ದಿಷ್ಟಿ ವಿಶ್ಯಾಂತ್ ಜಾಯ್ತೆಂ ಸಾಂಗುಯೆತ್. ಏಕಾ ಮೆಕಾ ಮೆಳ್ಚಾ ತರ್ನ್ಯಾ ಕಾಳ್ಜಾಂಚಾ ದಿಷ್ಟಿನಿ ಜಾಯ್ತ್ಯಾಂ ಕುಟ್ಮಾಂಕ್ ಬುನ್ಯಾದ್ ಪಡ್ಲ್ಯಾ ತರ್ ಹ್ಯಾಚ್ ದಿಷ್ಟಿಕ್ ಸಾಂಪ್ಡೊನ್ ಥೊಡ್ಯಾ ಕುಟ್ಮಾನಿ ಫುಟ್ ಆಯ್ಲಿಯ್ ಆಸಾ!. ದೀಷ್ಟ್ ಗರ್ಜೆಚಿ, ಗರ್ಜೆಚಿ ದೀಷ್ಟ್ ಖೊಟಿ ಜಾಲಿ ತರ್!. ’ತ್ಯಾ ಮನ್ಶ್ಯಾಚಾ ದೀಷ್ಟಿಕ್ ಪಡ್ಚೆಂಚ್ ನೈಂ’ ’ಹೊ.... ತಿಣೆ ಸಾಂಗ್ಲ್ಯಾರ್ ಜಾಲೆಂ ಆನಿ ಜಾಲ್ಲ್ಯಾ ಬರಿಂಚ್!.’ ’ತ್ಯಾ ಮನ್ಶ್ಯಾಚಾ ಮುಕಾರ್ ಏಕ್ ಪಡಾನಾಕಾತ್’, ಖೊಟ್ಯಾ ದಿಷ್ಟಿ ಥಾವ್ನ್ ಬಚಾವಿ ಜೊಡ್ಚ್ಯಾಕ್ ಅಸಲಿಂ ಜಾಗ್ವಣೆಚಿಂ ಉತ್ರಾಂ ಆತಾಂಯ್ ಆಮ್ಚಾ ಗಾಂವಾನಿ ಆಯ್ಕೊಂಕ್ ಮೆಳ್ತಾತ್. ಗಾಂವಾರ್ ಥೊಡ್ಯಾಂಕ್ ಹ್ಯಾ ಖೊಟ್ಯಾ ದಿಷ್ಟಿಕ್ ಲಾಗೊನ್ ಬೋಟ್ ಜೊಕ್ಚೆಂ ಆಜೂನ್ ರಾವುಂಕ್ ನಾ! ದೀಷ್ಟ್ ಪಡ್ಚ್ಯಾ ಆನಿ ದೀಷ್ಟ್ ಕಾಡ್ಚ್ಯಾ ವಿಶಿಂ ಹಾಂವ್ ಮ್ಹಜ್ಯಾ ಲ್ಹಾನ್ಪಣಾರ್ ಥಾವ್ನ್‌ಚ್ ಆಯ್ಕೊನ್ ಆಯ್ಲಾಂ.

ಮನಿಸ್ ಯಾ ಮನ್ಜಾತ್, ರೂಕ್ ಯಾ ಝಡಾಂ, ಶೆತಾಂ ಯಾ ತೊಟಾಂ, ಖಾಣ್ ಯಾ ಜೆವಾಣ್, ಖಡ್ಪಾಂ ಯಾ ಬಾಂದ್ಪಾಂ. ಹ್ಯಾ ದಿಷ್ಟಿಚಾ ಘಾಸಾಕ್ ಸಾಂಪ್ಡಾತ್ ತರ್ ವಾಂಚ್ ನಾಂ!. ಮನಿಸ್ ಮೊನೆ ಜಾಲ್ಯಾತ್ ತರ್ ಮನ್ಜಾತಿ ಅಸ್ಕತ್ ಜಾಲ್ಯಾತ್, ರೂಕ್ ಬಾವ್ಲ್ಯಾತ್ ತರ್ ಝಡಾಂ ಕರ್ಪಾಲ್ಯಾಂತ್, ಶೆತಾಂ ಸುಕ್ಲ್ಯಾಂತ್ ತರ್ ತೊಟಾಂ ಪಿಕ್ಲ್ಯಾಂತ್, ಖಾಣಾಂ ಭಾತೆಲ್ಯಾಂತ್ ತರ್ ಜೆವ್ಣಾಂ ಬೆಳ್ಶೆಲ್ಯಾಂತ್, ಖಡ್ಪಾಂ ಫುಟ್ಲ್ಯಾಂತ್ ತರ್ ಬಾಂದ್ಪಾಂ ಕೊಸಾಳ್ಳ್ಯಾಂತ್! ತರ್ ಏಕಾ ಮನ್ಶ್ಯಾಚಾ ದೀಷ್ಟಿಂತ್ ಇತ್ಲಿ ಸಕತ್ ಆಸತ್?  ಆಜ್ ಮಾಕಾ ಪಾತ್ಯೆಂವ್ಕ್ ಕಷ್ಟ್ ಮಾರ್ತಾತ್ ಪೂಣ್ ಹಾವೆಂಯ್ ಮ್ಹಜ್ಯಾ ಜಿಣ್ಯೆಂತ್ ಹ್ಯಾ ಖೊಟ್ಯಾ ದಿಷ್ಟಿ ಥಾವ್ನ್ ಬಚಾವಿ ಜೊಡ್ಚ್ಯಾಕ್ ಥೊಡ್ಯೊ ವಾಟೊ ಜರೂರ್ ವಿಂಚ್ಲ್ಯಾತ್!

ಮ್ಹಜ್ಯಾಚ್ ಭೊವಾರಿಂ ಜಾಲ್ಲಿಂ ಆನಿ ಹಾವೆಂ ಆಯ್ಕಾಲ್ಲಿಂ ಥೊಡಿಂ ಘಡಿತಾಂ ವಾಯ್ಟ್ ದೀಷ್ಟ್ ಕಿತ್ಲಿ ಪ್ರಭಾವಾಚಿ ಮ್ಹಣ್ ಸಾಂಗ್ಚಾಕ್ ಸಾಕ್ಸ್ ಜಾತಾತ್.

ನವ್ಯಾ ಘರ್ಚಾ ಬಾಂದ್ಪಾಚೆಂ ಕಾಮ್ ಜ್ಯೊರಾನ್ ಚಲ್ತಾಲೆಂ. ಧರ್ಣಿಕ್ ಕಾವ್ ಕಾಡ್ಚಾಂತ್ ವ್ಯಸ್ಥ್ ಆಸ್‍ಲ್ಲ್ಯಾ ತಾಕಾ ಪಳೆವ್ನ್ "ವಾ..... ಮೇಸ್ತ್ರೀಲ್ನ  ಬೇಲೆ ಬಾರೀ ಶೋಕ್ ಆತ್‍ಂಡ್..." (ಮೇಸ್ತ್ರಿಚೆಂ ಕಾಮ್ ಬಾರೀ ಬೋರೆಂ ಜಾಲಾಂ) ಪಳೆಲ್ಲ್ಯಾ ಏಕಾ ವ್ಯಕ್ತಿನ್ ಸಾಂಗುನ್ ಜಾಲ್ಲೆಂ!! ಹೆ ಉತರ್ ಆಯ್ಕೊನ್ ವಿರಾರ್ ಜಾಲ್ಲ್ಯಾ ಮೇಸ್ತ್ರೀನ್ ಮಾತ್ರ್ ಹಾತಿಂ ಹಾಸ್‍ಲ್ಲಿ ಟಾಪಿ ಧರ್ಣಿಕ್ ಮಾರ್‌ಲ್ಲಿ. ಹೆಂ ಘಡಿತ್ ಘಡೊನ್ ದಶಕಾಂ ಸಂಪ್ಲಿಂ ತರೀ ಆಜೂನ್ ತ್ಯಾ ಧರ್ಣಿಕ್ ಕಾವ್ ಲಾಗಾನಾ!!

ಉದ್ಕಾಚಾ ಆಸ್ರ್ಯಾಕ್ ಗರ್ಜ್ ಮ್ಹಣ್ ಕೊಂಕ್ರಿಟಿಚಿ ಮಜ್ಬೂತ್ ಟಾಂಕ್ ಭಾಂದುನ್ ತಯಾರ್ ಜಾಲ್ಲಿ. ಪಯ್ಸ್ ಜಾವ್ನ್ ಆಯ್‍ಲ್ಲ್ಯಾ ಏಕಾ ವ್ಯಕ್ತಿನ್ ಥಂಯ್ಸರ್ ವಣ್ಕುನ್ ದವರ್‌ಲ್ಲ್ಯಾ ದೆಳ್ಯಾಚೆರ್ ಚಡುನ್ ಟಾಂಕಿಚಿ ಸೊಭಾಯ್ ವರ್ಣುನ್ ಜಾಲ್ಲಿ. ಥೊಡ್ಯಾಚ್ ದಿಸಾನ್ ಕೊಂಕ್ರೀಟ್ ಫುಟೊನ್  ಪಾಜ್ರೊಂಕ್ ಸುರು ಜಾಲ್ಲೆಂ ಉದಾಕ್ ಟಾಂಕ್ ಫುಟೊನ್ ಕಾಡ್ತಾಸರ್ ರಾವ್‍ಲ್ಲೆಂಚ್ ನಾಂ..!!

 ತೊಂದಾಡೆಚಾ ರುಕಾ ಮುಳಾಂತ್ ಪಂದಾಡೆ ನಿದ್‌ಲ್ಲ್ಯಾ ವಾಲಿಚೆರ್ ಉದೆಲ್ಲೆ ಕಾಂಠ್‍ಬರ್ ಕುವಾಳ್ಯಾಚೆ ಪಿಂಪ್ರೆ, ಲಾಗ್ಶಿಲ್ಯಾನ್ ಪಾಶಾರ್ ಜಾಲ್ಲ್ಯಾ ಏಕಾ ವ್ಯಕ್ತಿಚಾ ದಿಷ್ಟಿಕ್ ಸಾಂಪಡ್ಲೆ!! “ತುಮ್ಕಾಂ ಹ್ಯಾ ಪಾವ್ಟಿಂ ಕುವಾಳೆ ಲೋಡ್ ಕರುಂಕ್ ಲೊರಿ ಹಾಡಿಜೆ ಕೊಣ್ಣಾ" ತಿ ದೀಷ್ಟ್ ಉಲೊವ್ನ್ ಘೆಲ್ಲಿ. ಲೋರಿ ಸೊಡ್ಯಾಂ ತ್ಯಾ ವಾಲಿಚೊ  ಏಕ್‍ಚ್ ಏಕ್ ಕುವಾಳೊ ಕುಂಡ್ಲ್ಯಾಂತ್ ಶಿಜ್ಲೊ ನಾ.!!

ವಡ್ಲ್ಯಾ ಫೆಸ್ತಾಚಾ ಸಂಭ್ರಮಾಕ್ ಮ್ಹಣ್ ದೆಬಾಳೊ ಘಡಾಯ್ ಕಾತ್ರುನ್ ಹಾಡ್‍ಲ್ಲೊ. ಬರೊ ಜೂನ್ ಜಾಲ್ಲೊ ಘಡಾಯ್ ಹಫ್ತ್ಯಾ ಫುಡೆಂಚ್ ಮಾಳ್ಯಾರ್ ಪಿಕೊಂಕ್ ದವರುಂಕ್! ಇಲ್ಲೊ ದೀಕ್ ದೆವೊಂದಿ ಮ್ಹಣ್ ಘರ್ಚಾ ವಣದಿಚಾ ಕೊನ್ಶ್ಯಾರ್ ಉಬೊ ಕೆಲ್ಲೊ ಘಡಾಯ್ ಪಳೆವ್ನ್ ಜಾಲಾಂತ್ಲ್ಯಾನ್ ಪಾಶಾರ್ ಜಾಂವ್ಚಾ ಎಕಾ ವ್ಯಕ್ತಿನ್ "ಹೊ ಫೆಸ್ತಾಕ್ ಘಡಾಯ್!" ಮ್ಹಣ್ ಸುರ್ವಾತ್ ದೀವ್ನ್ ಜೆ ಕಿತೆಂ ಸಾಂಗುಂಕ್ ಆಸಾ ತೆಂ ಸಾಂಗುನ್ ಸೊಡ್‌ಲ್ಲೆಂ. ತ್ಯಾ ವ್ಯಕ್ತಿಚಿ ದೀಷ್ಟ್ ಇಲ್ಲಿ ಬೋಳ್ ಮ್ಹಣ್ ಪಯ್ಲೆಂಚ್ ಖಬಾರ್ ಆಸ್‍ಲ್ಲಿ ಜಾಲ್ಲ್ಯಾನ್ ಫೆಸ್ತಾಕ್ ಹೊ ಘಡಾಯ್ ಪಿಕಾತ್‍ಗೀ ಮ್ಹಣ್ ದುಬಾವ್ ಜಾಲ್ಲೊ. ಲೊಸುಣೆಚೊ ಬೊಯೊ ದಾಡಾವ್ನ್, ಘಡಾಯೆಚಾ ಮುಳಾಂತ್ ಖೊವೊವ್ನ್, ಸುತ್ಲೆಚಾ ಗೊಣಿಯೆ ಭಿತರ್ ಘಡಾಯ್ ರೆವ್ಡಾವ್ನ್ ಮಾಳ್ಯಾರ್ ದವರ‍್ಲೊ. ಫೆಸ್ತಾಚಾ ಆದ್ಲ್ಯಾ ದಿಸಾ ಸಕಯ್ಲ್ ಕಾಡ್ತಾನಾ... ಪಾಚ್ವೊಚ್!. ಏಕ್ ಕೆಳೆಂಯ್ ಪಿಕೊಂಕ್ ನಾಂ!. ಭೆಸ್ಪಾ ದಿಸಾ ಫೆಸ್ತಾಚಾ ತಯಾರಾಯ್ ಭರಾನ್ ಜಾತಾನಾ ಘಡಾಯೆಕ್ ಮಾತ್ರ್ ದೀಷ್ಟ್ ಪಡ್‌ಲ್ಲಿ. ತ್ಯಾಚ್ ಸಾಂಜೆರ್ ಜಾಲಾಂತ್ಲ್ಯಾನ್ ಪಾಶಾರ್ ಜಾಂವ್ಚಾ ದೀಷ್ಟ್ ಘಾಲ್ಲ್ಯಾ ವ್ಯಕ್ತಿಕ್ ಘಡಾಯ್ ದಾಕೊವ್ನ್ ಘಡಾಯ್ ಪಿಕೊಂಕ್ ನಾ ಮ್ಹಣ್ ಬೆಜಾರಾಯ್ ಉಚಾರ್ತಾನಾ... "ತಾಕಾ ಇಲ್ಲೆಂ ಉದಾಕ್ ಶೆಣಾಯಾ.. ಫಾಲ್ಯಾಂ ಪಿಕ್ತಾಗೀ ನಾ ಪಳೆಯಾ". ಮ್ಹಣ್ ಸಾಂಗುನ್ ತೊ ವ್ಯಕ್ತಿ ಘೆಲ್ಲೊ. ವ್ಹಯ್... ದುಸ್ರೆ ದಿಸಾ ಸಗ್ಳೊ ಘಡಾಯ್‍ಚ್ ಪಿಕ್‍ಲ್ಲೊ, ಏಕ್‍ಚ್ ಏಕ್ ಕೆಳೆಂ ಪಾಚ್ವೆಂ ನಾಸ್ತಾಂ!!!

ಹ್ಯಾ ವಾಯ್ಟ್ ದಿಷ್ಟಿ ಥಾವ್ನ್ ಬಚಾವಿ ಜೊಡ್ಚಾಕ್ ಭುರ್ಗ್ಯಾಂಕ್ ಕಾಜಾಳ್ ಲಾಗಂವ್ಚೆಂ, ಹಾತಾಕ್, ಗಳ್ಯಾಕ್, ಪೆಂಕ್ಟಾಕ್, ಪಾಯಾಂಕ್ ಕಾಳ್ಯಾ ಮಣಿಯಾಂಚೊ ಹಾರ್ ಯಾ ನಾಡೊ ಬಾಂದ್ಚೆ ಆತಾಂಯ್ ಚಾಲ್ತೆರ್ ಆಸಾ. ಭುರ್ಗ್ಯಾಕ್ ಪಡ್‌ಲ್ಲಿ ದೀಷ್ಟ್ ಕಾಡುಂಕ್ ಮ್ಹಣ್ ಮೀಟ್ ಮಿರ್ಸಾಂಗ್ ವೋಳ್ನ್ ರಾಂದ್ಣಿಕ್ ಉಡಂವ್ಚೆಯ್ ಆಸಾ. ತರ್ಕಾರಿ, ರೂಕ್, ಝಡಾಂ, ತೊಟಾಂ, ಶೆತಾಂ, ಬಾಂದ್ಪಾಂ ದಿಷ್ಟಿ ಥಾವ್ನ್ ರಾಕ್ಚಾಕ್ ಬೆರ್ಚಾಪ್ಪಾ, ಕಾಳೆಂ ಕುಂಡ್ಲೆಂ. ದಾವ್ಯಾ ಪಾಯಾಂಚಿ ವಾಣ್-ಸಾರ್ಣಿ ಕುಂಟೊ-ನಿವ್ಳಿಚೊ ಕಾಂಟೊ ಸಾಂಗಾತಾ ಬಾಂದ್ಚೆಂಯ್ ಪಳೆಂವ್ಕ್ ಮೆಳ್ತಾ.

ಅಸಲಿಂ ಹೆರ್ ಜಾಯ್ತಿಂ ಘಡಿತಾಂ ಆಮ್ಚಾ ಭೊವಾರಿಂ ಘಡ್ಲ್ಯಾಂತ್ ಆನಿ ಆಯ್ಕೊಂಕ್ ಮೆಳ್ತಾತ್. ಬಾಳ್ಶ್ಯಾಂಕ್ ಜೆವಾಣ್ ದಿತಾನಾ, ಭುರ‍್ಗಿಂ ಉಲಂವ್ಕ್ ಯಾ ಚಲಂವ್ಕ್ ಶಿಕ್ತಾನಾ ಭಾಯ್ಲ್ಯಾ ವ್ಯಕ್ತಿನಿಂ ಕಿತೆಂಯ್ ಸಾಂಗ್ಲ್ಯಾರ್ ಭುರ್ಗ್ಯಾನಿಂ ಕರ್ಚಾ ಕಾಮಾನಿಂ ಊಣ್ ಯೆತಾ ಮ್ಹಣ್ ಸಾಂಗ್ಚೆಂಯಿ ಆಯ್ಕಾಲಾಂ. ಏಕ್ ವಾಯ್ಟ್ ಘಡಿತ್ ಘಡ್ತಾನಾ, ತ್ಯಾಚ್ ಸಂಧರ್ಬಾರ್ ಎಕಾ ವ್ಯಕ್ತಿನ್ ಸಾಂಗ್ಚಿಂ ಉತ್ರಾಂ ತಾಳ್ ಮೆಳ್ತಾತ್ ತರ್ ದೀಷ್ಟ್ ಲಾಗ್ಲಿ ಮ್ಹಣ್ ಸಾಂಗ್ಚೆಂ ಆಸಾ! ಪೂಣ್ ದುಸ್ರೆ ವಾಟೆನ್ ಚಿಂತ್ಲೆ ತರ್,  ಜಾಯ್ತ್ಯಾ ಹೆರ್ ಕಾರಾಣಾಂಕ್ ಲಾಗೊನ್ ತಿಂ ಘಡಿತಾಂ ಘಡೊಂಕ್ ಪುರೊ ಮ್ಹಳ್ಳೊ ವಾದ್ ಥೊಡೆಪಾವ್ಟಿಂ ಮ್ಹಜ್ಯಾ ಮತಿಕ್ ಏತಾ. ವಾಲಿಚಾ ಮ್ಹುಳಾಕ್ ಕಿಡಿನ್ ಕಾಂತಯಿಲ್ಲೆಂ ಜಾವ್ಯೆತ್!! ಸಿಮೆಟೆಚಿ ಸಾರ್ವೊಣ್ ಕರ್ತಾನಾ ಯಾ ಟಾಂಕಿಚಿ ವಣದ್ ಬಾಂದ್ಚಾ ಕಾರ್ಯಾಂತ್ ಥೊಡಿ ಮಿಲಾವಟ್ ಯಾ ಮಾಪ್ ಮೆಜ್ಪಾಂತ್ ಚಡುಣೆಂ ಜಾವ್ನ್ ಫುಟ್ ಆಯ್ಲ್ಯಾ ಜಾವ್ಯೆತ್!! ಸಾರ್ಕಿ ಗಜಾಲ್ ಕಿತೆಂ?? ದೀಷ್ಟ್ ಲಾಗ್ತಾ ಯಾ ನಾ ಮ್ಹಳ್ಳೆಂ ಕಳಿತ್ ನಾ. ಘಡಾಯ್ ಪಿಕ್‍ಲ್ಲೆಂ ಘಡಿತ್ ಮಾತ್ರ್ ಮ್ಹಜ್ಯಾ ಮತಿಂತ್ ಸವಾಲ್ ಜಾವ್ನ್ ಉರ್ಲಾಂ!

ಸನ್ನು ನಿಡ್ಡೋಡಿ