ನಿತಿ ಫೈಸಲ್

ಉಗಡ್ ದಾವಾಟೊ, ಭಿತರ್ ಸರ‍್ಚಾಕ್,

ಸರ್ಗಾರಾಜಾಕ್ ಪ್ರವೇಶ್ ಕರ‍್ಚಾಕ್.

ಘಮಾಂಡಾಯೆನ್ ಸೂಚನ್ ದಿತಾ ಪಾರ‍್ಯಾಗಾರಾಕ್,

ಸಂಸಾರಾಂತ್ಲೊ ಮನಿಸ್ ತೊ, ಮ್ಹಣ್ ನಾಂವಾಡ್ದಿಕ್.

ಜಾವ್ನಾಸ್‌ಲ್ಲೊ ಹಾಂವ್, ವಡ್ ಮನಿಸ್

ಸಂಸಾರಿ, ಪಿರ್ಗಜೆಂತ್ಲೊ, ವಡ್ಲೊ ಮಾತ್ಬಾರಿ.

ಕುಮಕ್ ದಿಲ್ಯಾ, ಬಾಂದ್ಪಾಂ ಬಾಂದ್ಚಾಕ್,

ತರ್, ಚಿಂತಾಯ್ ಕಿತೆಂ! ಸೊಡ್ ಭಿತರ್ ವೆಚಾಕ್.

ಸಾಂ ಪೆದ್ರುಕ್ ಖಬಾರ್ ಕಳಾಯ್ಲಿ.

ಥೊಡ್ಯಾಚ್ಚ್ ವೆಳಾನ್, ಅಯ್ಲಿ ಜಾಪ್ ಭಿತರ್ಲಿ!

ತುಂ ಜಾವ್ನಾಸಾಯ್, ಭಕ್ತಿವಂತ್ ಬಾಯ್ಲ್ಯಾ ದೆಖಿಕ್!

ಪೂಣ್! ಪಾವೊ ನಹಿಂ, ಭಿತರ್ ಯೆಂವ್ಚ್ಯಾಕ್!

ಚುಕಂವ್ಕ್ ನಾ ಹಾಂವೆಂ, ಖಂಯ್ಚೆಯ್ ಮಾಗ್ಣೆಂ ರಜಾರ್!

ಪಾಳ್ಳ್ಯಾತ್ ಕಾಯ್ದೆ, ಹರ್ಯೆಕಾ ವೆಳಾರ್!

ತರ್ ಕಿತ್ಯಾಕ್, ರೀಗ್ ದೀನಾಂಯ್ ಭಿತರ್ ವೆಚಾಕ್?

ಸುಸ್ಕಾರುನ್ ಸುರು ಕೆಲೆಂ ರಡ್ಚಾಕ್!

ಛೇ! ನಿದೆ ಸಾಯ್ಬಾ, ವೊಗೆ ರಾವುನ್!

ರಡ್ತಾಯ್ ಕೋಣ್ ಮೆಲಾ ಮುಣೊನ್?

ಎಕಾಚ್ಛಾಣೆಂ ಜಾಗ್ ಜಾಲಿ, ದೆಂಕ್ಣ್ಯಾಕ್ ಬಾಯ್ಲೆಚಾ!

ಪಳೆತಾನಾ, ಅಸ್‌ಲ್ಲೊಂ ಹಾಂವ್, ದೆಗೆನ್ ಖಟ್ಲ್ಯಾಚಾ.

ಜಾಂವ್ಕ್ ಪುರೊ, ದೆಖ್ಲೆಂ ಹಾಂವೆಂ ಹೆಂ ಸ್ವಪ್ಣಾಂತ್!

ಪೂಣ್ ಆಮ್ಚ್ಯಾ, ನೀಜ್ ಜಿವಿತಾಂತ್?

ಚಿಂತ್ತಾಂವ್ ಆಮಿ ಭಕ್ತಿವಂತ್,

ಖರಿ ನೀತ್ ಜಾತೆಲಿ ಆಮ್ಚಿ ಸರ್ಗಾರಾಜಾಂತ್!!

ಇಲಾಸ್ ಅಲಂಗಾರ್.

**********

niti foisol

ugodd davatto, bhitor soro‍chak,

sorgarazak provex koro‍chak.

Ghomanddayen suchon dita paro‍eagarak,

somsarantlo monis to, mhonn namvadd'dik.

Zaunas‌l'lo hamv, vodd monis

somsari, pirgojentlo, voddlo matbari.

Kumok dilea, bandpam bandchak,

tor, chintai kitem! sodd bhitor vechak.

Sam pedruk khobar kollaili.

Thoddeachch vellan, oyli zap bhitorli!

tum zaunasai, bhoktivont bailea dekhik!

punn! pavo nohim, bhitor yemvcheak!

chukounko na hamvem, khoinchey magnnem rozar!

pall'lleat kaide, horyeka vellar!

tor kiteak, rig dinam-i bhitor vechak?

suskarun suru kelem roddchak!

chhe! nide saiba, voge ravun!

roddtai konn mela munnon?

ekachchhannem zag zali, denknneak bailecha!

polletana, os‌l'lom hamv, degen khottleacha.

Zaunko puro, dekhlem hamvem hem svopnnant!

punn amchea, niz jivitant?

chint'tamv ami bhoktivont,

khori nit zateli amchi sorgarazant!!

Ilasa Alangar