ಕಚ್ಚಾ ಪಾಡಿಂತ್ ಕಾಜು ಚೊರ್ನ್

ಚಡ್ಡೆ ಭಿತರ್ ಲಿಪವ್ನ್

ಹಾಡ್ನ್ ತುಕಾ ದಿತಾನಾ

ಮಾಂಯ್ಚೆ ಗಾಳಿ ಆಯ್ಕಾಲ್ಲೆ ತೆ ದೀಸ್

ಜಾಂಬ್ಳಾಂಚ್ಯಾ ರುಕಾರ್ ಚಡೊನ್

ಜಾಂಬ್ಳಾಂ ಕಾಡುಂಕ್ ವೆತಾನಾ

ಫಾಂಟೊ ಮೊಡುನ್ ಸಕ್ಲಾ ಪಡ್ತಾನಾ

ತುಂವೆ ಮೊಗಾನ್ ಆರವ್ನ್ ಧರ್ ಲ್ಲೆ ತೆ ದೀಸ್

ಪೆರಾಂ ಕಾಡುಂಕ್ ತೆಂಕ್ಡಿ ವರ್ತಾನಾ

ವೊಂಯ್ಚ್ಯಾ ಕಾಂಟ್ಯಾಂಕ್ ಸಿರ್ಕೊನ್

ಗಾಗ್ರೊ ತುಜೊ ನಿಸರ್ತಾನಾ

ಸೆಜಾರ್ಚ್ಯಾ ಆಲಿಸ್ ಬಾಯೆನ್ ದುಬಾವ್ ಕೆಲ್ಲೆ ತೆ ದೀಸ್.

ಗೊರ್ವಾಂಕ್ ಚರೊಂವ್ಕ್ ಸೊಡುನ್

ಮೆರೆರ್ ನಿದೊನ್ ಸಪ್ಣಾಂ ದೆಕ್ತಾನಾ

ಗೊರ್ವಾಂನಿ ಗಾದ್ಯಾಂತ್ಲೆಂ ಭಾತ್ ಖೆಲ್ಲ್ಯಾಕ್

ಮಾಪ್ಳ್ಯಾನ್ ಆಮ್ಕಾಂ ದಾಂವ್ಡೊನ್ ಹಾಡುಲ್ಲೆ ತೆ ದೀಸ್

ಕಣ್ಣಾಮುಚ್ಚೆ ಕಾಡೆ ಕೂಡೆ ಖೆಳ್ ಖೆಳೊಂಕ್

ಕುಂಕ್ಡಾ ಗುಡಾಂತ್ ಲಿಪೊನ್ ಬಸ್ತಾನಾ

ಡಿವ್ಡಾಕ್ ಪಳೆವ್ನ್ ಧಾಂವೊನ್ ಯೇವ್ನ್

ಗಾಲಾಕ್ ಮ್ಹಜ್ಯಾ ಕೀಸ್ ದಿಲ್ಲೆ ತೆ ದೀಸ್.

ಆಂಬೊ ಕಾಡುಂಕ್ ರುಕಾರ್ ಚಡ್ತಾನಾ

ಉಂಬ್ಲೆ ಚಾಬೊನ್ ಅಂಗ್ ದಾಡ್ಕೆತಾನಾ

ತೇಲ್ ಪುಸುನ್, ಉದ್ಕಾಂತ್ ಶೆಕ್ ದಿಂವ್ಚ್ಯಾ ವಗ್ತಾ

ಬಾಬಾಚ್ಯಾ ಚಿಂಚೆಚ್ಯಾ ಅಡರಾನ್ ಮಾರ್ ಖೆಲ್ಲೆ ತೆ ದೀಸ್.

ಪಾದ್ರಿ ಉಬಿ ದೊತೊರ್ನ್ ವಿಚಾರ್ತಾನಾ

ಪಾಟ್ಲ್ಯಾನ್ ರಾವುನ್ ತುಂವೆ ಸಾಂಗೊನ್ ದಿತಾನಾ

ಪಾದ್ರ್ಯಾಬಾಕ್ ರಾಗ್ ಯೇವ್ನ್ ಆಮ್ಕಾಂ ದೊಗಾಂಯ್ಕಿ

ಕೇಸ್ ಧರ್ನ್ ಮಾಂಡೊ ವೊಣೊದಿಕ್ ಆಪ್ಟಿಲ್ಲೆ ತೆ ದೀಸ್.

ಫಿರ್ಗಜೆಚ್ಯಾ ಫೆಸ್ತಾ ದಿಸಾ ಬಾಬಾಚೆ ಪಯ್ಶೆ ಚೊರ್ನ್

ಇಗರ್ಜೆಚ್ಯಾ ತೊರಿ ಲಾಗಿಂ ಎಕಾಮೆಕಾ ಐಸ್ ಕ್ರಿಮ್ ಖಾತಾನಾ

ಬಾಬಾಚ್ಯಾ ಭಿಯಾಕ್ ಲಾಗೊನ್ ಆಮಿ ಲಿಪೊನ್ ಬಸೊಂಕ್ ವೆಚ್ಯಾ ವಗ್ತಾ

ತೆರೆಜ್ ಬಾಯೆಚ್ಯಾ ಕೊಲ್ಗ್ಯಾನ್ ದಾಂವ್ಡೊನ್ ಹಾಡ್ ಲ್ಲೆ ತೆ ದೀಸ್.

ಲಾನ್ಪಣಾಲೆ ತೆ ದೀಸ್ ಚಿಂತಾನಾ ದುಖಾಂ ಭರ್ತಾತ್ ದೊಳ್ಯಾಂನಿ

ಲಗೋರಿ, ಕುಟ್ಟಿ ದೊಣ್ಣೆ, ಚೌಕಾಬರೆ ಅಸಲ್ಯಾ ಖೆಳಾಂನಿ

ಲಾನ್ಪಣ್ ಮಾಜ್ವೊನ್ ಗೆಲೆಂ, ಪರತ್ ಮೆಳಾನಾ ಆನಿಂ

ಕಾಳಿಜ್ ಆಶೆತಾ ಅಜುನಿ ಜಿಯೆಂವ್ಕ್ ಲಾನ್ಪಣಾಚ್ಯಾ ಉಗ್ಡಾಸಾಂನಿ.

ಸುರೇಶ್ ಸಲ್ಡಾನ್, ಸಕಲೇಶ್ಪುರ್

**********

Lanponnale dis

Kochcha paddint kazu chorn

chodd'dde bhitor lipoun

haddn tuka ditana

mamyche galli aikal'le te dis

zambllanchea rukar choddon

zambllam kaddunk vetana

fantto moddun sokla poddtana

tumve mogan aroun dhor l'le te dis

peram kaddunk tenkddi vortana

vomychea kantteank sirkon

gagro tuzo nisortana

sezarchea alis bayen dubavo kel'le te dis.

Gorvank chorounko soddun

merer nidon sopnnam dektana

gorvamni gadeantlem bhat khel'leak

mapllean amkam damvddon haddul'le te dis

konn'nnamuchche kadde kudde khell khellonk

kunkdda guddant lipon bostana

ddivddak polleun dhamvon yeun

galak mhojea kis dil'le te dis.

Ambo kaddunk rukar choddtana

umble chabon ong daddketana

tel pusun, udkant xek dimvchea vogta

babachea chinchechea oddoran mar khel'le te dis.

Padri ubi dotorn vichartana

pattlean ravun tumve sangon ditana

padreabak rag yeun amkam dogamyki

kes dhorn manddo vonnodik apttil'le te dis.

Firgojechea festa disa babache poixe chorn

igorjechea tori lagim ekameka ois krim' khatana

babachea bhiak lagon ami lipon bosonk vechea vogta

terez bayechea kolgean damvddon hadd l'le te dis.

Lanponnale te dis chintana dukham bhortat dolleamni

logori, kutt'tti donn'nne, choukabore osolea khellamni

lanponn majvon gelem, porot mellana anim

kalliz axeta ozuni jieunko lanponnachea ugddasamni.

Suresh Saldanha, Sakleshpur