ಶೀತಲ್ ಗುಣೇಸ್ತ್ ಭುರ್ಗೆಂ, ಜಶೆಂ ತಾಚೆಂ ನಾಂವ್ ತಶೆಂಚ್ ತೆಂ ಸ್ವಭಾವಾನ್ ನಾಜೂಕ್, ಪೂಣ್ ಸ್ವಪ್ಣಾಂ ದೆಕ್ಚ್ಯಾಂತ್ ಅನಿ ತಿಂ ಸಾಕಾರ್ ಕರುಂಕ್ ಝುಜ್ಚ್ಯಾಂತ್ ಭಾರಿಚ್ ಹುಷಾರ್. ಶಿಕ್ಪಾಂತ್ ತಶೆಂಚ್ ಇತರ್ ಚಟುವಟಿಕ್ಯಾಂನಿ ತಾಚೊ ಉಂಚ್ಲೊ ಹಾತ್. ನಾಂ ಮ್ಹಜ್ಯಾನ್ ಹೆಂ ಜಾಯ್ನಾ ಮ್ಹಳ್ಳೆಂ ತಾಚ್ಯಾ ತೊಂಡಾತ್ ಆಯ್ಕೊಂಕ್ ಮೆಳನಾತ್ಲೆಂ. ಘರಾಂತ್ ತಶೆಂಚ್ ಗಾವಾಂತ್ ಸರ್ವಾಂಕ್ ತೆಂ ಮೊಗಾಳಿ.

ಆವಯ್ ಬಾಪಯ್ ತಶೆಂ ಭಾವಾ ಸಂಗಿ ಮೊಗಾನ್ ತೆಂ ಜಿಯೆತಾಲೆಂ.  ಶಿಕ್ಪಾಂತ್ ಕೆದಾಳಾಯ್ ಮೆರಿಟ್ ಸೀಟ್ ಅಪ್ಣಾವ್ನ್ ನಾಂವ್ ಹಾಡ್ಲೆಲೆಂ. ಸರ್ವ್ ಶಿಕ್ಷಕಾಂಕ್ ತೆಂ ಮ್ಹಳ್ಯಾರ್ ಭಾರಿಚ್ ಖುಶಿ. ಆಶೆಂ ಲ್ಹಾನ್ಪಣಾರ್ ಥಾವ್ನ್ ಅಪ್ಣಾನ್ IAS ಕರಿಜಾಯ್ ಮ್ಹಳ್ಳಿ ಆಶಾ ತಾಚಿ, ತ್ಯಾ ದಿಶೆನ್ ತಾಚೆಂ ಪ್ರಯತ್ನ್ ದೊಡ್ತೆಂ ಆಸ್ಲೆಂ. ಕುಟ್ಮಾಚೊ ಸಹಕಾರ್ ಅನಿ ಶಿಕ್ಷಕಾಂಚೊ ಪಾಟಿಂಬೊ ಘೆವ್ನ್ ಸ್ಪರ್ಧಾತ್ಮಕ್ ಪರೀಕ್ಷಾ ಲಿಕ್ಚೆಂ ತಾಚೆ ಪ್ರಯತ್ನ್ ಆರಂಭ್ ಜಾಲೆಂ. ತಾಚೊ ಭಾವ್ ಸ್ನೇಹಲ್ ಅಪ್ಲ್ಯಾ ಭಯ್ಣಿ ವಿಶಿಂ ಭೊವ್‌ಚ್ ಸಂತೊಸ್ ಪಾವ್ತಾಲೊ.

ಅಶೆಂ ಖುಶೆನ್ ಮೊಗಾನ್ ಕುಟ್ಮಾಸಂಗಿ ಆಪ್ಲಿಂ ಸ್ವಪ್ಣಾಂಚ್ ಆಸ್ತ್ ಜಾವ್ನ್ ಘೆವ್ನ್ ಜಿಯೆತೆಲ್ಯಾ ತಾಕಾ ಮುಕಾರಿಂ ಯೆಂವ್ಚ್ಯಾ ಆಂದ್ಕಾರಾಚಿ ಜಳಕ್ ಸಯ್ತ್ ನಾತ್‍ಲ್ಲಿ. ಆಪ್ಲೆಂ ಸ್ವಪಾಣ್ ಜ್ಯಾರಿ ಕರುಂಕ್ ಫಕತ್ ಸ ಮ್ಹಹಿನೆ ಆಸ್‍ಲ್ಲೆ. ಶೀತಲಾಚಿ ತಯಾರಾಯ್ ಬರಿ ಚಲೊನ್ ಆಸ್‍ಲ್ಲಿ. ತ್ಯಾ ದೀಸ್ ಸಕಾಳಿಂ ಮುಡ್ಲಾ ಸುರ್ಯೊ ಉದೆಲ್ಲೊ ಕಿತೆಂಗೀ ಗಯ್ರೊ ದಿಸ್ತಾಲೊ. ಅಪ್ಲ್ಯಾ ಪರೀಕ್ಷೆಕ್ ತಯಾರಾಯ್ ಕರ್ನ್ ಅಸ್ಚ್ಯಾ ಶೀತಲಾಕ್ ಭಾವ್ ಸ್ನೇಹಲಾನ್ ಏಕ್ ಅವಾಜ್ ದಿಲೊ "ಬಾಯೆ ಏಕ್ ರಾಂವ್ಡ್ ಬೊವೊನ್ ಯೆವ್ಯಾಂ ರಿಲ್ಯಾಕ್ಸ್ ಜಾತಾ". ಭಾವಾನ್ ಮೊಗಾನ್ ಅಪಾಯ್ತಾನಾ ಅನಿ ಅಪ್ಣಾಕೀ ಇಲ್ಲೊಸೊ ವಿರಾಮ್ ಗರ್ಜ್ ಅಸಾ ಮ್ಹಣ್ ತಿಂ ಆವಯ್ ಲಾಗಿಂ ವಿಚಾರ್ನ್ ಭಾಯ್ರ್ ಸರ್ಲಿಂ.

ಚಿಂತಿನಾತ್ಲೆ ಪರಿಂ ವಾದಾಳ್ ತ್ಯಾ ಘರಾಕ್ ಅಪ್ಟಾಲೆಂ. ರಸ್ತ್ಯಾ ಅವ್ಘಡ್ ಥಂಯ್ ಘಡ್ಲೆಂ, ಜಿವಾಕ್ ಬಾಧಕ್ ಜಾಂವ್ಚೊ ಉರ್ಲೊ ತರೀ ಅವ್ಘಡಾಂತ್ ಶೀತಲಾನ್ ಅಪ್ಲೊ ಉಜ್ವೊ ಹಾತ್ ಹೊಗ್ಡಾವ್ನ್ ಘೆತ್ಲೊ. ಅನಿ ಸ ಮ್ಹಹಿನ್ಯಾನಿ IAS ಪರೀಕ್ಷಾ ಬರವ್ಚೆಂ ಸಪಣ್ ಅಧುರೆಂ ಉರ್ಲೆಂ ಮ್ಹಳ್ಳೆ ಬೊಗಾಪ್ ಮ್ಹತಿಂತ್ ಧೊಸುಂಕ್ ಲಾಗ್ಲೆಂ. ಸಯ್ರ್ಯಾಂ ಥಾವ್ನ್ ಸಮಾಧಾನೆಚಿ ನ್ಹಂಯ್ ಬಗಾರ್ ನಿರಾಸ್ಪಣ್ ಭರ್ಲೆಲಿಂ ಉತ್ರಾಂ ಮತಿಕ್ ಕೊಂಕುಕ್ ಲಾಗ್ಲಿಂ. ತಾಂಚಿಂ ಉತ್ರಾಂ ಆಯ್ಕೊನ್ ಆವಯ್ ಬಾಪಾಯ್ಚ್ಯಾ ದೊಳ್ಯಾನಿ ಭರ್ಲೆಲಿಂ ದುಕಾಂ ಪಳೆವ್ನ್ ಶೀತಲ್ ಖಂತಿಭರಿತ್ ಜಾಲೆಂ.

ಪೂಣ್ ಅಪ್ಣಾಚೆಂ ಸ್ವಪಾಣ್ ಜಾರಿ ಕರ್ಚೆಂ ಅನಿ ಅಪ್ಲ್ಯಾ ವ್ಹಡಿಲಾಚಿಂ ದುಕಾಂ ಪುಸ್ಚಿಂ ಕಶೆಂ ಮ್ಹಳ್ಳೆಂ ಚಿಂತುಕ್ ಪಡ್ಲೆಲ್ಯಾ ತಾಣೆಂ ಕುಡಿಂತ್ ಊಣ್ ಅಸ್ಲ್ಯಾರಿ ಸಾಧಾನ್ ಕೆಲ್ಲ್ಯಾಂಕ್ ಮತಿ ಪರ್ದ್ಯಾರ್ ಹಾಡ್ಲೆಂ. ಮ್ಹನ್ ಕೆಲ್ಯಾರ್ ಕಿತೆಂಯ್ ಸಾಧನ್ ಕರ್ಯೆತ್ ಮ್ಹಳ್ಳೆಂ ಮತಿಂತ್ ದೃಢ್ ಕರ್ನ್ ಅಪ್ಲ್ಯಾ ದಾವ್ಯಾ ಹಾತಾಚೊ ಪ್ರಯೊಗ್ ಕೆಲೊ ಅನಿ ಮುಖ್ಲ್ಯಾ ಚಾರ್ ಮ್ಹಹಿನ್ಯಾನಿ ದೀಸ್ ರಾತ್ ಮ್ಹುಳ್ಳೆಪರಿಂ ಲಿಕ್ಣೆಂಚೆಂ ಪ್ರಯತ್ನ್ ಕರ್ತಾಲ್ಯಾ ತಾಕಾ "ಹೆಂ ಪೂರಾ ಜಾಂವ್ಚೆಂ ವೆಚೆಂ ನ್ಹಂಯ್ ಕಿತ್ಯಾಕ್ ತೆಂ ವ್ಯರ್ಥ್ ಪ್ರಯತ್ನ್ ಕರ್ತಾ?" ಮ್ಹಳ್ಳಿ ಶಿಣ್ ಆಯ್ಕೊಂಕ್ ಮೆಳ್ಳಿ. ಪೂಣ್ ತಿ ಗುಮಾನಾಕ್ ಘೆನಾಸ್ತಾಂ ಶೀತಲಾನ್ ತಯಾರಾಯ್ ಕೆಲಿ ಆನಿ ತಾಣೆಂ ಪರೀಕ್ಷಾ ಬರಯ್ಲಿಚ್. ಪರೀಕ್ಷಾ ಬರಯ್ಲ್ಯಾ ಖಂಯ್, ಪೂಣ್ ಉತ್ತೀರ್ಣ್ ಜಾಂವ್ಚೆಂ ಕಿತೆಂ ಸುಲಭ್ ಗೀ?" ಅಸಲಿಂ ಉತ್ರಾಂ ಆಯ್ಕೊಂಕ್ ಮೆಳ್ಳಿಂ ತರೀ ಹಳೂ ಹಾಸೊ ದೀವ್ನ್ ಶೀತಲ್ ಘರಾ ಗೆಲೆಂ. ಮತಿಂತ್ ಅಪ್ಣಾಚ್ಯಾ ಪ್ರಾಮಾಣಿಕ್ ಪ್ರಯತ್ನಾಕ್ ದೆವಾಥಂಯ್ ಭಾವಾರ್ಥ್ ಥಿರ್ ಸಾಂಬಾಳ್ನ್ ಆಸ್ಲೆಂ.

ಆಮಾಸೆ ಉಪ್ರಾಂತ್ ಪುನೊವ್ ಯೆಜಯ್‍ಚ್ ಅನಿ ಹೆಂ ಪ್ರಕ್ರತಿಚೆಂ ನಿರ್ಮೊಣೆಂ ತಶೆಂಚ್ ಜಿಣ್ಯೆಂತ್ ಕಷ್ಟಾ ಉಪ್ರಾಂತ್ ಸುಖ್ ಅಸಾಜಾಯ್‍ಚ್, ನಾಂ ತರ್ ಕಷ್ಟಾಕಿಂ ಮೋಲ್ ನಾಂ ಸುಖಾಕೀ ನಾಂ. ತೊ ದೀಸ್ ಶೀತಲಾಚ್ಯಾ ಜಿಣ್ಯೆಂತ್ ಪ್ರಮುಖ್ ದೀಸ್. ಸಕಾಳಿಂ ಉಟ್ತಚ್ ಘರಾ ಲಾಗಿಂ ಅಪ್ಲ್ಯಾ ಈಷ್ಟಾಂಕ್ ಪಳೆವ್ನ್ ಕಿತೆಂ ಜಾಲೆಂ ಮ್ಹಣ್ ಚಿಂತಾನಾ ಕಾನಾಂತ್ ಪಡ್ಲೆಲಿ ಖಬರ್ ಶೀತಲಾಕ್ ಇತ್ಲೊ ಸಂತೊಸ್ ದೀಂವ್ಕ್ ಲಾಗ್ಲಿ ಕೀ ದೊಳ್ಯಾನಿಂ ತಾಚ್ಯಾ ದೂಕ್ ಉಮಾಳೊನ್ ಆಯ್ಲೆಂ. ವ್ಹಯ್, ಶೀತಲ್ IAS ಪರೀಕ್ಷಾ ಉತ್ತೀರ್ಣ್ ಜಾಲ್ಲೆಂ. ಸರ್ವಾಂಕ್ ಏಕ್ ದೇಕ್ ತೆಂ ಜಾಲ್ಲೆಂ. ಅಪ್ಲ್ಯಾ ಕಷ್ಟಾಂಚೊ ಪ್ರತಿಫಳ್ ನಿರ್ಫಳ್ ಜಾಂವ್ಕ್ ನಾತ್‌ಲ್ಲೊ. ಶಿಣ್ ಉಚಾರ್ತೆಲ್ಯಾಂಚೆಂ ತೊಂಡ್ ಆಜ್ ಬಂದ್ ಪಡ್‌ಲ್ಲೆಂ, ಅಪ್ಲ್ಯಾ ಆವಯ್ ಬಾಪಾಯ್ಕ್ ಆನಿ ಭಾವಾಕ್ ಆರಾವ್ನ್ ಘೆವ್ನ್ ಆಮಿಂ ಜೀಕ್ ಅಪ್ಣಾಯ್ಲಿ ಪಪ್ಪಾ ಮಮ್ಮಾ ಮ್ಹಣ್ ಖುಶೆನ್ ಗಳ್ಗಾಳ್ಯಾಂ ರಡ್ಲೆಂ.

- ಸೀಮಾ ತಾಕೊಡೆ