ಪಾಂಚ್ವಿ ಪರ್ಯಾಂತ್ಲೆಂ ಮ್ಹಜೆಂ ಶಿಕಾಪ್ ಘರಾ ಲಾಗ್ಶಿಲ್ಯಾ ಕನ್ನಡ ಮೀಡಿಯಂ ಇಸ್ಕೊಲಾಂತ್ ಜಾಲ್ಲೆಂ. ತೆ ಉಗ್ಡಾಸ್ ಅಜೂನ್ ಜಿವಾಳ್ ಆಸಾತ್. ಸುಜಾತ ಟೀಚರ್, ಲೀನ ಟೀಚರ್ ಆನಿ ಫ್ಲೊಸ್ಸಿ ಟೀಚರ್ ಹಾಣಿಂ ದಿಲ್ಲೆಂ ಶಿಕಾಪ್, ಶಿಕಯ್ಲಲಿ ಬೂದ್ ಆನಿ ಜಿಣ್ಯೆ ಲಿಸಾಂವ್ ಆಯ್ಚ್ಯಾ ಜಿಣಿಯೆಕ್ ಮೂಳ್. ತಾಂಕಾಂ ಋಣಿ ಹಾಂವ್. ಶಿಕ್ಪಾ ಸಾಂಗಾತಾ ಶಿಕ್ಲಲ್ಯೊ ಹೆರ್ ಜಾಯ್ತ್ಯೊ ಚಟುವಟಿಕ್ಯೊ ಅಜ್ ದಿಸ್ಪೊಟ್ತ್ಯಾ ಜಿಣಿಯೆಕ್ ಆಧಾರ್ ಜಾವ್ನ್ ಆಸಾತ್.

1999 ಇಸ್ವಿ, ಹಾಂವ್ ಮ್ಹಜೆಂ ಪಾಂಚ್ವೆ ದರ್ಜೆಚೆಂ ಶಿಕಪ್ ಸಂಪಯ್ತಾನಾ. ಹರ್ಯೆಕ್ ಫಲಿತಾಂಶಾಂತ್ ಮ್ಹಾಕಾ ಹರ್ಯೆಕಾ ದರ್ಜೆಂತ್ ಪಯ್ಲೆಂ, ದುಸ್ರೆಂ ಯಾ ಚುಕ್ಲ್ಯಾರ್ ತಿಸ್ರೆಂ ಸ್ಥಾನ್ ಖಚಿತ್. ಹ್ಯಾ ಇಸ್ಕೊಲಾಕ್ ಪಟ್ಟೆ ಇಸ್ಕಾಲ್ ಮ್ಹುಣೊನ್ ಅಜೂನ್ ಸಾಂಗ್ತಾಂವ್ ತರೀ ಇಸ್ಕೊಲ್ ಬಂದ್ ಜಾವ್ನ್ ಸಭಾರ್ ವರ್ಸಾಂ ಜಾಲಿಂ. ಹಾಂಗಾಸರ್ ಪಾಂಚ್ವಿ ದರ್ಜೆ ಪರ್ಯಾಂತ್ ಶಿಕೊಂಕ್ ಆವ್ಕಾಸ್ ಆಸ್ತಾಲೊ. ಮುಕ್ಲ್ಯಾ ಶಿಕ್ಪಾಕ್ ಪಯ್ಶಿಲ್ಯಾ ದುಸ್ರ್ಯಾ ಇಸ್ಕೊಲಾಚಿ ವಾಟ್ ಸೊಧಿಜೆ ಅಸ್ತಾಲಿ.

ಸವ್ಯಾ ದರ್ಜೆ್ಕ್ ಖಂಯ್ಸರ್ ವೆಚೆಂ ಮ್ಹುಣೊನ್ ಚಿಂತಾನಾ, ಮ್ಹಜ್ಯಾ ಘರ್ಚ್ಯಾನಿ ದಾಮಸ್‍ಕಟ್ಟೆ, ಕಿರೆಂ ಫಿರ್ಗಜೆಚ್ಯಾ ಇಸ್ಕಾಲಾಕ್ ದಾಖಲ್ ಕರ್ಚೊ ನಿರ್ಧಾರ್ ಕೆಲ್ಲೊ. ತೆಂ ಇಸ್ಕೊಲ್ ಸಯ್ತ್ ಕನ್ನಡ ಮಾಧ್ಯಮ್. ಮೊಜ್ಯಾ ಸಾಂಗಾತಿ ಥೊಡ್ಯಾನಿ ಇಂಗ್ಲಿಷ್ ಮಾಧ್ಯಮ್ ವಿಂಚ್‍ಲ್ಲೆಂ. ಮಾಯ್ ಮಹಿನ್ಯಾಂತ್, ಕಿರೆಂ ಇಸ್ಕೊಲಾಕ್ ದಾಖಲ್ ಜಾವ್ನ್ ಪಾಟಿಂ ಘರಾ ಯೆತಾನಾ ವಾಟೆರ್ ಮೆಳ್‌ಲ್ಲ್ಯಾ ಎಕಾ ಸ್ರ್ತೀಯೆನ್ ಸದಾಂಚೆ ಸವಾಯೆ ಪರ್ಮಾಣೆ " ಖಂಯ್ಸರ್ ಪಾವ್ಲ್ಯಾತ್?" ಮ್ಹುಣೊನ್ ವಿಚಾರ್ ಕರ್ತಾನ ಮ್ಹಜ್ಯಾ ಮಮ್ಮಿನ್ ಸವಿಸ್ತಾರ್ ವಿವರ್ ದಿಲೊ.

"ತುಜೊ ಪೂತ್ ಶಿಕೊಂಕ್ ಹುಷಾರ್ ಆಸಾ... ತಾಕಾ ಇಂಗ್ಲಿಷ್ ಮಾಧ್ಯಮಾಕ್ ಘಾಲಿಜಯ್ ಆಸ್‌ಲ್ಲೆಂ. ಇಂಗ್ಲಿಷ್ ಶಿಕ್ಲ್ಯಾರ್ ಮುಕಾರಿಂಕ್ ಮೊಸ್ತು ಬರೆಂ" ಮ್ಹಣೊನ್ ಒಕ್ಕಾಣೆ ಘಾಲ್ತಾನಾ "ತೊ ಆತಾಂ ಕನ್ನಡ ಶಿಕೊಂದಿ, ಮ್ಹಜೊ ಪೂತ್ ಹುಶಾರ್ ಆಸಾ ಜಾಲ್ಲ್ಯಾನ್ ಇಂಗ್ಲಿಷ್ ಮುಕಾರ್ ಖಂಡಿತ್ ಶಿಕ್ತಾಲೊ" ಮ್ಹಣ್ ಮಮ್ಮಿನ್ ವಿಶ್ವಾಸಾನ್ ಜಾಪ್ ದಿಲ್ಲಿ!

ಮಮ್ಮಿಚ್ಯಾ ಜಾಣ್ತಿಕಾಯೆನ್, ಕನ್ನಡಾಂತ್ ನಿಪುಣ್ ಜಾಲೊಂ, ಇಂಗ್ಲಿಷ್ ಉಪ್ರಾಂತ್ ಶಿಕ್ಲೊಂ ಸಂಗಿಂ ’ಮನೆಯೇ ಮೊದಲ ಪಾಠ ಶಾಲೆ’ ಮ್ಹುಣೊನ್ ಸಮ್ಜಲೊಂ.

ಸನ್ನು ನಿಡ್ಡೋಡಿ