi moga donn

ek zatanam him kallzam don

Roshu Baba, Barkur