ಜಿಣ್ಯೆ ರೋದ್ ಘುಂವ್ತಾನಾ...

ಸದಾಂಯ್ ಸಾಂಜೆರ್, ಹ್ಯಾ ದರ್ಯಾತಡಿರ್ ಯೇವ್ನ್ ಬಸ್ಚೆಂ ಸೊಡ್ಲ್ಯಾರ್, ದುಸ್ರೆಂ ಕಾಮ್ ನಾಂ ಮ್ಹಾಕಾ. ನವೆಂ ಕಾಮ್ ಮೆಳ್ತಾ ಪರ್ಯಾಂತ್. 

ವೆಗಾನ್ ಧಾಂವ್ಚಿ ಜಿಣಿ, ಥೊಡೊ ವೇಳ್ ಥಾಂಬ್ಲೆಲೊ ಅನ್ಭೊಗ್... ಜಿಣಿಂಚ್ಚ್ ಶಾಶ್ವತ್ ನಂಯ್ ತರ್, ಕಾಮ್ ಖಂಯ್ಚೆಂ ಶಾಶ್ವತ್? ಅತಾಂ, ಪ್ರಕ್ರತೆ ಲಾಗಿಂ ಉಲೊಂವ್ಕ್ ಆನಿ ಸೊಭಾಯ್ ಚಾಕೊಂಕ್ ವೇಳ್ ಮೆಳ್ಳಾ, 

ಪುಣ್, ಅಶೆಂಚ್ ಮುಂದರುನ್, ತೀನ್ ಮಹಿನ್ಯಾಂ ಭಿತರ್ ಕಾಮ್ ಮೆಳನಾ ತರ್, ವೀಸಾ ಸಂಪ್ತಾ ಆನಿ ಗಾಂವಾಕ್ ವಚಜಾಯ್ ಪಡ್ತಾ.

ಅತಾಂ ಸಕಾಳಿಂ ಥಾವ್ನ್ ಸಾಂಜ್ ಪರ್ಯಾಂತ್ ನವ್ಯಾ ಕಾಮಾಚಿ ಸೊಧ್ನಾಂ, ಸಾಂಜೆರ್ ದರ್ಯಾ ತಡಿರ್ ಬಸೊನ್ ವೇಳ್ ಪಾಶಾರ್, ಉಪ್ರಾಂತ್ ರೂಮಾಚ್ಯಾ ಲಾಗ್ಸರ್ ಅಸ್ಚ್ಯಾ ಹೊಟೇಲಾಂತ್ ಜೇವ್ನ್, ರೂಮಾಕ್ ವಚೊನ್ ನ್ಹಾವ್ನ್ ಮಾಗ್ಣೆಂ ಕರ್ನ್ ನಿದ್ಲ್ಯಾರ್ ಸಕಾಳಿ ಉಟೊನ್, ತಯಾರ್ ಜಾವ್ನ್ ತ್ಯಾಚ್ ಹೊಟೆಲಾಂತ್ ನಾಸ್ಟೊ ಕರ್ನ್ ದೀಸ್ ಆರಂಭ್. 

ಹಿ ಅತಾಂ ಮ್ಹಜಿ ಸದಾಂಚಿ ಕಾಣಿ.

ಘರಾ ಫೋನ್ ಕೆಲ್ಲೊ, ಪುಣ್, ಕಾಮಾಚ್ಯೆ ವಿಶಿಂ ಕಾಂಯ್ ಸಾಂಗೊಂಕ್ ನಾಂ ಹಾವೆಂ. ಕಾಮ್ ನಾಂ ಮ್ಹಣ್ ಸಾಂಗ್ಲ್ಯಾರ್ ತಾಂಕಾಂ ನೀದ್ ಪಡ್ಚಿನಾ. 

ಹಾಂಗಾ, ಕಿತೆಂ ಜಾವ್ನ್ ಅಸಾ ತೆಂ ತಾಂಕಾಂ ವಿವರುನ್ ಸಾಂಗೊಂಕ್ ಅಸಾಧ್ಯ್. ದೆಕುನ್, ಸಗ್ಳೆಂ ಬರೆಂ ಅಸಾ ಮ್ಹಣ್ ಸಾಂಗ್ಲ್ಯಾರ್ ಮಾತ್ಸೊ ಸುಶೆಗ್.

ಹಾಂ, ನವೆಂ ಕಾಮ್ ಸೊಧುನ್ ಅಸಾಂ ಮ್ಹಣ್ ಹಾವೆಂ ಸಾಂಗ್ಲೆಲೆಂ ಮಹಿನ್ಯಾ ಆದಿಂ. ಕಂಪನಿ ಲೋಸಾರ್ ಅಸಾ ನವೆಂ ಕಾಮ್ ಸೊಧುನ್ ಅಸಾಂ ಮ್ಹಣ್ ಸಾಂಗ್ಲೆಲೆಂ. 

"ಪ್ರಾಯೆ ನಿಮ್ತಿಂ ಕಾಮ್ ಮೆಳಾತ್ಗಿ, ಅತಾಂ ಹರ್ಯೇಕ್ ಕಡೆ ತರ್ನಾಟೆ ಜಾಯ್ ಮ್ಹಣ್ತಾತ್ ನೆಂ"? ಮ್ಹಣ್ ಬಾಯ್ಲೆನ್ ಅಕ್ಲಾಸ್ ಸೊಡ್ಲೆಲೊ ಉಗ್ಡಾಸ್ ಅಸಾ ಮ್ಹಾಕಾ.

"ಪುಣ್ ಅನ್ಬೊಗಾಕೀಯ್ ಪ್ರಮುಖ್ಯತಾ ದಿಂವ್ಚಿ ಕಂಪನ್ಯೊಯ್ ಅಸ್ತೆಲ್ಯೊ" ಮ್ಹಣ್ ಭುಜಾಯಿಲ್ಲೆಂ ಹಾವೆಂ.

ಅಶೆಂ, ದರ್ಯಾ ಲ್ಹಾರಾಂ ಸಂಗಿ, ಭೊಗ್ಣಾಂ ಲ್ಹಾರಾಂ ಉಚಾರುನ್ ಅಸ್ತಾನಾಂಚ್, ಭುಜಾಚೆರ್ ಹಾತ್ ದವರ್ನ್ ಆಪಯ್ಲೊ ಮ್ಹಾಕಾ. ಘುಂವ್ತಾನಾ, ಏಕ್ ತರ್ನಾಟೊ ಅಮ್ರುಕ್ಯೊ ಹಾಸೊ ದೀವ್ನ್ ಪ್ರಶ್ನಾರ್ಥಕ್ ದಿಶ್ಟಿನ್ ಮ್ಹಾಕಾ ಪಳೆಂವ್ಕ್ ಲಾಗ್ಲೊ.

ಹಾವೆಂ ತೊ ಕೋಣ್ ಮ್ಹಣ್ ವಿಚಾರ್ಚೆ ಪಯ್ಲೆಂಚ್ಚ್, "ಆರ್ ಯು ಮಿಸ್ಟರ್ ಸ್ಟ್ಯಾನಿ"? ಮ್ಹಣ್ ವಿಚಾರಿ ಲಾಗ್ಲೊ. 

"ವ್ಹಯ್ ಹಾಂವ್ ಸ್ಟ್ಯಾನಿ, ಪೂಣ್ ತುಮ್ಚಿ ವಳೊಕ್ ಜಾವ್ನಾ ಮ್ಹಾಕಾ". ಮ್ಹಳೆಂ ಹಾವೆಂ ವಿಜ್ಮಿತಾಯೆನ್.

"ಹಾಂವ್ ಕಿಶೋರ್, ಶೇಖರಾಚೊ ಪೂತ್". ತಾಣೆಂ ಸಾಂಗ್ತಾನಾ, ವಿಜ್ಮಿತಾಯ್ ಆನಿ ಆತುರಾಯ್ ದೊನೀ ಚಡ್ಲಿ.

ಹೊ ಕೊಣಿ ದುಸ್ರ್ಯಾ ಸ್ಟ್ಯಾನಿಕ್ ಸೊಧುನ್ ಅಸಾ ಮ್ಹಣ್ ಭೊಗ್ಲೆಂ, ಆನಿ "ಕೋಣ್ ಶೇಖರ್, ಮ್ಹಾಕಾ ಉಗ್ಡಾಸ್ ಯೇನಾ"? ಮ್ಹಣ್ ಸಾಂಗ್ತಾನಾ, ತಾಣೆಂ ತಾಚೆಂ ಮೊಬಾಯ್ಲ್ ಕಾಡ್ನ್, ಫೊಟೊ ದಾಕಯ್ಲೊ, ಹಾಂವ್ ಸಗ್ಳೊಚ್ಚ್ ವಿಜ್ಮಿತ್ ಜಾಲೊಂ.

"ವ್ಹಯ್ ಹೊ ಶೇಖರ್, ಅಣ್ಣಾ ಶೇಖರ್, ಹೊ ಫೊಟೊ ಚಾರ್ ವರ್ಸಾಂ ಆದಿಂ ಕಾಮಾ ವೆಳಾರ್ ಕಾಡ್ಲೆಲೊ. ಆತಾಂ ಕಸೊ ಅಸಾ ಅಣ್ಣಾ ಶೇಖರ್"? ಮದ್ರಾಸಿ ತೊ ದೆಕುನ್ ಅಣ್ಣಾ ಶೇಖರ್ ಮ್ಹಣ್ ಆಪಂವ್ಚೆ ಅಸ್ಲೆಂ ಹಾವೆಂ ಆನಿ ಸಾಂಗತ್ಯಾನಿಂ.

"ತೊ ಬರೊ ಅಸಾ, ತುಜೊ ಕೆದಾಳಾಯ್ ಉಗ್ಡಾಸ್ ಕಾಡ್ತಾ." ಮ್ಹಣ್ ಫೋನ್ ಕರಿಲಾಗ್ಲೊ. ಹಾಂವ್‌ಂಯ್ ಉಲಯ್ಲೊಂ ತಾಚೆ ಲಾಗಿಂ, ಮ್ಹಾಕಾಯ್ ಚಾರ್ ವರ್ಸಾಂ ಉಪ್ರಾಂತ್ ಶೇಖರಾಚೊ ತಾಳೊ ಆಯ್ಕೊನ್ ಸಂತೊಸ್ ಜಾಲೊ.

ಹ್ಯಾಚ್ ದರ್ಯಾ ತಡಿರ್, ಚಾರ್ ವರ್ಸಾಂ ಆದಿಂ ಅಣ್ಣಾ ಶೇಖರ್ ಬಸೊನ್ ಅಸ್ತಾನಾ, ಮ್ಹಾಕಾ ಮೆಳ್‌ಲ್ಲೊ. ಸದಾಂ ತಾಕಾ ಪಳೆವ್ನ್, ವ್ಹಳಕ್ ಜಾವ್ನ್ ಉಲಯ್ತಾನಾ, ತಾಕಾ ಪಾರ್ಟ್-ಟೈಮ್ ಕಾಮ್ ಗರ್ಜ್ ಅಸಾ ಮ್ಹಣ್ ತಿಳ್ಸಿಲ್ಲೆಂ... 

ತಾಣೆಂ ಕಾಮ್ ಕರ್ಚಾ ಕಂಪೆನಿಂತ್, ಆಟ್ ವ್ಹರಾಂಚೆ ಕಾಮ್ ಆನಿ ಸಾಂಭಾಳ್ ಉಣೊ. ಉರ್ಲೆಲೊ ವೇಳ್ ಆಶೆಂಚ್ ವ್ಯರ್ಥ್ ಬಸೊನ್ ಪಾಡ್ ಜಾತಾ ಮ್ಹಣ್ ಶೀಣ್ ಉಚಾರ್ತಾಲೊ. ಸಾಂಬಾಳ್ ಸಗ್ಳೊ, ಭುರ್ಗ್ಯಾಂಚಾ ಶಿಕ್ಪಾಕ್, ಘರಾ ಖರ್ಚಾಕ್ ಆನಿ ತಾಚ್ಯಾ ಹಾಂಗಾಚ್ಯಾ ಖರ್ಚಾಕ್ ಸಾರ್ಕೊ ಜಾತಾ, ಕಾಂಯ್ ಉರಾನಾ, ತಾಚಿ ಬೆಜಾರಾಯ್….

ದೆಕುನ್ ಮ್ಹಜ್ಯಾ ಲಾಗಿಂ ಕಾಂಯ್ ಪಾರ್ಟ್- ಟೈಮ್ ಕಾಮ್ ಅಸ್ಲ್ಯಾರ್ ವಿಚಾರುಂಕ್ ಲಾಗ್ಲೊ. ಹಾವೆಂ ತಾಕಾ ದೋನ್ ದಿಸಾಂ ಉಪ್ರಾಂತ್, ಮ್ಹಜಾ ಕಂಪೆನಿಂತ್ ಪಾರ್ಟ್-ಟೈಮ್ ಕಾಮಾಕ್ ಲಾಯ್ಲೊ. 

ಪುಣ್, ಮುನ್ಸಿಪಾಲಿಟಿಚೆಂ ಭ್ಯೆಂ ಅಸ್‌ಲ್ಲೆಂ. ತೆ, ತವಳ್ ತವಳ್ ಯೇವ್ನ್ ಪಳೆತಾತ್, ಭಾಯ್ಲ್ಯಾ ಕೊಣಾಕೀ, ಮ್ಹಣ್ಜೆ ತ್ಯಾ ಕಂಪೆನಿಚ್ಯಾ ವೀಸಾಚ್ಯಾ ಕಾಮೆಲ್ಯಾಂ ಸಾಂಗಾತಾ ದುಸ್ರ್ಯಾ ಕಂಪೆನಿಚ್ಯೆ ವಾ ಇತರ್ ವೀಸಾಚೆ ಕಾನೂನ್ ಭಾಯ್ರ್ ಜಾವ್ನ್ ಕಾಮ್ ಕರ್ತಾತ್ಗಿ ಮ್ಹಣ್ ಪಳೆಂವ್ಕ್ ಆನಿ ಇತರ್ ಕಾನೂನ್ ವಿಶ್ಯಾಂಕ್ ಬಧ್ದ್ ಜಾವ್ನ್ ಕಾಮ್ ಕರ್ತಾತ್ ಮ್ಹಳ್ಳೆಂ ಪಳೆಂವ್ಕ್.

ತೆ, ಅಚಾನಕ್ ರೈಡ್ ಮಾರ್ತಾತ್ ಆನಿ ಹ್ಯಾ ವೆಳಾರ್, ಕಿತೆಂಯ್ ಹಾತಿಂ ಮೆಳ್ಳ್ಯಾರ್, ಕಂಪೆನಿಕ್ ದಂಡ್ ಆನಿ ಕಾನೂನ್ ಭಾಯ್ರ್ ಕಾಮ್ ಕರ್ತಲ್ಯಾಂಕ್ ಜೈಲ್ ಆನಿ ಉಪ್ರಾಂತ್ ಗಾಂವಾಕ್ ಧಾಡ್ತಾತ್ ಜಾಲ್ಲ್ಯಾನ್, ಕಾಮ್ ಕರುನ್ ದಿಂವ್ಚೆಂ ಚಡ್ ಕಷ್ಟಾಂಚೆ. 

ತರೀ ಅಣ್ಣಾ ಶೇಖರಾಕ್ ಮ್ಹಜ್ಯಾ ಶಿಫಾರಾಸೆ ವಯ್ರ್ ಕಾಮ್ ಮೆಳ್ಳೆಲೆಂ.

ಥೊಡ್ಯಾಚ್ ದಿಸಾಂನಿ, ತಾಚಾ ಕಾಮಾಚಿ ವೋಡ್ ಪಳೆವ್ನ್ ಸಗ್ಳ್ಯಾಂಕ್ ಮೊಗಾಚೊ ಜಾಲೊ. ಅಶೆಂ ಆಮ್ಚಿಯ್ ಇಶ್ಟಾಗಾತ್ ಚಡ್ಲಿ.

“ತೊ, ತುಜ್ಯೆ ವಿಶಿಂ ಕೆದಾಳಾಯ್ ಸಾಂಗ್ತಾಲೊ, ತುಂ ಫೈನಲ್ ಇಯರ್ ಇಂಜಿನಿಯರಿಂಗ್ ಕರ್ನ್ ಅಸಾಯ್, ಸಂಪ್‌ಲ್ಲೆಂಚ್ ಹಾಂಗಾ ಹಾಡಾಯ್ಜಜ್, ಆತಾಂ ಥೊಡೆ ಪಯ್ಶೆ ಉರಂವ್ಕ್ ಸಾಧ್ಯ್ ಜಾಲೆಂ. ದಿವಾಲಿ ರಜೆರ್ ಗಾಂವಾಕ್ ವಚೊನ್ ಘರ್ಚೆಂ ಥೊಡೆಂ ಕಾಮ್ ಕರಿಜಯ್” ಅಶೆಂ ಸಗ್ಳೆಂ ಸಾಂಗ್ತಾಲೊ.

ಆಶೆಂ, ಕಾಂಯ್ ಚಡ್ ಉಣೆಂ ಪಾಂಚ್ ವಾ ಸಾತ್ ಮ್ಹಹಿನೆಂ ಆಮಿಂ ಸಾಂಗಾತಾ ಕಾಮ್ ಕೆಲೆಂ. ಕಾಂಯ್ ನಶಿಬಾಕ್ ಪಸಂದ್ ಜಾಂವ್ಕ್ ನಾ ದಿಸ್ತಾ, ಏಕ್ ದೀಸ್ ಆಮ್ಚಾ, ಕಂಪೆನಿಕ್ ಮುನ್ಸಿಪಾಲಿಟಿಚೆಂ ರೈಡ್ ಪಡ್ಲೆಂ ಆನಿ ಅಣ್ಣಾ ಶೇಖರಾಕ್ ಬಂಧಿ ಕರ್ನ್ ವರ್ನ್ ಗೆಲೆ. ದುಸ್ರ್ಯಾ ಕಂಪೆನಿಚಿ ವೀಸಾ ಘೆವ್ನ್, ಆಮ್ಚಾ ಕಂಪೆನಿಂತ್ ಕಾಮ್ ಕರ್ತಾ ಮ್ಹಳ್ಳ್ಯಾ ಏಕಾಚ್ ಚುಕಿಕ್. ತಶೆಂಚ್ ಆಮ್ಚಾ ಕಂಪೆನಿಕೀ ದಂಡ್ ಘಾಲೊ.

ಅತಾಂ, ಅಣ್ಣಾ ಶೇಖರಕ್ ಬಂದಿ ಕರ್ನ್ ತಾಚಿಂ ಸಪ್ಣಾಂಯ್ ಖೈದ್ ಜಾಲಿಂ. ಗಾಂವಾಕ್ ಧಾಡ್ತಾತ್ ತಿ ಖಾತ್ರಿ ಅಸಲ್ಲಿ. ಪುಣ್ ಕೆದಾಳಾ ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಮಾತ್ರ್ ತ್ಯಾ ವೆಳಾರ್ ನಾತ್'ಲ್ಲಿ.

“ತಾಚೊ, ತ್ಯಾ ಮ್ಹಹಿನ್ಯಾಚೊ ಸಾಂಭಾಳ್ ಕಂಪೆನಿಂತ್ ಅಸ್'ಲ್ಲೊ. ಹಾವೆಂ, ತಾಕಾ ಕಾಮಾಕ್ ಲಾಯಿಲ್ಲೊ ದೆಕುನ್ ಮ್ಹಕಾ ತೊ ಸಾಂಭಾಳ್ ದೀಂವ್ಕ್ ಕಂಪೆನಿ ಒಪ್ವಲಿ ಆನಿ ಅಶೆಂ ಕಿತೆಂಯ್ ಜಾಯ್ತ್ ಜಾಲ್ಯಾರ್, ಕಿತೆಂ ಕರಿಜೆ ಮ್ಹಣ್ ಪಯ್ಲೆಂಚ್ ಆಮಿ ಉಲೆಯಿಲ್ಲ್ಯಾಂತ್, ತುಮ್ಚಾ ಘರ್ಚೊ ವಿಳಾಸ್ ಆನಿ ಬ್ಯಾಂಕಾಚೊ ವಿವರ್ ತಾಣೆಂ ಮ್ಹಾಕಾ ದಿಲ್ಲೊ”.

“ಹಾವೆಂ, ತೊ ಜೈಲಾಂತ್ ಅಸ್ತಾನಾ ಮೆಳೊಂಕ್ ಆನಿ ಫೋನ್ ಕರುಂಕ್ ಪ್ರೇತನ್ ಕೆಲ್ಲೆಂ. ಪುಣ್ ಸುಫಳ್ ಜಾಲೆಂ ನಾಂ. ತಾಚೊ, ಸಾಂಭಾಳ್ ಹಾವೆಂ, ತಾಣೆಂ ದಿಲ್ಲ್ಯಾ ಬ್ಯಾಂಕ್ ಖಾತ್ಯಾಕ್ ಘಾಲ್ಲೊ. ತೊ ಕೆದಾಳಾ ಹಾಂಗಾ ಥಾವ್ನ್ ಗಾಂವಾಕ್ ಪಾವ್ಲೊ, ಕಿತ್ಲೆ ಕಷ್ಟ್ ಸೊಸ್ಲೆ, ತೆ ದೇವ್'ಚ್ ಜಾಣಾಂ."

"ಕಿತೆಂಯ್ ಜಾಂವ್, ಆಜ್ ತಾಚೊ ತಾಳೊ ತೆವ್ಶಿಲ್ಯಾನಿಯ್ ಆಯ್ಕೊನ್ ಸಂತೊಸ್ ಜಾಲೊ”. ದರ್ಯಾ ಲ್ಹಾರಾಂ ತಡಿಕ್ ಅಪ್ಟಾಲ್ಲ್ಯಾ ಪರಿಂ, ಯಾದಿ ಜಿವಾಳ್ ಜಾಲೆ.

“ತುಂ ಶೇಖರಾನ್ ಚಿಂತ್'ಲ್ಲ್ಯಾ ಆನಿ ಆಶೆಲ್ಲ್ಯಾ ಪರಿಂ ಕುವೈಟ್ ಯೇವ್ನ್ ಪಾವ್ಲೊಯ್. ಕಿತೆಂ ಕಾಮ್ ಕರ್ನ್ ಅಸಾಯ್"?

"ಹಾಂವ್, ಓಯಿಲ್ ಸೆಕ್ಟಾರಾಂತ್ ಇಂಜಿನಿಯರ್ ಜಾವ್ನ್ ಅಸಾಂ. ಪಯ್ಲೆಂ, ಇಲ್ಲೊ ಪಯ್ಸ್ ರಾವ್ತಾಲೊಂ, ಆತಾಂ ಹಾಂಗಾಚ್, ಲಾಗ್ಸರ್ ರೂಮ್ ಕೆಲಾಂ. ಕಾಮಾಕ್ ಲಾಗಿಂ ದೆಕುನ್" ಮ್ಹಣಾಲೊ ತೊ ಬೋಟ್ ಜೊಕುನ್. "ಹಾಂವ್, ದೋನ್ ದಿಸಾಂ ಪಯ್ಲೆಂ, ತುಕಾ ಮೆಳೊಂಕ್ ಮ್ಹಣ್ ತುಮ್ಚಾ ಕಂಪೆನಿಕ್ ಗೆಲ್ಲೊಂ. ಪುಣ್, ತುಂ ಅತಾಂ, ಥಂಯ್ ಕಾಮ್ ಕರಿನಾಂಯ್ ಮ್ಹಣ್ ಸಾಂಗ್ಲೆಂ ತಾಣಿಂ. ತುಂ ಖಂಯ್ಸರ್ ಕಾಮ್ ಕರ್ತಾಯ್ ಅತಾಂ."? ವಿಚಾರ್ಲೆಂ ತಾಣೆಂ ಉತ್ಸುಕ್ ಜಾವ್ನ್.

"ನಶಿಬ್ ಮ್ಹಜೆಂ ಪಾಡ್ ವಾ ಕಂಪೆನಿಚೊ ವೇಳ್ ಬರೊ ನಾಂ. ಬಿಜ್ನೆಸ್ ನಾಂ ಮ್ಹಣ್, ಮ್ಹಾಕಾ ಕಾಮಾಂತ್ಲೊ ಕಾಡ್ಲೊ. ತೀನ್ ಮ್ಹಹಿನ್ಯಾಂಚೊ ವಾಯ್ದೊ ಅಸಾ, ನವೆಂ ಕಾಮ್ ಸೊಧುಂಕ್. ಸದಾಂಯ್ ಕಾಮ್ ಸೊಧ್ಚೆಂ ಸೊಡ್ಲ್ಯಾರ್, ದುಸ್ರೆಂ ಕಾಮ್ ನಾಂ ಅತಾಂ. ಪ್ರಾಯ್ ಪಳೆವ್ನ್ ಥೊಡೆ ಕಾಮ್ ದೀಂವ್ಕ್ ನರ್ಗತಾತ್. ಕಿತೆಂ ಕರ್ಚೆಂ? ತೀನ್ ಮ್ಹಹಿನೆ ಕಾಮ್ ಸೊಧ್ತಾಂ, ಮೆಳ್ಳೆಂ ತರ್ ಬರೆಂ ನಾ ತರ್ ಗಾಂವಾಕ್ ವೆಚೆಂ" ಮ್ಹಳೆಂ ಹಾವೆಂ ಆಕ್ಲಾಸಾನ್.

ಆಯ್ಕೊನ್ ವ್ಹಡ್ಲ್ಯಾನ್ ಹಾಸ್ಲೊ ತೊ, ಹಾಂವ್ ತಾಕಾಚ್ ಪಳೆಂವ್ಚಾಕ್ ಪಡ್ಲೊಂ. "ಬರ್‍ಯಾ ಮ್ಹನ್ಶಾಂಕ್, ಬರೆಂಚ್ ಜಾತಾ. ತ್ಯಾ ದೀಸ್ ಮ್ಹಜಾ ಪಪ್ಪಾಕ್ ಕಾಮ್ ಕರ್ನ್ ದಿಲೆಂಯ್ ತುಮ್ಚಾ ಕಂಪೆನಿಂತ್. ಆನಿ ಆಜ್, ಹಾಂವ್ ತುಕಾ ಆಮ್ಚ್ಯಾ ಕಂಪೆನಿಂತ್ ಕಾಮ್ ಕರ್ನ್ ದಿತಾಂ. ಫಾಲ್ಯಾಂ, ಸಕಾಳಿಂ ಇಕ್ರಾ ವೊರಾಂಕ್ ಯೇ, ಹಾಂವ್ ತುಜೆಂ ಅಪಾಂಯ್ಟ್ಮೆಂಟ್ ಲೆಟರ್ ತಯಾರ್ ಕರ್ನ್ ದವರ್ತಾಂ." ಮ್ಹಣೊನ್ ತಾಚೆಂ ಬಿಜ್ನೆಸ್ ಕಾರ್ಡ್ ದೀಂವ್ಕ್ ಲಾಗ್ಲೊ.

ಮ್ಹಜಾ ದೊಳ್ಯಾನಿ ದೋನ್ ಥೆಂಬೆ ದೂಕ್ ಅಪ್ಶೆಂ ದೆಂವೊನ್ ಗೆಲೆ. “ಕಶೆಂ ತುಜೊ ಉಪ್ಕಾರ್ ಆಟಂವ್? ಸಬ್ಧ್ ನಾಂತ್ ಮ್ಹಜೆಲಾಗಿಂ” ಮ್ಹಳೆಂ ಹಾವೆಂ ತಾಚ್ಯಾ ಹಾತಾಕ್, ಹಾತ್ ಮೆಳವ್ನ್.

"ಫಾಲ್ಯಾಂ, ಸಕಾಳಿಂ ಇಕ್ರಾ ವೊರಾಂಕ್ ಹಾಂವ್ ತುಕಾ ರಾಕೊನ್ ಅಸ್ತಾಂ". ಮ್ಹಣೊನ್ ಚಲತ್ತ್ ರಾವ್ಲೊ ತೊ.

ಕಾಮ್ ಮೆಳ್ಳೆಲಿ ಖಬರ್, ಘರಾ ಫೋನ್ ಕರ್ನ್ ಸಾಂಗ್ತಾಂ ಮ್ಹಣ್, ಹಾಂವ್'ಯ್ ವೆಗ್ಗಿಂ ರೂಮಾ ತೆವ್ಶಿಂ ಚಲ್ಲೊಂ.

ಕ್ಲೈವ್ ಸೋಜ್, ಬೊಳಿಯೆ.