ಯಾದಿಂಚೆಂ ನತಾಲ್.

ವರ್ಸಾಂ ವೇಗ್ ಆರಾವ್ನ್ ಧಾಂವಾತ್ತ್ ಗೆಲಿಂ. ವರ್ಸಾನ್ ವರಸ್ ನತಾಲ್ ಸಂಭ್ರಮ್ತಾನಾ,  ಸ್ವಾಭಾವಿಕ್ ಜಾವ್ನ್ ಬಾಳ್ಪಣಾಲಿಂ ಭೊಗ್ಣಾಂ ಮಾತ್ರ್ ಕೆನ್ನಾಂ ಕೆನ್ನಾಂ ಆಪ್ಲಿ ಗೊಡ್ಸಾಣ್ ಚಾಕವ್ನ್ ತೀಳ್ನ್ ವೆತಾಲಿಂ. ಹೊ ಜೊಕ್ತೊ ವೇಳ್, ಕುಸ್ವಾರ್ ವಾಂಟ್ತಾ ವಾಂಟ್ತಾನಾ ನತಾಲಾಂ ಯಾದಿಂಚ್ಯಾ ವೊಳಿನಿಂ ಮಾತ್ಸೆಂ ಭೊಂವಾಡೊ ಮಾರ್ಯಾಂ ಅಶೆಂ ಭಗ್ಲೆಂ ಪಾಶಾರ್ ಜಾಲ್ಲಿಂ ವರ್ಸಾಂ, ಪುರ್ಸತೆರ್ ಆಸ್ತಾನಾ ಉಡಾಸಾಕ್ ಯೆತಾತ್. ತ್ಯಾ ಸೊಭಿತ್ ಹಳ್ಳೆಂತ್, ಪಾಚ್ವ್ಯಾ ರಾನಾಂ ಮಧೆಂ, ಲಾನ್ ಕೊಲ್ವಾಚೆಂ ಘರ್. ಸುಕ್ಣಿಂ ಸಾವ್ಜಾಂ, ರೆಡೆ ಗೊರ್ವಾಂ, ಗಾದೆ ಸಾಗೊಳಿ, ಮಾಡ್ ಮಾಡಿಯಾಂ ಮಧ್ಲೆಂ ದಿಸ್ಪಡ್ತೆಂ ಜಿವಿತ್ ಆಜ್ ಸೊಧುನ್ ಗೆಲ್ಯಾರಿ ಮೆಳ್ಚೆಂನಾ. ಥಂಯ್ಸರ್ ಹ್ಯಾ ಸರ್ವಾಂಚಿ ಸಾವ್ಳಿಯಿ ಆಸ್ಚಿನಾ.

ವರ್ಸಾಂತ್ಲೆ ಬಾರಾಯ್ ಮಹಿನೆ ಆತಾಂಚ್ಯೆ ಪರಿಂಚ್ ಯೆತಾ-ವೆತಾಲೆ ತರಿ, ತೆದಾಳಾಚ್ಯಾ ಸಾದ್ಯಾ ಆಚರಣಾಂಕ್ ಆನಿ ಆತಾಂಚ್ಯಾ ರೆಡಿಮೇಡ್ ಸಂಭ್ರಮಾಂಕ್ ಆಕಾಸ್ ಆನಿ ಧರ್ತೆಚೊ ಫರಕ್ ದಿಸ್ತಾ. ದಿಸಾ ಮಧೆಂ ಜೆವ್ಣಾ, ಖಾಣಾಕ್ ಏಕ್ ಘಡಿ ಬಸ್ ಲ್ಲೆಂ ಸೊಡ್ಲ್ಯಾರ್, ದೀಸ್ ಭರ್ ಮಾಂಯ್-ಬಾಬ್ ವಾವ್ರ್ ಕರ್ಚ್ಯಾರ್‌ಚ್ ವ್ಯಸ್ತ್ ಆಸ್ತಾಲಿಂ. ಎಕಾ ಸಾಕಾಳಿಂ ಎಕ್ಲ್ಯಾನ್ ರಾಂದ್ಪಾ ಕುಡಾಕ್ ರಿಗ್ಲ್ಯಾರ್ ಎಕ್ಲ್ಯಾಕ್ ಗೊರ್ವಾಂಚೆಂ ಕಾಮ್ ಜಾಯ್ತೆಂ ಆಸ್ತಾಲೆಂ. ತಾಂಚಿ ಖಾವಣ್ ಜಾಡ್ಚೆ ಥಾವ್ನ್, ತಾಳ್ಣೆಂ, ಮಡ್ಡಿ, ಗೊಟ್ಯಾಕ್ ಖೊಲಿ, ಸೊಪ್, ತಣ್ ಆನಿ ಭಾತೆಣ್ ಮ್ಹಣ್ ತಾಂಚೊ ವಾವ್ರ್‌ಚ್ ಎಕ್ಲ್ಯಾಕ್ ಚಡ್ ಜಾತಾಲೊ.

ಘರ್ಚ್ಯಾ ಸಾಂದ್ಯಾಂಕ್ ಜಾಯ್ನಾಸ್ಚ್ಯಾ ವಾವ್ರಾಕ್ ಭಾಯ್ಲ್ಯಾ ಮನ್ಶ್ಯಾಂಕಿ ಆಪಂವ್ಚೆಂ ಪಡ್ತಾಲೆಂ, ದಾಖ್ಲ್ಯಾಕ್ ಲಾಂಕುಡ್ ಫಡುಂಕ್, ಸಾರೆಂ ವ್ಹಾವಂವ್ಕ್ ಅಶೆಂ. ತವಳ್ ರಾಂದ್ಪಾಚೆಂ ಕಾಮ್ ಚಡ್ ದೆಕುನ್, ಮಾಂಯ್ನ್ ಘರಾ ಉರ್ಚೆಂ ಪಡ್ತಾಲೆಂ. ಇತ್ಲ್ಯಾ ಮಧೆಂಯ್, ಉಸ್ವಾಸ್ ಕಾಡುಂಕ್ ಪುರ್ಸತ್ ನಾತ್‌ಲ್ಲಿ ತರೀ, ಕುಸ್ವಾರಾಚೊ ಉಡಾಸ್ ಜರೂರ್ ಆಸ್ತಾಲೊ. ತಾಂದು ಭಾಜುನ್, ತೊ ಮಿಲ್ಲಾಂತ್ ಪಿಟೊ ಕರ್ನ್ ವಾ ದಾಂತ್ಯಾಂತ್ ಧಳೂನ್ ಗೊಡ್ ಪಿಟೊ ಕರ್ನ್, ನಾರ್ಲ್ ಕಾಂತುನ್, ಭಾಜುನ್, ವಾಣಾರ್ ಧಾಡಾಂವ್ಕ್, ಎಕಾಮೆಕಾಕ್ ಆಪವ್ನ್ ಕಶೆಂ ಪುಣಿ ತಿ ಪರ್ಮಳಿಕ್ ಲಾಡು ತಯಾರ್ ಕರ್ತಾಲಿಚ್. ಹೊ ಪರ್ಮಳ್ ಘರಾಂತ್ ಭರ್ತಾನಾ, ಹೆಣೆಂ ಆಮ್ಚ್ಯೊ ಆಲೋಚನ್ಯೊ ಜಿವಾಳ್ ಜಾತಾಲ್ಯೊ.

ಗರ್ದಾನಾಚೊ ಗೊಟೊ ಕರುಂಕ್ ಭಾವಾಚೆಂ ಯೋಜನ್ ತಯಾರ್ ಜಾತಾಲೆಂ. ತೊ ಎಕ್ಲೊ ಮಾತ್ರ್ ನಂಯ್ ಸೆಜಾರ್ಚೆ ಭುರ್ಗೆಯ್ ಸಾಂಗಾತ್ ದಿತಾಲೆ. ಹಮೀದ್, ರಾಜು, ವಿಜಯ್ ಸಾಂಗಾತ್ ದಿತೆಲೆ, ಲಿಂಗಪ್ಪಣ್ಣ ಸಯ್ತ್ ಇಂದಾಚೆ ಫಾಂಟೆ ಕಾತರ್ನ್ ದೀಂವ್ಕ್ ಯೆತಾಲೊ. ಲಚ್ಚಿಲಾಂತ್ಲ್ಯಾ ಕಣ್ಕೆ ಬೊಲ್ಯಾಂತ್ಲೆ ಕಣೆ ಕಾತರ್ತಾನಾ ಹಾತಾ ಪಾಯಾಂಕ್ ಕಾಂಟೆ ತೊಪೊನ್ ರಗಾತ್ ವ್ಹಾವ್ಲ್ಯಾರಿ ಫಿಕಿರ್ ನಾತ್ಲಿ. ಮೂಗ್, ಕುಳಿತ್, ಭಾತ್, ಗುಲೊ ಕಿರ್ಲಾವ್ನ್, ಗರ್ದಾನಾ ಗೊಟ್ಯಾ ಭಾಯ್ರ್ ಬಿತರ್ ಗಾದೆ ಕರ್ಚಿ ಐಡಿಯಾ ಲಾನ್ಪಣಾರ್ ಭಾವಾಕ್ ಕಳಿತ್ ತರಿ ಕಶಿ, ಮ್ಹಣ್ ಆಮ್ಕಾಂ ಲ್ಹಾನಾಂಕ್ ವಿಸ್ಮಿತ್.

ಘರ್ಚ್ಯಾ ಬಗ್ಲೆನ್ ಗರ್ದಾನಾ ಗೊಟೊ ಉಬೊ ಜಾತಾನಾ, ಮಾಳ್ಯಾ ವಯ್ಲ್ಯೊ ಶೆಳಿಯೊ, ಗೊವ್ಳಿ, ಬಾಳೊಕ್, ಮರಿ, ಜುಜೆ, ಆಂಜ್, ತೇಗ್ ರಾಯ್, ಸಗ್ಳೆ ದೆಂವೊನ್ ಯೇವ್ನ್ ಉಬೆ ಜಾಲ್ಯಾರ್, ಥೊಡ್ಯಾ ಬೊಕ್ರ್ಯಾಂಚೊ ಗೊಮ್ಟೊ, ಥೊಡ್ಯಾಂಚೆಂ ಪೆಂಕಾಡ್ ಆಂಗಾ ಥಾವ್ನ್ ವೆಗ್ಳೆಂ ಆಸ್ತಾಲೆಂ. ಘರಾ ಥಾವ್ನ್ ಚಿಕ್ಕೆ ಪಯ್ಸ್ ರೆಡೆ ಮೊಶಿನಿಂ ನಿದ್ಚೆಂ ಏಕ್ ಕೊಂಡ್ ಆಸ್‌ಲ್ಲೆಂ ಆಮ್ಚಿ ಸವಾರಿ ಥಂಯ್ಸರ್ ಪಾವ್ತಾಲಿ. ಕೊಂಡಾ ಬಗ್ಲೆಚಿ ಮೊವ್ ಮಾತಿ ಆರಾವ್ನ್ ಪೊವ್ಲೆಂತ್ ಭರ್ನ್ ಘರಾ ಹಾಡ್ನ್ ಮೊಳ್ನ್ ಬೊಕ್ರೆ ಕರ್ಚಿ ಕಲಾ ಆಮ್ಕಾಂ ಭೋವ್ ಉರ್ಭೆನ್ ಭರ್ಚೆ ತಸ್ಲಿ. ಉಪ್ರಾಂತ್ ತೆ ವೊತಾಕ್ ಸುಕವ್ನ್, ಏರ್ ಯೇನಾ ತಶೆಂ ಸಾಂಭಾಳ್ನ್, ಧವೊ ರಂಗ್ ಸಾರಂವ್ಕ್ ಚುಣೊ ವಾಪಾರ್ಚೊ ಆಸ್ತಾಲೊ. ಅತಾಂಚ್ಯೆ ಪರಿಂ ನಮುನ್ಯಾವಾರ್ ಪೇಂಯ್ಟ್ ತಾಂಕಾ ಮೆಳಾನಾತ್‌ಲ್ಲೊ ತರಿ ಚಲ್ಯಾಂಕ್ ಕಾಂಯ್ ಉಬ್ಗೊಣ್ ಭಗಾನಾಸ್ಲಿ. ಹಪ್ತ್ಯಾ ಭಿತರ್ ಗರ್ದಾನಾ ಗೊಟೊ ಉಭೊ ಜಾತಾಲೊಚ್. ಮಾಡಿಯೆಚ್ಯೊ ಕಾಂಬಿ ತಾಸುನ್ ಬಾರೀಕ್ ಶಿರೊ ಕರ್ನ್, ಜೊಕ್ತೆಂ ಮಾಪ್ ಮೆಜಾಪ್ ಧರ್ನ್ ರಚ್‌ಲ್ಲಿಂ ನೆಕೆತ್ರಾಂ, ರಂಗಾಳ್ ಕಾಗ್ದಾಂ, ಫಿಂತಾನಿಂ ಸುಂರ್ಗಾರೊನ್, ಪಾಕ್ಯಾ ಕೊನ್ಶ್ಯಾಕ್ ವಾ ತೆಂಕ್ಡೆರ್ ಚಡೊನ್ ಉಮ್ಕೊಳ್ ಘೆವ್ನ್ ನತಾಲಾಂ ಸಂಭ್ರಮ್ ಉಚಾರ್ತಾಲಿಂ.

ಪರ್ಗಾವಾಂತ್ಲಿಂ, ಸಯ್ರಿಂ, ಭಾವ್ ಭಯ್ಣಿಂ ಚಡಾವತ್ ನತಾಲಾಂ ಸಂದರ್ಭಿಂ ಗಾಂವಾಕ್ ಯೆತಾಲಿಂ ತೆನ್ನಾ ಘರಾಂತ್ ವರ್ತೊ ಸಂತೊಸ್. ತಾಣಿಂ ಹಾಡ್ಚಿಂ ನವಿಂ ವಸ್ತುರಾಂ, ಫೆಸ್ತಾಕ್ ಗರ್ಜೆಕ್ ಪಡ್ಚ್ಯೊ ವಸ್ತು ಘೆವ್ನ್ ಆಮ್ಕಾಂ ಖುಶಿ ಜಾಲ್ಯಾರ್, ಗಾಂವಾಕ್ ಯೇಂವ್ಕ್ ಜಾಯ್ನಾತ್ಲ್ಯಾಂನಿ ಗ್ರೀಟಿಂಗ್ ಕಾರ್ಡಾಂ ಧಾಡ್ನ್ ಫೆಸ್ತಾ ಸಂದೇಶ್ ಪಾಟಂವ್ಚೆ ಆಸ್‌ಲ್ಲೆ. ತಾಂಚ್ಯಾ ಹಾತ್ ಬರ್ಪಾಂನಿ ಬರಯಿಲ್ಲಿಂ ಕಾರ್ಡಾಂ, ಥೊಡಿಂಚ್ ಉತ್ರಾಂ ತರಿ, ತಾಂಚೆ ಹಾಜರ್ಪಣ್ ಪಾಚಾರುಂಕ್ ತಿತ್ಲೆಂ ಪಾವ್ತಾಲೆಂ. ತಿಂ ಕಾರ್ಡಾಂ ಭಾವಾನ್ ಸುತಾಕ್ ಉಮ್ಕಾಳಾವ್ನ್ ಗರ್ದಾನಾ ಗೊಟ್ಯಾಚೊ ಸುಂರ್ಗಾರ್ ಚಡಂವ್ಚೊ ಆಸ್‌ಲ್ಲೊ. ಆದ್ಲ್ಯಾ ವರ್ಸಾಚಿಂಯ್ ಕಾರ್ಡಾಂ ಹಾಂತು ಆಸ್ತಾಲಿಂ.

ನತಾಲ್ ಆಮ್ಚ್ಯಾ ಘರಾ ಭಿತರ್ ಮಾತ್ರ್ ಉರಾನಾಸ್ತಾಂ, ಸೆಜಾರಾ ಪರ್ಯಾಂತ್ ಪಾವ್ತಾಲೆಂ. ಸೆಜಾರ್ಚಿಂ ಹಿಂದು ಕುಟ್ಮಾಂ ಆಮ್ಕಾಂ ಆಕ್ಕಾ, ಆಣ್ಣಾ ಜಾವ್ನ್‌ಚ್ ವಳ್ಕಿಚಿಂ ದೆಕುನ್ ಭಾವ್ ಭಾಂದವ್ಪಣಾಚೊ ಗಾಂಚ್ ಥಂಯ್ಸರ್ ಆಸ್ತಾಲೊ. ಎಕಾಮೆಕಾ ಸುಖ್ ದುಕಾಂತ್ ಭಾಗೆಲಿ ಜಾಂವ್ಚ್ಯಾ ಅಮ್ಚೆ ತಾಂಚೆ ಮಧೆಂ, ಘುಟಾಚೆ ವಿಶಯ್ ಭೋವ್ ಉಣೆ ಆಸ್‌ಲ್ಲೆ. ಆಮ್ಚ್ಯಾ ಘರಾಂಕ್ ತಾಂಚಿ ಭೆಟ್, ತಾಂಚ್ಯಾ ಘರಾಂಕ್ ಆಮ್ಚಿ ಸಧಾಂನಿತ್ ಮ್ಹಳ್ಳೆಬರಿ ಜಾತಾಲಿ. ತಶೆಂ ಆಮ್ಚೊ ಕುಸ್ವಾರ್ ದಾಲಿಯೆಂತ್ ಬಸೊನ್ ತಾಂಗೆರ್ ವೆತಾಲೊ. ತಾಂಚ್ಯಾ ದೀಪಾವಳೆಚೊ ಗಿ, ಅಶ್ಟೆಮಿಚೆ ಮೂಡೆ, ಗಾಂವ್ಚ್ಯಾ ಕೊಂಬ್ಯಾಚೆಂ ಸುಕೆಂ ನಿಸ್ತೆಂ ಆಮ್ಗೆರ್ ಪಾವ್ತಾಲೆಂ.

ಕುಸ್ವಾರ್ ವಾಂಟುಂಕ್, ಮಾಮಾಗೆರ್, ಬಾಪ್ಪುಗೆರ್, ಮೊದೊರ್ನಿಗೆರ್ ಮ್ಹಣ್ ಚಾರ್ ಪಾಂಚ್ ಘರಾಂ ಆಸ್ತಾಲಿಂ, ತಾಂಣಿ ಹಾಡ್ನ್ ದಿತಾನಾಂ ತಾಂಚೊ ಕಿತೆಂ ಚಡ್ತಿಕ್ ಆಸಾ, ವ ನವೊ ಆಸಾ ತೆಂ ದೆಕ್ಚಿ ಪಿಸಾಯ್ ಆಮ್ಕಾಂ ಭುರ್ಗ್ಯಾಂಕ್ ಆಸ್ತಾಲಿ. ಘರಾಚ್ ಕೆಲ್ಲೊ ರುಚಿಕ್, ಪರ್ಮಳಿಕ್ ಕುಸ್ವಾರ್, ತುಕ್ಡ್ಯೊ, ಚಾಕ್ಲ್ಯೊ, ಲಾಡು, ಘರಾಚ್ ಪಿಕಯಿಲ್ಲ್ಯಾ ಗಡಾಯಾಚಿಂ ಚಾರ್ ಕೆಳಿಂ, ಗೊಡ್ ನಾರ್ಲ್ ಭರ್ಶಿಲ್ಲೊ ಫೊವ್, ಅಶೆಂ ತ್ಯಾ ಕುಸ್ವಾರಾಚಿ ರೂಚ್‌ಚ್ ವಿಂಗಡ್ ಆಸ್‌ಲ್ಲಿ. ಪೆಂಟೆಕ್ ವಚೊನ್ ಮಾಂಯ್ ಪಯ್ಲೆಂಚ್ ಸಂತ್ರಾಂ ಹಾಡುನ್ ದವರ್ತಾಲಿ ಜಾಲ್ಲ್ಯಾನ್ ಕುಸ್ವಾರಾಚ್ಯಾ ದಾಲಿಯೆಂತ್ ತೀಂಯ್ ಬಸ್ತಾಲಿಂ!.

ಫೆಸ್ತಾಚ್ಯಾ ದಿಸಾ ಸಾಂಜೆಕ್ ಮಿಸಾಕ್ ವಚೊಂಕ್ ಭಾರಿಚ್ ಆತುರಾಯ್ ಆಮ್ಕಾಂ. ಮಾಂಯ್ಕ್ ಕೆದಾಳಾಯ್ ರಾತ್ಚೆಂ ಮೀಸ್ ನಾ, ತಿಕಾ ಸನ್ನಾಂ ಉಕಡ್ಚೆಂ ಕಾಮ್. ಆಮಿ ಎಕಾ ಲಾಂಬ್ ಬೊಡಿಯೆಕ್ ಸುಕಿ ಚುಡೆತಿ ಭಾಂದುನ್ ಏಕ್ ಚೂಡ್ ತಯಾರ್ ಕರ್ಚಿ. ಸಾಧಾರಣ್ ಆಟ್ ವರಾಂಕ್ ಆಮಿ ನ್ಹೆಸೊನ್ ತಯಾರ್ ರಾಂವ್ಚೆಂ. ಸೆಜಾರ್ಚ್ಯಾ ಸಾತ್ ಆಟ್ ಕುಟ್ಮಾಂಚಿ ಲ್ಹಾನಾಂ ವ್ಹಡಾಂ ಸಕ್ಕಡ್ ಸಾಂಗಾತಾ ಮೆಳ್ತಾನಾ ಲಗ್ಭಗ್ ಪಂಚ್ವೀಸ್ ಜಣಾಂ ಜಾತಾತ್. ಸಕ್ಡಾಂನಿ ವ್ಹಡಾನ್ ಕಂತಾರಾಂ ಗಾವ್ನ್ ಗಾದ್ಯಾ ಮೆರಾಂನಿಂ, ಹಾಸೊನ್ ಉಲವ್ನ್ ಮಿಸಾಕ್ ವೆಚೊ ಸಂತೊಚ್‌ಚ್ ವಿಂಗಡ್ ಆಸ್ ಲ್ಲೊ. ರಸ್ತ್ಯಾ ಥಾವ್ನ್ ಪಯ್ಸ್ ಆಸ್ಚ್ಯಾ ಆಮ್ಚ್ಯಾ ಘರಾಂಕ್, ವಾಹನಾ ವಚಾನಾತ್‌ಲ್ಲಿಂ. ಗಾದ್ಯಾ ಮೆರಾಂನಿ, ರಾನಾ ಫಾಲ್ಕಿಂ ಉತ್ರೊನ್ ವೆತಾನಾ, ಜಿವ್ದಾಳಿ, ರಾನ್ವಟ್ ಮನ್ಜಾತಿ ಆಸ್ತಾಲ್ಯೊ ದೆಕುನ್, ಚುಡಿ ಉಪ್ಕಾರ್ತಾಲ್ಯೊ. ಪಾಟಿಂವೆತಾನಾಂಯ್ ಸಕ್ಟಾಂನಿ ಸಾಂಗಾತಾ ಉಲವ್ನ್ ಹಾಸೊನ್ ಘರಾ ಪಾವ್ತಾನಾ ರಾತ್ಚೊ ವೇಳ್ ಸುಮಾರ್ ಏಕ್ ವರ್ ಜಾಲ್ಲೆಂಯ್ ಆಸಾ. ತೆಂ ಫೆಸ್ತ್ ಮ್ಹಣ್ ಕಳ್ತಾಲೆಂ. ಉಪ್ರಾಂತ್ ರಾತಿಚೆಂ ಬಾರಾ ವರಾಂಚೆಂ ಮೀಸ್ ಚುಕ್ಲ್ಯಾ ಉಪ್ರಾಂತ್ ಅಸಲಿಂ ಮಝೆಭರಿತ್ ಘಡಿತಾಂ ಲಾಭ್‌ಲ್ಲಿಂ ನಾಂತ್.

ನತಾಲಾಂ ಫೆಸ್ತ್ ಪರತ್ ಪಾವ್ಲಾಂ ದಾರಾರ್. ಗರ್ದಾನಾ ಗೊಟೆ, ನೆಕೆತ್ರಾಂ, ಕುಸ್ವಾರ್, ಕ್ರಿಸ್ಮಸ್ ಟ್ರೀ, ಸಾಂತಾಕ್ಲಾಸ್, ಫಿಂತಾಂ, ಫುಲಾಂ ಸಗ್ಳೆಂ ಮೆಳ್ತಾ ಮೊಲಾಕ್. ಸಂದೇಶ್ ಪರ್ಗಾವ್ಯಾಂ ಥಾವ್ನ್ ಸೆಜಾರ್ಯಾ ಪರ್ಯಾಂತ್ ಮೊಬಾಯ್ಲಾಚ್ಯಾ ಬುತಾಂವಾ ಥಾವ್ನ್‌ಚ್. ರೆಡಿಮೇಡ್ ಸಂಸಾರಾಂತ್ ಮನಿಸ್‌ಯ್ ಜಾಲಾ ರೆಡಿಮೇಡ್. ಥಂಯ್ ಹಾಂಗಾ ಪಳೆಂವ್ಕ್ ಮೆಳ್ಚೆಂ ಬರೆಂಪಣ್ ವಾ ನವಾಲ್ ಮ್ಹಳ್ಯಾರ್, ಸಾಂಗಾತಾ ಮೆಳೊನ್ ಕುಸ್ವಾರ್ ತಯಾರ್ ಕರ್ನ್, ವಿಕುನ್, ಮೆಳ್ ಲ್ಲೊ ದುಡು ದುರ್ಬಳ್ಯಾಂಚ್ಯಾ ಗರ್ಜಾಂಕ್ ದಿಂವ್ಚೊ, ದಾನ್ ದಿಂವ್ಚೆಂ, ಕುಮ್ಕೆ ವಾವ್ರ್ ಹಾತಿಂ ಘೆಂವ್ಚೆ, ಅಶೆಂ. ಬದ್ಲಾಲ್ಲ್ಯಾ ಪರಿಸರಾಂತ್ ಆಮಿಯ್ ಬದ್ಲೊಂಚೆ ಸಹಜ್. ಮನ್ಶ್ಯಾ ಮೊಲಾಂ ಮಾತ್ರ್ ಬದ್ಲಾನಾಶೆಂ ಚತ್ರಾಯ್‌ಯಿ ಗರ್ಜ್. ಮೋಗ್ ಶಾಂತಿ ಭಾವ್ ಭಾಂದವ್ಪಣಾಚೆಂ ಭಿಂ ವೊಂಪುನ್‌ಚ್ ವಚೊಯಾಂ. ನತಾಲಾಂಚೊ ಸಂಭ್ರಮ್ ವಾಡೊನ್‌ಚ್ ಯೆತಲೊ. ಪ್ರಸ್ತುತ್ ಪರಿಗತೆಂತ್, ಕಷ್ಟಾಂಚೆ ಸ್ಥಿತೆಂತ್ ನತಾಲ್ ಪರತ್ ಆಯ್ಲಾಂ ತೊಚ್ ಸಂದೇಶ್ ಘೆವುನ್, ಶಾಂತಿ ಬರ್ಯಾ ಮನಾಚ್ಯಾ ಮನ್ಶ್ಯಾಂಕ್ ಸಂಸಾರಿಂ. ಎಕಾಮೆಕಾ ಥಂಯ್ ಬರೆಂ ಮನ್ ಆಮ್ಚೆಂ ಜಾತಾನಾ ಹರ್ಯೆಕಾ ಘಡ್ಯೆ ನತಾಲ್ ಸಂಭ್ರಮ್ತಾ. ಹೊ ಸಂತೊಸ್ ಭಗ್ಚೆಂ ನಶಿಭ್ ಆಮ್ಚೆಂ ಆಸುಂ.

ಸರ್ವ್ ಮ್ಹಜ್ಯಾ ಮೊಗಾಚ್ಯಾಂಕ್ ತುಮ್ಕಾಂ ಭಾಗಿ ಸಂತೊಸ್ಭರಿತ್, ಭಲಾಯ್ಕೆಭರಿತ್ ನತಾಲಾಂ ಫೆಸ್ತ್ ಮಾಗ್ತಾಂ ಆನಿ ಭಾಗಿ ನವೆಂ ವರಸ್ ಯಿ ಆಮ್ಕಾಂ ಫಾವೊ ಜಾಂವ್ ಅಶೆಂ ಆಶೆತಾಂ.

ಫೆಲ್ಸಿ ಲೊಬೊ, ದೆರೆಬಯ್ಲ್.