ಜಿಣ್ಯೆ ಪಾನಾಂ 10 - "ಆದಾಂವ್ ಆನಿ ಎವ್" ಯಾ “ಮಂಗನಿಂದ ಮಾನವ”?

ಉತ್ಪತ್ತಿ ಗ್ರಂಥಾಂತ್ ಮೊಯ್ಜೆನ್ ಲಿಖ್‍ಲ್ಲ್ಯಾ ಸಂಸಾರಾಚ್ಯಾ ರಚ್ನೆ ವಿಷ್ಯಾಂತ್ ಆಮಿಂ ಸರ್ವ್ ಜಾಣಾಂವ್. ಸಾತ್ ದಿಸಾಂಚ್ಯಾ ಸಂಸಾರಾಚಾ ರಚನೆಚಿ ಚರಿತ್ರಾ ಪರ್ನ್ಯಾ ಸೊಲ್ಲ್ಯಾಂತ್ ಉಲ್ಲೇಖ್ ಕೆಲ್ಲ್ಯಾನ್, ಹ್ಯಾ ಸಂಸಾರಿಂ ದಾದ್ಲ್ಯಾಕ್ ದೆವಾನ್ ಮಾತ್ಯೆ ಥಾವ್ನ್ ರಚ್ಲೊ ಆನಿ ತಾಚಿ ಬೋರ್ ಕಾಡ್ನ್ ಸ್ರ್ತಿಯೇಕ್ ರಚ್ಲೆಂ ಮುಳ್ಳ್ಯೆ ವಿಶಿಂ, ಲಾನ್ಪಣಾರ್‌ಚ್ ಘರಾಂತ್ ಆನಿ ಮುಳಾವಿ ದೊತೊರ್ನ್ ಶಿಕ್ತಾನಾ ಹಾಂವೀ ಸಮ್ಜಲ್ಲೊಂ. ಪ್ರಾಥಮಿಕ್ ಶಿಕ್ಪಾ ವೆಳಾರ್ ಹ್ಯಾ ವಿಷಯಾಚೆರ್ ತರ್ಕ್ ಜಾಂವ್ಕ್ ದುಸ್ರೆಂ ಉತರ್ ವಾಚುಂಕ್ ಯಾ ಆಯ್ಕೊಂಕ್ ನಾತ್‌ಲ್ಲೆಂ, ಮಾತ್ರ್ ನಂಯ್ ಲ್ಹಾನ್ ಪ್ರಾಯೆರ್ ಜಾಯ್ತೀ ಸಮ್ಜಣಿ ನಾತ್‍ಲ್ಲಿ. ಎವೆನ್ ಆದಾಂವ್ಕ್ ಫಳ್ ಖಾವೊವ್ನ್ಂಚ್ ಘಡ್ಭಡ್ ಜಾಲ್ಲಿ ಮ್ಹಣ್ ಸಮ್ಜತಾನಾ ಹಾಂವ್ ಡಿಗ್ರೆಚಾ ಶಿಕ್ಪಾಕ್ ಪಾವುಲ್ಲೊಂ!

ಪೊಂಪೈ ಹೈಸ್ಕೂಲಾಂತ್ ಶಿಕ್ತಾಲೊಂ. ಇಗರ್ಜಿಚೆಂ ಇಸ್ಕೊಲ್ ಜಾಲ್ಲ್ಯಾನ್ ದೊತೊರ್ನಿಚೆಂ ಶಿಕಪ್ ಇಸ್ಕೊಲಾಚಾ ಶಿಕ್ಪಾಸಂಗಿಂ ಸಾಂಗಾತಾ ಚಲ್ತಲೆಂ. ಧಾವೆಂತ್ ದೊತೊರ್ನಿಚಿ ಪಬ್ಲಿಕ್ ಪರಿಕ್ಷಾ ಆಸ್ತೆಲಿ ಜಾಲ್ಲ್ಯಾನ್ ಚೀತ್ ದೀವ್ನ್ ಶಿಕ್ಚಿ ಗರ್ಜ್! ಶಿಕ್ಪಾಚಿಂ ಮೆಟಾಂ ಚಡ್ತಾನಾ ನವೆಂ ನವೆಂಚ್ ಶಿಕೊಂಕ್ ಮೆಳ್ತಾಲೆಂ. ಸಮಾಜ್ ಶಾಸ್ತ್ರ್, ರಸಾಯನ್ ಶಾಸ್ತ್ರ್, ಜೀವ್ ಶಾಸ್ತ್ರ್, ಆಶೆಂ ವೆವೆಗ್ಳ್ಯಾ ವಿಷಯಾಂಚೆರ್ ಧ್ಯಾನ್ ಪ್ರಾಪ್ತ್ ಜಾತಲೆಂ. ಜೀವ್ ಶಾಸ್ತ್ರಾಂತ್ ಕಾಂಯ್ ಥೊಡೆಂ ಟಿಚರಾಂನಿ ವಿವರುನ್ ಸಾಂಗಿನಾಸ್ತಾಂ ಗುಪಿತ್ ಲಿಪಯ್ಲೆಂಯ್ ಅಸಾ! ತಿ ಗಜಾಲ್ ವೆಗ್ಳಿ. ಜಾಯ್ತ್ಯಾ ವಿಶಯಾಂಚೆರ್ ಶಿಕಪ್ ಮೆಳ್ತಾನಾ ಮ್ಹಜ್ಯಾ ಮತಿಂತ್ ಗುಸ್ಪೊಡ್ ಕೆಲ್ಲೊ ಚಾರ್ಲ್ಸ್ ಡಾರ್ವಿನಾನ್. ಮ್ಹಜ್ಯಾ ಮತಿಂತ್ ರೊಂಬುಲ್ಲ್ಯಾ ಸಂಸಾರಾಚಾ ರಚನೆಚಾ ಚರಿತ್ರೆಚೆರ್ ವಾದಾಳ್ ಉಟ್‍ಲ್ಲೆಂ ಹಾಂಗಾಸರ್! ಬಿಲಿಯನ್ ವರ್ಸಾಂ ಪಯ್ಲೆಂ ಪ್ರಥ್ವಿ ಕಶಿ ರಚುನ್ ಆಯ್ಲಿ, ಜೀವ್ ಕಣಾಂ ಕಶಿಂ ಉದೆಲಿಂ, ಸುಕ್ಣಿಂ- ಸಾವ್ಜಾಂ, ಗುಡೆ-ದೊಂಗೊರ್, ಉದ್ಕಾ ಸಾಗೊರ್ ಆಶೆಂ ನವೆಂಚ್ ಶಿಕೊಂಕ್! ಸಾಂಗಾತಾಚ್ ಚಾರ್ಲ್ಸ್ ಡಾರ್ವಿನಾಚೊ’ ಮಂಗನಿಂದ ಮಾನವ’ ಮ್ಹುಳ್ಳೊ ’ಸಿಧ್ದಾಂತ್’. ಮತಿಂತ್ ಜಾಯ್ತಿಂ ಸವಾಲಾಂ ಆತಾಂ ಉಬ್ಜಾಲ್ಲಿಂ. ಕೊಣಾಲಾಗಿಂ ವಿಚಾರುಂ ಮ್ಹಣ್ ಕಳಿತ್ ನಾತ್‌ಲ್ಲೆಂ. ಟೀಚರಿಲಾಗಿಂ ಗೆಲ್ಯಾರ್ ಮಾರ್, ಪಾದ್ರ್ಯಾಬಾಲಾಗಿಂ ಗೆಲ್ಯಾರ್ ಕುಟಿ, ಘರಾ ವಿಚಾರುಂಕ್ ಕಾವ್ಜೆಣಿ, ಆಶೆಂ ಜಾಯ್ತೆ ಬಾಂದ್ಪಾಸ್! ಪೂಣ್ ಏಕ್ ಅವ್ಕಾಸ್ ಉಗ್ತೊ ಮೆಳ್‌ಲ್ಲೊ, ಜೀವ್‍ಶಾಸ್ತ್ರ್ ಶಿಕಂವ್ಚಿ ಟೀಚರ್ ಕ್ರೀಸ್ತಾಂವ್ ಆನಿ ಇಸ್ಕೊಲಾಂತ್ ದೊತೊರ್ನ್ ಶಿಕಂವ್ಕೀ ತಿಚ್ಚ್.!

ತ್ಯಾ ಎಕಾ ದಿಸಾ ಟಿಚರಿನ್ ದೊತೊರ್ನಿಚಾ ಕ್ಲಾಸಿಂತ್, ಸಂಸಾರಾಚಾ ರಚನೆಚೊ ಪ್ರಸ್ತಾಪ್ ಕಾಡುನ್ ವಿವರಣ್ ದೀಂವ್ಕ್ ಸುರು ಕೆಲೆಂ. ಹಾವೆಂ ಇಲ್ಲೆಂ ಧೈಯ್ರ್ ಆರಾಯ್ಲೆಂ. ಬಯಲೊಜಿ ಕ್ಲಾಶಿಂತ್ ಸಂಸಾರಾಚಾ ವಿಕಸನಾಚೆರ್ ಶಿಕವ್ಣ್ ದಿಂವ್ಚಿ ಟಿಚರ್ ಆತಾಂ ಸಾತ್ ದಿಸಾನಿ ರಚ್ಲೆಲ್ಯಾ ಸಂಸಾರಾಚೆ ಚರಿತ್ರೆ ವಿಶಿಂ ಸಾಂಗುನ್ ಆಸ್‌ಲ್ಲಿ. ಮಾಕಾ ಬಾಂದ್ಪಾಸ್ ಘೆವ್ನ್ ವೊಗೆ ರಾವುಂಕ್ ಜಾಲೆಂ ನಾ! ಹಾವೆಂ ಮಾತ್ರ್ ವಿಚಾರ್ನ್ ಸೊಡ್ಲೆಂ "ಟಿಚರ್ ತುಮಿಂ ಪಾಠ್ ಶಿಕಯ್ತಾನಾ ಮಂಗನಿಂದ ಮಾನವ ಮ್ಹಣ್ತಾತ್, ಹಾಂಗಾ ದೆವಾನ್ ಮಾತ್ಯೆ ಥಾವ್ನ್ ಮನ್ಶಾಕ್ ರಚ್ಲೊ ಮ್ಹುಣೊನ್ ಸಾಂಗ್ತಾತ್... ಖಂಯ್ಚೆಂ ಸಾರ್ಕೆಂ?" ಸಗ್ಳಿ ಕ್ಲಾಸ್ ನಿಶಬ್ಧ್ ಜಾಲ್ಲಿ. ಟಿಚರ್ ಮಾತ್ರ್ ದೊಳೆ ವಾಠಾರುನ್ ಮ್ಹಾಕಾಚ್ಚ್ ಪಳೆಂವ್ಚಾರ್ ಪಡ್ಲಿ. ಆಸಲೆಂ ಸವಾಲ್ ಯೆತ್ ಮ್ಹುಣೊನ್ ತಿಣೆ ಚಿಂತುಂಕ್ ನಾ ಜಾವ್ಯೆತ್. ಪೂಣ್ ತಿಣೆ ಹುಷಾರ‍್ಪಾಣಾನ್ ಜಾಪ್ ದಿಲ್ಲಿ, "ತುಕಾ ಥಂಯ್ ಪಾಸ್ ಜಾಯ್ಜೆ ತರ್, ಥಂಯ್ ಶಿಕ್‌ಲ್ಲೆಂ ಬರಯ್, ಹಾಂಗಾ ಪಾಸ್ ಜಾಯ್ಜೆ ತರ್ ಹಾಂಗಾ ಶಿಕ್‌ಲ್ಲೆಂ ಬರಯ್!" ಪೂಣ್ ಮ್ಜಜ್ಯಾ ಸವಾಲಾಕ್ ಜಾಪ್ ತವಳ್ ಮೆಳ್ಳಿ ನಾ!

ಪಾಟ್ಲ್ಯಾ ಥೊಡ್ಯಾ ದಿಸಾಂ ಆದಿಂ ಮ್ಹಜ್ಯಾ ವಡ್ ಭಯ್ಣಿಕ್ ಪೆಂಟೆಕ್ ಗೆಲ್ಲ್ಯಾ ತವಳ್ ಮೆಳ್‌ಲ್ಲ್ಯಾ ಟಿಚರಿನ್ ಕಾಂಯ್ ಥೊಡೆಂ ಉಲಯ್ತಾನಾ, ಮ್ಹಜೊಯ್ ವಿಚಾರ್ ಕರುನ್ “ತೊ ಆತಾಂ ಕಸೊ ಅಸಾ? ಶಿಕ್ತಾನಾ ಬಾರೀ ಪೊಕ್ರಿ ಆಸ್‍ಲ್ಲೊ” ಮ್ಹುಣೊನ್ ಉಗ್ಡಾಸ್ ಕಾಡ್ಲೊ ಖಂಯ್. ಮ್ಹೊಜ್ಯಾ ಭಯ್ಣಿನ್ ಹಿ ಗಜಾಲ್ ಮ್ಹಾಕಾ ತಿಳ್ಸಿತಾನಾ ಹ್ಯಾ ಘಡಿತಾಚೊ ಉಗ್ಡಾಸ್ ಆಯ್ಲೊ ಮಾತ್ ನಂಯ್ ಕಾಂಯ್ ಇಲ್ಲ್ಯೊ ಪೊಕ್ರಿ ಹಾಸೊ ಥೊಂಡಾರ್ ಯೇನಾಸ್ತಾನಾ ರಾವ್ಲ್ಯೊ ನಾಂತ್!

ಸನ್ನು ನಿಡ್ಡೋಡಿ.