ಆದ್ಲೆ ದೀಸ್

ವಾಡ್ಯಾಂತ್ ಎಕಾ ಘರಾ

ಟಿವಿ ಹಾಡ್ಲಿ ತರ್

ಸರ್ವಾನಿಂ ತಾಂಗೆರ್

ಟಿವಿ ಪಳೆಂವ್ಕ್ ವೆಚೆಂ.

ಫಿಲಿಪ್ಸಾಚೊ ರೇಡಿಯೊ

ಘೆವ್ನ್ ಖಾಂದ್ಯಾರ್

ಜ್ಯೊರಾನ್ ಪದ್ ಘಾಲುನ್

ಮಾರ್ಗಾರ್ ಭಂವ್ಚೆಂ.

ತಾಂಬ್ಡ್ಯಾ ಬಸ್ಸಾನಿಂ

ಬಸ್ಚ್ಯಾ ಸಿಟಿ ಖಾತಿರ್

ತುವಾಲೊ ಘಾಲುಂಕ್ ಧಡ್ಬಡ್ಚೆಂ.

ತೊವ್ಶೆಂ ಯಾ ಆಂಬೊ

ಖಾಂವ್ಚ್ಯಾ ಖಾತಿರ್

ಮಾಂಯ್ ಕಡೆ ಪಯ್ಶ್ಯಾಂಕ್

ಜಗಡ್ಚೆಂ.

ವಾಡ್ಯಾಂತ್ ಕಾಜಾರ್ ಆಸ್ಲ್ಯಾರ್

ಮಾಟೊವ್ ಘಾಲುಂಕ್ ವೆಚೆಂ

ಘರಾಚ್ ದುಕೊರ್ ಮಾರ್ನ್

ಕಾಳ್ಜಾನ್ಕಿಟಿ ಖಾಂವ್ಕ್ ರಾಕೊನ್ ರಾಂವ್ಚೆಂ.

ಮಾಟ್ವಾಂತ್ ಧರ್ನಿರ್ ಬಸೊನ್

ಶಿರೊತ್ಯಾನಿಂ ಜೆಂವ್ಚೆಂ

ವೋರ್ನ್ ಭಾಯ್ರ್ ವೆತಾ ಮ್ಹಣ್

ದರ್ವೊಡೊನ್ ಖಾಂವ್ಚೆಂ.

ಧಾ ಬಾರಾ ಮೈಲಾಂ ಚಲೊನ್

ಇಸ್ಕೊಲಾಕ್ ವೆಚೆಂ

ಬ್ಯಾಗಾಂತ್ ಬಿಂಡಾ, ಆಂಬೆ,

ಚಿತುರ್ಲ್ಯೊ ಚೊರ್ನ್ ಹಾಡ್ಚೆಂ.

ಪಾಯಾಂಕ್ ಮೊಚೆ ನಾಸ್ತಾನಾ

ಕಾಂಟ್ಯಾ ಬೊಲ್ಯಾನಿ ರಿಗ್ಚೆಂ

ಕಾಂಟ್ ಬರ್ ವಸ್ತುರ್ ಘೆವ್ನ್

ತಳ್ಯಾಕ್ ಉಂಬ್ಳುಂಕ್ ವೆಚೆಂ.

ಮಾರ್ಗಾರ್ ಕಾರಾಕ್ ದೆಖ್ತಚ್

ತಾಚ್ಯಾ ಪಾಟ್ಲಾನ್ ವೆಚೆಂ

ಐಸ್ ಕ್ಯಾಂಡಿ ಯೆತಾನಾ

ಕ್ವಾಟರ್ ಬಾಟಲ್ ಘೆವ್ನ್ ದಾಂವ್ಚೆ.

ದೋನ್ ರುಪಯ್ ಹಾತಾಂತ್

ಘೆವ್ನ್ ಸಕ್ಡಾಂಕೀ ದಾಕಂವ್ಚೆಂ

ಮಾಂಯ್ ಸಂಗಿ ಮಾರ್ಕೆಟಿಂತ್

ವಡಾ ಖಾಂವ್ಕ್ ಜಗಡ್ಚೆಂ.

ಮೊರಾಚೆ ಪಾಕ್ ಬೂಕಾಭಿತರ್

ದವರ್ನ್ ಪಿಲಾಂಕ್ ರಾಕ್ಚೆಂ

ಧಾವಿ ಕ್ಲಾಸ್ ಮ್ಹಣಾಸರ್ ಧೊಂಪ್ರಾ

ವಯ್ರ್ ಚಡ್ಡಿ ಘಾಲ್ನ್ ಆಸ್ಚೆಂ.

ಚೆಡ್ವಾಂಕ್ ಪಳೆತಾನಾ ಮಯ್ಲಾಂ

ಪಯ್ಸ್ ಲಜೆನ್ ಧಾಂವ್ಚೆಂ

ಕಾಣ್ಯೆ ಬೂಕ್, ಬೂಕಾಭಿತರ್

ದವರ್ನ್ ಲಿಪೊನ್ ವಾಚ್ಚೆಂ.

ಫೆಸ್ತಾ ಪರ್ಬೆಕ್ ನವೆಂ

ವಸ್ತುರ್ ಘಾಲ್ನ್ ಮಿಸಾಕ್ ವೆಚೆಂ

ಲಗ್ನಾಚಿ ಪ್ರಾಯ್ ಜಾಲ್ಯಾರಿ

ಗಾಗ್ರೊ ಬಾಜು ಘಾಲ್ನ್ ಖೆಳ್ಚೆಂ.

ದೊಳ್ಯಾನಿಂ ಉದೆತಾತ್ ದುಖಾಂ

ಪಯ್ಲೆಂಚೆ ದೀಸ್ ತೆ ಚಿಂತಾನಾ

ಆದ್ಲೊ ತೊ ಸಂತೊಸ್ ಉಲ್ಲಾಸ್

ಪರತ್ ಆಮ್ಕಾಂ ಮೆಳ್ಚೊನಾ.

ಆತಾಂಚ್ಯಾ ಭುರ್ಗ್ಯಾಂಕ್

ಸಭಾರ್ ಸೌಲತ್ಯೊ ಆಸ್ಲ್ಯಾರೀ

ಪಯ್ಲೆಂಚೊ ತೊ ಆನಂದ್

ತಾಂಕಾ ಮೆಳ್ಚೊನಾ.

ಟಿ.ವಿ., ಸಿನೆಮಾ, ಫ್ಯಾಶನಾಂ

ಪಳೆವ್ನ್ ಬದ್ಲಾಲ್ಯಾರೀ

ಪಯ್ಲೆಂಚ್ಯಾ ಗಾಗ್ರ್ಯಾ ಬಾಜ್ವೆಚಿ

ತಿ ಸೊಭಾಯ್ ಪರತ್ ಮೆಳ್ಚಿನಾ.

ಸುರೇಶ್ ಸಲ್ದಾನ್, ಸಕಲೇಶ್ಪುರ್

**********

Adle dis

vaddeant eka ghora

ttivi haddli tor

sorvanim tanger

ttivi polleunko vechem.

Filipsacho reddio

gheun khandear

jeoran pod ghalun

margar bhomvchem.

Tambddea bossanim

boschea sitti khatir

tuvalo ghalunk dhoddboddchem.

Touxem ya ambo

khamvchea khatir

mam-i kodde poixeank

zogoddchem.

Vaddeant kazar aslear

mattovo ghalunk vechem

ghorach dukor marn

kallzankitti khaunko rakon ramvchem.

Mattvant dhornir boson

xiroteanim jemvchem

vorn bhair veta mhonn

dorvoddon khamvchem.

Dha bara moilam cholon

iskolak vechem

beagant bindda, ambe,

chiturleo chorn haddchem.

Payank moche nastana

kanttea boleani rigchem

kantt bor vostur gheun

tolleak umbllunk vechem.

Margar karak dekhtoch

tachea pattlan vechem

ois keanddi yetana

kvattor battol gheun damvche.

Don rupoi hatant

gheun sokddanki dakomvchem

mam-i songi markettint

vodda khaunko zogoddchem.

Morache pak bukabhitor

dourn pilank rakchem

dhavi klas mhonnasor dhompra

voir chodd'ddi ghaln aschem.

Cheddvank polletana moilam

pois lojen dhamvchem

kannye buk, bukabhitor

dourn lipon vachchem.

Festa porbek novem

vostur ghaln misak vechem

lognachi prai zaleari

gagro bazu ghaln khellchem.

Dolleanim udetat dukham

poilenche dis te chintana

adlo to sontos ul'las

porot amkam mellchona.

Atanchea bhurgeank

sobhar souloteo asleari

poilencho to anond

tanka mellchona.

Tti.vi., sinema, feaxonam

polleun bodlaleari

poilenchea gagrea bajvechi

ti sobhai porot mellchina.

Suresh Saldanha, Sakleshpur