ಮ್ಹಜ್ಯಾ ಲ್ಹಾನ್ಪಣಾಚಿ ಮುಂಬಯ್ ಪಾಂವ್ಚಿ ಆಶಾ ಜಾರಿ ಜಾಯ್ಜಯ್ ತರ್, ಪದ್ಯೋನ್ನತರ್ ಶಿಕಪ್ ಸಂಪಯ್ಜೆ ಪಡ್ಲೆಂ. 2012 ಇಸ್ವೆಂತ್ ಪಾವ್ಸಿಲ್ಯಾ ದಿಸಾನಿಂ, ಮ್ಹಜ್ಯಾ ವ್ಹಡ್ ಭಯ್ಣಿ ಸಂಗಿಂ, ಆಶೆಲ್ಲೆಂ ಪಯ್ಲೆಂ ಮೇಟ್ ಮೀರಾ ರೋಡಾಚಾ ರಸ್ತ್ಯಾರ್ ದವರ‍್ಲೆಂ. ಮುಂಬಯ್ಚೊ ಹವೊ ನವೊಚ್ ಜಾಲ್ಲ್ಯಾನ್ ಥೊಡ್ಯಾ ವೆಳಾಕ್ ರುಚ್ಲೊ. ಉಪ್ರಾಂತ್ಲ್ಯಾ ದಿಸಾನಿಂ ಹಾಂವೆಂ ಆನ್ಭೊಗ್ ಕೆಲ್ಲೆಂ ಜಾಯ್ತೆಂ. ಚಡ್ ತೇಂಪ್ ಮುಂಬಯ್ ಮ್ಹಜ್ಯಾನ್ ರಾವೊಂಕ್ ಜಾಲೆಂ ನಾ. ಹಾಕಾ ಕಾರಾಣಾಂಯಿ ಆಸ್‌ಲ್ಲಿಂ. ಥೊಡೊಚ್ ತೇಂಪ್ ಆಸ್‍ಲ್ಲೊಂ ತರೀ, ಇಶ್ಟಾಂ ಸಂಗಿಂ ಆನಿ ಕುಟ್ಮಾಂಚ್ಯಾಂ ಸಂಗಿಂ ಜಾಯ್ತೊ ಭೊಂವ್‍ಲ್ಲೊಂ. ನವೊಚ್ ಮುಂಬಯ್ ಪಾವ್‍ಲ್ಲೊಂ ಜಾಲ್ಲ್ಯಾನ್ ಜಾಯ್ತಿ ಜಾಗ್ವಣಿ ಆನಿ ಬೂದ್ ಬಾಳ್ ಮಾಕಾ ಮೆಳ್‌ಲ್ಲಿ. ಥೊಡ್ಯಾಂನಿಂ ಥೊಡ್ಯಾಂ ಘಡಿತಾಂಚೆಂ ದೃಷ್ಟಾಂತ್ ದೀವ್ನ್, ಮುಂಬಯ್ ನವ್ಯಾನ್ ಆಯಿಲ್ಲ್ಯಾಂಕ್ ಕಶೆಂ ಆನಿ ಕಿತೆಂ ಮ್ಹಣ್ ವಿವರ್ ದಿಲ್ಲೊ. ವಾಟೆ ವಾಟೆಂನಿ ಥೊಡೆ ಲುಟ್ಕಾರ್ ಮೆಳ್ತಾತ್, ರೈಲಾರ್ ಧಕ್ಕೊ ಮಾರ್ತಾತ್, ಗಲಾಟೊ ಜಾಂವ್ಚಾಲಾಗಿಂ ರಾಂವ್ಚೆಂ ನಂಯ್, ಮೊಲಾಧಿಕ್ ವಸ್ತು ಭಾಯ್ರ್ ಕಾಣ್ಘೆವ್ನ್ ವೆಚೆಂ ನಂಯ್, ಕೊಣಾಚಿಚ್ ವೊಳೊಕ್ ಕರ್ಚಿ ನಂಯ್, ನವೊಚ್ ಮ್ಹಣ್ ದಾಕಂವ್ಚೆಂ ನಂಯ್, ನೆಣಾರ‍್ಯಾ ಪರಿಂ ಚಲ್ಚೆಂ ನಂಯ್, ಪಾಪಾರ‍್ಯಾ ಬರಿಂ ಕರ‍್ಚೆಂ ನಂಯ್, ಮ್ಹುಣೊನ್ ಕಾನಾಂತಿ ಪೆಂಪಾರೆಂ ಫುಂಕ್ತಾನಾ ಮ್ಹಾಕಾ ಸಮ್ಜಲ್ಲೆಂಕೀ ಹ್ಯಾ ಗಾಂವಾಂತ್ ಪಾಪ್ ಬಿರ್ಮತ್ ಚಿಂತುಂಕ್ ಗೆಲ್ಯಾರ್ ಮ್ಹಜ್ಯಾಚ್ ಗಳ್ಯಾಕ್ ದೊರಿ ಮ್ಹಣ್!

ಎಕಾ ಹಫ್ತ್ಯಾನ್ ಮೀರಾ ರೋಡ್ ಥಾವ್ನ್ ಆಂಧೆರಿ ಲೋಕಲ್ ಟ್ರೈನಾರ್ ವಚೊನ್ ಥಂಯ್ ಥಾವ್ನ್ ಕುರ್ಲಾ ಬಸ್ಸಾರ್ ವಚೊಂಕ್ ಶಿಕ್‍ಲ್ಲೊಂ! ಹಾಚೆ ಉಪ್ರಾಂತ್ ಧಯ್ರ್ ಮೆಳ್‌ಲ್ಲೆಂ ಮ್ಹಾಕಾ ಎಕ್ಲ್ಯಾಕ್‌ಚ್ ಭಂವೊಂಕ್. ರಸ್ತ್ಯಾರ್ ಚಲ್ತಾನಾ ಭಿಕ್ ಮಾಗ್ಚ್ಯಾಂಕ್ ದಯಾ ದಾಕಂವ್ಕ್‌ಯೀ ಭಿರಾಂತ್. ಥೊಡ್ಯಾಂನಿ ಹಾಸೊ ದಿಲ್ಯಾರೀ ಮ್ಹಜ್ಯಾ ತೊಂಡಾರ್ ತಿರಾಸ್ಕಾರಾಚಿಂ ಭೊಗ್ಣಾಂಚ್ ಝಳ್ಕಾತಾಲಿಂ. ಸರ್ವಾಂಕೀ ಕಾರಣ್ ಮ್ಹಾಕಾ ಮೆಳ್‌ಲ್ಲಿ ಶಿಕೊವ್ಣ್! ಏಕ್ ಪಾವ್ಟಿಂ ಕಾಮಾಚಾ ಸೊಧ್ನೆರ್ ಮ್ಹಜ್ಯಾ ಮಿತ್ರಾಕ್ ಮೆಳೊಂಕ್ ಮುಲುಂಡ್ ವಚಜಾಯ್ ಪಡ್ಲೆಂ. ಹಾಂವೆಂ ಥಂಯ್ಸರ್ ಪಯ್ಲೆ ಪೌವ್ಟಿಂ ವೆಚೆಂ ಜಾಲ್ಲ್ಯಾನ್ ತಾಣೆಂಯ್ ಮಾಕಾ ಗರ್ಜೆಚಿ ಸಮ್ಜಣಿ ದಿಲಿ. ಟ್ರೈನಾರ್ ಥಾವ್ನ್ ದೆಂವೊನ್ ಹಾಂವ್ ಮಾಕಾ ಮೆಳ್‌ಲ್ಲ್ಯಾ ಹಿಶಾರ‍್ಯಾಂ ಪರ್ಮಾಣೆಂ ಮಿತ್ರಾಕ್ ಮೆಳೊಂಕ್ ಪಾಯ್ ವೆಟೆನ್ ವೆತಾಲೊಂ. ದೊನೀ ಬಗ್ಲೆಕ್ ಆಂಗ್ಡಿ. ಭಂವ್ತಿಂ ಕಿತೆಂ ಆಸಾ ತೆಂ ಪಳೆವ್ನ್ ಹಾಂವ್ ವಾಟ್ ಚಲ್ತಾಲೊಂ. "ಎಕ್ಸ್‌ಕ್ಯೂಸ್ ಮಿ ಸರ್" ಮ್ಹಣ್ ಕೋಣ್ ಎಕ್ಲೊ ಎಕಾಚ್ಚಾಣೆ ಮ್ಹಜೆ ಮುಕಾರ್ ಉಬೊ ಜಾಲ್ಲೊ. ಹಾಂವೆಂ ಜಾಪ್ ದಿಂವ್ಚ್ಯಾ ಪಯ್ಲೆಂಚ್ ಎಕಾ ಬಿಲ್ಡಿಂಗಾಚೆಂ ನಾಂವ್ ಸಾಂಗೊನ್, ಥಂಯ್ಸರ್ ವೆಚಿ ವಾಟ್ ವಿಚಾರಿಲಾಗ್ಲೊ. ಎಕಾಚ್ ಖಿಣಾನ್ ಮ್ಹಜ್ಯಾ ಮತಿಂತ್ ವೊಂಪ್‍ಲ್ಲಿಂ ಜಾಗ್ವಣೆಚಿಂ ಉತ್ರಾಂ ಉಗ್ಡಾಸಾಕ್ ಆಯ್ಲಿಂ. ’ನೆಣಾರ‍್ಯಾ ಪರಿಂ ಕರ್ಚೆಂ ನಂಯ್!’ ಹಾಂವೆಂ ಸಾಂಗುನ್ ಸೊಡ್ಲೆಂ "Go straight, take first right and then first left" (ಮುಕಾರ್ ವಚ್, ಪಯ್ಲ್ಯಾ ಉಜ್ವ್ಯಾಕ್ ಘುಂವ್ ಆನಿ ಉಪ್ರಾಂತ್ ಪಯ್ಲ್ಯಾ ದಾವ್ಯಾಕ್ ಚಲ್!) "ಥ್ಯಾಂಕ್ಯೂ ಸರ್" ಮ್ಹಣ್ ತೊ ಹಾಸೊ ದಾಕೊನ್ ಚಲ್ತಚ್ ರಾವ್ಲೊ! ಹಾಂವ್ ಮಾತ್ರ್ ಮ್ಹಜ್ಯಾ ಮಿತ್ರಾಲಾಗಿಂ ಪಾವೊಂಕ್ ವಾಟ್ ಸೊಧ್ತಾಲೊಂ ಆನಿ ಹಿಶಾರ‍್ಯಾಂ ಪರ್ಮಾಣೆ ಉಜ್ವ್ಯಾ ಬಗ್ಲೆಕ್ ಘುಂವ್ಲೊಂ! ಹಾಂವೆಂ ಕೆಲ್ಲಿ ಚೂಕ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ಯೆತಾಲಿ. ತೊಯಿ ಮ್ಹಜೆ ಪರಿಂಚ್ ಕಾಂಯ್ ಕಾಮಾಚಾ ಸೊಧ್ನೆರ್ ಆಸ್‌ಲ್ಲೊ ಜಾವ್ಯೆತ್ ಮ್ಹಣ್ ಚಿಂತಾನಾ ಬಿರ್ಮತ್ ದಿಸ್ತಾಲಿ! ಜಾಯ್ತಿಂ ಹೆರ್ ಚಿಂತ್ನಾಂ ಮತಿಂತ್ ವಾದಾಳ್ ಉಟವ್ನ್ ಆಸ್‌ಲ್ಲಿಂ. ಕಾಂಯ್ ಥೊಡೊ ವೇಳ್ ಚಲ್‌ಲ್ಲ್ಯಾ ಉಪ್ರಾಂತ್ ಹಾಂವೆಂ ಮ್ಹಜ್ಯಾ ಮಿತ್ರಾನ್ ಕಾಮ್ ಕರ‍್ಚೆಂ ದಫ್ತರ್ ಸೊಧುನ್ ಕಾಡ್ಲೆಂ ಆನಿ ಥಂಯ್ಸರ್ ಲಾಗಿಂಚ್ ಆಸ್ಚ್ಯಾ ಬಿಡಾ ಆಂಗ್ಡಿ ಮುಕಾರ್ ಉಬೊ ಜಾಲೊಂ. ಭಂವ್ತಿಂ ದೀಷ್ಟ್ ಘುಂವ್ಡಾಯ್ತಾನಾ ಮ್ಹಜೆಲಾಗಿಂ ವಾಟ್ ವಿಚಾರ್ ಕೆಲ್ಲೊ ವ್ಯಕ್ತಿ ಮಾರ್ಗಾಚಾ ದುಸ್ರ್ಯಾ ಬಗ್ಲೆಕ್ ಆನ್ಯೇಕಾ ವ್ಯಕ್ತಿಲಾಗಿಂ ವಾಟ್ ವಿಚಾರುನ್ ಆಸ್‌ಲ್ಲೊ! ಹಾಂವ್ ಮಾತ್ ಬಿಡಾ ಆಂಗ್ಡಿಚಾ ಆಡೊಸಾಕ್ ಲಿಪ್ಲೊಂ!

ಹೆಂ ಘಡಿತ್ ಮ್ಹಜ್ಯಾ ಜಿವಿತಾಂತ್ ಆಜೂನ್ ಉಗ್ಡಾಸಾಕ್ ಯೆತಾ. ಚಡ್ತಾವ್ ಜಾವ್ನ್ ಕೊಣೀ ವಾಟ್ಸುರಿ ವಾಟ್ ವಿಚಾರಿತ್ ತರ್ ಹೊ ಉಗ್ಡಾಸ್ ಮತಿ ಪಡ್ದ್ಯಾರ್ ಯೇನಾಸ್ತಾನಾ ರಾವಾನಾ! ವಾಟ್ ವಿಚಾರ್ತಾನಾ ಕಳಿತ್ ನಾ ಮ್ಹಳ್ಳೆಂ ತರ್, ಹಾಂವ್ ತ್ಯಾ ಗಾಂವಾಕ್ ನವೊಚ್ ಮ್ಹಣ್ ಚಿಂತುನ್ ಕಾಂಯ್ ಮಾಕಾಯ್ ಲುಟ್ತಿತ್ ಕೊಣ್ಣಾ ಮ್ಹಳ್ಯಾ ಭಿಯಾನ್ ವೊಂಟಾರ್ ಉತ್ರಾಂ ಯೇವ್ನ್ ಜಾಲ್ಲಿಂ. ಜಾಯ್ತಿಂ ಹೆರ್ ಘಡಿತಾಂ ಮ್ಹಜ್ಯಾ ಕಾನಾಂನಿ ಫುಂಕುನ್ ನವ್ಯಾ ಗಾಂವಾಂತ್ ಸುರ್ವೆರ್ ಎಕಾ ಥರಾಚೆಂ ಭ್ಯೆಂ ಮ್ಹಜ್ಯಾ ಕಾಳ್ಜಾಂತ್ ರಾಜ್ ಕರ್ತಾಲೆಂ. ಥೊಡ್ಯಾನಿಂ ಕೆಲ್ಲ್ಯಾ ಚುಕಿಂ ಖಾತಿರ್ ಜಾಯ್ತಿಂ ಗರ್ಜೆವಂತಾಂ ಆಜ್ ಆಧಾರ್ ಮೆಳ್ನಾಸ್ತಾನಾ ಕಷ್ಟಾತಾತ್ ಮ್ಹಣ್ ಸಾಂಗ್ಚ್ಯಾಕ್ ಹೆಂ ಘಡಿತ್ ಏಕ್ ದೃಷ್ಟಾಂತ್.

ಸನ್ನು ನಿಡ್ಡೋಡಿ