ಕವಿತೆಚ್ಯಾ ಆಯ್ದಾನಾಂತ್ ಭುಕೆಚಿಂ ವೆವೆಗ್ಳಿಂ ರುಪಾಂ

ಥೊಡ್ಯಾ ವರ್ಸಾಂ ಆದಿಂ ಕಾಂಯ್ ಆಮ್ಚ್ಯಾ ನವ್ಯಾ ಕವಿಚಿಂ ಚಿಂತ್ನಾಂ ಮೋಗ್ / ಕುಟಾಮ್ ಹ್ಯಾಚ್ ಸುತ್ತುರಾ ಭಿತರ್ ಘುಂವೊನ್ ಆಸ್ತಾಲಿಂ. ಆಧುನಿಕತಾ ಆನಿ ವೈಜ್ಞಾನಿಕತೆಚ್ಯಾ ದಾವೆಕ್ ಶಿಕ್ಪಿ ಕೊಂಕ್ಣಿ ಯುವಜಣಾಂಚಿ ವೋಡ್ ಕೊಂಕ್ಣಿ ಸಾಹಿತ್ಯಾ ಥಂಯ್ ಉಣೆ ಜಾತೆ ಯೆತಾಲಿ ತರೀ ಹಾಕಾ ಆಪವಾದ್ ಮುಳ್ಳ್ಯಾಬರಿ ಥೊಡೆ ಯುವಜಣ್ ಕೊಂಕ್ಣಿ ಸಾಹಿತ್ಯಾ ಥಂಯ್ ಆಪ್ಲಿ ವೋಡ್ಣಿ ದಾಕೊವ್ನ್ ಆಸ್‌ಲ್ಲೆ.

ಪುಣ್ ಖುಶೆಚಿ ಗಜಾಲ್ ಕಿತೆಂಗಿ ಮುಳ್ಳ್ಯಾರ್ ವೈಜ್ಞಾನಿಕತೆನ್ ಆಪ್ಲಿ ಪ್ರಗತಿ ದಾಕಯಿಲ್ಲ್ಯಾಬರಿ, ಆಮ್ಚ್ಯಾ ಯುವಜಣಾಂನಿ ಕೊಂಕ್ಣಿ ಸಾಹಿತ್ಯಾ ಥಂಯ್ ಆಪ್ಲಿ ಉರ್ಬಾ ಚಡಾಯ್ಲಿ ಆನಿ ಹ್ಯಾ ಉರ್ಬೆಂತ್ ತಾಂಚಿಂ ಚಿಂತ್ನಾಂ ಸಾಂಪ್ರದಾಯಿಕ್ ಶೈಲೆ ಥಾವ್ನ್ ಭಾಯ್ರ್ ವಚೊನ್, ಸಂಸಾರಾಂತ್ ಘಡ್ಚ್ಯಾ ಹರ್ಯೇಕ್ ವಿಷಯಾಂಕ್ ಆರಾವ್ನ್ ಭಿರಾಂಕುಳ್ ಚಿಂತ್ನಾಂಚೆಂ ಸಾಹಿತ್ಯ್ ಭಾಯ್ರ್ ಪಡ್ತಾ ಆನಿ ವಾಚ್ಪ್ಯಾಂಕ್ ವಿವಿಧ್ ಕೊನ್ಶ್ಯಾಂ ಥಾವ್ನ್, ವಿವಿಧ್ ರುಪಾಂನಿ ಚಿಂತುಂಕ್ ಆಸ್ಪದ್ ಕರುನ್ ದಿತಾ.

ಇತ್ಲೆಂ ಹಾವೆಂ ಬೊರೊಂವ್ಕ್ ಕಾರಣ್ ಪಾಟ್ಲ್ಯಾ ದಿಸಾಂನಿ ಆಂಕ್ರಿ.ಕೊಮ್ ಜಾಳಿ ಜಾಗ್ಯಾರ್ ಪಾಯ್ಸ್ ಜಾಲ್ಲಿ ಕ್ಲೈವ್ ಸೋಜ್ ಬೊಳಿಯೆ ಹಾಚಿ ಕವಿತಾ "ಭ್ಹುಖ್". ಕವಿತಾ ಭೋವ್ ಲ್ಹಾನ್ ತರೀ ಪಾಟ್ಲ್ಯಾ ಲಗ್ಭಗ್ 20 ದಿಸಾಂ ಥಾವ್ನ್ ಮೊಜಿ ನೀದ್ ಪಾಡ್ ಕರುಂಕ್ ಲಾಗ್ಲ್ಯಾ. ಪರ್ತುನ್ ಪರ್ತುನ್ ಮಾರ್ನ್ ಮಾರ್ನ್ ಜಾಗೊಂವ್ಕ್ ಲಾಗ್ಲ್ಯಾ. ಹರ್ಯೆಕ್ ಪೌವ್ಟಿಂ ವಾಚ್ತಾನಾ ದುಸ್ರ್ಯೊ ದುಸ್ರ್ಯೊ ಇಮಾಜ್ಯೊ ಮೊಜ್ಯಾ ದೊಳ್ಯಾಂ ಮುಖಾರ್ ಉಬ್ಯೊ ಜಾತಾತ್. ಕೆದ್ನಾಂ ಲ್ಹಾನ್ ಆಸ್ತಾನಾ ಭಗ್‌ಲ್ಲಿ ಕಠೀಣ್ ದುಬ್ಳಿಕಾಯ್ ದೊಳ್ಯಾಂ ಮುಖಾರ್ ಉಬಿ ಜಾತಾ ತರ್, ಕೆದ್ನಾಂ ಪಟ್ಕಿರ‍್ಯಾ ರಾಜ್ ಕಾರಣಿಂನಿ ಸಾಧ್ಯಾ ಲೊಕಾ ವಯ್ರ್ ಚಲೊಂವ್ಚಿ ದಬ್ಬಾಳಿಕಾ ಪೊಲ್ಕಾ ನಾಚ್ ನಾಚ್ತಾ. ಪುಣ್ ಹಾಚ್ಯಾಕಿ ವರ್ತೆಂ ಮೊಜ್ಯಾ ದೊಳ್ಯಾಂ ಮುಖಾರ್ ಪಾಶಾರ್ ಜಾತೆ ಆಸಾ.

==========

ಭ್ಹುಖ್ 

ಕುಜ್ನಾಂತ್ ಪರಾತ್
ಆವಾಜ್ ಉಟ್ಲಾ..
ಭೊಗ್ತಾ, ಆಯ್ದಾನಾಂಕೀ
 ಭ್ಹುಖ್ ಲಾಗ್ಲ್ಯಾ...

ವಾಟ್ಲ್ಯೊ ಮ್ಹೊರಿಯೇಂತ್
ರಡ್ತಾತ್ ಗ್ರಾಹಾಕಾಂಚಿಂ
ದುರಾಂ ಸಾಂಗೋನ್...!!
ಥೊಡ್ಯೊ ಮೇಜಾರ್
ಗ್ರಾಹಕಾಂಚಿ ಭ್ಹುಖ್
ಥಾಂಬಾವ್ನ್...!!
ಥೊಡ್ಯೊ, ಆಸಾತ್
ವಾಟ್ ಪಳೇವ್ನ್...!!

ಕ್ಲೈವ್ ಸೋಜ್, ಬೊಳಿಯೆ

==========

ಮುಂಬಯಾಂತ್ ವೇಶ್ಯಾ ವಾಟಿಕೆಕ್ ನಾಂವಾಡ್‌ಲ್ಲ್ಯಾ ಗ್ರ್ಯಾಂಟ್ ರೋಡ್ ಪರಿಸರಾಚೆಂ ಚಿತ್ರಣ್. ವೇಶ್ಯಾವಾಟಿಕಾ ಏಕ್ ವ್ರತ್ತಿ ಮರ್ಯಾದ್ ವಂತ್ ಮುಣೊನ್ ನಾಂವಾಡ್‌ಲ್ಲ್ಯಾ ಸಮಾಜೆನ್ ಕಳಂಕ್ ದ್ರಷ್ಟೆನ್ ಪಳೆಂವ್ಚೊ ದಂದೊ. ಪುಣ್ ಹ್ಯಾಚ್ ಮರ್ಯಾದ್‌ವಂತ್ ಸಮಾಜ್ ರೂಪಿತ್ ಕೆಲ್ಲ್ಯಾ ಥೊಡ್ಯಾಂನಿ ಆಪ್ಲ್ಯಾ ಕುಟ್ಮಾಚ್ಯಾ ದಿಷ್ಟಿ ಭಾಯ್ರ್ , ಆಪ್ಲ್ಯಾ ಆಂಗಾಚಿ ಖರಸ್ ಕಾಡುಂಕ್ ಹ್ಯಾಚ್ ವೇಶ್ಯಾವಾಟಿಕಾ ದಂಧ್ಯಾಚಿ ವಾಟ್ ದರ್ತಾತ್ ತಿ ಗಜಾಲ್ ವೆಗ್ಳಿ.

ಕುಜ್ನಾಂತ್ ಪರಾತ್ ಆವಾಝ್ ಉಟ್ಲಾ
ಭೊಗ್ತಾ ಆಯ್ದಾನಾಂಕೀ ಭ್ಹುಖ್ ಲಾಗ್ಲ್ಯಾ

ವ್ಹಯ್ ಹ್ಯಾ ವೇಶ್ಯಾವಾಟಿಕಾ ಧಂಧ್ಯಾಚೊ ಪ್ರಭಾವ್‌ಚ್ ಆಸೊ.ಜಾಂವ್ದಿ ತಿ ವೇಶ್ಯಾ ಯ್ಯಾ ತಿಚೊ ಗ್ರಾಹಕ್. ಜೆವ್‌ಲ್ಲ್ಯಾ ತಿತ್ಲಿ ಭುಖ್ ಉಣಿ ಜಾಯ್ನಾ ಮುಳ್ಳ್ಯಾಬರಿ ಪರ್ತುನ್ ಪರ್ತುನ್  ಹಾಚೆ ಪಾಟ್ಲ್ಯಾನ್ ಭುಖೆಲಿ ಜಾತಾತ್. ವಿವಿಧ್ ಕಾರಣಾಂಕ್ ಲಾಗೊನ್ ಹ್ಯಾ ವೇಶ್ಯಾವಾಟಿಕೆ ದಂಧ್ಯಾಕ್ ಚೆಡ್ವಾಂಚೆಂ ಯೆಣೆಂ ಜಾತಾ, ಜಾಂವ್ಕ್ ಆಸೊಂಕ್ ಪುರೊ ತಿ ಕುಟ್ಮಾಚಿ ಜವಾಬ್ಧಾರಿ ಸಂಪೂರ್ಣ್ ಕರ್ಚ್ಯಾ ಲಾಗೊನ್ ದುಸ್ರಿ ಖಂಚಿಚ್ ವಾಟ್ ಮೆಳಾನಾಸ್ತಾನಾ, ಜಾಂವ್ಕ್ ಆಸೊಂಕ್ ಪುರೊ ಆಡಂಬರಾಚೆಂ ಜೀವನ್ ಸಾರುಂಕ್ ಪಯ್ಶೆ ಉಣೆ ಪಡ್ತಾತ್ ಮುಣೊನ್, ಜಾಂವ್ಕ್ ಆಸೊಂಕ್ ಪುರೊ ಎಕ್ ಪೌವ್ಟಿಂ ಕೊಣಾಚ್ಯಾ ಒತ್ತಾಯೆಕ್ ಮುಣೊನ್ ಗಮ್ಮತೆಂತ್ ವಾಂಟೆಲಿ ಜಾಂವ್ಕ್ ಕೆಲ್ಲೆಂ ಕ್ರತ್ಯ್ ತ್ಯಾ ಪರಿಧೆ ಥಾವ್ನ್ ಭಾಯ್ರ್ ಯೆಂವ್ಕ್ ಸೊಡಿನಾ. ಕೆಲ್ಲಿ ಕರ್ನಿ ಪರ್ತೆಕ್ ಪರ್ತೆಕ್ ಆಧಾರಿಜೆ ಪಡ್ತಾ. ಪಯ್ಶೆ ಆನಿ ಪರಿಸ್ಥಿತಿ ಮುಳ್ಳ್ಯಾ ಕುಜ್ನಾಂತ್ ಮನಿಸ್ ವಳ್ವಳೊನ್ ವಳ್ವಳೊನ್ ತೊ ಥಕ್ತಾ. ಹ್ಯಾ ಸಮಾಜ್ ಮುಳ್ಳ್ಯಾ ಕುಜ್ನಾಂತ್ ಆಶೆಂ ಥಕೊನ್ ಆಸ್ತಾನಾ ತಾಂಚಿಯ್ ಭ್ಹುಖ್ ಥಾಂಬೊಂವ್ಕ್ ವೇಶ್ಯಾ ಮುಳ್ಳಿಂ ಆಯ್ದಾನಾಂ ವಿವಿಧ್ ನಮೂನ್ಯಾಚಿಂ ಖಾಣಾಂ ಭರುನ್ ತಯಾರ್ ಆಸ್ತಾತ್. 

ಪಯ್ಶೆ ಮೆಳ್ತಾತ್ ತರೀ ಹ್ಯಾ ವೇಶ್ಯಾಂಚಿ ಜಿಣಿ ತ್ಯಾ ಪಯ್ಶಾಂಬರಿ ಗೊಡ್ಶಿ ಆಸಾನಾ. ಥೊಡ್ಯಾ ಲಾಗಿಂ ತಾಣಿಂ ರಾಂವ್ಚಿ ಪರಿಸ್ಥಿತಿ ಗೊರ್ವಾಂಚ್ಯಾ ಗೊಟ್ಯಾಂ ಪ್ರಾಸ್ ನಿಕ್ರಷ್ಟ್ ಆಸ್ತಾ. ನಿದೊಂಕ್ ಸಮಾ ಜಾಗೊ ಆಸಾನಾ, ನಾಂ ಮುಣೊನ್ ನಿರ್ಮಳ್ ವಾರೆಂ ಸೆಂವ್ಕ್ ಸಯ್ತ್ ಆಸ್ಪದ್ ಆಸಾನಾ. ಮೆಳ್ಯಾ ಪರಿಸರಾಂತ್ ಆಪ್ಲ್ಯಾ ಕಾಮಾಚ್ಯಾ ಉಪ್ರಾಂತ್ಲೆಂ ಜೀವನ್ ಸಾರಿಜೆ ಪಡ್ತಾ. ತ್ಯಾಚ್ ದೆಕುನ್ ಕವಿ ಮುಣ್ತಾ ವಾಟ್ಲ್ಯೊ ಮ್ಹೊರಿಯೆಂತ್ ರಡ್ತಾತ್ ಗ್ರಾಹಕಾಂಚಿಂ ದುರಾಂ ಸಾಂಗೊನ್...... ಎಕೆಕ್ ಬೊಶಿಯೆಕ್ ( ವೇಶ್ಯೆಕ್ ) ಎಕೆಕ್ ಥರಾಚೆ ಗ್ರಾಹಕ್ ಮೆಳ್ತಾತ್. ಥೊಡೆ ಬೊರ‍್ಯಾನ್ ತಾಂಚ್ಯಾ ಸಂಗಿಂ ವರ್ತನ್ ಕರ್ತಾತ್ ತರ್, ಥೊಡ್ಯಾಚೆಂ ವರ್ತನ್ ಕ್ರೂರತಾಚೆ ಸರ್ವ್ ಪೌಂವ್ಡೆ ಉತ್ರೊಂಚ್ಯಾ ತಸಲೆಂ. ಥೊಡ್ಯಾ ಪೌವ್ಟಿಂ ಆಪ್ಲಿ ಭಿಗ್ಡಾಲ್ಲಿ ಭಲಾಯ್ಕಿ ಕಾಣ್ಘೇವ್ನ್ ಗ್ರಾಹಕಾಂಕ್ ತ್ರಪ್ತಿ ಕರುಂಕ್ ಪಡ್ತಾ. ಕಿತ್ಯಾಕ್ ಮುಳ್ಳ್ಯಾರ್ ಗ್ರಾಹಕಾನ್ ತಾಚ್ಯಾ ಚಿಂತ್ಪಾ ಪ್ರಕಾರ್ ಫಾವೊತೆಂ ಮೋಲ್ ದಿಲ್ಲೆಂ ಆಸ್ತಾಂ ತೊ ಗ್ರಾಹಕ್ ಆಪ್ಣೆ ದಿಲ್ಲ್ಯಾ ಮೊಲಾಕ್ ಸಂಪೂರ್ಣ್ ನ್ಯಾಯ್ ಮೆಳಾಶೆಂ ತೊ ಪಳೆತಾ. ಆಸಲ್ಯಾ ಪರಿಸ್ಥಿತೆಂತ್ ಎಕ್ ವೇಶ್ಯೆಚಿ ಮಾನಸಿಕ್ ಪರಿಸ್ಥಿತಿ ಸಮ್ಜೊನ್ ಘೆಂವ್ಚಿಂ ಕೊಣಿಂ ಆಸಾನಾಂತ್. ಆಸ್ತಾತ್ ತರ್ ಫಕತ್ತ್ ತಿಚ್ಯೊ ಸಾಂಗಾತಿಣ್ಯೊ ಜೊ ತಿಚ್ಯಾ ಭರಿಚ್ ಕ್ಲಿಷ್ಟ್ ಪರಿಸರಾಂತ್ ಜೀಯೆವ್ನ್ ಆಸ್ತಾತ್. ಜಶೆಂ ಮೊರಿಯೆಂತ್ ಆಸ್‌ಲ್ಲ್ಯಾ ವಾಟ್ಲೆಂಬರಿ ತಾಂಚಿ ಜೀಣ್. ಜಿಣಿ ಕಶಿಯ್ ಆಸೊಂದಿ ವೇಶ್ಯಾವಾಟಿಕಾ ಎಕ್ ನಿರಂತರ್ ಪ್ರಕ್ರಿಯಾ ಜಾವ್ನಾಸಾ. ಗ್ರಾಹಕ್ ಉಣೆ ಪಡ್ಲೆ ಮುಣೊನ್ಂಚ್ ನಾ. ತ್ಯಾಚ್ ದೆಕುನ್ ಥೊಡ್ಯೊ ವೇಶ್ಯಾ [ ವಾಟ್ಲ್ಯೊ ] ಮ್ಹೊರಿಯೆಂತ್ ರಡೊನ್ ಆಸ್ಲ್ಯಾರೀ ಥೊಡ್ಯೊ ಮೇಜಾರ್ ಗ್ರಾಹಕಾಂಚಿ ಭ್ಹುಖ್ ಥಾಂಬೊವ್ನ್ ಆಸ್ತಾತ್.

ಥೊಡ್ಯೊ ಆಸಾತ್ ವಾಟ್ ಪಳೇವ್ನ್.....ಹಿಂ ಚಾರ್ ಉತ್ರಾಂ ಮ್ಹಾಕಾ ಗ್ರ್ಯಾಂಟ್ ರೋಡಾಚೊ ಉಗ್ಡಾಸ್ ಪರ್ತೇಕ್ ಜಿವಾಳೊಂಕ್ ಕಾರಣ್ ಜಾತಾ. ಕೊಣಿ ಹ್ಯಾ ರಸ್ತ್ಯಾರ್ ದಿಸಾಚೆಂ ಪಯ್ಣ್ ಕೆಲ್ಯಾರ್ ಹೆಂ ಚಿತ್ರಣ್ ಕಿತ್ಲೆಂ ಸತ್ ಮುಣೊನ್ ಭಗ್ತಾ. ಜಶೆಂ ಎಕ್ ಫುಲಾಕ್ ಬಾವೊಂಕ್ ಎಕ್ ವಾಯ್ದೊ ಆಸ್ತಾಗಿ ತಶೆಂಚ್ ಹೊ ವೇಶ್ಯಾವಾಟಿಕೆಚೊ ಬಜಾರ್. ವೇಶ್ಯಾ ಪ್ರಾಯ್ ಜಾಲಿ ಯ್ಯಾ ಪರ್ವಿ ಜಾಲಿ ಮುಳ್ಳ್ಯಾರ್ ಉಪ್ರಾಂತ್ ತಿಚೊ ಡಿಮಾಂಡ್ ಉಣೊ ಜಾತಾ. ತಿಕಾ ವಿಚಾರ್ಚೆ ಗ್ರಾಹಕ್ ಆಸಾನಾಂತ್. ಆನಿ ಹಿ ಸಹಜ್ ಪ್ರಕ್ರಿಯಾ ಜಾವ್ನಾಸಾ. ಕಿತ್ಯಾಕ್ ಮುಳ್ಳ್ಯಾರ್ ಹರ್ಯೇಕ್ ವ್ಯಾಪಾರಿ ಆಪ್ಣೆಂ ನಿವೇಶ್ ಕೆಲ್ಲ್ಯಾ ಪಯ್ಶ್ಯಾಂಕ್ ಫಾವೊತೊ ಪಾಯ್ದೊ ಆಶೆತಾ. ಭಾವನಾಂಕ್ ಹ್ಯಾ ಬಾಜರಾಂತ್ ಮೋಲ್ ನಾ. ತ್ಯಾಚ್ ದೆಕುನ್ ಕಿತ್ಲ್ಯೊಗಿ ವಾಟ್ಲ್ಯೊ [ವೇಶ್ಯಾ] ತಾಂಚ್ಯಾ ಗ್ರಾಹಕಾಂಚೊ ವಾಟೊ ಪಳೆವ್ನ್ ಆಸ್ತಾತ್ ಏಕ್ ನಿರ್ಲಿಪ್ತ್ ಹುಮೆದಿನ್.

ವೇಶ್ಯಾವಾಟಿಕಾ ಎಕ್ ಸಮಾಜಿಕ್ ಪಿಡಾ. ನಿರ್ಮೂಲ್ ಕರುಂಕ್ ಸಾಧ್ಯ್ ನಾ [ಆಸಾಧ್ಯ್ ಖಂಡಿತ್ ನಂಯ್]. ಬೊರೆಂ ಶಿಕಾಪ್ , ಫಾವೊತಿಂ ಕಾಮಾಂ, ಸಾಮಾಜಿಕ್ ಜಾಗ್ರತಿ ಲೋಕಾಕ್ ಸರ್ಕಾರಾ ಥಾವ್ನ್ ಫಾವೊ ಜಾಲ್ಯಾರ್ ಖಂಡಿತ್ ಜಾವ್ನ್ ಎಕಚ್ಪರಾ ನಹಿಂ ತರೀ ಹಳ್ತಾರ್ ಹ್ಯಾ ಬಜಾರಾಕ್ ಆಂತ್ಯ್ ಯೆತಾಲೊ ಮುಳ್ಳೊ ಮೊಜೊ ವಿಶ್ವಾಸ್ ಆನಿ ಭರ್ವಾಸೊ.

ಸಂಸಾರಾಂತ್ ಭುಕೆಚಿಂ ವಿವಿಧ್ ರುಪಾಂಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಪೂಣ್ ಚಡಾವತ್ ರುಪಾಂ ಫಕತ್ ಗ್ರಾಹಕಾಂಚಿಂ. ಪೂಣ್ ಹ್ಯಾ ಕವಿತೆಂತ್ ಆಯ್ದಾನಾಂಚ್ಯಾ ಭುಖೆಚೆಂ ರುಪ್ಣೆಂ ವಾಚ್ಪ್ಯಾಂ ಮುಕಾರ್ ದವರ್ಲಾಂ. ತರ್ ಆಯ್ದಾನಾಕ್ ಭುಖ್ ಲಾಗೊಂಕ್ ಕಾರಣ್ ಕಿತೆಂ? ಹಿ ಭುಖ್ ಫಕತ್ ಪೊಟಾಚಿ ? ಐಶಾರಾಮಿಜಿಣ್ಯೆಚಿ? ವಾ ವಾಂಚೊನ್ ಉರ್ಚಿ? ತೆಂ ಚಿಂತ್ಚೆಂ ಕಾಮ್ ಕವಿ ವಾಚ್ಪ್ಯಾಂಕ್ ಸೊಡ್ತಾ.

ಏಕ್ ಮಾತ್ ವಿಸ್ರೊಂಕ್ ಜಾಯ್ನಾ, ಆಯ್ದಾನಾಚೆಂ ಅಸ್ತಿತ್ವ್ ಸಗ್ಳೆಂ ಗ್ರಾಹಕ್ ಅನಿ ತಾಚ್ಯಾ ಭುಖೆಚೆರ್ ಹೊಂದೊನ್ ಆಸಾ. ಗ್ರಾಹಕಾಂ ಪಯ್ಕಿ ಥೊಡೆ ಆಯ್ದಾನಾಂಕ್ ಮರ್ಯಾದ್ ದಿತಾತ್, ಥೊಡೆ ದೀನಾಂತ್. ಪೂಣ್ ಏಕ್ ಮಾತ್ ಸತ್- ಗ್ರಾಹಕ್ ನಾ ತರ್ ಆಯ್ದಾನಾಂಕ್, ವಾಟ್ಲ್ಯಾಂಕ್ ಅಸ್ಮಿತಾತ್ ನಾ.

ಆಸಲೆಂ ಎಕ್ ಚಿಂತಪ್ ಚಿಂತುಂಕ್ ಆಸ್ಪದ್ ಕರುನ್ ದಿಲ್ಲ್ಯಾ ಕವಿ ಮಿತ್ರ್ ಕ್ಲೈವ್ ಸೋಜ್ ಬೊಳಿಯೆಕ್ ಮೊಜೆ ಧಿನ್ವಾಸ್. ಆಸಲ್ಯಾಚ್ ಉಂಚ್ಲ್ಯಾ ಚಿಂತ್ಪಾಚಿಂ ಕವಿತಾಂ ತಾಚೆ ಥಾವ್ನ್ ವ್ಹಾಳೊಂದಿತ್ ಮುಣೊನ್ ಆಶೆತಾಂ.

ನಾನು ಮರೋಲ್ ತೊಟ್ಟಾಮ್.