ಜಿಣ್ಯೆ ಪಾನಾಚಾ ಹ್ಯಾ ಆಂಕ್ಡ್ಯಾರ್ ಮ್ಹಜ್ಯಾ ಗಾಂವ್ಚ್ಯಾ ದೆ| ಡೆನಿಸ್ ಜೆ. ಪಿಂಟೊ (10.03.1954 - 21.08.2004) ಹಾಂಚೆ ವಿಶಿಂ ಲಿಖುಂಕ್ ಆಶೆತಾಂ. ವ್ರತ್ತೆನ್ ಶಿಕ್ಷಕ್ ತೆ ಜಾವ್ನಾಸ್‌ಲ್ಲೆ. ಜೊನಾ ಮಾಸ್ಟೆರ್ ಮ್ಹುಣೊನ್ ಆಮ್ಚ್ಯಾ ಗಾಂವಾರ್ ಸರ್ವಾಂಕ್ ವಳ್ಕಿಚೆ. ತಾಂಚಿ ಸೆವಾ ಕೇವಲ್ ಶಿಕ್ಷಣ್ ಕ್ಷೇತ್ರಾಕ್ ಮಾತ್ರ್ ಸೀಮಿತ್ ಕರಿನಾಸ್ತಾಂ ಗಾಂವ್ಚ್ಯಾ ಬರ‍್ಯಾಪಣಾಕ್ ತೆ ವಾವುರ್‌ಲ್ಲೆ. ತರ್ನಾಟ್ಯಾಂಕ್ ಮಾರ್ಗದರ್ಶಕ್ ತೆ ಜಾವ್ನಾಸ್‌ಲ್ಲೆ. ಜಾಯ್ತ್ಯಾ ನಾಟಕಾಂಕ್ ತಾಣಿ ದಿಗ್ಧರ್ಶನ್ ದಿಲಾಂ. ಹಾಯರ್ ಪ್ರೈಮರಿ ಇಸ್ಕೊಲಾಕ್ ವೆತಾನಾ ಸದಾಂ ಸಕಾಳಿಂ ಬಸ್ಸಾರ್ ಮೆಳ್ಚ್ಯಾ ತಾಣಿ ದಿಲ್ಲಿಂ ಜಾಯ್ತಿಂ ಸಲಹಾ ಸೂಚನಾ ಆಜೂನ್ ಮೊಜ್ಯಾ ಉಗ್ಡಾಸಾಂತ್ ಅಸಾತ್. ಮ್ಹಜ್ಯಾ ಕುಟ್ಮಾಕೀ ತೆ ಮೊಗಾಚೆ. ಸದಾಂ ಸಾಂಜೆರ್ ಕುದ್ರಿಪದ್ವಾರ್ ಮೆಳ್ಚೆ ಪಪ್ಪಚೆ ಆಪ್ತ್ ಮಿತ್ರ್!

ತಿಸ್ರ್ಯಾ ಕ್ಲಾಶಿಂತ್ ಶಿಕ್ತಾಲೊಂ. ಆಯ್ತಾರಾ ದೊನ್ಪರಾಂಚೆ ಮೀಸ್ ಜಾವ್ನ್ ದೊತೊರ್ನಿಚಾ ಕ್ಲಾಶಿಕ್ ವೆತಾನಾ ಮಾಸ್ಟೆರಾಮಾನ್ ಆಪಯ್ಲೆಂ. ಕಥೊಲಿಕ್ ಯುವ ಸಂಚಾಲನ್ (ಅತಾಂ ಭಾರತೀಯ್ ಕಥೊಲಿಕ್ ಯುವ ಸಂಚಾಲನ್) ಸಂಘಟನಾಚ್ಯಾ ಸಾಂದ್ಯಾಂ ಸಂಗಿ ತೆ ಆಸ್‍ಲ್ಲೆ. ಮ್ಹಾಕಾ ಆಪಯಿಲ್ಲೆಂ ನಾಟಕಾಂತ್ ಅಭಿನಯ್ ಕರ್ಚ್ಯಾಕ್. ಮ್ಹಜ್ಯಾ ಲಾನ್ಪಣಾರ್‌ಚ್ ಮ್ಹಾಕಾ ವೆದಿರ್ ಆಭಿನಯ್ ಕರ್ಚೊ ಆವ್ಕಾಸ್ ತಾಣಿ ದಿಲ್ಲೊ. ತಾಂಕಾಂ ಹಾಂವ್ ಆಜ್ ಋಣಿ. ಮ್ಹಜೆ ಲಾಗಿಂ ಆಸ್‍ಲ್ಲೆಂ ತಾಲೆಂತ್ ತಾಣಿಂ ಪಾರ್ಕಿಲ್ಲೆಂ. ಮ್ಹಾಕಾ ತೊ ಏಕ್ ವಿಶೇಷ್ ಆನ್ಭೋಗ್ ಜಾವ್ನಾಸ್‌ಲ್ಲೊ. ಜಿಣ್ಯೆಂತ್ ಪಯ್ಲೆ ಪಾವ್ಟಿಂ ವೆದಿರ್ ಅಭಿನಯ್ ಕರ್ಚೊ. ತವಳ್ ಇಗರ್ಜೆಕ್ ಚಲೊನ್ ವಚಜಾಯ್ ಆಸ್‍ಲ್ಲೆಂ. ಸದಾಂ ಸಾಂಜೆರ್ ನಾಟಕಾಚೆಂ ಆಭ್ಯಾಸ್ ಜಾವ್ನ್, ಆಮ್ಚ್ಯಾಚ್ ವಾಡ್ಯಾಚೆ ಮೆಲ್ವಿನ್ ಡಿ ಸೋಜ ಆನಿ ಆಲ್ವಿನ್ ಡಿ ಸೋಜ ಮ್ಹಾಕಾ ರಾತಿಂ ಘರಾ ಪಾವಯ್ತಲೆ. ಹೆ ಉಗ್ಡಾಸ್ ಆಜೂನ್ ಜಿವಾಳ್ ಆಸಾತ್.

ವೆದಿರ್ ಪ್ರದರ್ಶನ್ ಜಾಲ್ಲ್ಯಾ ಉಪ್ರಾಂತ್ ಹಾಂವೆಯೀ ಏಕ್ ನಾಟಕ್ ಬರಯ್ಜಯ್ ಮ್ಹಣ್ ಆಶಾ ಮತಿಂತ್ ಉಬ್ಜಲ್ಲಿ. ಜಾಯ್ತಿಂ ವರ್ಸಾಂ ಪಾಶಾರ್ ಜಾಲಿಂ, ಬಾರಾವೆಂತ್ ಅಸ್ತಾನಾ ಹಿ ಆಶಾ ಮ್ಹಜೊ ಮಿತ್ರ್ ಜೀವನ್ ಕ್ರಾಸ್ತಾ ಸಂಗಿಂ ಮೆಳೊನ್ ಬರಯ್ಲೆಲ್ಯಾ ’ಪರಿವರ್ತನ್’ ಮ್ಹುಳ್ಳ್ಯಾ ನಾಟಕಾ ಸಂಗಿಂ ಸುಫಳ್ ಜಾಲಿ. ತ್ಯಾ ನಂತರ್ ಕೊಂಕ್ಣೆಂತ್ ಉಮೆದ್ ಚಡ್ಲಿ ಆನಿ ಕವಿತಾ, ಲೇಖನಾ, ಕಾಣಿಯೊ, ನಾಟ್ಕುಳೆ ಮೊಜ್ಯಾ ಲಿಕ್ಣೆಂತ್ ಥಾವ್ನ್ ಉದೆವ್ನ್ ಆಯ್ಲೆ. ಮೊಜ್ಯಾ ವ್ಹಡಿಲಾಂನಿ ವರ್ತೊ ಸಹಕಾರ್ ದಿಲ್ಲೊ. ಘರಾಚ್ಚ್ ರಾವೊನ್ ಇಸ್ಕೊಲಾಚೆಂ ಲಿಸಾಂವ್ ಶಿಕ್ಲ್ಯಾರ್ ಮಾತ್ರ್ ಪುರೊ ಮ್ಹುಣೊನ್ ದಭಾವ್ ಘಾಲ್ಲೊ ನಾ. ಆಜ್ ಮಾಸ್ಟೆರಾಮ್ ಆಮ್ಚೆ ಮಧೆಂ ನಾ! ಪೂಣ್ ತಾಜೊ ಉಡಾಸ್ ಸದಾಂಚ್ ಜೀವಂತ್ ಆಸಾ ಆನಿ ಆಸ್ತಾಲೊಚ್ಚ್!

ಸನ್ನು ನಿಡ್ಡೋಡಿ