Author
Felcy Lobo, Derebailತಿಚಿ ಬಜೆಟ್
ಗಾಂವಾಕ್ ಗಾಂವ್ ಚ್ಚ್ ಉಲಂವ್ಕ್ ಲಾಗ್ಲಾ
ದೇಶ್ ಭರ್ ಬಜೆಟಿಚಿಚ್ಚ್ ಖಬಾರ್
ವಾರ‌್ಯಾಂತೀ ಉಪ್ಯೆಂವ್ಕ್ ಲಾಗ್ಲ್ಯಾ ಹಗುರ್
ಘರ್ಚ್ಯಾ ಚೊವ್ಕೆಂತ್ ಪತಿ, ಭಾವೆ , ದೆರಾಂಚ್ಯಾ
ಆಕಾಂತ್ ವಿರಾರಾಯೆಚ್ಯಾ ದೊರಗ್ ತಾಳ್ಯಾಂಚೆ ಚರ್ಚಾಕೂಟ್
ರಾಂದ್ಪಾ ರಾವ್ಳೆರಾಂತ್ ತಿಚೊ ವೆಗ್ಳೊಚ್ಚ್ ಸಂಸಾರ್
ಬಜೆಟ್ ಜಾಂವ್ ದೇಶಾಚಿ ವಾ ರಾಜ್ಯಾಚಿ
ತಿಕಾ ನಾ ಫರಕ್
ಮಹಿನ್ಯಾ ಮಹಿನ್ಯಾಕ್ ಘರಾ ಖರ್ಚಾಚಿ
ಬಜೆಟ್ ಮಂಡನ್ ಕರ್ಚ್ಯಾ ತಿಚ್ಯಾ ತಾಂಕಿಕ್
ಖಂಚ್ಯಾ ಮಂತ್ರಿಚೊ ಖಾತೊಯೀ ಲೇಖ್ ನಂಯ್
ತಿಣೆ ಭಾಂದ್ಚ್ಯಾ ಸುಂಕಾಕ್ ಕಿತೆಂ ಬರ್ಗೊಳ್?
ರಾಂದ್ಪಾ ಕುಡಾ ಥಾವ್ನ್ ಘರ್ಚ್ಯಾ
ಮುಲ್ಯಾಂ ಮುಲ್ಯಾಂನಿ
ತಿಚ್ಯಾ ನಾಜೂಕ್ ಹಾತಾಂಚಿಂ ಬೊಟಾಂ ಚರ್ತಾನಾ?
ಘರ್ಚ್ಯಾ ಸರ್ವಾಂಕೀ ತಿಚ್ಚ್ ಜಾಯ್ ಜಾತಾನಾ?
ಚಾ, ಕಾಫಿ, ಗೊಬ್ಳೊ , ಬೊಶಿಯಾಂಸಂಗಿಂ
ಆಯ್ದಾನಾಂ, ಸಂಭ್ರಮಾಂ, ವಸ್ತ್ರಾಂ,
ಶಾಳಾಂ, ದಫ್ತರಾಂ ಪರ್ಯಾಂತೀ
ತಿಚ್ಯಾಚ್ ಅಸ್ತಿತ್ವಾಚೆಂ ಪಾಂಗ್ರಣ್
ತಿಣೆಂ ಭಾಂದ್ಚ್ಯಾ ಸುಂಕಾಚಿ ಪಟ್ಟಿ
ಲಾಂಬತ್ತ್ ವೆತಾಂ,
ತೀಯಿ ಮಾತ್ಶಿ ಶಾಣಿ ಜಾಲ್ಯಾ
ರಿತ್ಯಾ ಬೊತ್ಲಿಂನಿ ಲೊಣ್ಚಿಂ, ಹಾಪೊಳ್,
ಸಂಡಿಗೆಚೊ ಸಂಖೊ ವಾಡ್ಲಾ
ಕೆಂಚಣ್ಣಾಚ್ಯಾ ಗುಡಾ ಆಂಗ್ಡಿ ತೆವ್ಶಿಂ
ಭೆಟೊ ತಿಚ್ಯೊ ವಾಡ್ಲ್ಯಾತ್
ಗರ್ಜ್ ದಿಸ್ಲ್ಯಾರ್ ಸಾಂಬಾರಾ ಪಿಟೆ
ದುಖಿಚೆಂ ತೇಲ್
ಕೆಸಾಂ ರಾಕ್ಣೆಕ್ ವ ತಾಳು ಥಂಡೊಂವ್ಕ್
ತಾಯಾರ್ಚ್ಯಾ ಪಾಂವ್ಡ್ಯಾರ್ ರಾವೊನ್
ಪಾಲ್ವಾ ಗಾಂಟ್ ಥೊಡಿ ವ್ಹಡ್ ಕೆಲ್ಯಾ
ಗರ್ಭಾಂತೀ ಬಾಳಾಕ್ ವಾವವ್ನ್
ಜಯ್ತ್ ಕಟ್ಟೊಣಾಂಕ್ ಸಿಮೆಟ್ ಗಾರೊ ವಾವವ್ನ್
ವಿಶೆವ್ ಆಶೆನಾಸ್ತಾಂ ಘರಾ ಭಿತರ್
ಘರಾ ಭಾಯ್ರ್ ಧಾಂವ್ಣೆ ಖರಸ್
ದಫ್ತರಾಂ ವೆವಾರಾಂನಿ ರಿಗೊನ್
ದಾದ್ಲ್ಯಾಕ್ ಸಹಕರ್ಸುಂಚ್ಯೆಕ್
ಕೆದೊಳ್ ಪರ್ಯಾಂತ್ ಅಬಲ್ ಮಣ್ಶ್ಯಾತ್ ?
ಮಾಂಯ್, ತುಂ ಅಬಲ್ ನ್ಹಂಯ್ ಮಾಂಯ್
ತಶೆಂ ಮ್ಹಣ್ತೆಲ್ಯಾಂಕ್ ಮ್ಹಣೊಂಕ್ ದಿ
ನಿಂದಾ ಕರ್ತೆಲ್ಯಾಂಕ್ ತಶೆಂ ಕರುಂಕ್ ಸೊಡ್
ಚಿಡಾವ್ನ್, ಕೊಂಕುನ್, ಖೆಂಡುನ್, ಬೆಂಡುನ್
ತುಜೆಂ ಉಣೆಂಪಣ್ ಉಸ್ತುನ್ ಉಸ್ತುನ್
ಹೆಡಾವ್ನ್ ಹಾಸ್ತೆಲ್ಯಾಂಚ್ಯಾ ತಾಳ್ವ್ಯಾಂನಿಂ
ರಿತೆಂಪಣ್ ಪೆಂಕಾಡ್ ಧಲಯ್ತಾ
ತುವೆಂಚ್ ಕೆಂಚಣ್ಣಾಚ್ಯಾ ಆಂಗ್ಡಿಕ್
ವಿಕ್ಲೆಲೆಂ ತೇಲ್
ತಾಳ್ವೆಂಕ್ ಮಾಖುನ್ ಆನಿ ತರೀ
ಥಂಡ್ ಜಾಂವ್ ತೆ, ಮಾಂಯ್
ಆನಿ ತರೀ ಥಂಡ್ ಜಾಂವ್ ತೆ.
ಫೆಲ್ಸಿ ಲೋಬೊ ದೆರೆಬಯ್ಲ್
**********
Tichi bojett
gamvak gamv chch ulounko lagla
dex bhor bojettichichch khobar
varoeanti upyeunko laglea hogur
ghorchea choukent poti, bhave , deranchea
akant virarayechea dorog talleanche chorchakutt
randpa raullerant ticho vegllochch somsar
bojett zamv dexachi va rajeachi
tika na forok
mohinea mohineak ghora khorchachi
bojett monddon korchea tichea tankik
khonchea montricho khatoyi lekh nom-i
tinne bhandchea sunkak kitem borgoll?
randpa kudda thaun ghorchea
muleam muleamni
tichea nazuk hatanchim bottam chortana?
ghorchea sorvanki tichch zai zatana?
cha, kafi, gobllo , boxiamsongim
aidanam, sombhromam, vostram,
xallam, doftoram poreanti
ticheach ostitvachem pangronn
tinnem bhandchea sunkachi pott'tti
lambot't vetam,
tiyi matxi xanni zalea
ritea botlimni lonnchim, hapoll,
sonddigecho sonkho vaddla
kenchonn'nnachea gudda angddi teuxim
bhetto ticheo vaddleat
gorz dislear sambara pitte
dukhichem tel
kesam raknnek vo tallu thonddounko
tayarchea pamvddear ravon
palva gantt thoddi vhodd kelea
gorbhanti ballak vauvn
zoit kott'ttonnank simett garo vauvn
vixevo axenastam ghora bhitor
ghora bhair dhamvnne khoros
doftoram vevaramni rigon
dadleak sohokorsunchyek
kedoll poreant obol monnxeat ?
mam-i, tum obol nhoim mam-i
toxem mhonnteleank mhonnonk di
ninda korteleank toxem korunk sodd
chiddaun, konkun, khenddun, benddun
tujem unnemponn ustun ustun
heddaun hasteleanchea tallveamnim
ritemponn penkadd dholoita
tuvench kenchonn'nnachea angddik
viklelem tel
tallvenk makhun ani tori
thondd zamv te, mam-i
ani tori thondd zamv te.
Felcy Lobo, Derebail
Leave a comment