ಜಿಣ್ಯೆ ಪಾನಾಂ - 15 : ಪ್ರಿಯಾ ಟ್ರಾವೆಲ್ಸ್

ಪ್ರಿಯಾ ಟ್ರಾವೆಲ್ಸ್ ಮ್ಹಜಾ ಲ್ಹಾನ್ಪಣಾರ್ ಕುದ್ರಿಪದ್ವಾರ್ ಥಾವ್ನ್ ಕೊಡ್ಯಾಳಾಕ್ ಆಸ್‌ಲ್ಲೆಂ ಡೈರೆಕ್ಟ್ ಬಸ್ಸ್. ಸಕಾಳಿಂಚಾ ಸವಾಯ್ ಸಾತಾಂಕ್ ಪಯ್ಲೆಂ ಟ್ರಿಪ್, ಉಪ್ರಾಂತ್ ಸಾಡೆ ಧಾ, ಸಾಡೆ ತೀನ್, ಅಶೆಂ ದಿಸಾಕ್ ತೀನ್ ಟ್ರಿಪ್ಪಾಂ ಕೊಡ್ಯಾಳಾಕ್ ವಚೊನ್, ರಾತ್ಚಾ ಧಾಂಕ್ ಯೇವ್ನ್ ಕುದ್ರಿಪದ್ವಾರ್ ಹಾಲ್ಟ್. ಆಮ್ಚಾ ಹಳ್ಳೆಂತ್ ಥಾವ್ನ್ ಸದಾಂ ಕಾಮಾಕ್ ವೆತೆಲ್ಯಾಂಕ್, ಉಂಚ್ಲ್ಯಾ ಶಿಕ್ಪಾಕ್ ಪಯ್ಸ್ ಕೊಡ್ಯಾಳ್ ವೆತೆಲ್ಯಾಂಕ್ ಹೆಂ ಬಸ್ಸ್ ವ್ಹಡ್ ಆಧಾರ್. ತವಳ್ ಕೊಡ್ಯಾಳ್ ವಚುಂಕ್ ಮೆಳ್ಚೊ ಆವ್ಕಾಸ್ ಭೋವ್ ಉಣೊ. ಮ್ಹಜಿ ಧಾವಿ ಸಂಪ್ತಾಸರ್ ಸಾರ್ಕೆಂ ಧಾ ಪಾವ್ಟಿಂಯ್ ಕೊಡ್ಯಾಳ್ ವಚೊಂಕ್ ನಾ. ವಾಟೆರ್ ಮೆಳ್ಚಿ ಪಕ್ಷಿಕೆರೆ ಇಗರ್ಜ್, ಪಾವಂಜೆ ನ್ಹಂಯ್, ಸುರತ್ಕಲ್ ಪೇಂಟ್, ದೊನೀ ಬಗ್ಲೆಕ್ ಪಳೆಂವ್ಕ್ ಮೆಳ್ಚೆ ಪಣಂಬೂರಾಂತ್ಲೆ ಕಾರ್ಖಾಣೆ, ಪಣಂಬೂರಾಂತ್ಲೊ ಢಕೊ, ಅಪ್ರೂಪ್ ಪಳೆಂವ್ಕ್ ಮೆಳ್ಚಿ ವ್ಹಡ್ ತಾರ‍್ವಾಂ. ಅಶೆಂ ಪ್ರಿಯಾ ಟ್ರಾವೆಲ್ಸಾರ್ ಕೊಡ್ಯಾಳ್ ವೆಚೆಂ ಮ್ಹಳ್ಯಾರ್ ಪಿಕ್‍ನಿಕ್ ವಚೊನ್ ಆಯಿಲ್ಲೊ ಆನ್ಬೋಗ್ ಜಾತಾಲೊ!

ಹ್ಯಾ ಬಸ್ಸಾಚೆರ್ ವಾವುರ್ಚೆ ರೊಕಿಯಾಮ್, ವಿನ್ಸಿಯಾಮ್, ಮಥಾಯಸ್, ಜಯಣ್ಣ, ಪ್ರಶಾಂತ್, ವೀರಪ್ಪಣ್ಣ, ಆವಿನಾಶ್, ರೋಣಿ.... ಹಾಣಿ ಸರ್ವಾನಿಂ ಗರ್ಜೆವಂತಾಕ್ ಕೆಲ್ಲೊ ಉಪ್ಕಾರ್ ಜಾಯ್ತೊ. ಆಜ್ ಆಮ್ಚ್ಯಾ ಕುದ್ರಿಪದ್ವಾಚಾ ರಸ್ತ್ಯಾರ್ ಪ್ರಿಯಾ ಟ್ರಾವೆಲ್ಸ್ ಧಾಂವಾನಾ ತರೀ ತಾಂಚೊ ಉಡಾಸ್ ಮಾತ್ರ್ ಆತಾಂಯ್ ಜಿವೊ. ಆಯ್ತಾರಾ ಸಕಾಳಿಂಚಾ ಮಿಸಾಕ್ ಲೊಕಾಕ್ ನಿಡ್ದೋಡಿ ಇಗರ್ಜಿಕ್ ಪಾವಯ್ತಾಲೆಂ. ಕ್ರಿಸ್-ಮಸ್ ಆನಿ ಪಾಸ್ಕಾಂಚ್ಯಾ ವೆಳಾರ್ ರಾತಿಂ ಮೀಸಾ ಥಾವ್ನ್ ಪಾಟಿಂ ಪಾವಯ್ತಾಲೆಂ. ಹಾಫ್ತ್ಯಾ ಮಧೆಂ ಮರ್ಣಾಂ ಜಾಲಿಂ ಜಾಲ್ಯಾರ್ ಸಾಂಜೆಚ್ಯಾ ಮೀಸಾಕ್ ಪಾವೊಂಕ್ ತಾಣಿಂ ತಾಂಚೊ ವಾವ್ರ್ ಖಳ್‌ಲ್ಲೊ ನಾಂ. ಕಿನ್ನಿಗೋಳಿ, ಕಿರೆಂ, ನಿಡ್ದೋಡಿ ಆನಿ ಕಲ್ಲಮುಂಡ್ಕೂರಾಂತ್ ರಾತಿಂ ನಾಟಕ್ ಆಸ್ಲ್ಯಾರ್ ಪಾಟಿಂ ಘರಾ ಪಾವೊಂಕ್ ಪ್ರಿಯಾ ಬಸ್ಸ್. ವರ್ಸಾಕ್ ಏಕ್ ಪಾವ್ಟಿಂ ಆಮ್ಚ್ಯಾಚ್ ಗಾಂವ್ಚಾ ಮನ್ಶಾಂ ಸಂಗಿಂ ಹ್ಯಾ ಬಸ್ಸಾಚೆರ್ ಉಣ್ಯಾ ಧರಿರ್ ರಾತ್ಚೆಂ ಕಾರ್ಕಳ್ ಫೆಸ್ತಾಕ್ ವಚುನ್ ಯೆತಾನಾ ಕೆಲ್ಲಿಂ ಗಮ್ಮಾತಾಂ ಜಿಣ್ಯೆರ್ ವಿಸ್ರೊಂಚಿ ನಾಂತ್!

ಗಾಂವ್ಚಾ ಲೊಕಾಸಂಗಿಂ ಮೆಳೊನ್ ಹ್ಯಾ ಬಸ್ಸಾಚೆರ್ ವಾವುರ್ಚೆ ಸರ್ವ್ ಆಮ್ಚಾಚ್ ಗಾಂವ್ಚೆ ಜಾಲ್ಲೆ. ಆಬೊಲಿಂ, ಕಳೆ, ಕಸ್ರಿ ಪಾನಾಂ, ಶಿರೊತಿ, ಘಡಾಯ್ ಅಶೆಂ ಗಾಂವ್ಚಿ ಕ್ರಷಿ ಪೆಂಟೆಕ್ ಫಾವುಂಕ್, ಕೊಡ್ಯಾಳ್ ಥಾವ್ನ್ ಗರ್ಜೆಚಿಂ ವೊಕ್ತಾಂ ಘೆವ್ನ್ ಯೇಂವ್ಕ್, ಕೊಡ್ಯಾಳ್ ಆಸ್ಪತ್ರೆಂತ್ ಕೊಣೀ ದಾಖಲ್ ಜಾಲೊ ತರ್ ತಾಂಕಾ ಜೆವಾಣ್ ಆನಿ ಮುಸ್ತಾಯ್ಕಿ ಪಾವಂವ್ಕ್ ಆಮ್ಕಾಂ ಪ್ರಿಯಾ ಬಸ್ಸ್ ಮಾಧ್ಯಮ್, ಆಮಿ ವಚಜಯ್ ಮ್ಹಣ್ ನಾತ್‍ಲ್ಲೆಂ!!. ಆಪ್ಣಾಕ್ ಕಲೆಕ್ಷನ್ ಚಡ್ ಜಾಯ್ ಮ್ಹಣ್ ಪಯ್ಣಾರ‍್ಯಾಂಕ್ ತಾಣಿಂ ದೊಸ್‍ಲ್ಲೆಂ ನಾ. ಹಾತಾಂತ್ ಚಿಲ್ಲರ್ ನಾಂತ್ ತರ್ ಗಲಾಟೊ ಜಾಲ್ಲೊ ನಾ. ಜಾಯ್ತಾ ಗರ್ಜೆವಂತಾಂಕ್ ತಾಣಿ ಧರ್ಮಾರ್ಥ್ ಸೆವಾ ದಿಲ್ಯಾ. ಗಾಂವಾರ್ ಗಾಡಿಯೊ ನಾತ್‍ಲ್ಲ್ಯಾ ತ್ಯಾ ವೆಳಾರ್ ಪಿಡೆಸ್ತಾಂಕ್, ಗರ್ಬೇಸ್ತ್ ಸ್ರೀಯಾಂಕ್ ರಾತ್ಚಾ ವೆಳಾರ್ ಆಸ್ಪತ್ರೆಕ್ ಪಾವಯಿಲ್ಲಿ ಕೀರ್ತ್ ಆಮ್ಚಾ ಪ್ರಿಯಾ ಟ್ರಾವೆಲ್ಸಾಚಿ!
ಜಾತ್-ಮತ್-ಭೇದ್ ಸೊಡ್ನ್ ತಾಣಿ ದಿಲ್ಲಿ ಆಪೂರ್ವ್ ಸೆವಾ, ಫೆಸ್ತಾಂ-ಕಾಜಾರಾಂಕ್ ಸಂಗಿಂ ಮೆಳೊನ್ ಕೆಲ್ಲಿಂ ಗಮ್ಮತಾಂ ಆಜೂನ್ ಕುದ್ರಿಪದ್ವಾಚಾ ಲೊಕಾಚ್ಯಾ ಉಡಾಸಾಂತ್ ಅಮರ್ ಉರ್ಲ್ಯಾಂತ್. ರಜೆಚ್ಯಾ ದಿಸಾನಿಂ ಮ್ಹಾಕಾ ಕೊಡ್ಯಾಳ್ ವರ್ನ್ ಹಾಡ್ತಾಂ ಮ್ಹಣ್ ಮ್ಹಜ್ಯಾ ಮಮ್ಮಿ ಲಾಗಿಂ ತಾಣಿಂ ಜಾಯ್ತೆಂ ಪಾವ್ಟಿಂ ವಿಚಾರಿಲ್ಲೆಂ ಆಸಾ. ಪೂಣ್ ಮ್ಹಜಿಂ ಪೊಕ್ರಿಪಣಾಂ ಜಾಣಾ ಆಸ್‌ಲ್ಲ್ಯಾ ಮಮ್ಮಿನ್ ಮಾತ್ರ್ ನಾಂ ಮ್ಹಳ್ಳೆಂ!. ರಜೆಚಾ ದಿಸಾನಿಂ ಖೆಳೊಂಕ್ ಖಾಲಿ ಜಾಲ್ಲೆ ಟಿಕೆಟಿಚೆ ಬೂಕ್ ಹ್ಯಾಚ್ ಬಸ್ಸಾರ್ ಥಾವ್ನ್ ಮೆಳ್ಳ್ಯಾತ್. ಜಾಯ್ತೆ ಪಾವ್ಟಿಂ ಹೋಟೆಲಾನಿಂ ಚಾ ಜೆವ್ಣಾಂ ತಾಂಚೆ ಸಾಂಗಾತಾಚ್ ಜಾಲ್ಯಾಂತ್. 1990 ಕಾಳಾರ್ ಕುದ್ರಿಪದ್ವಾರ್ ವ್ಹಡ್ ಜಾಲ್ಲ್ಯಾ ಆಮ್ಕಾಂ ಪ್ರಿಯಾ ಟ್ರಾವೆಲ್ಸ್ ಏಕ್ ಉಡಾಸಾಂತ್ ದವರ್ಚೆ ತಸಲೆಂ ’ಚೈಲ್ಡ್‌ವುಡ್ ಟ್ರ್ಸಾನ್ಸ್‌ಪೋರ್ಟ್’!

ಆಜ್ ಘರಾ ಘರಾನಿಂ ಗಾಡಿಯೊ ಆಯ್ಲ್ಯಾತ್, ನಾ ತರ್ ಜಾಯ್ ಜಾತಾನಾ ಭಾಡ್ಯಾಚೊ ಗಾಡಿಯೊ ಮೆಳ್ತಾತ್ ಜಾಲ್ಲ್ಯಾನ್ ಬಸ್ಸಾಚೆರ್ ವೆಚೆಂ ಉಣೆಂ ಜಾಲಾಂ. ಹಳ್ಳೆಂತ್ಲ್ಯಾ ಬಸ್ಸಾಂಕ್ ಲುಕ್ಸಾಣ್ ಜಾವ್ನ್ ಬಸ್ಸಾಂ ಬಂಧ್ ಜಾಲ್ಯಾಂತ್. ಬಸ್ಸಾಂಕ್‌ಚ್ ಮ್ಹಣ್ ರಾಕುನ್ ರಾಂವ್ಚಾ ದುಬ್ಳ್ಯಾ ಲೊಕಾಕ್ ಮಾತ್ರ್ ದೀಸ್ ತ್ರಾಸಾಂಚೆ ಜಾಲ್ಯಾತ್. ಹಳ್ಳೆಂತ್ ಥಾವ್ನ್ ಪೆಂಟೆಕ್ ವಚುಂಕ್ ಆಸ್ಚಿ ಗರ್ಜ್ ಸಮ್ಜುನ್ ಭೋವ್ ಲಾಂಬ್ ಆವ್ದೆಕ್ ಕುದ್ರಿಪದ್ವಾಚಾ ಲೊಕಾಕ್ ಬಸ್ಸಾಚಿ ಸೆವಾ ದೀಂವ್ಕ್ ಕಾರಣ್ ಜಾಲ್ಲ್ಯಾ ಮ್ಹಾಲಕ್ ಕೊಟ್ಟಾರಚೌಕಿ ಶ್ರೀ ಶೇಖರ್ ಶೆಟ್ಟಿ ಹಾಂಕಾಂ ಸಲಾಂ!

- ಸನ್ನು ನಿಡ್ಡೋಡಿ

ತಸ್ವೀರ್ ಕುರ್ಪಾ : ಶ್ರೀ ಜೊಯ್ಸನ್ ಪಿಂಟೊ - ಕುದ್ರಿಪದವು.