(ಆಮ್ಚ್ಯಾ ಹರ್ಯೆಕ್ಲ್ಯಾಚ್ಯಾ ಜೀವನಾಂತ್ ಆಮ್ಚಿ ಆವಯ್ ಮಹತ್ವಾಚೊ ಪಾತ್ರ್ ಖೆಳ್ತಾ. ಆಮ್ಕಾಂ ಹರ್ಯೇಕ್ಲ್ಯಾಕೀ ನೋವ್ ಮಹಿನೆ ಆಪ್ಲ್ಯಾ ಉದಾರಿಂ ವಾವೊವ್ನ್, ಆಪ್ಲ್ಯಾ ಜಿಣೆಯೆ ಸಂಗಿಂ ಝುಜೊನ್ ಆಮ್ಕಾಂ ಹ್ಯಾ ಸಂಸಾರಾಚೊ ಉಜ್ವಾಡ್ ತಿಣೆ ದಾಕಯ್ಲಾ. ಆಮ್ಚ್ಯಾ ಥಾವ್ನ್ ತಿಕಾ ಕಿತ್ಲೆ ಕಷ್ಟ್ ಆಯ್ಲ್ಯಾರಿ ಆಮ್ಚ್ಯಾ ಥಂಯ್ ತಿಚೊ ಮೋಗ್ ಕೆದ್ನಾಂಚ್ ಉಣೊ ಜಾಯ್ನಾ. ಜಾಯ್ತೆ ಜಣ್ ಆಮ್ಚ್ಯಾ ಜಿವಿತಾಂತ್ ಆಮ್ಕಾಂ ಸಲಹಾ-ಸೂಚನಾಂ, ಮಾರ್ಗದರ್ಶನಾ ದಿಂವ್ಕ್ ಯೆತಾತ್ ಆನಿ ವೆತಾತ್ ಪುಣ್ ಆಮ್ಚಿ ಆವಯ್ ಆಮ್ಚ್ಯಾ ಸಾಂಗಾತಾ ತಿಚ್ಯಾ ಜಿವಿತಾಚ್ಯಾ ಆಂತ್ಯ್ ಪರ್ಯಾಂತ್ ಆನಿ ಆಮ್ಚ್ಯಾ ಮುಖ್ಲ್ಯಾ ಜಿವಿತಾಕ್ ತಿಚ್ಯಾ ಆದರ್ಶಾಂಚಿ ಪಾವ್ಲಾಂ ಸೊಡುನ್ ವೆತಾ.
ಪುಣ್ ಆಮಿಂ ಆಮ್ಚ್ಯಾ ಆವಯ್ಕ್ ತಿಣೆಂ ದಿಲ್ಲೊ ಮೋಗ್ ತ್ಯಾಚ್ ರಿತಿನ್ ಪಾಟಿಂ ದಿತಾಂವ್‍ಗೀ????? ಆಜ್ ಆಪ್ಲ್ಯಾ ಭುರ್ಗ್ಯಾಂ ಪಾಸೊತ್ ಸರ್ವಸ್ವ್ ತ್ಯಾಗ್ ಕೆಲ್ಲ್ಯೊ ಕಿತ್ಲೆಶ್ಯೊ ಆವಯೊ ಆಜ್ ಆಪ್ಲಿ ಜಿಣಿ ಸಾರುಂಕ್ ಕಷ್ಟೊನ್ ಆಸಾತ್. ಆಪ್ಲೆಂ ಕುಟಾಮ್ ರುತಾ ಜಾಲ್ಲ್ಯಾ ತಕ್ಷಣ್ ಸಭಾರ್ ಜಣಾಂಕ್ ಆಪ್ಲ್ಯಾ ಆವಯ್ಚ್ಯಾ ತ್ಯಾಗಾಚೊ ವಿಸರ್ ಪಡ್ತಾ. ಪರಿಣಾಮ್ ಜಾವ್ನ್ ತಿಣೆ ದುಸ್ರ್ಯಾಂಚ್ಯಾ ಹಂಗಾರ್ ಜಿಯೆಜೆ ಪಡ್ತಾ ನಾಂ ತರ್ ಆಸ್ರ್ಯಾಂತ್ ಆಪ್ಲಿ ಜಿಣಿ ಸಾರಿಜೆ ಪಡ್ತಾ. ಆಶೆಂ ಆಮ್ಚ್ಯಾ ಜಿವಿತಾಂತ್ ಆವಯ್ಚ್ಯಾ ಪಾತ್ರಾವಿಶಿಂ ಬೊರೊಂವ್ಕ್ ಗೆಲ್ಯಾರ್ ಪಾನಾಂ ಪಾಂವ್ಚಿಂನಾಂತ್.
ಹೆಂ ಸರ್ವ್ ಬಾರ್ಕಾಯೆನ್ ಆನಿ ಸೂಕ್ಷ್ಮ್ ರಿತಿನ್ ಪಾರ್ಕುನ್ ಆಸ್‍ಲ್ಲೊ ಕವಿ "ಆರೊ ಕಾಮತ್" ಆಪ್ಲಿ ಮಾರ್ಮಿಕ್ ಕವಿತಾ "ದೆಕುನ್ ಮಿಸ್ತಾ ’ಮಾ’ ಮ್ಹಳೆಂ" ಕಾಣ್ಘೇವ್ನ್ "ಆಂಕ್ರಿ" ಚ್ಯಾ ಮಾಟ್ವಾಂತ್ ರಿಗ್ಲಾ. ಕಾಳ್ಜಾಕ್ ನಾಟ್ವೊಂಚ್ಯಾ ತಸಲಿಂ ಮಾರ್ಮಿಕ್ ಕವಿತಾ ಲಿಖ್ಚಿ ವಿಶೇಶ್ ಶ್ಯಾಥಿ ಆಸ್‍ಲ್ಲ್ಯಾ ತಾಕಾ ಆಮಿಂ ಸ್ವಾಗತ್ ಕರ್ತಾಂವ್ ಆನಿ ತಾಚಿ ಹಿ ಕವಿತಾ ವಾಚ್ಪ್ಯಾಂಕ್ ಸಮರ್ಪಿತಾಂವ್. - ಸಂಪಾದಕ್)

ದೆಕುನ್ ಮಿಸ್ತಾ ‘ಮಾ’ ಮ್ಹಳೆಂ

ಮಂದಿರ್ ದಿವ್ಳಾಂ ಇಗರ್ಜ್ಯೊ

ಕಿತ್ಯಾಕ್ ಲಾಗುನ್ ಸೊಧ್ತಾಯ್

ಆಸಾ ತರ್ ಆವಯ್ ಜಿವಂತ್

ದೆವಾಕ್, ಸೊಧುನ್ ಕಿತ್ಯಾಕ್ ಭೊಂವ್ತಾಯ್?

ಚಾರ್ ಇಟ್ಯಾಂಚೆಂ ಘರ್ ತುಜೆಂ

ಫಕತ್ ಕುಟಮ್ ತುಜೆಂ ರಾವ್ತಾ

ಜೆದ್ನಾಂ ಆವಯ್ ಭಿತರ್ ಸರಿತ್

ಘರ್ ಮಂದಿರ್ ಜಾಂವ್ಕ್ ಪಾವ್ತಾ

ರಚ್ನಾರಾ ಆನಿ ತುಜೆ ಮಧೆಂ

ತಿ ಜಾತಾ ನಿಸಣ್

ಪಳೆ ತಿಚೆಂ ಕಾಳಿಜ್ ಕೆದೆಂ

ಹಾಡ್ಲೆಂ ತುಕಾ ದೆವಾಲಾಗಿಂ ವಿಚಾರ್ನ್

ಕೆಲಾಂಯ್ ತರ್ ತಿಕಾ ದು:ಖಿ

ಪರಮೊಶಿನ್ ಘಡೊನ್ ಚುಕಿ

ವಚ್, ಪೊಟ್ಲುನ್ ಧರ್ ತಿಕಾ

ಭೊಗ್ಸಿತೆಲಿ ಹಾಸುನ್ ಆಮುರ್‌ಪಿಕಿ

ಮೋಗ್-ಮಾಯ್ಪಾಸ್ ಹರ್ಯೆಕ್ ದೀ

ತಿಚ್ಯಾ ಜಿವಿತಾ ಆವ್ದೆಂತ್

ಜಿಣಿ ತುಜಿ ನಂದನ್ ಜಾಯ್ತ್

ಚಲ್ಶಿ ತಿಚ್ಯಾ ಸಾವ್ಳೆಂತ್

ದೇವ್ ದಿಂವ್ಚೊನಾ ಮಾಗ್ಲ್ಯಾ ಬಗಾರ್

ತಿ ಘೆಂವ್ಚಿನಾ ದೀವ್ನ್ ಉದಾರ್

ನೋವ್ ಮ್ಹಯ್ನೆ ವ್ಹಾವವ್ನ್ ಉದರ್

ಆಪ್ಲ್ಯಾಚ್ ಕುಡಿಂತ್ ಕೋಣ್ ದೀತ್ ಬಿಡಾರ್

ದೆಕುನ್ ಮಿಸ್ತಾ ‘ಮಾ’ ಮ್ಹಳೆಂ

ಸಂಸಾರಿ ಹಿಕಾ ಆವಯ್ ಮ್ಹಳೆಂ

Aro Kamat