ಮಿಸಾಚೆಂ ಅಕ್ರೇಚೆಂ ಕಾಂತಾರ್ ಹೆವ್ಶಿಲ್ಯಾನ್ ಮ್ಹಜೆಂ ಫೋನ್ ವೈಬ್ರೇಟ್ ಜಾಂವ್ಕ್ ಸುರು ಜಾಲೆಂ. ಮ್ಹಜ್ಯಾ ಕಾಳ್ಜಾಚಿ ಉಡಿ ಚಡ್ಲಿ. "ಕಾಂಯ್ ಕಾಲ್ ರಾತಿಕ್ ಧಾಡ್ಲೆಲಿ ಮ್ಹಜಿ ಮೆಸೇಜ್ ವಾಚುನ್ ಆತಾಂ ಫೋನ್ ಕೆಲಾಂ ಜಾಂವ್ಕ್ ಪುರೊ". ಅಶೆಂ ಚಿಂತಾಲೊಂ. ಆತಾಂ ಮಧೆಂ ಉಟೊನ್ ಗೆಲ್ಯಾರ್ ಲೋಕ್ ಕಿತೆಂ ಚಿಂತಿತ್? "ಆಕ್ರೇಚೆಂ ಕಾಂತಾರ್ ಜಾಂವ್ಚೆ ತಿತ್ಲಿ ಸೊಸ್ಣಿಕಾಯ್ ನಾಂ ಕಿತೆಂ ಮಣ್ತಿತ್". ಅರ್ಧೆಂ ಲೋಕ್ ಕಿತೆಂ ಚಿಂತಾ ಆನಿ ಕಿತೆಂ ಮ್ಹಣಾತ್ ಮ್ಹಣ್ ಚಿಂತುನ್ಂಚ್ ಅರ್ಧಿ ಜಿಣಿ ಸಂಪ್ಲಿ. ಆಯ್ತಾರಾಚ್ಯಾ ಪಯ್ಲ್ಯಾ ಮಿಸಾಕ್ ಭರ್ಲೆಲ್ಯಾ ಲೋಕಾಚಾ ಖೆಟಿ ಮಧೆಂ ಭಾಯ್ರ್ ವೆತಾನಾಂ ಸಗ್ಳ್ಯಾಂಚಿ ದೀಶ್ಟ್ ಮ್ಹಜೆರ್ ಆಸಾತ್, ದೆಕುನ್ ವೊಗೆಚ್ ರಾವ್ಲೊಂ. ಪುಣ್ "ಮೊಗಾಳ್ ಪುತ್ರಾ.." ಮ್ಹಣ್ತಾನಾ ಪರ್ತ್ಯಾನ್ ವೈಬ್ರೇಟ್ ಜಾಲೆಂ. ಆನಿ ಆತಾಂ ಮ್ಹಜ್ಯಾ ಕಾಳ್ಜಾಚಿ ಉಡಿ ದೊಡಿ ಜಾಲಿ. ಮ್ಹಾಕಾ ಫೋನಾಂ ಯೆಂವ್ಚಿಂ ಅಪ್ರೂಪ್, ಆನಿ ಆತಾಂ ಆಶೆಂ ವಾಜ್ತಾ ಮ್ಹಳ್ಯಾರ್ ಕಿತೆಂ ತರಿ ಘಡ್ಬಡ್ ಜಾಲ್ಯಾ. "ಕಾಲ್ಚಿ ಮೆಸೇಜ್ ವಾಚುನ್ಂಚ್ ಫೋನ್ ಕೆಲಾಂ ಆಸ್ತೆಲೆಂ". ಮ್ಹ ಣ್ ಚಿಂತುನ್ ಕಾಳಿಜ್ ಉಡ್ತಾಲೆಂ ಭಿಂಯಾನ್.

ದಿಂಬಿಯೆರ್ ಪಡೊನ್ ಭಾಗೆವೆಂತ್ ಖುರ್ಸಾಚಿ ಕುರು ಕಾಡ್ನ್ ಏಕಾಚ್ ಸ್ವಾಸಾಂತ್ ಭಾಯ್ರ್ ಧಾಂವೊನ್ ಆಯ್ಲೊಂ. ಆನಿ ಆಮ್ಸೊರಾನ್ ಫೋನ್ ಕಾಡ್ನ್ ಕೊಣೆಂ ಫೋನ್ ಕೆಲ್ಲೆಂ ಮ್ಹಣ್ ಪಳೆಂವ್ಕ್ ಪಡ್ಲೊಂ. "ಅರೆ, ಭಯ್ಣ್ - ವಿಲ್ಮಾನ್ ಫೋನ್ ಕೆಲ್ಲೆಂ. ಕಾಂಯ್ ಮಿಸಾ ಥಾವ್ನ್ ಯೆತಾನಾ ಮಾಸ್ ಹಾಡ್ನ್ ಯೇ ಮಣ್ ಸಾಂಗೊಂಕ್ ಆಸ್ತೆಲೆಂ". ಮ್ಹಣ್ ಚಿಂತನಾಂಚ್ ಪರ್ತ್ಯಾನ್ ಫೋನ್ ವಾಜ್ಲೆಂ. ಹಾಂವೆಂಯ್ ದರ್ವಡೊನ್ "ಹಲೋ, ಮೀಸ್ ಜಾತಾ ಮಣಾಸರ್ ಸೊಸ್ಣಿಕಾಯ್ ಸೊಸ್ಣಿಕಾಯ್ ನಾಂ ಗೀ ತುಕಾ ಕಿತೆಂ ವಯ್ಲ್ಯಾ ವಯ್ರ್ ಫೋನ್ ಕರ್ತಾಯ್’"? ಮ್ಹಣ್ ವಿಚಾರ್ತಾನಾಂಚ್ ತೆವ್ಶಿಲ್ಯಾನ್ ವಿಲ್ಮಾ ಕಾಂಪ್ಚಾ ತಾಳ್ಯಾಂತ್ "ದಾಟ್ಟು ಮಾಂಯ್ ಪಡ್ಲಿ, ಗಾಯ್ಕ್ ಬೊಯ್ಲಾಂತ್ ಬಾಂದುಂಕ್ ಮ್ಹಣ್ ವರ್ತಾನಾ ಮಾಂಯ್ಚಾ ಪಾಂಯಾಂಕ್ ದೊರಿ ರೆವ್ಡೊನ್ ಪಡ್ಲಿ ಆನಿ ಗಾಯ್ನ್ ಜಾಯ್ತೆಂ ವೋಡ್ನ್ ವೆಲೆಂ". ಆಯ್ಕೊನ್ ಹಾಂವ್ ಶಿರಿಂ ಚುಕ್ಲೊಂ. ಕಿತೆಂ ಕರ್ಚೆಂ ಕಳ್ಳೆಂನಾ. "ತುಂವೆಂ ಫೋನ್ ಕಾಡುಂಕ್ ನಾಂಯ್ ದೆಕುನ್ ಹಾಂವೆ ಇತ್ತಾಬಾಕ್ ಫೋನ್ ಕೆಲೊ. ಆತಾಂ ಆಮಿಂ ಸಿಟಿಂತ್ಲ್ಯಾ ಆಸ್ಪತ್ರೆಕ್ ವೆತೇ ಆಸಾಂವ್, ತುಂ ಥಂಯ್ಸ್ ವೆಗಿಂ ಯೇ". ಮ್ಹಣಾಲೆಂ ವಿಲ್ಮಾ ಏಕಾಚ್ ಸ್ವಾಸಾಂತ್. "ಆಜ್ ಆಯ್ತಾರ್ ವಯ್ಲ್ಯಾನ್ ದಾಕ್ತೆರ್ ಆಸಾತ್ಗಿ?" ಮ್ಹಳ್ಳೆಂ ಸವಾಲ್ ಮ್ಹಾಕಾ ಧೊಸುಂಕ್ ಲಾಗ್ಲೆಂ. ಹಾಂವೆಂ ಗಳಾಯ್ ಕರ್ನಾಸ್ತಾಂ ಬೈಕಾ ಕುಶಿನ್ ಮೆಟಾಂ ಕಾಡ್ಲಿಂ.

ಮುಕಾರ್ ಪಳೆಯ್ತಾನಾ ರೀಮಾ ಮ್ಹಜೆಂ ಕುಶಿನ್ ಮೆಟಾಂ ಕಾಡುನ್ ಯೆಂವ್ಚೆ ಪರಿಂ ದಿಸ್ಲೆಂ. ಯೆಂವ್ಚೆ ಪರಿಂ ನಂಯ್ ಮ್ಹಜೆಚ್ ಕುಶಿನ್ ಯೆತಾಲೆಂ ತೆಂ ಖಂಡಿತ್! ಕಾಲ್ ರಾತಿಂ ಹಾಂವೆಂ ಧಾಡ್ಲೆಲ್ಯಾ ಮೆಸೇಜಿಕ್ ಜಾಪ್ ದೀಂವ್ಕ್ ಮ್ಹಣ್ ಭೊಗ್ಲೆಂ ಮ್ಹಾಕಾ. ಪುಣ್ ಆತಾಂ ತಾಚೆ ಖಾತಿರ್ ರಾವ್ಲೊಂ ತರ್ ಅಸ್ಪತ್ರೆಕ್ ಪಾವ್ತಾನಾ ವೇಳ್ ಜಾಯ್ತ್. ಆಶೆಂ ಚಿಂತುನ್ ತುರ್ತಾನ್ ಥಂಯ್ ಥಾವ್ನ್ ಭಾಯ್ರ್ ಸರ್ಲೊಂ. ಆತಾಂ ಭಾಯ್ರ್ ಸರ್ಲೊಂ ಸಾರ್ಕೆಂ, ಮ್ಹಜೆ ಲಾಗಿಂ ಕಾರಣ್ ಆಸ್’ಲ್ಲೆಂ, ಪುಣ್ ರೀಮಾ ಕಿತೆಂ ಚಿಂತಾ ಕೊಣ್ಣಾ? "ಮೆಸೇಜ್ ಧಾಡುಂಕ್ ಧೈಯ್ರ್ ಅಸ್ಲೆಲ್ಯಾಕ್ ಮುಖಾರ್ ರಾವೊಂಕ್ ಧೈಯ್ರ್ ನಾಂಗಿ"? ಅಶೆಂ ಚಿಂತಾ ಅಸ್ತೆಲೆಂ. "ಪುಣ್ ಹಾಂವ್ ಥಂಯ್ ರಾವ್ಲೆಲೊಂ ತರ್ ರೀಮಾಚಿ ಜಾಪ್ ಕಿತೆಂ ಆಸ್ತಿ. ಕಿತೆಂ ಮ್ಹಣ್ತಾ ಆಸ್ಲೆಂ" ಅಶೆಂ ದೊನೀ ತರ್ಫೆನ್ ಚಿಂತುಂಕ್ ಲಾಗ್ಲೊಂ. ಮಧೆಂ ಮಾಂಯ್ಚಿ ಖಂತ್. ಆಶೆಂ ಚಿಂತುನ್ ಅಸ್ಪತ್ರ್ ದಿಸ್ತಾನಾಂಚ್ ಹಾಂವ್ ವಾಸ್ತವಕ್ ಆಯ್ಲೊಂ.

ಭಿತರ್ ವೆತಾನಾಂಚ್ ಫಾರ್ಮ್ ಭರ್ಚೆಂ ವಿಲ್ಮಾ ದಿಸ್ಲೆಂ. "ವಿಲ್ಮಾ, ಮಾಂಯ್ ಖಂಯ್ ಆಸಾ"? ಏಕಾಚ್ಚಾಣೆಂ ವಿಚಾರ್ತಾನಾ ತೆಂ ಆಕಾಂತುನ್ ಪಡ್ಲೆಂ. "ಮಾಂಯ್ಕ್ ಆಪರೇಶನ್ ಥಿಯೇಟರಾಕ್ ವೆಲಾಂ. ಆನಿ ಇಲ್ಲೊ ತಡೊನ್ ಜಾಲ್ಲೊ ತರ್ ದಾಕ್ತೆರ್ ಮೆಳ್ನಾ ಆಸ್ಲೊ. ದೆವಾಕ್ ಅರ್ಗಾಂ." ತೆಂ ಸಾಂಗೊನ್ಂಚ್ ಆಸ್’ಲ್ಲೆಂ. ಹಾಂವ್ ಏಕ್ ಪಾವ್ಟಿಂ ಆಪರೇಶನ್ ಥಿಯೆಟಾರಾಲಾಗಿಂ ವಚೊನ್ ಪಳೆವ್ನ್ ಆಯ್ಲೊಂ ದಾರ್ ಬಂದ್ ಅಸ್ಲೆಲ್ಯಾನ್ ಮಾಂಯ್ಚಿ ಝಳಕ್ ಸಯ್ತ್ ದಿಸ್ಲಿನಾ. ಇತ್ತಾಬ್ ಥಂಯ್ಸ್ ರಾವೊನ್ ಅಸ್ಲೊ ಆನಿ ತಾಣೆಂಯ್ ಮ್ಹಾಕಾ ಧೈರ್ಯ್ ದಿಲೆಂ.

ತಿತ್ಲ್ಯಾರ್ ವಿಲ್ಮಾ ಥಂಯ್ ಪಾವ್ಲೆಂ. "ದಾಟ್ಟು ಅಪರೇಶನಕ್ ಪನ್ನಾಸ್ ಹಜಾರ್ ರುಪಯ್ ಖರ್ಚ್ ಆಸಾ ಮ್ಹಣ್ ಸಾಂಗ್ತಾತ್. ಆನಿ ಅರ್ಧೆ ಆತಾಂ ಭರುಂಕ್ ಸಾಂಗ್ಲ್ಯಾತ್ ಆನಿ ಅರ್ಧೆ ಉಪ್ರಾಂತ್. ಆತಾಂ ಖಂಯ್ ಥಾವ್ನ್ ಹಾಡ್ಚೆ ಇತ್ಲೆ ಪಯ್ಶೆ? ಮ್ಹಜ್ಯಾ ಲಾಗಿಂ ಪಾಂಚ್ ಹಜಾರ್ ರುಪಯ್ ಆಸಾತ್". ಮ್ಹಣೊನ್ ದುಕಾಂ ಗಳಂವ್ಕ್ ಲಾಗ್ಲೆಂ ವಿಲ್ಮಾ. "ತುಮಿಂ ರಾವಾ ಹಾಂಗಾ ಹಾಂವ್ ಕಾಂಯ್ ಕರ್ತಾಂ" ಮ್ಹಣ್ ಥಂಯ್ ಥಾವ್ನ್ ಭಾಯ್ರ್ ಆಯ್ಲೊಂ.

ತಾಂಚ್ಯಾ ಮುಖಾರ್ ಮಜಿ ಖಂತ್ ದಾಕಂವ್ಕ್ ನಾ. ಪುಣ್ ಭಾಯ್ರ್ ಯೇವ್ನ್ ಚಿಂತುಂಕ್ ಲಾಗ್ಲೊಂ ಆಜ್ ಆಯ್ತಾರ್ ಬ್ಯಾಂಕ್ ಬಂದ್. ಎ. ಟಿ. ಮ್. ಕಾರ್ಡ್ ಹಾಂವೆಂ ಕರುಂಕ್ ನಾ. ಆತಾಂ ಕಪಲಾರ್ ಹಳ್ತಾರ್ ಘಾಮ್ ಸುಟೊಂಕ್ ಲಾಗ್ಲೊ. ಎ. ಟಿ. ಮ್ ಕಾರ್ಡ್ ಕೆಲ್ಯಾರಿ ಫಾಯ್ದೊ ಕಿತೆಂ? ಮಶಿನಾಂತ್ ಕೆದೆಳಾಯ್ ಪಯ್ಶೆ ನಾಂತ್ ಮ್ಹಳ್ಳೆಂ ದುರ್ಸೊಣೆಂ ಸಗ್ಳ್ಯಾಂಚೆಂ.

ಗಾಂವಾಕ್ ಪಾಟಿಂ ವೊಚೊನ್ಂಚ್ ಕಾಂಯ್ ವ್ಯವಸ್ಥಾ ಕರಿಜಯ್ ಅಶೆಂ ಚಿಂತುನ್ ಬೈಕ್ ಸ್ಟಾರ್ಟ್ ಕೆಲೆಂ ಹಾಂವೆಂ. ಘರಾ ಕಾಂಯ್ ಧಾ ಹಜಾರ್ ಆಸ್ತಿತ್. ಚಾರ್ ದಿಸಾಂ ಪಯ್ಲೆಂ ನಾರ್ಲ್ ವಿಕುನ್ ಆಯಿಲ್ಲೆ ಪಯ್ಶೆ ತೆ. ಆನಿ ಉರ್ಲೆಲೆ ಕಿತೆಂ ಕರುಂ? ಸೆಜಾರಾ ಕಾಂಯ್ ಪಾಂಜ್ ಹಜಾರ್ ಮೆಳ್ತಿತ್ ಉಪ್ರಾಂತ್ ಕಿತೆಂ? ಅಶೆಂ ಚಿಂತುನ್ ಘಾರಾ ಪಾವ್ಲೊಂ. ವೆಗಿಂ ವಚೊನ್ ಕಾಬಾಟಾಂತ್ಲೆ ಧಾ ಹಜಾರ್ ರುಪಯ್ ಕಾಡ್ನ್ ಬೊಲ್ಸಾಂತ್ ದವರ್ಲೆ. ಆನಿ ಸೆಜಾರ್ಚಾ ಲೀನಾ ಬಾಯೆಗೆರ್ ಭಾಯ್ರ್ ಸರ್ಲೊಂ. ತಿಕಾ ಸಗ್ಳೆಂ ಸಾಂಗ್ಲೆಂ ಆನಿ ತಿಣೆಂ, ಹಾಂವೆಂ ಚಿಂತ್ಲೆಲ್ಯಾ ಪರಿಂಚ್ ಪಾಂಚ್ ಹಜಾರ್ ರುಪಯ್ ದಿಲೆ. ಆನಿ ರೊನಿ "ಕಿತೆಂಯ್ ಜಾಯ್ ತರ್ ಸಾಂಗ್’ರೇ ಪುತಾ" ಮ್ಹಣಾಲಿ.

ಹಾಂವ್ ಉರ್ಲೆಲೆ ಪಯ್ಶೆ ಖಂಯ್ ಥಾವ್ನ್ ಏಕ್ಟಾಂವ್ಚೆಂ ಮ್ಹಣ್ ಚಿಂತುನ್ ಥಂಯ್ ಥಾವ್ನ್ ಭಾಯ್ರ್ ಸರ್ಲೊಂ. ಆನಿ ಕೊಣಾಚಿಯ್ ಮ್ಹಾಕಾ ತಿತ್ಲಿ ಸಳಾವಳ್ ನಾ. ಮುಖಾರ್ ಆಯಿಲ್ಲಿ ಆಲೋಚನ್ಂಚ್ ಬೈಕ್ ವಿಕ್ಚಿ. ದುಸ್ರಿ ವಾಟ್ ನಾ, ವೇಳ್ ವಿಬಾಡ್ನಾಸ್ತಾಂ ಹಾಂವೆಂ ರಮೇಶಣ್ಣಕ್ ಫೋನ್ ಕೆಲೊ. ತೊ ಸೆಕೆಂಡ್ ಹ್ಯಾಂಡ್ ವಸ್ತುಂಚೆಂ ಬಿಜ್ನೆಸ್ ಕರ್ತಾ. ತಾಣೆಂ ತಾಚ್ಯಾ ಘರಾಚ್ ಯೇಂವ್ಕ್ ಸಾಂಗ್ಲೆಂ ಆನಿ ಖಿಣಾನ್ ಥಂಯ್ ಪಾವ್ಲೊಂ. "ವರ್ಸ್ ಜಾಂವ್ಕ್ ನಾ ತುಂವೆಂ ಬೈಕ್ ಘೆವ್ನ್ ಕಿತೆಂ ಭಾರಿ ಅರ್ಜೆಂಟರ್ ವಿಕುಂಕ್ ಭಾಯ್ರ್ ಸರ್ಲಾಯ್?” ಮ್ಹಣಾಲೊ ತೊ ಮ್ಹಾಕಾ ಪಳೆಲ್ಲೆಂಚ್. ತಾಕಾ ವಯ್ಲ್ಯಾ ವಯ್ರ್ ಥೊಡೆಂ ಸಮ್ಜಯ್ಲೆಂ ಆನಿಂ "ಕಿತ್ಲೆ ದಿತಾಯ್ ಬೈಕಾಕ್" ಮ್ಹಣ್ ವಿಚಾರ್ಲೆಂ. ತೊ ಏಕ್ ಪಾವ್ಟಿಂ ಬೈಕಾಚಿ ಸಗ್ಳಿ ಪರೀಕ್ಷಾ ಕರ್ನ್ "ನವೆಂಚ್ ಬೈಕ್ ಆನಿ ಚಡ್ ರನ್ ಜಾಂವ್ಕ್ ನಾ ದೆಕುನ್ ತೀಸ್ ಹಜಾರ್ ರುಪಯ್ ದಿತಾಂ" ಮ್ಹಣಾಲೊ. ಮಾಕಾ ಆತಾಂ ಗರ್ಜ್ ಆಸ್ಲೆಲ್ಯಾನ್ ಜಾಯ್ತ್ ಮ್ಹಳೆಂ ಆನಿ ಬೈಕ್ ತಶೆಂಚ್ ಬೈಕಾಚಿಂ ಪೆಪಾರಾಂ ತಾಕಾ ದೀವ್ನ್ ಥಂಯ್ ಥಾವ್ನ್ ಭಾಯ್ರ್ ಸರ್ಲೊಂ.

ವಿಲ್ಮಾ ಲಾಗಿಂ ಆಸ್ಚೆ ಪಾಂಚ್ ಹಾಜಾರ್ ರುಪಯ್ ಮೆಳಾವ್ನ್ ಆತಾಂ ಪನ್ನಾಸ್ ಹಜಾರ್ ರುಪಾಯ್ ಜಾಲ್ಲೆ. ಚಿಂತುನ್ ಮತಿಕ್ ಮಾತ್ಸೊ ಸುಶೆಗ್ ಭೊಗ್ಲೊ. ಆತಾಂ ಬಸ್ಸಾರ್ ಸಿ. ಟಿ. ಕ್ ಪಾವ್ಲೊಂ ಆನಿ ಶೆಕಿಂ ಆಸ್ಪತ್ರೆಕ್. ಆಸ್ಪತ್ರೆಕ್ ಪಾವ್ತಾನಾ ಮಾಂಯ್ಚಾ ಪಾಂಯಾಂಚೆ ಅಪರೇಶನ್ ಜಾಲ್ಲೆಂ ಆನಿ ವಾರ್ಡಾಕ್ ಹಾಡ್’ಲ್ಲೆಂ. ಹಾಂವೆಂ ಸಗ್ಳೆ ಪಯ್ಶೆ ಎಕ್ಟಾಂಯ್ ಕರ್ನ್ ವಿಲ್ಮಾಕ್ ದಿಲೆ ಆನಿ ಬಿಲ್ಲ್ ಫಾರಿಕ್ ಕರುಂಕ್ ಸಾಂಗ್ಲೆಂ."ಇತ್ತಾಬಾ ತುಜ್ಯಾ ಕಾರಾಚೆಂ ಭಾಡೆಂ ಫಾಲ್ಯಾಂ ದಿತಾಂ ಆತಾಂ ಕಶೆಂಯ್ ಎಕ್ಟಾವ್ನ್ ಇತ್ಲೆ ಪಯ್ಶೆ ಜಮೊ ಕೆಲೆ." ಮಣ್ತಾನಾ. "ತುಂ ಕಿತೆಂ ರೆ ರೊನಿ ಪರ್ಕ್ಯಾ ಪರಿಂ ಉಲಯ್ತಾಯ್. ಹಾಂವ್ ಧಾಂವ್ತಾಯೇ ನಂಯ್ ತುಂ ಧಾಂವ್ತಾಯ್? ಸವ್ಕಾಸ್ ದಿಲ್ಯಾರ್ ಜಾಲೆಂ ಆತಾಂ ತುಂ ಮಾಂಯ್ಕ್ ಪಳೆ" ಮ್ಹಣಾಲೊ ಇತ್ತಾಬ್ ಮಾಕಾ ಧೈಯ್ರ್ ದೀವ್ನ್.

ಮಾಂಯ್ ಮತಿರ್ ಆಯಿಲ್ಲಿ ಪುಣ್ ಪುರಾಸಾಣ್ ಆಸ್ಲಿ ತಿಚ್ಯಾ ದೊಳ್ಯಾಂನಿ." ಆಮ್ಚಾ ಗಾಯ್ನ್ ಮ್ಹಾಕಾ ಆಸ್ಪತ್ರೆಕ್ ಪಾಯ್ಲೆಂ ಆನಿ ಕಾಂಯ್ ಚಡ್ ಉಣೆಂ ಜಾಲ್ಲೆಂ ತರ್ ಸಿಮೆಸ್ತ್ರಿಕ್’ಚ್ ಪಾವ್ತಿಂ ಕೊಣ್ಣಾ.?” ಮ್ಹಣಾಲಿ ಮಾಂಯ್ ಸುಸ್ಕಾರ್ನ್. "ತ್ಯಾ ಗಾಯ್ಕ್ ಫಾಲ್ಯಾಂಚ್ ಗಿರಾಯ್ಕ್ ಪಳೆವ್ನ್ ವಿಕುನ್ ಸೊಡ್ತಾಂ". ಮ್ಹಳೆಂ ಹಾಂವೆಂ ರಾಗನ್. "ತ್ಯಾ ಮೊನ್ಯಾ ಜಾತಿಕ್ ಕಿತೆಂ ಕಳಿತ್ ರೇ ರೊನಿ, ಸಕಾಳಿಂಚೆ ಪಾಚ್ವೆಂ ತಣ್ ಪಳೆವ್ನ್ ಉಡ್ಕಿ ಮಾರ್ನ್ ಧಾಂವ್ಲಿ ಆಸ್ತೆಲಿ, ದೆವಾನ್ ರಾಕ್ಲೆಂ, ಅರ್ಗಾಂ, ಇತ್ಲೆಂಚ್ ಜಾಲೆಂ." ಮ್ಹಣಾಲೊ ಇತ್ತಾಬ್. "ದೋನ್ ದಿಸಾಂನಿ ಘರಾ ವಚ್ಯೆತ್ ಮ್ಹಣ್ ಸಾಂಗ್ಲಾಂ ದಾಕ್ತೆರಾನ್." ಮ್ಹಣಾಲೆಂ ವಿಲ್ಮಾಂ ಯೇವ್ನ್.

ದುಸ್ರ್ಯಾ ದಿಸಾಚ್ ಬ್ಯಾಂಕಾಕ್ ವಚೊನ್ ಪಯ್ಶೆ ಹಾಡ್ನ್ ಲೀನಾ ಬಾಯೆಚೆ ಆನಿ ಇತ್ತಾಬಾಚ್ಯಾ ಕಾರಾಚ್ಯಾ ಬಾಡ್ಯಾಚೆ ಪಯ್ಶೆ ದೊನೀ ಫಾರಿಕ್ ಕೆಲೆ. ಇತ್ತಾಬಾಚ್ಯಾ ಕಾರಾರ್’ಚ್ ಮಾಂಯ್ಕ್ ಘರಾ ಆಪವ್ನ್ ಹಾಡ್ಲೆಂ. ಕಾರಾರ್ ಥಾವ್ನ್ ದೇಂವ್’ಲ್ಲೆಂಚ್ ಮಾಂಯ್ನ್ ವಿಚಾರ್ಲೆಂ "ತುಜೆಂ ಬೈಕ್ ಖಂಯ್ ಆಸಾ ರೇ ರೊನಿ?" “ಬೈಕ್ ನವೆಂ ಹಾಡ್ಯಾಂ ಮಾಂಯ್, ಪುಣ್ ಮಾಂಯ್ ನವಿ ಹಾಡುಂಕ್ ಜಾತಾಯೆ ಮಾಂಯ್?” ಮ್ಹಳೆಂ ಹಾಂವೆ, ತಿಚ್ಯಾ ಬಾವ್ಳ್ಯಾಕ್ ಆಧಾರ್ ದೀವ್ನ್.

ವಿಲ್ಮಾನ್ ಆನಿ ಇತ್ತಾಬಾನ್ ಸಗ್ಳೆಂ ಸಾಂಗ್ಲೆಂ ಮಾಂಯ್ಕ್ ಉಪ್ರಾಂತ್. ಆಯ್ಕೊನ್ ಮಾಂಯ್ಚಾ ದೊಳ್ಯಾಂನಿ ದುಕಾಂ ದೆಂವೊನ್ ಗೆಲಿಂ. "ಪಳೆಲೆಯೆ, ಥೊಡ್ಯಾಚ್ ಘಡಿಯಾಂ ಭಿತರ್ ಕಿತೆಂ ಸಕ್ಕಡ್ ಜಾವ್ನ್ ಗೆಲೆಂ. ಗಾಯ್ ಏಕ್ ನೀಬ್ ಮಾತ್ರ್... ಹೊ ಖೆಳ್ ನಶಿಬಾಚೊ". ಮ್ಹಣಾಲಿ ಮಾಂಯ್ ದುಕಾಂ ಪುಸುನ್. "ಆಯ್ತಾರ್ ಜಾಲ್ಲ್ಯಾನ್ ದುಸ್ರಿ ವಾಟ್ ನಾಸ್ತಾಂ ಬೈಕ್ ವಿಕಿಜೆ ಪಡ್ಲೆಂ. ನಾ ತರ್ ಕಾಂಯ್ ಬ್ಯಾಂಕಾಕ್ ವಚೊನ್ ಹಾಡ್ಯೆತೆ." ಮ್ಹಳೆಂ ಹಾಂವೆಂ ತಿಕಾ ಸಮಾಧಾನ್ ಕರ್ನ್. "ವಿಕ್ಚಾ ಬದ್ಲಾಕ್ ಕಾಂಯ್ ಇಲ್ಲೆ ಪಯ್ಶೆ ರೀಣ್ ವಿಚಾರ್ಲೆಲೆಂ ತರ್ ರಮೇಶಣ್ಣ ದಿತೊ ಕೊಣ್ಣಾ.” ಮ್ಹಣಾಲೊ ಇತ್ತಾಬ್. "ತೊ ತಶೆಂ ದಿತೊ ತರ್ ಬೈಕ್ ಹಾಂಗಾ ಆಸೊಂದಿ, ಆತಾಂ ಪಯ್ಶೆ ಘೆವ್ನ್ ವಚ್, ಫಾಲ್ಯಾಂ ಯಾ ಪೊರ್ವಾಂ ಯೇವ್ನ್ ಪಯ್ಶೆ ದೀವ್ನ್ ಬೈಕ್ ವರ್ನ್ ವಚ್". ಮ್ಹಣ್ತೊ ಆಸ್’ಲ್ಲೊ ಮ್ಹಳೆಂ ಹಾಂವೆಂ ಬೆಜಾರಾಯೆನ್. "ಜಾಲೆಂ ತೆ ಜಾಲೆಂ ಕಾಂಯ್ ಕರುಂಕ್ ಜಾಯ್ನಾ, ಪುಣ್ ಮುಖಾರ್ ಮತಿಂತ್ ದವ್ರುಂಕ್ ಜಾಯ್" ಮ್ಹಣೊನ್ ಇತ್ತಾಬ್ ಚಲ್ಲೊ.

ಮಾಂಯ್ ಆತಾಂ ಚಿಕ್ಕೆ ಬರಿ ಜಾವ್ನ್ ಆಯಿಲ್ಲಿ. ಆಧಾರ್ ಘೆವ್ನ್ ಚಲ್ತಾಲಿ. ಪುಣ್ "ಪಯ್ಲೆಂಚ್ಯಾ ಪರಿಂ ಜಾಂವ್ಕ್ ಕಾಂಯ್ ಆನಿಕಿ ಕಾಂಯ್ ದೋನ್ ಮಹಿನೆ ಪುಣಿ ಲಾಗ್ತೆಲೆ" ಆಶೆಂ ದಾಕ್ತೆರಾನ್ ಸಾಂಗ್ಲೆಲೆಂ. ವಿಲ್ಮಾ ಮಾಂಯ್ಚಿ ಚಾಕ್ರಿ ಕರುಂಕ್ ಮಗ್ನ್ ಜಾಲೆಂ. ಆನಿ ಹಾಂವ್ ಭಾಯ್ಲ್ಯಾ ಕಾಮಾಂತ್.

ಹಾಚ್ಯಾ ಮಧೆಂ ಪರ್ತ್ಯಾನ್ ಉಡಾಸ್ ಆಯ್ಲೊ, ರೀಮಾಕ್ ಕೆಲ್ಲ್ಯಾ ಮೆಸೇಜಿಕ್ ಜಾಪ್ ಮೆಳಾಜೆ ತರ್ ಆಯ್ತಾರಾ ಮಣಾಸರ್ ರಾಕಾಜಯ್ ಆನಿ ಮ್ಹಾಕಾ ಮೆಸೇಜ್ ಕರುಂಕ್ ಧೈಯ್ರ್ ನಾಂ. ಆನಿ ತೆಂ ಕಿತೆಂ ಚಿಂತುನ್ ಆಸಾ ದೇವ್ ಜಾಣಾಂ. ಕಿತೆಂಯ್ ಆಸಾ ಪೊರ್ವಾಂ ಆಯ್ತಾರಾ ಮೀಸಾ ಉಪ್ರಾಂತ್ ಪಳೆವ್ಯಾಂ.

ಕ್ಲೈವ್ ಸೋಜ್