ಮಾಳೊವ್
ಚಲ್ತಾನಾಂ ಘರಾಂತ್ ಭಾಯ್ರ್ ಭಿತರ್
ಉದೆಲೆಂ ಸವಾಲ್ ಏಕ್ ಮತಿ ಭಿತರ್
ಕಿತೆಂ ಆಸ್ತಲೆಂ ಘರ್ಚ್ಯಾ ಮಾಳ್ಯಾ ವಯ್ರ್
ಆಜ್ ಪುರ್ಸೊತಾಯೆರ್ ಪುರಾ ಕಾಡ್ತಾಂ ಕೊಯ್ರ್
ಚಡುಂಕ್ ಮಾಳ್ಯಾರ್ ದೆಳೊ ಹಾಡ್ಲೊ
ಪಯ್ಲೆಂ ಇಲ್ಲೊ ಗೊಂಟೆರ್ ಕಾಡ್ಲೊ
ಜರ್ಲೊ ಮಾತ್ಯಾರ್ ಚರೊಂಕ್ ಲಾಗ್ಲೊ
ವಾಳತ್, ವಾಗೊಣಿ, ಧಾವೊಂಕ್ ಲಾಗ್ಲ್ಯೊ
ದಿಸ್ಲಿಂ ಮುಕಾರ್ ತಾಂಬ್ಯಾಚಿಂ ಆಯ್ದಾನಾಂ
ಕೊಣೆಂ ದವರ್ಲ್ಯಾಂತ್ಗಿ ತಿಂ ಕೋಣ್ ಜಾಣಾಂ
ಆಬಾನ್ ಸೊರ್ಯಾ ಖಾತಿರ್ ವಸ್ತು ವಿಕ್ತಾನಾಂ
ಚಿಂತ್ತಾಂ, ಹ್ಯಾ ಆಯ್ದಾನಾಂಚೊ ತಾಕಾ ಉಡಾಸ್ ನಾಂ
ವರ್ಸಾಂ ಪಯ್ಲೆಂ ದವರ್ಲ್ಲೊ ಉಂದ್ರಾ ಘುಡ್
ಉಂದ್ರಾಂನಿ ಖೆಲಾಂ ಖಾಣ್, ಸೊಡ್ಲಾ ಘುಡ್
ಚಿಂತ್ತಾಲೊಂ ಆಮ್ಚ್ಯಾ ಘರಾಂತ್ ಹಾಂವ್ಚ್ ಬುದ್ವಂತ್
ಆತಾಂ ಕಳ್ಳೆಂ, ಉಂದಿರ್ ಮ್ಹಜಾಕಿ ಬುದ್ವಂತ್
ಬುಯಾಂವ್, ನಾಂಗೊರ್, ಮುಸಾಳ್, ಬಾಣ್
ವಸ್ತುರ್, ಬೂಕ್ ಆನಿಂ ಪರ್ನೊ ಸಾಮಾನ್
ಜಾತಾ ಮಾಳ್ಯಾರ್ ಹಾಂಚೊ ಸಮಾವೇಶ್
ನಿಯಾಳ್ನ್ ಆಸಾತ್ ಕೊಣ್ಣಾ, ತೆ ಆದ್ಲೆ ದೀಸ್
ಮೆಳ್ಳಿಂ ಮಿಶಿಯೊ ಫುಟ್ತಾನಾಂ ಬರಯಿಲ್ಲಿಂ ಕವನಾಂ
ಚೆಡ್ವಾಂಚ್ಯಾ ನಾಂವಾಂ ಸಂಗಿಂ ಗುಂತ್ಲ್ಲಿಂ ಭಾವನಾಂ
ಆಟೊಗ್ರಾಫ್, ಫೊಟೊಗ್ರಾಫ್, ಥೊಡಿಂ ಉಡಾಸಾಚಿಂ ಕಾಂಕ್ಣಾಂ
ಎಕೆಕ್ಚ್ ಮತಿಕ್ ಆಯ್ಲಿಂ, ತರ್ನಾಟ್ಪಾಣಾಚಿಂ ಉಡ್ಕಾಣಾಂ
ತುಂ ರೆ ಮ್ಹಜೊ, ಹಾಂವ್ ರೆ ತುಜಿಂ
ಧುಳಿಂತ್ ಬುಡ್ಲ್ಲೆಂ ಹೆಂ ಕಾಗದ್ ಕೊಣಾಚೆಂ
ಹಾಂ, ಕುಟ್ಮಾ ಭಿತರ್ಲಿ ಚಲಿ ಮೊಗಾರ್ ಪಡ್ಲ್ಲಿ
ಕಾಳ್ಜಾಂ ಮೊಡ್ಲ್ಲಿಂ, ಪುಣ್ ಕಾಗ್ದಾಂ ಉರ್ಲ್ಲಿಂ
ಪಯ್ಲೆಂಚೆಂ ಚಿಂತ್ತಾನಾಂ ಆಂಗಾಂತ್ ಘಾಮ್ ಸುಟ್ತಾ
ಆತಾಂ ಬಾಯ್ಲೆ ಮುಕಾರ್ ಜಾಲಾಂ ಸಾಧು ಸಂತ
ಹೊ ಮಾಳೊವ್ ಪರ್ನ್ಯೊ ಕಾಣಿಯೊ ಸಾಂಗ್ತಾ
ಹಾಚೆಂ ದಾರ್ ಹಾಂಗಾಚ್ಚ್ ದಾಂಪುನ್ ಸೊಡ್ತಾಂ
ರೋಶು ಬಾಬಾ, ಬಾರ್ಕುರ್
**********
Mallovo
choltanam ghorant bhair bhitor
udelem soval ek moti bhitor
kitem astolem ghorochea mallea voir
az pursotayer pura kaddtam koir
choddunk mallear dello haddlo
poilem il'lo gontter kaddlo
zorlo matear choronk laglo
vallot, vagonni, dhavonk lagleo
dislim mukar tambeachim aidanam
konnem dourleantgi tim konn zannam
aban soroea khatir vostu viktanam
chint'tam, hea aidanancho taka uddas nam
vorosam poilem dourl'lo undra ghudd
undramni khelam khann, soddla ghudd
chint'talom amchea ghorant hamvch budvont
atam koll'llem, undir mhozaki budvont
buyamv, nangor, musall, bann
vostur, buk anim porno saman
zata mallear hancho somavex
nialln asat konn'nna, te adle dis
mell'llim mixio futt'tanam boroyil'lim kounam
cheddvanchea namvam songim guntl'lim bhaunam
attograf, fottograf, thoddim uddasachim kanknnam
ekekch motik ailim, tornattpannachim uddkannam
tum re mhozo, hamv re tujim
dhullint buddl'lem hem kagod konnachem
ham, kuttma bhitorli choli mogar poddl'li
kallzam moddl'lim, punn kagdam url'lim
poilenchem chint'tanam angant gham' sutt'ta
atam baile mukar zalam sadhu sonto
ho mallovo porneo kannio sangta
hachem dar hangachch dampun soddtam
Roshu Baba, Barkur
Leave a comment