ಮಾಕಾ ಮಾಜ್ರಾಂಚೆರ್ ಆನಿ ಪೆಟ್ಯಾಂಚೆರ್ ಇಲ್ಲೊ ಮೋಗ್ ಚಡ್. ಹಳ್ಳೆಂತ್ಲ್ಯಾ ಘರಾನಿಂ ಚಡಾವತ್ ಜಾವ್ನ್ ಮಾಜ್ರಾಂ, ಪೆಟೆ, ಗಾಯ್ರಾಂ ಆನಿ ಕುಂಕ್ಡಾಂಕ್ ಕುಟ್ಮಾ ಸಾಂದ್ಯಾಚೊ ಮಾನ್ ಮೆಳ್ತಾ. ಮ್ಹಜ್ಯಾ ಲ್ಹಾನ್ಪಣಾರ್ ಥಾವ್ನ್ ಆಮ್ಚ್ಯಾ ಘರಾ ಆಜೂನ್ ಹ್ಯೊ ಪೊಸ್ಕ್ಯೊ ಮನ್ಜಾತಿ ಖಳ್‌ಲ್ಲ್ಯೊ ನಾಂತ್. ಜಾಯ್ತೆ ಪೆಟೆ ಘರ್ ರಾಕುನ್ ಆನಿ ಜಾಯ್ತಿಂ ಮಾಜ್ರಾಂ ಘರ್ ಸೊಭೊವ್ನ್ ಅಂತರ್ಲ್ಯಾಂತ್.

ಉತರ್ ಪ್ರಾಯೆಕ್ ಪಾವುನ್, ಮ್ಹಜ್ಯಾ ಲಾನ್ಪಣಾಚಾ ಬಾರಾ ವರ್ಸಾಂಕ್ ಸಾಂಗಾತ್ ದೀವ್ನ್ ಜೀವ್ ಸಾಂಡ್‌ಲ್ಲೊ ಟೋಮಿ ಆನಿ ತರ್ನಾಟ್ಪಣಾಚ್ಯಾ ಧಾ ವರ್ಸಾಂಕ್ ಸಾಂಗಾತ್ ದಿಲ್ಲೆಂ ಮ್ಹಜೆಂ ಬಿಲ್ಲು, ಎದೊಳ್ ಮ್ಹಣಾಸರ್ ಲಾಂಬ್ ಆವ್ದೆಕ್ ಆಮ್ಗೆರ್ ಜಿಯಿಲ್ಲಿಂ ಜಾವ್ನಾಸಾತ್. ಘರ್ ರಾಕ್ವಣ್ ಕರ್ನ್ ಮಾತ್ರ್ ನಂಯ್ ಆಮಾ ಸರ್ವಾಂಚಿ ಕಾಳ್ಜಾ-ಮನಾಂ ಜಿಕ್‍ಲ್ಲ್ಯಾ ಆಮ್ಚಾ ಮೊಗಾಚ್ಯಾ ಚಿನ್ನುನ್ ಮಾತ್ರ್ ಚಾರ್ ವರ್ಸಾಂಚ್ಯಾ ಪ್ರಾಯೆರ್ ದೊಳ್ಯಾಂತ್ ರಗಾತ್ ನಾತ್ಲೆಲ್ಯಾಂಚ್ಯಾ ಘಾಸಾಕ್ ಸಾಂಪ್ಡೊನ್ ಆದೇವ್ಸ್ ಮ್ಹಳ್ಳೆಂ! ಚಿನ್ನುನ್ ಆನಿ ಬಿಲ್ಲಾನ್ ಮ್ಹಜ್ಯಾ ತರ್ನಾಟ್ಪಾಣಾಚ್ಯಾ ಪೊಕ್ರಿಂಕ್ ಜಾಯ್ತೊ ಸಾಂಗಾತ್ ದಿಲಾ. ತಿಂ, ಆಜೂನ್ ಮ್ಹಜ್ಯಾ ಉಡಾಸಾಂತ್ ಧೊಸ್ತಾತ್ ಆಸ್ತಾಂ, ಹೆಂ ಜಿಣ್ಯೆ ಪಾನ್ ತಾಂಕಾ ಸಮರ್ಪಿತಾಂ.

ಆಬಾಗೆಲ್ಯಾ ಘರಾ ಲಾಗ್ಶಿಲ್ಯಾಂಕಡೆ ಥಾವ್ನ್ ಹಾಡ್‍ಲ್ಲ್ಯಾ ಮಂಗಲೆ ಮಾಜ್ರಾಕ್ ಘರಾ ಮುಕ್ಲ್ಯಾ ಖಣಿಯೆಂತ್ ಗುಗಿನ್ ಮಾರ‍್ಲ್ಯಾ ಉಪ್ರಾಂತ್ ಆಮ್ಗೆರ್ ಮಾಜ್ರಾಂ ಜಾಯ್ನಾಂತ್ ಮ್ಹಳ್ಳ್ಯಾ ವಾದಾಕ್ ಆಡ್ ವಚೊನ್ ಮ್ಹಜ್ಯಾ ಬಿಲ್ಲುನ್ ಧಾ ವರ್ಸಾಂ ಘರ್ ಸೊಭಯಿಲ್ಲೆಂ ಆನಿ ಉಂದ್ರಾಚಿ ನೀದ್ ಸುಟಯ್ಲಿ!. ಘರಾಂತ್ ಮಾಜ್ರಾಂಚಿ ಸಾವ್ಳಿ ನಾಸ್ತಾಂ ಕಿರ್ಕಿರಿ ಜಾಂವ್ಚಾ ವೆಳಾ ಇಗರ್ಜಿ ಲಾಗ್ಶಿಲ್ಯಾ ವಳ್ಕಿಚ್ಯಾ ಏಕಾ ಕ್ರೀಸ್ತೀ ಕುಟ್ಮಾಂಗೆರ್ ಥಾವ್ನ್ ಹಾಂವೆಂ ತಾಕಾ ಹಾಡ್‌ಲ್ಲೆಂ. ರಿವಾಜಿ ಫರ್ಮಾಣೆಂ ರಾಂದ್ಣಿ ಕುರಾಕ್ ಸೊಂಡಿ ಘಷ್ಟುನ್ ಸಕ್ಲಾ ದವಾರ್ತಾನಾ ಭಿಯಾನ್ ಕೊನ್ಶಾಂತ್ ರಿಗ್‌ಲ್ಲೆಂ ತೆಂ!. ಉಪ್ರಾಂತ್ಲ್ಯಾ ದಿಸಾನಿಂ ತಾಣೆ ತಾಚೆಂ ಹುಶಾರ್ಪಣ್ ದಾಕಯ್ಲೆಂ. ಕುಜ್ನಾಚಿ ರಾಣಿ ತೆಂ ಜಾಲ್ಲೆಂ. ಚೋರ್ನ್ ಖಾಂವ್ಚಿ ಸವಯ್ ತಾಕಾ ನಾತ್‌ಲ್ಲಿ. ಶಿಕಾರೆಂತ್ ಚತುರ್, ಬುದಿಂತ್ ಹುಶಾರ್! . ತಾಚೆಂ ಜೆವಾಣ್ ತಾಕಾ ತಾಜ್ಯಾಚ್ ಬೊಶಿಯೆಂತ್, ಧರ್ಣಿರ್ ಘಾಲೆಂ ತರ್ ಪಾಟ್ ಕರ್ನ್ ಮರ್ಜಿ ದಾಕಯ್ತಾಲೆಂ!

ಬಿಲ್ಲುಕ್ ಉಸ್ಕ್ಯಾರ್ ಬಸೊವ್ನ್, ತಾಕಾ ಪೊಶೆವ್ನ್ ಖೆಳ್ಚಿ ಮ್ಹಜಿ ಸದಾಂಚಿ ಸವಯ್. ರಾತಿಂ ಬಾಗ್ಲಾಂ ಧಾಂಪುನ್ ಭಾಯ್ರ್ ಘಾಲೆಂ ತರ್ ಭಾಯ್ಲ್ಯಾನ್ ಥಾವ್ನ್ ಜನೆಲಾಕ್ ದಾವ್ಲ್ಯೊ ಮಾರ್ನ್ ಮ್ಹಾಕಾ ಜಾಗಂವ್ಚಿ , ಸದಾಂ ಸಕಾಳಿಂ ಮಾಮ್ಮಿ ಆದಾನ್ ದವರುಂಕ್ ಉಟ್ತಾನಾ ಮ್ಹಜ್ಯಾ ಹಾಂತುಳ್ನಾ ಲಾಗಿಂ ಯೇವ್ನ್, ಮ್ಹಜ್ಯಾ ತಕ್ಲೆಕ್ ಘಷ್ಟುನ್ ಮ್ಹಾಕಾ ಉಟಂವ್ಚಿ ತಾಚಿ ಸವಯ್! ಧವ್ಯಾ ರಂಗಾಚಿ ಲೋಂವ್ ಆಂಗಾರ್ ಪಾಂಗ್ರುನ್, ಜಲ್ಮಾನ್ ದೋನ್ ರಂಗಾಚೆ ದೊಳೆ ಘೆವ್ನ್ ಆಯಿಲ್ಲೆಂ ತೆಂ ಕೊಣಾಯ್ಕೀ ಆಂವಡ್ತಾಲೆಂ. ತಾಚ್ಯಾ ಸೊಭಾಯೆಕ್ ಭುಲೊನ್ ಜಾಯ್ತೆ ಬೊಕುಲ್ ಜೊಕ್ತ್ಯಾ ವೆಳಾರ್ ಯೇವ್ನ್ ಆಂಯ್ಡೆ ಗಳಯ್ತಾಲೆ. ಜಾಯ್ತ್ಯಾ ಪಾವ್ಟಿಂ ಆವಯ್ ಜಾಲ್ಲ್ಯಾ ತಾಣೆ ಸಬಾರ್ ಪಿಲಾಂಕ್ ಜಲ್ಮ್ ದಿಲಾ ಆನಿ ವೆವೆಗ್ಳ್ಯಾ ಗಾಂವಾಕ್ ಪಾವಯ್ಲಾಂ. ಧಾ ವರ್ಸಾಂಚಿ ಲಾಂಬ್ ಜಿಣಿ ಸಂಪೊನ್ ಬೋವ್ ಅಸ್ಕತ್ ತೆಂ ಜಾಲ್ಲೆಂ. "ಆಮ್ಚೆಂ ಮಾಜಾರ್ ಮೆಲೆಂ" ಮ್ಹಣ್ ಮಾಮ್ಮಿನ್ ಮ್ಹಾಕಾ ಫೊನಾರ್ ಸಾಂಗ್ತಾನಾ ಬೋವ್ ಬೆಜಾರ್ ಜಾಲ್ಲೆಂ. ಜಾಯ್ತ್ಯೊ ಯಾದಿ ಜೀವ್ ದವ್ರುನ್ ತೆಂ ಮಾತ್ರ್ ನಿರ್ಜೀವ್ ಜಾಲ್ಲೆಂ.

ಬಿಲ್ಲುಚ್ಯಾ ಧಾ ವರ್ಸಾಂಚ್ಯಾ ಜಿಣ್ಯೆರ್ ತಾಕಾ ಚಿನ್ನುಚೊಯ್ ಸಾಂಗಾತ್ ಮೆಳ್ಳಾ. ಪೆಟ್ಯಾಕ್ ಆನಿ ಮಾಜ್ರಾಂಕ್ ಮಧ್ಲ್ಯಾನ್ ಉಜೊ ವಚಾನಾ ಮ್ಹಳ್ಳ್ಯಾ ಸಾಂಗ್ಣೆಕ್ ಆಡ್ ವೆಚೆಂ ಬಾಂಧವ್ಯ್ ಆಮ್ಚ್ಯಾ ಚಿನ್ನುಚೆಂ ಆನಿ ಬಿಲ್ಲುಚೆಂ. ಘರ್ಚ್ಯಾ ವಠಾರಾಂತ್ ಬಿಲ್ಲುನ್ ರಾಜ್ ಚಲಂವ್ಚಾ ವೆಳಾ ಲ್ಹಾನ್ ಪುಡ್ಪುಡಿತ್ ಕುಕುರ್ ಜಾವ್ನ್ ಚಿನ್ನುಚೆಂ ಯೆಣೆಂ ಜಾಲ್ಲೆಂ. ಎಕ್ಸುರ‍್ಯಾ ಚಿನ್ನುನ್ ಖೆಳೊಂಕ್ ಬಿಲ್ಲು ಕಡೆ ತಮಾಶೆ ಕರ್ತಾನಾ ಸುರ್ವೆರ್ ದಾವ್ಲಿ ಮಾರ್‌ಲ್ಲೆಂ ಬಿಲ್ಲು ಉಪ್ರಾಂತ್ಲ್ಯಾ ದಿಸಾನಿಂ ಚಿನ್ನುಚೆರ್ ಮೊವಾಳ್‍ಲ್ಲೆಂ. ಧವ್ಯಾ ರಂಗಾಚ್ಯಾ ಲೊಂವೆನ್ ನೆಸ್‌ಲ್ಲಿಂ ಚಿನ್ನು ಆನಿ ಬಿಲ್ಲು ಆಮ್ಚಾ ಘರ್ಚಾ ಬಾಗ್ಲಾಕ್ ಸೊಭಾಯ್ ಜಾವ್ನ್ ವರ್ತೊವ್ತಾಲಿಂ. ಚಿನ್ನುನ್ ಬಿಲ್ಲುಕ್ ತವಳ್ ತವಳ್ ಚಿಡಾಯ್ತಾನಾ ಕಿತ್ಲೆಶೆ ಪಾವ್ಟಿಂ ’ಪೆಟ್ಯಾನ್ ಮಾಜ್ರಾಕ್ ಲಗಾಡ್ ಕಾಡ್ಲೆಂ’ ಮ್ಹಣ್ ಬೋಬ್ ಜಾಲ್ಲಿ ಆಸಾ!! ಪೂಣ್ ಥೊಡ್ಯಾಚ್ ವೆಳಾನ್ ದೊಗಾಂಯ್ ಸಾಂಗಾತಾ ಬಸ್ತಾಲಿಂ. ಚಿನ್ನುಕ್ ರಾಗ್ ಚಡ್, ಪೊಕ್ರಿ ಪಣಾಂ ಜಾಯ್ತಿಂ ಪೂಣ್ ಘರ್ಚ್ಯಾ ವಸ್ತುಂಕ್ ಭಾಯ್ಲ್ಯಾ ಮನ್ಶಾಂಕ್ ಹಾತ್ ಲಾಂವ್ಕ್ ಸೊಡಿನಾತ್‌ಲ್ಲೊ. ಎಕಾ ರಾತಿಂ ಗುಡಾಂತ್ ಪೊಸ್‍ಲ್ಲೊ ಸೊಂಸೊ ಧಾವ್‌ಲ್ಲ್ಯಾ ವೆಳಾ ಪಾಟ್ಲ್ಯಾನ್ ಧಾವೊನ್ ಸೊಂಸ್ಯಾಚಾ ಗೊಮ್ಟ್ಯಾಕ್ ಧರ್ನ್ ಕಿತೆಂಚ್ ಮಾರ್ ಜಾಯ್ನಾಸ್ತಾನಾ ಪಾಟಿಂ ಗುಡಾಲಾಗಿಂ ಮ್ಹಜ್ಯಾ ಹಾತಾಂತ್ ಹಾಡ್ನ್ ದಿಲ್ಲ್ಯಾ ಚಿನ್ನುಚಾ ಹುಶಾರ್ಕಾಯೆವಿಶಿಂ ಕಿತ್ಲೆಂ ವರ್ಣಿಲ್ಯಾರೀ ಉಣೆಂಚ್!!

ರಜೆಚಾ ದಿಸಾನಿಂ ಸಕಾಳಿಚೆಂ ಇಲ್ಲೆಂ ತಡವ್ ಕರ್ನ್ ಉಟ್ಯಾಂ ಮ್ಹಣ್ ಮ್ಹಜ್ಯಾ ಭಯ್ಣಿನ್ ಆಳ್ಸಾಯ್ ದಾಕಯ್ಲ್ಯಾರ್ ಭಿತರ್ ಯೇವ್ನ್ ವೋಲ್ ವೋಡ್ನ್ ಉಟಯ್ತಾಲೊ. ಸದಾಂ ದನ್ಪಾರಾಂಚೆ ಭಾಯ್ರ್ ಸೊಪ್ಯಾಚೆರ್ ನಿದ್ಚಾ ತಾಕಾ ಭಿತರ್ ಚೊವ್ಕೆಂತ್ ಫ್ಯಾನಾಚೊ ಆವಾಜ್ ಆಯ್ಕಾಲೊ ತರ್ ಪಪ್ಪಾಚಾ ಭಿಯಾಕ್ ಹಳೂ ಚೊರ‍್ಯಾಂ ಪೋಟ್ ವೊಡ್ನ್ ಭಿತರ್ ಯೇವ್ನ್ ಪಾಯ್ ಸೊಡ್ನ್ ನಿದ್ಚ್ಯಾ ಚಿನ್ನುಕ್ ಆಜೂನ್ ಘರಾ ಗೆಲೊಂ ತರ್ ವಿಸ್ರಾನಾ! ತಾಕಾ ನಾಣ್ ದೀಂವ್ಕ್, ಜಾಲ್ಲ್ಯಾ ಘಾಯಾಂಕ್ ವೊಕಾತ್ ಲಾಂವ್ಕ್ ಮ್ಹಾಕಾ ಮಾತ್ರ್ ಆವ್ಕಾಸ್, ಹೆರಾಂಕ್ ಘಾಸಾಂಚಿ ರಾಸ್! ಎಕ್ ಪಾವ್ಟಿಂ ಚುಕೊನ್ ಪಪ್ಪಾಚ್ಯಾ ಹಾತಾಕ್ ತಾಚೊ ದಾಂತ್ ಲಾಗ್‍ಲ್ಲೊ, ’ಕಾಡ್ತಾಂ ತುಕಾ ಲಗಾಡ್.....!’ ಮ್ಹಳ್ಳ್ಯಾ ಪಪ್ಪಾಚ್ಯಾ ರಾಗಾಚಾ ದೆಂಕ್ಣ್ಯಾಕ್ ಭಿಯೆವ್ನ್ ಘರ್ ಸೊಡ್ನ್ ಗೆಲ್ಲೊ ಚಿನ್ನು ತೀನ್ ದಿಸಾಂ ಉಪ್ರಾಂತ್ ರಾನಾಂತ್ ಪಳೆಂವ್ಕ್ ಮೆಳ್‌ಲ್ಲೊ. ’ತುಕಾ ಕಾಂಯ್ ಕರ್ನಾರೆ ಘರಾ ವಚ್’ ಮ್ಹಣ್ ಪಪ್ಪಾನ್ ಸಾಂಗ್ತಚ್ ವಾರ‍್ಯಾ ವೆಗಾನ್ ಘರಾ ಪಾವ್‍ಲ್ಲ್ಯಾ ಚಿನ್ನುವಿಶಿಂ ಆನಿ ಕಿತೆಂ ಸಾಂಗೊಂ?.

ಜಾಲ್ ಜಾಡ್ತಾನಾ ಸಾರ್ಣಿ ಕುಂಟೊ ಧರ್ಚೊ, ಆರಾಯಿಲ್ಲೊ ಕೋಯ್ರ್ ಪಿಸ್ಳಾಂವ್ಚೊ, ಪೊಪ್ಳಾಂಚಿ ರಾಸ್ ದೆಸ್ವಾಟ್ ಕರ‍್ಚಿಂ ಪೊಕ್ರಿಪಣಾಂ ಆಮ್ಚ್ಯಾ ಚಿನ್ನುಕ್ ಸದಾಂಚಿ. ಧಾರುಣ್ ಕಾಳ್ಜಾಚ್ಯಾ ಹೀನಾಯ್ ಕ್ರತ್ಯಾಂಕ್ ಗೊಮ್ಟ್ಯಾಕ್ ಕೊಯ್ತೆಚೊ ಮಾರ್ ಕರ್ನ್ ಎಕ್ ಪಾವ್ಟಿಂ ಮರ್ಣಾಂತ್ಲೊ ವಾಂಚ್‍ಲ್ಲೊ ಚಿನ್ನು ದುಸ್ರ್ಯಾ ಪಾವ್ಟಿಂ ತ್ಯಾಚ್ ಕ್ರತ್ಯಾಂಕ್ ಸಂಸಾರ್ ಸಾಂಡುನ್ ಗೆಲ್ಲೊ!

ತುಮ್ಚ್ಯಾ ಜಿಣ್ಯೆಂತೀ, ತುಮ್ಚ್ಯಾ ಘರಾನಿಂ ತುಮಿ ಮೊಗಾನ್ ಪೊಸ್‌ಲ್ಲ್ಯಾ ಪೊಸ್ಕ್ಯಾ ಮೊನ್ಜಾತಿ ಸಂಗಿಂ ತುಮ್ಕಾಂ ಅಸಲೊಚ್ ಅನ್ಬೋಗ್ ಜಾಲಾ ಆಸ್ತಲೊ. ಮೊಗಾನ್ ಪೊಸ್‍ಲ್ಲ್ಯಾ ಮುಗ್ಧ್ ಮೊನ್ಜಾತಿಂ ಥಾವ್ನ್ ಪಾಟಿಂ ಮೆಳ್ಚೊ ಮೋಗ್ ವೆಗ್ಳ್ಯಾಚ್ ಥರಾಚೊ. ತೊ ಮೋಗ್, ದಿಲ್ಲ್ಯಾ ಮೊಗಾಕ್ ಖಾಲ್ತೆಪಣಾನ್ ಮೊಸೊರ್ ನಾಸ್ತಾಂ ಪಾಟಿಂ ಮೆಳ್ಚೊ. ರಾಗ್, ಮೊಸೊರ್, ಹಗೆಂ, ವಡ್ಪಣ್ ಮತಿಂತ್ ದವುರುನ್ ಮನ್ಶ್ಯಾಪಣಾಕ್ ಮೋಲ್ ದೀನಾಸ್ತಾನಾ ಜಿಯೆಂವ್ಚ್ಯಾಂಕ್ ಹ್ಯಾ ಮುಗ್ಧ್ ಮನ್ಜಾತಿ ಥಾವ್ನ್ ಶಿಕಜಯ್ ಜಾಲ್ಲೆಂ ಲಿಸಾಂವ್ ಜಾಯ್ತೆಂ ಆಸಾ.

ಕಿತೆಂಚ್ ಅಪ್ರಾಧ್ ನಾತ್‍ಲ್ಲ್ಯಾ ಮುಗ್ಧ್ ಮನ್ಜಾತಿಂಕ್ ಮನ್ಶ್ಯಾಪಣ್ ವಿಸ್ರುನ್ ಹಿಂಸಾ ದಿಂವ್ಚ್ಯಾ, ಜೀವ್ ಕಾಡ್ಚ್ಯಾ ಧಾರುಣ್ ಕಾಳ್ಜಾಚ್ಯಾಂಕ್ ಮಾತ್ರ್ ಕಿತೆಂ ಸಾಂಗ್ಚೆಂ ತೆಂ ಮ್ಹಾಕಾ ಕಳಿತ್ ನಾಂ.

- ಸನ್ನು ನಿಡ್ಡೋಡಿ