ಮನಿಸ್ ಜಲ್ಮಾತಾ ಆನಿ ಎಕಾ ನಿರ್ದಿಷ್ಟ್ ಅವ್ದಿ ವರೇಗ್ ಜಿಯೆಲ್ಲ್ಯಾ ಉಪ್ರಾಂತ್ ಮರಣ್ ಪಾವ್ತಾ. ಎಕಾ ವ್ಯಕ್ತಿಕ್ ದೆವಾನ್ ದಿಂವ್ಚೆಂ ಆವ್ಕ್ ಕಿತ್ಲ್ಯಾ ವರ‍್ಸಾಂಚೆ ಮ್ಹಣ್ ಕೋಣಾಕ್‌ಯೀ ಕಳಿತ್ ನಾ. ದೆಕುನ್ ಆಮ್ಕಾಂ ದಿಲ್ಲೊ ವೇಳ್, ಆವ್ಕಾಸ್ ಪರಿಪೂರ್ಣ್ ಥರಾನ್ ಉಪಯೋಗ್ ಕರ‍್ಚೆಂ ಖಂಡಿತ್ ಜಾವ್ನ್ ಆಮ್ಚ್ಯಾ ಹಾತಾಂತ್ ಆಸಾ.

ಜಿವಿತ್ ದೆವಾನ್ ಆಮ್ಕಾಂ ದಿಲ್ಲೆಂ ಏಕ್ ಅಪೂರ್ಬಾಯೆಚಿ ಕಾಣಿಕ್. “ಜಿವಿತಾಚಿ ಆವ್ದಿ” ಆಮ್ಕಾಂ ಮೆಳ್‌ಲ್ಲೊ ಆವ್ಕಾಸ್. ಹರ‍್ಯೆಕಾ ಸಕಾಳಿ ಉಟ್ತಾಸ್ತಾನಾ ಆಮಿ ಆಳ್ಸಾಯ್ ಸಾಂಡುನ್ ಸುಡ್ಸುಡಾಯೆನ್ ಉಟೊಂಕ್ ಜಾಯ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಕಾಂ ಜಿಯೆಂವ್ಕ್ ಆನ್ಯೇಕ್ ಆವ್ಕಾಸ್ ಲಾಭ್‌ಲ್ಲ್ಯಾಕ್! ಪರತ್ ನವೊ ದೀಸ್! ಕಾಲ್ಚ್ಯಾ ದಿಸಾ ಕೆಲ್ಲ್ಯೊ ಚುಕಿ ತಿದ್ವುಂಕ್ ಏಕ್ ವರ್ತೊ ವೇಳ್, ಕಾಲ್ಚ್ಯಾ ದಿಸಾ ಪರಿಪೂರ್ಣ್ ಕರಿನಾತ್‌ಲ್ಲಿಂ ಕಾಮಾಂ ಆಯ್ಚ್ಯಾ ದಿಸಾ ಪೂರ್ಣ್ ಕರ‍್ಚ್ಯಾಕ್ ಲಾಭ್‌ಲ್ಲೊ ಆವ್ಕಾಸ್. ಕಾಲ್ಚ್ಯಾ ದಿಸಾ ಸಪ್ಣೆಲ್ಲೆಂ ಸ್ವಪಣ್ ಜ್ಯಾರಿ ಕರ‍್ಚ್ಯಾಕ್ ಲಾಭ್‌ಲ್ಲೊ ಬರೊ ಸಂದರ್ಭ್. ಪುಣ್ ಮನಿಸ್ ಜಿವಿತಾಚಿ ಪಾವ್ಲಾಂ ಸುಗಾಮಾಯೆನ್ ಕಾಡ್ಚ್ಯಾಕ್ ಪ್ರಯತ್ನ್ ಕರ‍್ತಾ. ಅಧುನಿಕ್ ಸಂಸಾರಾಂತ್ ಜಾಂವ್ಚ್ಯೊ ಬದ್ಲಾಪ್ ಪಳೆತಾನಾ ಮನಿಸ್ ಆಪ್ಲೊ ವೇಳ್ ಉರೊಂವ್ಚಾಕ್ ಹರ್ ಪ್ರಯತ್ನ್ ಕರ‍್ತಾ. ವೆಗಿಂಚ್ ಕಾಮ್ ತಿರ್ಸುಂಚೆಂ ಕಂಪ್ಯೂಟರ್, ಮೊಬೈಲ್ ಇತ್ಯಾದಿ. ಘರ್ ಕಾಮಾಂ ಸಲಿಸಾಯೆನ್ ಕರ‍್ಚಿ ಅಧುನಿಕ್ ಸೌಲತ್ಯೊ ಆಮ್ಚೊ ವೇಳ್ ಉರ‍್ಯೆತಾ. ಪುಣ್ ಆಮಿ ಹಾಂಗಾಸರ್ ಚಿಂತುಂಕ್ ಜಾಯ್ ಆಮಿ ಉರ್‌ಯಿಲ್ಲೊ ವೇಳ್ ಖಂಯ್ಸರ್ ಗೆಲೊ? ಖಂಯ್ಚ್ಯಾ ಬರ‍್ಯಾ ಕಾಮಾಕ್ ತೊ ವಿನಿಯೋಗ್ ಕರ‍್ತಾಂವ್? ದೆವಾನ್ ರಚ್‌ಲ್ಲೊ ಸೊಭಿತ್ ಸಂಸಾರ್ ಆನಿಕೀ ಸೊಭಿತ್ ಕರ‍್ಚೆಂ ಪ್ರಯತ್ನ್ ಕರ‍್ನ್ ಆಸಾಂವ್‌ಗೀ? ಹ್ಯಾ ಸರ್ವ್ ಸವಾಲಾಂಕ್ ಜಾಪಿ ಆಮ್ಕಾಂಚ್ ಆಮಿ ವಿಚಾರುಂಕ್ ಜಾಯ್.

ಮನಿಸ್ ಸಾಧಾರಣ್ ಜಾವ್ನ್ ಜಿವಿತಾಂತ್ ಹೆರಾಂ ಥಾವ್ನ್ ಕಿತೆಂ ಮೆಳ್ತಾ? ದುಸ್ರ್ಯಾಂನಿ ಆಮ್ಕಾಂ ಕಿತೆಂ ದಿಲಾಂ? ಮ್ಹಳ್ಳ್ಯಾ ಚಿಂತ್ನಾಂನಿ ಬುಡೊನ್ ವೆತಾ ಶಿವಾಯ್, ಹಾವೆಂ ದುಸ್ರ್ಯಾಂಕ್ ಕಿತೆಂ ದಿಲಾಂ ಮ್ಹಳ್ಳೆಂ ಚಿಂತುಕ್ ಪಾಟಿಂ ಸರ‍್ತಾ.

ಏಕ್ ದೀಸ್ ಏಕ್ ವ್ಯಕ್ತಿ ಆಪ್ಲೆಂ ನವೆಂ ಕಾರ್ ನಿತಳ್ ಕರ‍್ನ್ ಆಸ್ತಾನಾ, ಸೆಜಾರ‍್ಚೊ ವ್ಯಕ್ತಿ “ತುಜೆಂ ನವೆಂ ಕಾರ್ ಸೊಭಿತ್ ಆಸಾ ಕೆದಾಳಾ ಘೆತ್‌ಲ್ಲೆಂಯ್” ಮ್ಹಣ್ ವಿಚಾರ್‌ಲ್ಲ್ಯಾ ವೆಳಾರ್ ತೊ ವ್ಯಕ್ತಿ “ಮ್ಹಜ್ಯಾ ಇಷ್ಟಾನ್ ಮ್ಹಕಾ ನವೆಂ ಕಾರ್ ಕಾಣಿಕ್ ಜಾವ್ನ್ ದಿಲಾಂ” ಮ್ಹಳ್ಳಿ ಜಾಪ್ ದಿತಾ. ತಕ್ಷಣ್ ಸೆಜಾರಿ ವ್ಯಕ್ತಿ “ಮ್ಹಜೆಂ ಲಾಗಿಂ ಅಸಲೆಂಚ್ ಕಾರ್ ಆಸಾಜಾಯ್ ಆಸ್‌ಲ್ಲೆಂ” ಮ್ಹಣ್ ಬೆಜಾರಾಯ್ ವ್ಯಕ್ತ್ ಕರ‍್ತಾನಾ ತೊ ವ್ಯಕ್ತಿ “ತುಕಾಯೀ ಮ್ಹಜ್ಯಾ ಇಷ್ಟಾ ತಸಲೊ ಇಷ್ಟ್ ಲಾಬ್ಚ್ಯಾಕ್ ಮಾಗ್ತಾಂ” ಮ್ಹಣಾಲೊ. ತೆದ್ನಾ ತಿಸ್ರೊ ವ್ಯಕ್ತಿ ಪಯ್ಸ್ ರಾವೊನ್ ಹ್ಯಾ ದೊಗಾಂ ವ್ಯಕ್ತಿಚೆಂ ಸಂಬಾಷಣ್ ಆಯ್ಕತಲೊ. ಪುಣ್ ತಾಚೆ ಚಿಂತಾಪ್ ವೆಗ್ಳೆಂಚ್ ಜಾವ್ನಾಸ್‌ಲ್ಲೆಂ. “ಹಾಂವೆಯೀ ಹೆರಾಂಕ್ ಮ್ಹಜ್ಯಾ ಜಿವಿತಾಂತ್ ಹೆರಾಂಕ್ ದಿಂವ್ಚೆಂ ತಸಲೊ ಇಷ್ಟ್ ಜಾಯ್ಜಯ್” ಮ್ಹಣ್ ಆಪ್ಣಾ ಇತ್ಲ್ಯಾಕ್ ಚಿಂತುಂಕ್ ಲಾಗ್ಲೊ. ಆಹಾ! ಕಿತ್ಲೆಂ ಬರೆಂ ಚಿಂತಾಪ್.

ಸಾಮಾನ್ಯ್ ಜಾವ್ನ್ ಆಮ್ಚೆ ಮಧೆಂ ದೋನ್ ಥರಾಂಚೆ ವ್ಯಕ್ತಿ ಆಸಾತ್. “ದಿಂವ್ಚೆ ವ್ಯಕ್ತಿ” ಆನಿ ಘೆಂವ್ಚೆ ವ್ಯಕ್ತಿ”.

‘ದಿಂವ್ಚೆ ವ್ಯಕ್ತಿ’ ಹ್ಯಾ ಸಮಾಜೆಕ್ ವಾ ಹೆರಾಂಕ್ ಕಿತೆಂ ತರಿಯೀ ದೀಂವ್ಕ್ ಜಾಯ್ ಮ್ಹಳ್ಳ್ಯಾ ಮನೋಭಾವಾನ್ ಆಸ್ತಾತ್ ತರ್, ‘ಘೆಂವ್ಚೆ ವ್ಯಕ್ತಿ’ ಮ್ಹಾಕಾ ಕಿತೆಂಯ್ ಮೆಳೊಂಕ್ ನಾ, ಮ್ಹಾಕಾ ಕೊಣ್‌ಯಿ ಕಿತೆಂಯೀ ದೀನಾಂತ್, ಮ್ಹಾಕಾ ತೆಂ ಮೆಳಾಜಾಯ್ ಆಸ್‌ಲ್ಲೆಂ ಮ್ಹಳ್ಳ್ಯಾ ನಿರಾಶೆಚ್ಯಾ ಮನೋಭಾವಾನ್ ಜಿವಿತ್ ಸಾರ‍್ತಾತ್. ‘ದಿಂವ್ಚೊ ವ್ಯಕ್ತಿ’ ಸಮಾಧಾನೆನ್ ಆನಿ ಸಂತೊಸಾಚ್ಯಾ ಸಾಗೊರಾಂತ್ ಸದಾಂಚ್ ಸಂತೊಸ್ಭರಿತ್ ಆಸ್ತಾ. ‘ಘೆಂವ್ಚೊ ವ್ಯಕ್ತಿ’ ಮ್ಹಕಾ ತೆಂ ಮೆಳಾಜಾಯ್, ಹೆಂ ಮೆಳಾಜಾಯ್ ಮ್ಹಳ್ಯಾ ನಾಸಾಮಾಧಾನೆಚ್ಯಾ ಪಿಡೆಕ್ ಒಳಗ್ ಜಾತಾ.

ದೆಕುನ್ ಆಮ್ಚೆಂ ಸಂಸಾರಿ ಜಿವಿತ್ ಸಂತೊಸಾನ್ ಜಿಯೆಜಾಯ್ ವಾ ನಾಸಮಾಧೆನೆನ್ ಜಿಯೆಜಾಯ್ ಮ್ಹಳ್ಳೆಂ ಆಮಿಂಚ್ ನಿರ್ಧಾರ್ ಘೆಂವ್ಕ್ ಜಾಯ್. ಹ್ಯಾ ಸಕ್ಕಡ್ ಚಿಂತ್ಪಾ ಮಧೆಂ ಏಕ್ ಪ್ರಮುಖ್ ವಿಷಯ್ ಆಮಿ ವಿಸ್ರೊಂಕ್ ನಜೊ. ಆಮ್ಕಾಂ ಜಿವಿತ್ ದಿಲ್ಲ್ಯಾ ದೆವಾನ್ ಖಂಡಿತ್ ಜಾವ್ನ್ ಏಕ್ ಪ್ರಮುಖ್ ಉದ್ದೇಶ್ ದವರ‍್ನ್ ಹೆಂ ಜಿವಿತ್ ಆಮ್ಕಾಂ ದಿಲಾಂ. ತೊ ಉದ್ದೇಶ್ ಆಮಿ ಪೂರ್ಣ್ ಕರ‍್ಚ್ಯಾಕ್ ಆಮಿ ಜಿಕ್ಲ್ಯಾಂವ್‌ಗೀ ವಾ ಸಲ್ವಲ್ಯಾಂವ್ ಮ್ಹಳ್ಳೆಂ ತ್ಯಾ ರಚ್ನಾರಾ ಮುಕಾರ್ ರಾವೊನ್ ಆಮಿ ನಿಮಾಣ್ಯಾ ಝಡ್ತೆಚಾ ದಿಸಾ ಸಾಂಗೊಂಕ್ ಆಸಾ.

ಏಕ್ ಮಹಾನ್ ಬರಯ್ಣಾರ್ ಆಪ್ಲ್ಯಾ ಬರ‍್ಪಾಂತ್ ಆಶೆಂ ಬರಯ್ತಾ “ಹೊ ಸಂಸಾರ್ ರುಚಿಕ್ ಆಸಾ, ಆನಿ ಪಾಚ್ವ್ಯಾ ರಂಗಾನ್ ಸೊಬ್ತಾ ರಚ್ನಾರಾನ್ ಹ್ಯಾ ಸಂಸಾರಾಚಿ ಜವಾಬ್ದಾರಿ ದಿಲ್ಯಾ ಆನಿ ಆಮಿ ತಿ ಜವಾಬ್ದಾರಿ ಖಂಚ್ಯಾ ಥರಾನ್ ಪಾಳ್ತಾಂವ್ ಮ್ಹಳ್ಳೆಂ ತೊ ಪಳೆತ್ ಆಸಾ”. ದೆಕುನ್ ಆಮಿ ಹರ‍್ಯೆಕಾ ಘಡಿಯೆ ಬರೆಂ ಕರುಂಕ್ ಜಾಯ್, ಬರೆಂ ಚಿಂತುಂಕ್ ಜಾಯ್. ಹೆರಾಂನಿ ಫಿರ್ಗಜೆಂತ್ ನಿಸ್ವಾರ್ಥಿ ಮನಾನ್ ಸೆವಾ ಕರ‍್ತಾನಾ ಮೊಸೊರ್ ಕರಿನಾಸ್ತಾನಾ, ವಾಯ್ಟ್ ಚಿಂತಿನಾಸ್ತಾನಾ ತಾಂಕಾಂ ಪಾಟಿಂಬೊ ದೀಂವ್ಕ್ ಜಾಯ್. ಆಮ್ಚ್ಯಾ ಹಾಜಾರ್‌ಪಣಾಂತ್ ಸಾಂಗಾತ್ಯಾಕ್ ಸಂತೊಸ್ ಲಾಬೊಂಕ್ ಜಾಯ್.

ಆಮ್ಚೆಂ ಥಂಯ್ ಆಸ್ಚೆಂ ಸಕ್ಕಡ್ ತಾತ್ಕಾಲಿಕ್. ಆಮ್ಚೆಂ ಜಿವಿತ್ ಏಕ್ ದೀಸ್ ಅಕೇರ್ ಜಾತಾ. ಆನಿ ಆಮ್ಚೆ ಲಾಗಿಂ ಆಸ್ಚೊ ಅಧಿಕಾರ್, ದುಡು, ಭಾಂಗಾರ್ ದುಸ್ರ್ಯಾಚ್ಯಾ ಹಾತಾಖಾಲ್ ವೆತಾ ಮ್ಹಣ್ ಕಳಿತ್ ಆಸ್ಲ್ಯಾರಿ ಕಿತ್ಯಾಕ್ ಹೊ ವ್ಯರ್ಥ್ ಮೊಸೊರ್, ಆಶಾ? ದೆಕುನ್, ಆಮ್ಚ್ಯಾ ಜಿವಿತಾಂತ್ ಮೆಳ್‌ಲ್ಲೊ ಆವ್ಕಾಸ್ ಆಳ್ಸಾಯೆನ್ ಆನಿ ಹಂಕಾರಾನ್ ದುರುಪಯೋಗ್ ಕರಿನಾಸ್ತಾನಾ, ಹರ‍್ಯೇಕ್ ದೀಸ್ ಆದ್ಲ್ಯಾ ದಿಸಾ ಕೆಲ್ಲಿಂ ವಾಯ್ಟ್ ಕಾಮಾಂ ಸಾರ್ಕೆಂ ಕರ‍್ನ್, ಆಮ್ಚೆಂ ಉಣೆಂಪಣ್ ಒಳ್ಕುನ್ ಬರೆಂಪಣ್ ಚಡೊಂವ್ಚೆ ಆವ್ಕಾಸ್ ಗಳ್ಸಿಯಾಂ. ಆಮ್ಕಾಂ ಸೊಭಿತ್ ಜಿವಿತ್ ದಿಲ್ಲ್ಯಾ ದೆವಾಕ್ ಹೊಗ್ಳಾಪ್ ದೀವ್ನ್, ಹ್ಯಾ ಸೊಭಿತ್ ಸಂಸಾರಾಂತ್ ಆಮ್ಚೆಂ ಜಿವಿತ್ ಸೊಭೊವ್ಯಾಂ.

ಲವಿಟಾ ಡಿಸೋಜ, ನಕ್ರೆ