ಪ್ರಾಚಿತ್ ಕಾಳ್

ರಡೊಂಕ್ ಮೆಳ್ಯಾಂ ಆಮಿಂ ಸಮೆಸ್ತ್

ಆಪಯ್ತಾ ಮರಿ ಮಾಂಯ್, ಜಾವ್ನ್ ದುಖೆಸ್ತ್

ನಾಂ ಮಾಂಯ್ ಆಮ್ಕಾಂ ಹಾಂಗಾ ಪುರ್ಸೊತ್

ಆಪಯ್ ಆಮ್ಕಾಂ, ಜರ್ ಆಸಾ ತರ್ ಗಮ್ಮತ್

ಪಡ್ತಾನಾ ಜೆಜುನ್ ಹರ್ಯೆಕ್ ಪಾವ್ಟಿಂ

ಪಳಯ್ಲಾಸ್ತೆಲೆಂ ಆಮ್ಚೆ ಕುಶಿನ್ ಘುಂವೊನ್ ಪಾಟಿಂ

ದಿಂವ್ಕ್ ಯೆತ್ ಗಿ ಕುಮೊಕ್ ಕೋಣ್ ತರಿ

ಆಮಿಂ, ಕೆಲೆಂ ಪಳೆವ್ನಿ ಪಳಯ್ನಾತ್ಲ್ಯಾಪರಿಂ

ದಿಲ್ಯಾ ಫಾಲ್ಯಾಂ ವಾಚುಂಕ್ ಖುರ್ಸಾವಾಟ್

ಚಿಂತುನ್ ಬೊಗ್ಲ್ಯಾ ಖುಶಿ, ಚಡುಂಕ್ ಇಗರ್ಜೆ ವಾಟ್

ದೆಂವಯ್ತಲೊಂ ಖಂಡಿತ್, ನಕ್ಲಿ ದುಖಾಂ ಕಾಟ್

ಥಾಪುಡ್ಚಾಕ್ ಸರ್ವ್ ಲೊಕಾನಿಂ, ಯೆವ್ನ್ ಮುಜಿ ಪಾಟ್

ವ್ಹರುಂಕ್ ಜಾಯ್ ಖುರಿಸ್ ಘರಾನ್ ಘರ್

ಸಾಂಗಾಲಾಗ್ಲೊ ಆಜ್ ಮಿಸಾರ್ ಫಿರ್ಗಜ್ ವಿಗಾರ್

ಖುರ್ಸಾಕ್ ಘಾಲೊ ಲೊಕಾನಿಂ ಫುಲಾಂಚೊ ಹಾರ್

ಆನಿಂ ರಿಕ್ಷಾರ್ ಬೊಂವ್ಡಾಯ್ಲೊ ಸಗ್ಳ್ಯಾ ಗಾಂವಾರ್

ಬಿಡಿ, ಸಿಗ್ರೆಟ್, ಸೊರೊ ಪಯ್ಸ್ ಕೆಲೊ

ಖಾಡ್, ಮಿಶಿಯೊ ಪೂರಾ ವಾಡೊಂಕ್ ಸೊಡ್ಲ್ಯೊ

ಭಕ್ತಿಪಣ್ ಬಾಯ್ಲ್ಯಾನ್ ಆಮಿಂ ದಾಕೊವ್ನ್ ದಿಲೆಂ

ತ್ಯಾ ಫಾರಿಜೆವಾಂಪರಿಂ ಆಜ್ ಆಮಿಂಯ್ ಕೆಲೆಂ

ನಿಮಾಣ್ಯಾ ಸುಕ್ರಾರಾ ವ್ಹಡ್ಲೊ ಉಪಾಸ್ ಕೆಲೊ

ಫೆಸ್ತಾ ದಿಸಾ ಬಾಬ್ ಪಿಯೆವ್ನ್ ಟಾಯ್ಟ್ ಜಾಲೊ

ಚಾಳಿಸ್ ದಿಸಾಂಚೊ ರಾಗ್ ತಾಣೆಂ ಆಮ್ಚೆರ್ ಕಾಡ್ಲೊ

ಆಮ್ಕಾಂ ಖಾಲಿ ಪೊಟಾರ್‌ಚ್ ನಿದೊಂಕ್ ಲಾಯ್ಲೊ

ಧುಳಿಂತ್ಲಿಂ ಆಮಿಂ ಧುಳಿಕ್ ವೆತಾಂವ್

ಆಮಿಂ ಹೆಂ ಉತಾರ್ ವಿಸ್ರೊನ್ ಸೊಡ್ತಾಂವ್

ದುಸ್ರ್ಯಾಂಚಿಂ ಪಾತ್ಕಾಂ ಉಸ್ತುಂಕ್ ವೆತಾಂವ್

ಆಮ್ಚಾ ಪಾತ್ಕಾಂಕ್ ಆಮಿಂ ಮಾತಿ ಗಾಲ್ತಾಂವ್

ದುಬಾವ್ತಾಂವ್ ಸೊಮ್ಯಾ ತುಜೆರ್, ತ್ಯಾ ತೊಮಾಸಾಪರಿಂ

ದೆಕುಂನ್‍ಚ್ ಕರ್ತಾಂವ್ ಘಾತ್ ಜುದಾಸಾಪರಿಂ

ಜಿಯೆಂವ್ಚ್ಯಾಕ್ ಪಾತ್ಕಾಂವಿಣೆಂ ಹಿ ಜಿಣಿ ಬರಿ

ದಿ ದೆವಾ ಕಾಳಿಜ್, ನಿತಳ್ ಸಾಂತಾಂಪರಿಂ

ರೋಶು ಬಾಬಾ, ಬಾರ್ಕುರ್

**********

Prachit kall

roddonk melleam amim somest

apoita mori mam-i, zaun dukhest

nam mam-i amkam hanga pursot

apoi amkam, zor asa tor gom'mot

poddtana jezun horyek pauttim

polloilastelem amche kuxin ghumvon pattim

divonko yet gi kumok konn tori

amim, kelem polleuni polloinatleaporim

dilea faleam vachunk khursavatt

chintun boglea khuxi, choddunk igorje vatt

demvoitolom khonddit, nokli dukham katt

thapuddchak sorv lokanim, yeun muji patt

vhorunk zai khuris ghoran ghor

sangalaglo az misar firgoz vigar

khursak ghalo lokanim fulancho har

anim rikxar bomvddailo sogllea gamvar

biddi, sigrett, soro pois kelo

khadd, mixio pura vaddonk soddleo

bhoktiponn bailean amim dakoun dilem

tea farijevamporim az amim-i kelem

nimannea sukrara vhoddlo upas kelo

festa disa bab pieun ttaitt zalo

challis disancho rag tannem amcher kaddlo

amkam khali pottar‌ch nidonk lailo

dhullintlim amim dhullik vetamv

amim hem utar visron soddtamv

dusreanchim patkam ustunk vetamv

amcha patkank amim mati galtamv

dubautamv somea tujer, tea tomasaporim

dekumn‍ch kortamv ghat zudasaporim

jiemvcheak patkamvinnem hi jinni bori

di deva kalliz, nitoll santamporim

Roshu Baba, Barkur