ವೇಳ್

ಯೆಸ್ ದ್ಯಾಟ್ಸ್ ಇಟ್…

ಉತ್ರಾಂಕ್ ಮ್ಹಜ್ಯಾ ಹಾಸೊ ದೀವ್ನ್

ತೊ ಚಲ್ತಾನಾ

ಖೊಮಿಸಾಚೊ ವಯ್ಲೊ ಬುತಾಂವ್

ಆನಿ ಟೈ ಸದಿಳ್ ಕೆಲಿ ಹಾವೆಂ.

ದನ್ಪರಾಂ ಎಕಾಕ್ ಜೆವ್ಲೆಲಿ ಭುತಿ

ವಾಸ್ರಾಚ್ಯಾ ಗಳ್ಯಾಕ್ ಬಾಂದ್ಲೆಲ್ಯಾ

ಘಾಂಟಿಪರಿಂ ಅವಾಜ್ ಕರಿತ್ತ್

ಘರ್ಚ್ಯಾ ಮೆಜಾರ್ ಪೊತ್ಯಾಸಮೇತ್

ಕುಸ್ಕೊನ್ ಬಸ್ತಾನಾ

ಹಾಂವ್ ರಾಂದ್ಚ್ಯಾ ಕುರಾಚ್ಯಾ ದೆಗೆರ್

ದೋಯ್ ಸೊಧ್ತಾಲೊಂ

ನೀಸ್ ದಾಟೆಲ್ಲ್ಯಾ ಥಂಡ್ ಚಪ್ಪಟ್ ಪೆಜೆಕ್

ಚೆಂಬು ಉದ್ಕಾಚೊ ಅಭಿಶೇಕ್

ದೋಯ್ ಘುಂವ್ಡಾಂವ್ಚ್ಯಾ ವೆಗಾಕ್

ನೀಸ್ ಆಸ್‌ಲ್ಲ್ಯಾನ್ ಜಾಲೆಂ

ಧಂಯ್ ತರ್

ತಾಕ್ ಲೊಣಿ ವೆಗ್ಳಿ ಜಾತಿ ಕೊಣ್ಣಾ

ಸಕಾಳಿಂ ಉಜ್ಯಾಚ್ಯಾ ದಾವೆಕ್

ತಾಪ್ಲೆಲ್ಯಾ ಕುರಾರ್

ಧಗ್ ತಾಪವ್ನ್ ಬಸ್ಲೆಲ್ಯಾ ಕುಂಡ್ಲ್ಯಾಂತ್

ಅಟೊನ್ ಸುಕ್ಲೆಲಿ ಕಡಿ

ಬುಡ್ಕುಲ್ಯಾಕ್ ಚಿಡ್ಕಲ್ಲ್ಯಾ ದುದಾಸಾಯೆಪರಿಂ

ದೊಯೆಂತ್ ಆರಾವ್ನ್ ವಾಟ್ಲೆಂತ್ ಘೆತಾಂ

ಭಾನಾ ಉದ್ಕಾಂತ್ ದಾವೊ ಹಾತ್ ಬುಡವ್ನ್

ದಾರ್ವಟ್ಯಾರ್ ಕುಲೆ ತೆಂಕುನ್

ಪೆಳಿಯೆರ್ ಪಾಂಯ್ ಸ್ವಾಸ್ ಸೊಡ್ತಾತ್

ಥಂಡ್ ಪೇಜ್ ಕಡಿಯೆರ್ ಮಿಸ್ಳೊನ್

ಪೊಟಾಕ್ ಸ್ವಾದಿಕ್ ಅಮ್ರತಾಚೊ ಸುಶೆಗ್

ಸರ್, ಯುವರ್ ಆರ್ಡರ್…

ಮೆಜಾರ್ ಮಾಂಡ್ಲೆಲೆಂ ಚಾ ಕಪ್:

ಆನಿ,

ಫಿಕಿರ್‌ ನಾಸ್ತಾಂ ಪಾಶಾರ್ ಜಾಂವ್ಚೆ

ಲೋಕ್, ಕಾರಾಂ ಆನಿ ರಾಟಾವಳಿ

ಹಾಂವ್ ಪೆಜೆಕ್ ಸೊಧ್ತಾಂ

ಸುಕ್ಲೆಲ್ಯಾ ಕಡಿಯೆಕ್ ಸೊಧ್ತಾಂ

ಪೆಳಿಯೆಕ್ ಸೊಧ್ತಾಂ

ಮ್ಹಾಕಾಚ್ ಸೊಧ್ತಾಂ...

- ಕಿರಣ್ ನಿರ್ಕಾಣ್

**********

Vell

Yes, that’s it…

utrank mhojea haso diun

to choltana

khomisacho voilo butamv

ani ttoi sodill keli havem.                               

Donporam ekak jeuleli bhuti

vasrachea golleak bandlelea

ghanttiporim ovaz korit't

ghorchea mezar poteasomet

kuskon bostana

hamv randchea kurachea deger

doi sodhtalom

nis dattel'lea thondd choppott pejek

chembu udkacho obhixek

doi ghumvddamvchea vegak

nis as‌l'lean zalem

dhom-i tor

tak lonni veglli zati konn'nna

sokallim ujeachea davek

taplelea kurar

dhog tapoun boslelea kunddleant

otton sukleli koddi

buddkuleak chiddkol'lea dudasayeporim

doyent araun vattlent ghetam

bhana udkant davo hat buddoun

darvottear kule tenkun

pellier pam-i svas soddtat

thondd pez koddier misllon

pottak svadik omrotacho suxeg

sor, yuvor arddor…

mezar manddlelem cha kop

ani,

fikir‌ nastam paxar zamvche

lok, karam ani rattaulli

hamv pejek sodhtam

suklelea koddiek sodhtam

pelliek sodhtam

mhakach sodhtam...

- Kiran Nirkan