ಭುರ್ಗ್ಯಾಕ್ ಪಾಳ್ಣ್ಯಾಂತ್ ದವರ್ಚೊ ಸಂಭ್ರಮ್, ಆಮ್ಚ್ಯಾ ಕ್ರಿಸ್ತಿ ಸಮಾಜೆಂತ್ ಲಗ್ನಾ ಭೆಸಾಕ್ ಏಕ್ ಭೋವ್ ಮಹತ್ವಾಚೆಂ ಸ್ಥಾನ್, ಮಾನ್, ಘನ್ ಆಸಾ. ಲಗ್ನ್ ಕುಟ್ಮಾಚ್ಯಾ ವಾಡಾವಳಿಚೊ ಮಹತ್ವಾಚೊ ಹಂತ್. ಘರಾಂತ್ ಬುರ್ಗ್ಯಾಂಚೆಂ ಎಣೆಂ ಚಡ್ ಸಂತೊಸ್ ಹಾಡ್ಚೊ ವಿಚಾರ್.

ಘರಾಂತ್ಲ್ಯಾ ಧುವೆಕ್ ವ ಸುನೆಕ್ ಗರ್ಭೆಸ್ತ್ ಪಣಾಚೆ ಆವ್ದೆಂತ್ ಚಡ್ ಜಾಗ್ರುತ್ಕಾಯ್, ಬರೆಂ ಖಾಣ್ ಜೆವಾಣ್ ದಿಂವ್ಚೆಂ ಸ್ವಾಭಾವಿಕ್. ಹಾಚ್ಯೆ ಪ್ರಾಸ್ ತಿಕಾ ಶಾಂತ್, ಪ್ರಸನ್ನ್ ಆನಿ ಖಂತಿವಿಣೆ ರಾಕಣ್ ಕರ್ಚಿ ಗರ್ಜ್. ನವ್ ಮಹಿನೆ ತಿಚ್ಯಾ ಜಿವಿತಾಚೊ ಭೋವ್ ಮಹತ್ವಾಚೊ ವಾಂಟೊ. ತಿಚೊ ದೊಡೊ ಜೀವ್ ಮ್ಹಣ್ ಮಾಲ್ಘಡಿಂ ಸಾಂಗ್ತಾಲಿಂ. ತಿಕಾ ಭೊರಾಚೊ ವಾವ್ರ್ ಜಾಂವ್ ಕರುಂಕ್ ದಿಂವ್ಚೆಂ ಆಡಾವ್ನ್ ಭಲಾಯ್ಕೆಚಿ ಚಡ್ ಜಾಗ್ರುತ್ಕಾಯ್ ಘೆಂವ್ಚಿ ಗರ್ಜ್.

ಬುರ್ಗ್ಯಾಚೆಂ ಜನಮ್ ಜಾತಚ್ ಚಾಳಿಸಾವ್ಯಾ ದಿಸಾ ಬುರ್ಗ್ಯಾ ವೊಲ್ ಲಾಂವ್ಚೆಂ ಆನಿ ಪಾಳ್ಣ್ಯಾಂತ್ ದವರ್ಚೆಂ ಕಾರ್ಯೆಂ ಚಲವ್ನ್ ವ್ಹರ್ತಾತ್. ಚಾಳಿಸಾವ್ಯಾ ದಿಸಾ ಬಾಳಂತ್ ಭುರ್ಗೆಂ ಪಯ್ಲೆ ಪಾವ್ಟಿಂ ಘರಾ ಥಾವ್ನ್ ಭಾಯ್ರ್ ಎತಾತ್. ಇಗರ್ಜೆಂತ್ ಪವಿತ್ರ್ ಸ್ನಾನಾಚೊ ಸಾಕ್ರಾಮೆಂತ್ ಬುರ್ಗ್ಯಾಕ್ ದಿತಾತ್. ಪೊದೊರ್ನ್ ಮೊದೊರ್ನಿಕ್ ಹಾಂಗಾ ಚಡ್ ಮಾನ್ ಆನಿ ಜವಾಬ್ದಾರಿ. ಬುರ್ಗ್ಯಾಕ್ ಕ್ರಿಸ್ತಿ ಮೊಲಾಂನಿ ವಾಡಂವ್ಚೆಂ ಮಿಸಾಂವ್, ಅವಯ್ ಬಾಪಯ್ ಪೊದೊರ್ನ್ ಆನಿ ಮೊದೊರ್ನ್ ಹ್ಯಾದಿಸಾ ಹಾತಿಂ ಧರ್ತಾತ್.

ಬುರ್ಗ್ಯಾಕ್ ನಿತಳ್ ಆನಿ ನವಿ ಧವಿ ನ್ಹೆಸೊಣ್, ವ್ಹಡಿಲಾಂ ಆನಿ ಕುಟ್ಮಾದಾರಾಂ ಸೊಭಿತ್ ನೆಟೊನ್ ಒಲಾಕ್ ಹಾಜರ್ ಜಾತಾತ್. ಇಗರ್ಜ್ಮಾತೆಕ್ ನವೊ ಸಾಂದೊ ಭರ್ತಿ ಜಾಂವ್ಚೊ ಹೊ ಸಂಭ್ರಮ್ ಭೋವ್ ಅರ್ಥಾಭರಿತ್.

ಒಲಾಚ್ಯಾ ಉಪ್ರಾಂತ್ಲೊ ಸಂಭ್ರಮ್ ಚ್ ಭುರ್ಗ್ಯಾಕ್ ಪಾಳ್ಣ್ಯಾಂತ್ ದವರ್ಚೊ. ಆಧಿಂ ಕುಟ್ಮಾಂನಿ ಜಾಯ್ತಿಂ ಬುರ್ಗಿಂ ಆಸ್ತಾಲಿಂ ದೆಕುನ್ ರುಕಾಚಿಂ ಘಟ್ ಪಾಳ್ಣಿಂ ತಯಾರ್ ಕರ್ಚಿಂ ಆಸ್ ಲ್ಲಿಂ. ಹಿಂ ಘರಾಂತ್ ಮಾತ್ರ್ ನಯ್, ಸೆಜಾರಾ, ವಾಡ್ಯಾಂತ್, ಕುಟ್ಮಾ ಸಯ್ರ್ಯಾಂಚ್ಯಾ ಘರಾಂನಿ ಪರ್ಯಾಂತ್ ಪಾವ್ತಾಲಿಂ. ಪಾಳ್ಣ್ಯಾಂತ್ ದವರ್ಚೊ ಸಂಭ್ರಮ್ ಪಾಳ್ಣೆಂ ಭಾಂಧ್ಚ್ಯಾ ಮುಖಾಂತ್ರ್ ಮುಖಾರುನ್ ವೆತಾಲೊ. ಜಡಾಯೆಚೆಂ ಪಾಳ್ಣೆಂ ಘಟ್ ದೊರಿಯಾಂನಿ ಭಾಂದ್ಚೆಂ ಆಸ್ ಲ್ಲೆಂ. ವಯ್ರ್ ಮಾಳ್ಯಾಕ್ ಘಟ್ ಆಡಿಂ ಘಾಲ್ಲಿಂ ಆಸ್ಲ್ಯಾರ್ ತಾಕಾಚ್ ದೊರಿಯೊ ಭಾಂಧ್ಚ್ಯೊ ಆಸ್ ಲ್ಲ್ಯೊ. ಕುಟ್ಮಾಂ ಸಾಂದೆ ಪಾಳ್ಣ್ಯಾಕ್ ಧವೆಂ ವಸ್ತುರ್ ಆನಿ ಸೊಭಿತ್ ರಂಗಾಳ್ ಫಿಂತಾಂನಿ ಪಾಳ್ಣೆಂ ಸೊಭಯ್ತಾತ್.

ಬುರ್ಗ್ಯಾಕ್ ಒಲ್ ಲಾಂವ್ಕ್ ಭಾಯ್ರ್ ಸರ್ಚ್ಯಾ ಆಧಿಂ ಆನಿ ಪಾಟಿಂ ಘರಾ ಪಾವ್ತಚ್ ಘರ್ಚ್ಯಾ ಆಲ್ತಾರಿಲಾಗಿಂ ಕುಟ್ಮಾ ಸಾಂದೆ ಲಾಗಿಂ ಸರೊನ್ ದೆವಾಚೊ ಆಶಿರ್ವಾದ್ ಮಾಗ್ತಾತ್. ಲಾಗ್ಶಿಲಿಂ ಸಯ್ರಿಂ, ವಾಡ್ಯಾಗಾರಾಂ, ಇಷ್ಟ್ ಮಂತ್ರ್ ಸಗ್ಳೆ

ಪಾಳ್ಣ್ಯಾಂತ್ ದವರ್ಚ್ಯಾ ಸಂಭ್ರಮಾಂತ್ ವಾಂಟೊ ಘೆತಾತ್. ಒಲ್ ಲಾಂವ್ಚ್ಯಾ ಕಾರ್ಯಕ್ರಮಾಂತ್ ಬುರ್ಗ್ಯಾಕ್ ನಾಂವ್ ದಿತಾತ್ ಆನಿ ಉಪ್ರಾಂತ್ ಇಗರ್ಜೆಂತ್ ತೆಂಚ್ ನಾಂವ್ ದಾಖಲ್ ಜಾತಾ.

ಬುರ್ಗ್ಯಾಕ್ ಪಾಳ್ಣ್ಯಾಂತ್ ದವರ್ಚ್ಯಾ ರಿವಾಜಿಂತ್ ಆಜಿಯೆಕ್ ಪಯ್ಲಿ ಮರ್ಯಾದ್. ಆಜೆನ್ ನಾತಿಕ್ ವ ನಾತ್ವಾಕ್ ಬರೆಂ ಮಾಗೊನ್, ಲಾಂಬ್ ಆವ್ಕ್ ಆಶೆವ್ನ್ ಬೆಸಾಂವ್ ದೀವ್ನ್ ಪಾಳ್ಣ್ಯಾಂತ್ ನಿದಾಂವ್ಚೆಂ. ಉಪ್ರಾಂತ್ ಹಾಜರ್ ಜಾಲ್ಲ್ಯಾಂನಿ ಬುರ್ಗ್ಯಾಕ್ ಆಶಿರ್ವಾದ್ ಆನಿ ವ್ಹಡಿಲಾಂಕ್ ಪರ್ಭಿಂ ಪಾಠಂವ್ಚೊ ಸಂದರ್ಭ್ ಆಸ್ತಾ. ನವ್ಯಾ ಬಾಳಾಚ್ಯಾ ಎಣ್ಯಾನ್ ಸಂತುಷ್ಟ್ ಜಾಲ್ಲೆಂ ಕುಟಾಮ್, ಮೊಗಾಚ್ಯಾಂಕ್ ರುಚಿಕ್ ಜೆವಾಣ್ ಆನಿ ಘಟಾಯೆಚೆಂ ವೊಕಾತ್ ದೀವ್ನ್ ದಾಧೊಶಿ ಕರ್ತಾತ್.

ಆಮ್ಚ್ಯಾ ಕೊಂಕ್ಣಿ ಸಮಾಜೆಂತ್ ಅಮಿ. ಪೊಸುನ್ ಹಾಡ್ ಲ್ಲ್ಯಾಸಂಭ್ರಮಾಂಕ್ ಬರ್ಗಾಲ್ ನಾ. ಘರಾಂತ್ ನವ್ಯಾ ವೆಕ್ತಿಚೆಂ ಎಣೆಂ ಜಾಂವ್ಚೆಂ ಆಸಾ ಮ್ಹಣ್ ಕಳ್ತಚ್, ಏಕ್ ವಿಭಿನ್ನ್ ಉಲ್ಲಾಸ್, ಕಾಳ್ಜಿ ಆಮ್ಚೆ ಭೊವಾರಿಂ ಜಲ್ಮಾತಾ. ತ್ಯಾ ತೆಕಿದ್ ತಯಾರಾಯ್ ಕರುಂಕ್ ಪಾವ್ತಾಂವ್. ಕುಟ್ಮಾಚ್ಯಾ ಮೊಗಾಚಿಂ ಫಳಾಂ ಜಾವ್ನ್ ಜಲ್ಮೊಂಚ್ಯಾ ಬಾಳಾಂಕ್ ಪಾಳ್ಣ್ಯಾಂತ್ ದವರ್ಚಿ ಆಮ್ಚಿ ರಿವಾಜ್ ಆಧಿಂ ಥಾವ್ನ್ ಆಮಿ ಪಾಳ್ನ್ ಆಯಿಲ್ಲಿ ಆಸಾ. ಹ್ಯಾ ಖಾತಿರ್ ಪಾಳ್ಣ್ಯಾ ಗಿತಾಂ ಮ್ಹಣ್ ಜಿಂ ಗಾಯ್ತಾತ್ ಆಜ್ ಕಾಲ್ ತಾಂಚಿ ವಿಸರ್ ಪಡೊಂಕ್ ಲಾಗ್ಲ್ಯಾ.

ಆಜಿ, ಆವಯ್, ಮಾವ್ಶಿ, ಆಶೆಂ ಸ್ತ್ರಿಯಾಂನಿಂ ಗಾಂವ್ಚಿಂ ಗಿತಾಂ ಅಶಿಂ ಆಸಾತ್:

-

ದೆವಾಗಾ ಬಾಪಾ ತುವೆಂ ದಿಲಿ ಸರಿ

ಆನಿ ಸುರುಪ್ ಸುಂದರ್ ನಾರಿರೆ

ಬಾಬಾ ಆಂಕ್ವಾರ್ ಮರಿ.

-

ಜಯ್ ಜಯ್ ಬಾಬಾ

ಜಯ್ ಕರಿನ್ ತುಕಾ

ಆನಿ ಬಾಂಬಿ ಬಾಂಧಿನ್ ರುಕಾ

ಚಾಂದಣಾಚ್ಯಾ.

-

ಧಲ್ ಧಲ್ ಮ್ಹಣ್ತಾಂ

ವ್ಹಡ್ ವೇಳ್ ಲಾಗ್ಲೊ

ಆನಿ ಬಾಬುನ್ ಖೆಳ್ ಮಾಗ್ಲೊ

ರೆ ದೆವಾಲಾಗಿಂ.

-

ರುಜಾಯ್ ಮ್ಹಜ್ಯೆ ಮಾಯೆ

ನಾಕಾ ಕರುಂಕ್ ಪಯ್ಸ್

ಕದೆಲ್ ದವ್ರುನ್ ಬಯ್ಸ್ ಗೆ

ಬಾಬುಚ್ಯಾ ಬಾಂಬಿಯೆಲಾಗಿಂ

-

ಸುವರ್ಣಾಚ್ಯಾಪಾಳ್ಣ್ಯಾಕ್

ರುಪ್ಯಾಚ್ಯೊ ದೊರಿಯೊ

ಆನಿ ಝೊಂಪ್ ಕಾಡ್ತಿತ್

ಮರಿಯೊ ಆಂಕ್ವಾರಿ

-

ತ್ಯಾ ಆಂಕ್ವಾರಿಂಚೊ

ಕಾಂಯ್ ಬರೊ ತಾಳೊ

ಆನಿ ಉದ್ಕಾವಿಣೆ ಮ್ಹಳೊರೆ

ಬಾಬಾ ಜೆಜುನ್ ಫುಲಯಿಲೊ

-

ಯೇಗೆ ಯೇಗೆ ನಿದೆ

ಸರ್ವಯ್ ಸುಖಾಚೆ

ಆನಿ ಬಾಬುಚೆ ದೊಳೆಗೆ ಬಾವುಲೆ

-

ರುಜಾರ್ ಮಾಯ್ ಘರ್ಚಿ

ಕೊಸೆಸ್ ಮಾಯ್ ಸಯ್ರಿ

ಆನಿ ಕುರ್ಪಾ ತುಜ್ಯಾವೆರಿರೆ

ಬಾಬಾ ದೊಗಾಂಯ್ಚಿ

-

ಯೇಗೆ ಯೇಗೆ ನಿದೆ

ನಿದೆಚ್ಯಾ ವೆಳಾ

ಬಾಳಾಚ್ಯಾ ಖೆಳಾ ರಾತ್ ಜಾಲಿ

-

ಇತ್ಲಿಂ ಗಾಣಾಂ ಗಾಯ್ಲಿಂ ಹಾವೆಂ

ಕಿತೆಂ ಮ್ಹಾಕಾ ಪಾಗ್?

ಆನಿ ಬಾಂಬಿಯೆಂತ್ ನಿದ್ ಲ್ಲ್ಯಾ

ಬಾಳಾ ಮ್ಹಾಕಾ ಬರೆಂ ಮಾಗ್

-

ಗಾಣಾಂ ಗಾಂವ್ಚ್ಯೆ ನಾರಿಕ್

ಕಿತೆಂ ಆಸಾ ಪಾಗ್?

ತುಜ್ಯಾ ರಜಾರಾಂತ್

ಆಜ್ಯೆಕ್ ಆವ್ಕ್ ಮಾಗ್.

-

ಹಿಂ ಸರ್ವ್ ಗಾಣಾಂ ಬಾಳಾಕ್ ಪಾಳ್ಣ್ಯಾಂತ್ ನಿದಾಯ್ತಾನಾ ಗಾಯ್ಲ್ಯಾರ್, ವಿವಿಧ ವೆಕ್ತಿಂ ಸಂದರ್ಭಾಂಕ್ ಲಾಗೊನ್ ವಿವಿಧ್ ಗಿತಾಂ ಗಾಂವ್ಚಿ ದಸ್ತುರ್ ಆಮ್ಚ್ಯಾ ಸಾಮಾಜೆಂತ್ ಆಸ್ ಲ್ಲಿಂ. ಕಾಂಯ್ ಥೊಡೆಕಡೆ ಆಜೂನ್ ಆಸಾ.

ಮಾವ್ಳ್ಯಾಕ್ ಆನಿ ಬಾಳ್ಶ್ಯಾಕ್ ಸಂಭಂದಿತ್ ಗಾಣಾಂ ಆಶಿಂ ಆಸ್ತಾತ್:

ಬೊಬೆ ಭಾಜ್ ಬೊಭೆ ಬಾಜ್

ಮಾಲ್ತುಲಾಂತ್

ಬಾಳಾ ತುಜೊ ಮಾಮ್ ಎತಾ

ಮಾಂಚಿಲಾಂತ್.

-

ತೊವ್ಶೆಂ ಮಾಮಾ ತೊವ್ಶೆಂ

ಖಂಯ್ಚ್ಯಾ ಖಾಂದಾರ್ ಘೆಂವ್ಚೆಂ

ಆಂಗ್ಡಿ ವೆಲ್ಯಾರ್ ವಿಕಾನಾ

ಘರಾ ಹಾಡ್ಲ್ಯಾರ್ ಪಿಕಾನಾ

-

ತಿ ಮಾಡಿ ಹಿ ಮಾಡಿ ಲಕೊಲಿ

ಮಾಮಾಚ್ಯಾ ಘರಾಕ್ ತೆಂಕೊಲಿ

ಮಾವ್ಳ್ಯಾಗಾ ಮಾಮಾ

ಬೊಲ್ಸಾಂತ್ ತುಜ್ಯಾ ಕಾಂತ್ಲಿ

ಆನಿ ಭಾಚೊ ಪುತಳಿ

ಬಾಂಬಿಯೆಂತ್.

ಆಸ್ಕಿನಾಗೊ ಪಾಸ್ಕಿನಾ

ಉದಾಕ್ ತಾಪಯ್ ಗೊ

ವೊಡ್ಲ್ಯಾ ಪೊಟಾಚೊ ಮಾಮ್ ಎತಾ

ಚೆಂಬು ಲಿಪಯ್ ಗೊ

-

ಬಾಳಾಕ್ ಆನಿ ಮಾವ್ಶೆಕ್ ಗಿತಾಂ:

ಬೊಬೆ ಭಾಜ್ ಬೊಬೆ ಭಾಜ್

ಮಾಲ್ತೆಂತ್

ಬಾಳಾ ತುಜಿ ಮಾವ್ಶಿ ಎತಾ

ಪಾಲ್ಕೆಂತ್

ಹಾಲೊರೆ ಹಾಲೊ

ಬಾಪುಯ್ ಮ್ಹಾಲೊ

ಆವಯ್ ತಿರ್ಮಾಲೊರೆ

ಮಾವ್ಶಿ ಕೊರಪೊಲು

-

 ಬಾಪ್ಲ್ಯಾಕ್ ಸಂಬಂಧಿತ್ ಗಾಣಾಂ:

ಬಾಪ್ಲೊ ಆನಿ ಪುತ್ನ್ಯೊ

ಎಕಾ ನಾಂವಾಚೊ

ಆನಿ ಪಾಯಾಂಕ್ ಮೊಚೊ

ಸುವರ್ಣಾಚೊ

ಬೊಬೆ ಭಾಜ್ ಬೊಬೆ ಭಾಜ್ ಗೊಡಾಚೆ

ಘೊಡ್ಯಾರ್ ಬಸೊನ್ ಬಾಪ್ಪು

ಎತಾತ್ ಬಾಯೆಚೆ

-

 ಬಾಳ್ ಆನಿ ಮನ್ಜಾತಿ:

ಕುರು ಕುರು ಕಾನಾ

ಮ್ಹೊಶಿ ಗೆಲ್ಯೊ ರಾನಾ

ಆಂಬುಡ್ನ್ ಹಾಡ್ ಗಾ ಮಾಮಾ

ಗಾಯಿ ಮ್ಹೊಶಿ

ಯೆಗೆ ಯೆಗೆ ಗಾಯೆ

ಗಾಯ್ಚ್ಯಾ ಗೊಟ್ಯಾಂತ್

ಬಾಬಾಚ್ಯೆ ವಾಟ್ಲೆಂತ್

ದೂದ್ ದೀಗೆ.

-

 ಬುರ್ಗ್ಯಾಕ್ ತೇಲ್ ರಗಡ್ತಾನಾ:

ಅಖೊ ಮಾಖೊ ತೇಲ್ ಮಾಖೊ

ತೆಲ್ಕಾರಾಚೊ ಬುಡ್ಕೊಲೊ ಫುಟ್ಲೊ

ತೆಲ್ ಗೆ ತೆಲ್

ಲೊಣಿಯಾಂಚ್ಯಾ ಉಂಡ್ಯಾಕ್

ಸಾಕ್ರಿಚೆಂ ಮೆಲ್

ಆನಿ ತಾಳ್ವೆರ್ ದವರ್ ತೆಲ್ ರೆ

ಮೊಜ್ಯಾ ಬಾಬುಲ್ಯಾಕ್

-

ದಕ್ಷಿಣ್ ಕನ್ನಡಾಂತ್ ಜಿಯೆಂವ್ಚ್ಯಾ ಗೌಡ ಸಾರಸ್ವತ್ ಕೊಂಕ್ಣ್ಯಾಂಚ್ಯಾ ಸಾಹಿತ್ಯಾಂನಿ ಸಯ್ತ್ ಆಮ್ಕಾಂ ಬುರ್ಗ್ಯಾಂಚಿ ಗಿತಾಂ ಆಯ್ಕೊಂಕ್ ಮೆಳ್ತಾತ್:

ಪಾಳ್ಣ್ಯಾಚ್ಯಾ ವಯ್ರ್ ಬಾಂಧಿಲಾ

ಚೆಂಡು

ಸುಖಿ ಗೋವಿಂದು ನಿದ್ರಾ ಕರಿ

ಮಾಂಕಡಾಚೆ ಪಿಲಾ

ಘೊವ್ ಖಂಯ್ ಗೆಲ್ಲಾ?

ತಾಯ್ಕುಳ್ಯಾಚಿ ಬಡ್ಡಿ ಘೆವ್ನ್

ಢೋಳು ವಾಜವ್ಚ್ಯಾಕ್ ಗೆಲ್ಲಾ

ಕೊಳಾಚ್ಯಾ ಬಾಮ್ಣಾ

ಪರಬ್ ಕೆನ್ನಾ

ಫಲತಾ ಎನ್ನಾ

ಡಾಂ ಕುಂ ಜಾತ್ತಾ.

-

ಬಿಲ್ಲು ಮಾಜ್ಜರಾ

ತುಂ ವಚೊನಾಕ್ಕಾ ಸೆಜಾರಾ

ಸೆಜಾರಾ ಗೆಲ್ಲ್ಯಾರಿ

ಮಾರಿನ್ ತುಜ್ಯಾ

ದಾವ್ಯಾ ಪೊಲ್ಯಾರಿ

ಬಾಳಾ ಕರ್ ರೆ ಜಯ್

ಬಿಲ್ಲಿನ್ ಖೆಲಿ ಸಾಯ್

ಗಾಯೆನ್ ಖೆಲೊ ಕುಂಡೊ

ಬಾಳಾಕ್ ದಿಲೊ ಉಂಡೊ

-

ಆದ್ಲೆಂ ವಿಸ್ರೊನ್ ನವೆಂ ವೆಂಗ್ಚ್ಯಾ ಆಮ್ಸೊರಿ ಸಂಸಾರಾಂತ್ ಮೊಲಾಧಿಕ್ ಬಾಳ್ ಗಿತಾಂ ಆಮ್ಚಿಂ ಮಾಜ್ವೊನ್ ಏಂವ್ಕ್ ಲಾಗ್ಲ್ಯಾಂತ್. ತಿಂ ಉರವ್ನ್, ತಾಂಚೊ ಪೋಸ್ ಕರ್ನ್ ಲ್ಹಾನಾಂಕ್ ಪಾವಂವ್ಚೆಂ ಕಾಮ್ ಕರ್ಚಿ ಗರ್ಜ್ ಅಧಿಕ್ ಆಸಾ.

ಮಾಲ್ಘಡ್ಯಾ ಜಿಬಾಂನಿ ಆಜೂನ್ ಘೊಳೊನ್ ಆಸ್ಚ್ಯಾ ಆಸಲ್ಯಾ ಸಭಾರ್ ಗಿತಾಂಚಿಂ ಸೊದ್ನಾಂ ಕೆಲ್ಲ್ಯಾಂತ್, ಆಮ್ಚೆಂ ಸಾಹಿತ್ಯ್ ಜಿವಾಳ್ ಉರ್ಚ್ಯಾಂತ್ ದುಭಾವ್ ನಾ.

- ಫೆಲ್ಸಿ ಲೋಬೊ, ದೆರೆಬಯ್ಲ್.