ಏಕ್ ಸ್ತ್ರೀಯೆಚ್ಯಾ ಗಳ್ಯಾಂತ್ ಕರಿಯಮಣಿ ಆನಿ ಬೊಟಾಂತ್ ರೆಸ್ಪೆರಾಚಿ ಮುದಿ ಆಸ್ಲ್ಯಾರ್ ತ್ಯಾ ಸ್ತ್ರೀಯೆ ವಯ್ರ್ ಹೆರ್ ದಾದ್ಲ್ಯಾಂಚಿ ದೀಷ್ಟ್ ಬದ್ಲಾತಾ ಆನಿ ತಿ ಸ್ತ್ರೀ ‘ಕಾಜಾರಿ’ ಮ್ಹಣ್ ಹರ‍್ಯೇಕ್ ದಾದ್ಲೆ, ಸ್ತ್ರೀಯೆಕ್ ಗೌರಾವಾನ್ ಲೆಕ್ತಾತ್. ಏಕ್ ಆಂಕ್ವಾರ್ ಚಲಿ ಎಕಾ ಚಲ್ಯಾ ಥಂಯ್ ಆಕರ್ಷಿತ್ ಜಾವ್ನ್ ತೆಂ ಆಕರ್ಷಣ್ ಮೊಗಾಂತ್ ಬದ್ಲಾತಾನಾ, ತೊ ಮೋಗ್ ವ್ಯಕ್ತ್ ಕರುಂಕ್ ಪೆಚಾಡುನ್ ಕಷ್ಟತಾ ಆನಿ ಆಪ್ಲ್ಯಾಚ್ಚ್ ಕಾಳ್ಜಾಂತ್ ಲಿಪಾಯ್ತಾ. ಪುಣ್ ಚಲ್ಯಾಕ್ ಚೆಡ್ವಾಚೊ ಮೋಗ್ ಸಮ್ಜಲ್ಯಾರ್ ಮಾತ್ರ್ ತೊ ‘ಮೋಗ್’ ಜಿಕೊಂಕ್ ಸಕ್ತಾ. ಲಜ್, ಭ್ಯೆಂ, ಕಾವ್ಜೆಣಿ ಎಕಾ ಚಲಿಯೆಚಿ ಸೊಭಯ್ ಚಡೊಂಕ್ ಸಕ್ತಾ.

ವ್ಹಡಿಲಾಚಿಂ ಆನಿ ಕುಟ್ಮಾಂಚಿ ಮರ‍್ಯಾದ್ ಉರೊಂವ್ಚ್ಯಾ ಚಿಂತ್ಪಾಂತ್ ತಾಚೆ ಥಂಯ್ ಉಬ್ಜಲ್ಲೊ ಮೋಗ್ ಲಿಪೊವ್ನ್ ಮೌನ್‌ಪಣಾಚ್ಯಾ ಜಿವಿತಾಂತ್ ಕಷ್ಟೊಂಚೆಂ ಯುವ ಜನಾಂಗ್ ಆತಾಂ ನಪಂಯ್ಜ್ ಜಾವ್ನ್, ಲಜೆವಿಣೆಂ, ಶಿಕಾಪ್ ಚಡ್‌ಲ್ಲ್ಯಾ ಸಂಸಾರಾಂತ್ ಅಪುಣ್ ಕಾಜಾರಿ ಸ್ತ್ರೀ ವಾ ದಾದ್ಲೊ ಮ್ಹಣ್ ಹೆರಾಂಕ್ ಕಳೊಂಕ್ ನಜೊ ಮ್ಹಳ್ಳ್ಯಾ ಆಧುನಿಕ್  ಚಿಂತ್ಪಾಚ್ಯಾ ಸಮಾಜೆಂತ್ ಆಮಿ ಜಿಯೆವ್ನ್ ಆಸಾಂವ್. ಆಪ್ಲ್ಯಾಚ್ಚ್ ಮರ್ಜೆಚೆಂ ಜಿವಿತ್ ಜಿಯೆಂವ್ಚೆಂ ಚಲೆ ಆನಿ ಚಲಿಯೊ ವಾಯ್ಟ್ ವಾಟೆಕ್ ವಚೊನ್, ಕುಟ್ಮಾಂ ಮರ‍್ಯಾದ್ ಪಿಡ್ಡಾರ್ ಕರ‍್ತಾತ್ ಮಾತ್ರ್ ನ್ಹಯ್ ಆಸ್ತಾಂ, ಆಪ್ಣಾಚೆಂ ನಿಸ್ಕಳ್‌ಪಣ್ ಹೊಗ್ಡಾವ್ನ್ ಘೆತಾತ್.

ಮೋಗ್ ಕಿತ್ಲ್ಯಾ ವೆಗಿಂ ಉಬ್ಜಾತಾಗೀ, ತಿತ್ಲ್ಯಾಚ್ ವೇಗಾನ್ ನಪಂಯ್ಚ್ ಜಾತಾ. ಮೊಬೈಲಾಂತ್ ಮೆಸೆಜ್ ಧಾಡ್ನ್ ಡಿಲಿಟಿ ಕೆಲ್ಲ್ಯಾ ತಿತ್ಲೆಂ ಸಲೀಸ್ ಜಾವ್ನಾಸಾ ಆತಾಚೆಂ ಆಕರ್ಷಣ್. ಆಯ್ಚ್ಯಾ ಆಧುನಿಕ್ ಸಮಾಜೆಂತ್ ಚಡ್‌ಲ್ಲೊ ಅನೈತಿಕ್ ಸಂಬಂಧ್ ಕುಟ್ಮಾಂ ಜಿವಿತಾಕ್ ನಾಲಿಸಾಯ್ ಹಾಡ್ಚೆ ತಸಲೊ. ವ್ಹಡಿಲಾಂಚ್ಯಾ ಒತ್ತಾಯೆಕ್ ಆಪ್ಣಾಂಕ್ ಪಸಂಧ್ ನಾತ್‌ಲ್ಲೆಂ ಕಾಜಾರ್ ಜಾವ್ನ್, ಉಪ್ರಾಂತ್ ಆಪುಣ್ ಮೋಗ್ ಕೆಲ್ಲ್ಯಾ ಸಂಗಿಂ ಧಾಂವೊನ್ ವೆಚಿಂ ಘಡಿತಾಂ ಚಡೊನ್ ಆಯ್ಲ್ಯಾತ್. ಲಗ್ನಾ ಜಿವಿತಾಂತ್ ‘ಅಪ್ರಾದ್’ ಚಡೊನ್ ಆಸಾತ್. ಮೊನ್ ನಾತ್‌ಲ್ಲಿ ಪತಿಣ್ ವ ಪತಿಕ್ ವಿಚ್ಛೆಧನ್ ದಿಂವ್ಚ್ಯಾ ಬದ್ಲಾಕ್ ಲಗಾಡ್ ಕಾಡ್ಚಿಂ ಘಡಿತಾಂಯಿ  ಆಮಿಂ  ಮಾದ್ಯಮಾಂನಿ ಆನಿ ದಿಸಾಳ್ಯಾ ಪತ್ರಾಂನಿ ಸದಾನಿಂತ್ ಪಳೆತಾಂವ್ ಆನಿ ವಾಚ್ತಾಂವ್.

ಕಾಜಾರ್ ಜಾವ್ನ್, ಹೆರ್ ದಾದ್ಲೊ ವ ಸ್ತ್ರೀಯೆಚ್ಯಾ ಮೊಗಾ ಸಂಬಂಧಾಂತ್ ದುಸ್ರ್ಯಾ ಸಂಗಿಂ ಸಂಬಂಧ್ ದವರ‍್ಚೆಂ ಚುಕ್ ನ್ಹಂಯ್ ಮ್ಹಣ್ ಕೊಡ್ತಿ ಥಾವ್ನ್  ತೀರ್ಪ್ ಲಾಬ್‌ಲ್ಲ್ಯಾ ಉಪ್ರಾಂತ್ ತೆಂಚ್ಚ್ ಏಕ್ ಪ್ಯಾಶನ್ ಜಾವ್ನ್ “ಪೊಳಾಪಳ್ ಘೆಂವ್ಚಿ“ ಪಿರ‍್ಯಾದ್ ಚಡೊನ್ ಆಯ್ಲ್ಯಾತ್. ಆತಾಂಚ್ಯಾ ಕಾಳಾರ್ ಕಾಜಾರ್ ಕಠಿಣ್ ಆನಿ ವ್ಯಭಿಚಾರ್ ಸುಲಭ್ ಜಾಲಾ ಆನಿ ತ್ಯಾಚ್ಚ್ ಕಾಳಾಂತ್ ಆಮಿ ಜಿಯೆವ್ನ್ ಆಸಾಂವ್. ಪ್ರಸ್ತುತ್ ಕಾಜಾರ್ ಜಾಂವ್ಕ್ ಪಾವೊತೊ ಚಲೊ ವ ಚಲಿ ಲಾಭಾನಾಂತ್.

ದೊತಿಚ್ಯಾ ಸಮಸ್ಯಾಂಕ್ ದುಬ್ಳಾಚ್ಯಾ ಘರ‍್ಚಿ ಚಲಿ ಆಂಕ್ವಾರ್ ಉರ‍್ತಾ. ಆಪ್ಲ್ಯಾ ಭಯ್ಣಿಚೆಂ ಕಾಜಾರ್ ಜಾಯ್ನಾಸ್ತಾನಾ ಭಾವ್ ಕಾಜಾರ್ ಜಾಂವ್ಕ್ ಆವ್ಕಾಸ್ ನಾಸ್ತಾಂ ಆಂಕ್ವಾರ್ ಉರ‍್ತಾತ್. ಹಾಚೊ ಪರಿಣಾಮ್ ಜಾವ್ನ್ ಆನೈತಿಕ್ ಸಂಬಂಧ್ ಚಡೊನ್ ಯೆತಾತ್, ಕುಟ್ಮಾಂ ಭಿತರ್‌ಚ್ ಲೈಂಗಿಕ್ ಶೋಷಣಾಕ್ ಒಳಗ್ ಜಾವ್ನ್,  ಸಭಾರ್  ಘಡಿತಾಂ ಪರ್ಗಟ್ ಜಾಯ್ನಾಸ್ತಾನಾ ಲಿಪೊನ್ ವೆತಾತ್. ಕಾಜಾರ್ ಜಾಯ್ನಾಸ್ತಾನಾ, ಜಲ್ಮಾಲ್ಲಿಂ ಭುರ್ಗಿಂ ಆಪ್ಲ್ಯಾ ಬಾಪಾಯ್ಚೆಂ ನಾಂವ್ ಸಾಂಗ್ಚೆಂ ಹಕ್ಕ್ ಹೊಗ್ಡಾವ್ನ್ ಘೆತಾತ್. ಆನಿ ಹೆರ್ ಸಭಾರ್ ಸ್ತ್ರೀಯೊ ಆನಿ ಚಲಿಯೊ ಆಪ್ಣಾಚ್ಯಾ ಖರ್ಚಾಕ್ ಪಯ್ಶೆಂ ನಾಸ್ತಾನಾ ಪಯ್ಶಾಚ್ಯಾ ಆಶೆಕ್ ಆಪ್ಲಿ ಮೊಲಾಧಿಕ್ ನಿಸ್ಕಳ್ ಕೂಡ್ ವಿಕುಂಕ್ ತಯಾರ್ ಜಾತಾತ್ ಮಾತ್ರ್ ನ್ಹಂಯ್, ಸಮಾಜೆಂತ್ ನಾಲಿಸಾಯೆಂತ್ ಜಿಯೆತಾತ್. ಥೊಡಿಂ ಸೈರಿಕ್ಯೊ ಕರ್ಚಿಂ ಮ್ಹಾಲೊ ಆನಿ ಮ್ಹಾಲಿಣ್ಯೊ  ಪಯ್ಶಾಂಚ್ಯಾ ಆಶೆಕ್, ‘ಚಲಿಯೆಕ್ ಏಕ್ ಚಲೊ ವ ಚಲ್ಯಾಕ್ ಏಕ್ ಚಲಿ’ ಜೊಕ್ತಿ ನ್ಹಂಯ್ ಮ್ಹಣ್ ಜಾಣಾ ಆಸೊನೀ ತಾಂಚೆಂ ಉಣೆಂಪಣ್ ಲಿಪೊವ್ನ್ ದವರ‍್ನ್ ಸೈರಿಕ್ ಕರ್ಚೆಂ, ತಾಂಚ್ಯಾ ಸೆವೆಚ್ಯಾ ಮನೋಭಾವಾಕ್ ಕಳಂಕ್ ಜಾತಾ. ಹ್ಯಾ ದ್ವಾರಿಂ ಪ್ರಾಮಾಣಿಕ್ ಸೈರಿಕ್ ಮಾಲ್ಯಾಕ್ ಸೈರಿಕ್ ಕರುಂಕ್ ಕಷ್ಟ್ ಭೊಗ್ತಾತ್.

ಲಗ್ನ್ ಜಾವ್ನ್ ಆಪ್ಲೊ ಪತಿ ಪರ್ಗಾವಾಂತ್ ವಾವ್ರ್ ಕರ‍್ತಾನಾ, ಗಾಂವಾತ್ ಆಸ್‌ಲ್ಲಿ ಬಾಯ್ಲ್ ದುಸ್ರ್ತಾ ದಾದ್ಲಾ ಸಂಗಿಂ ಸಂಬಂಧ್ ದವರ‍್ನ್ ಘೆತಾತ್. ಪತಿಕ್ ಹೆ ವಿಷಯ್ ಕಳಿತ್ ಜಾವ್ನ್ ಆಪ್ಲ್ಯಾ ಪತಿಣೆಕ್ ವಿಚ್ಛೇದನ್ ದೀಂವ್ಕ್ ಮುಕಾರ್ ಸರ‍್ತಾನಾ, ಕೊಡ್ತಿಂತ್ಲ್ಯಾ ತೀರ್ಪ್ ಪರ್ಮಾಣೆಂ ಪತಿಣೆಕ್ ದುಡು ದೀಂವ್ಕ್ ತಾಂಕ್ ನಾಸ್ತಾನಾ, ವಿಚ್ಛೇದನ್ ದೀಂವ್ಕ್ ದಾದ್ಲೊ ಕಷ್ಟಾತಾ. ಹ್ಯಾ ವೆಳಿ ತಿ ಸ್ತ್ರೀ ‘ಲಿವಿಂಗ್ ಇನ್ ರಿಲೆಷನ್‍ಶಿಪ್’ ಮ್ಹಳ್ಳ್ಯಾ ಸುಖಾಂತ್ ಜಿಯೆತಾ. ಪುಣ್ ಪತಿ ಎಕ್ಸುರೊ ಮಾನಸಿಕ್ ಜಾವ್ನ್ ಕಷ್ಟೊಂಚಿ  ಘಡಿತಾಂ ಆಮಿ ಜಾಣಾಂವ್.

ಜೊಡ್ಯಾಂನಿ ಕ್ಷಣಿಕ್ ಸುಖ್ ಆನಿ ಮೊಗ್ ಮ್ಹಳ್ಳ್ಯಾ ಜಾಳಾಂಕ್ ಶಿರ್ಕೊನ್ ಪಡ್ಚ್ಯಾ ಪಯ್ಲೆಂ ಚಿಂತುನ್ ಪಳೆಜಾಯ್. ಭುರ್ಗ್ಯಾಂಕ್ ಸಾಡುನ್, ಕುಟ್ಮಾಂದಾರಾಂ ಥಾವ್ನ್ ಪಯ್ಸ್ ವಚೊನ್, ಎಕಾ ದಾದ್ಲಾಚ್ಯಾ ವ ಸ್ತ್ರೀಯೆಚ್ಯಾ ಆಕರ್ಷಣೆಕ್ ವಳಗ್ ಜಾವ್ನ್ ಜಿವಿತ್‌ಚ್ಚ್ ನಾಸಾಕ್ ಘಾಲ್ಚ್ಯಾ ಪಯ್ಲೆಂ ಏಕ್ ಪಾವ್ಟಿಂ ಚಿಂತಿಜಯ್. ಆಸಲ್ಯಾ ಸಮಸ್ಯಾಂಕ್ ಶಿಕ್ಪಿಚ್ಚ್ ಸಾಂಪಾಡ್ತಾತ್. ಆಪ್ಣಾಲಾಗಿಂ ಆಸ್ಚೆಂ ಬಂಗಾರ್, ತರುಣ್ ಸೊಭಯ್, ಕ್ಷಣಿಕ್ ಆಶಾ ದಿತಾ. ‘ದವೆಂ ಆಸ್‌ಲ್ಲೆಂ ಸಕ್ಕಡ್ ದೂದ್ ನ್ಹಂಯ್’ ಗೊಡ್ಶಿ ಆನಿ ನಾಜೂಕ್ ಉತ್ರಾಂಚ್ಯಾ ಜಾಳಾಂಕ್ ಸಾಂಪಡ್ನ್ ಜಿವಿತ್ ವಿಬಾಡ್ ಕರಿನಾಕಾತ್.

ನ್ಹೆಸ್‌ಲ್ಲೆಂ ನ್ಹೆಸಾಣ್ ಜಾಂವ್, ವ್ಹಡ್ಲಿ ಗಾಡಿ ಜಾಂವ್ ವ ತಾಣೆಂ ದಾಖಯ್ಲಿಂ ಸ್ವಪ್ಣಾಂಚಿಂ ಉತ್ರಾಂ, ಪಟ್ಕಿರೊ ಭರ್ವಸೊ ಜಿವಿತಾಚ್ಯಾ ಆಕೇರ್ ಪರ್ಯಾಂತ್ ಲಾಭಾನಾ. ಹೆಂ ಕೇವಲ್ ಎಕಾ ಸ್ತ್ರೀಯೆಚಿ “ಕೂಡ್” ಆಪ್ಣಾಂವ್ಕ್ ಮಾತ್ರ್ ವ ಎಕಾ ದಾದ್ಲ್ಯಾಚಿ ‘ಪಯ್ಶೆಂ” ಪಿಳುಂಕ್ ಕರ್ಚೆಂ ಕುತಂತ್ರ್ ಜಾವ್ನಾಸಾ.

‘ಆಪ್ಣಾಂಕ್ ಲಗ್ನ್ ಜಾವ್ಕ್ಂಚ್ ನಾ’ ಮ್ಹಣ್ ಸಬಾರ್ ದಾದ್ಲೆ ಆಪ್ಣಾಚೆಂ ಕಾಜಾರ್ ಲಿಪೊವ್ನ್ ದವರ‍್ನ್, ಮೊಗಾ ಖೆಳ್ ಖೆಳ್ತಾತ್. ಸತ್ ಕಳಿತ್ ಜಾತಾನಾ, ಚೆಡ್ವಾಂಚಿ ಮಾನ್ ಮಾರ‍್ಯಾದ್ ಸಗ್ಳಿ ವೆತಾ ಆನಿ ಕಾಜಾರಿ  ಸ್ತ್ರೀಯೆಚೆಂ ಆನಿ ಆಂಕ್ವಾರ್ ಚೆಡ್ವಾಚೆಂ ಜಿವಿತ್ ನಾಲಿಸಾಯೆಚೆಂ ಜಾತಾ. ಕಪಟ್‌ಪಣಾಚೊ ಮೋಗ್ ಆಯ್ಚ್ಯಾ ಸಮಾಜೆಂತ್ ಚಡೊನ್ ಆಸಾ.

‘ಲಗ್ನ್’ ಏಕ್ ಪವಿತ್ರ್ ಸಾಕ್ರಾಮೆಂತ್. ಹ್ಯಾ ಸಾಕ್ರಾಮೆಂತಾಚೊ ಖರೊ ಅರ್ಥ್ ಸಮ್ಜೊಂಕ್ ಜಾಯ್. ಪವಿತ್ರ್ ಆಲ್ತಾರಿ ಮುಖಾರ್ ಆಮಿ ಕಿತೆಂ ಭಾಸ್ ದಿತಾಂವ್ ತೆಂ ತಾತ್ಕಾಲಿಕ್ ನ್ಹಂಯ್, ಬಗಾರ್ ಆಪ್ಲ್ಯಾ ಮರ್ಣಾಚ್ಯಾ ಆಕೇರ್ ಪರ್ಯಾಂತ್ ತಾಚೆಂ ಪವಿತ್ರ್‌ಪಣ್  ಸಾಬಾಳುಂಕ್ ಆಸಾ. ಹರ‍್ಯೇಕ್ ದಾದ್ಲ್ಯಾ ಆನಿ ಸ್ತ್ರೀಯೆ ಥಂಯ್ ಉಣೆಂಪಣ್ ಆಸ್ಚೆಂ ಸಹಜ್. ಸಂಪೂರ್ಣ್ ವ್ಯಕ್ತಿ ಹ್ಯಾ ಸಂಸಾರಾಂತ್ ಕೊಣ್‌ಚ್ ನಾ. ದೆಕುನ್ ದಾದ್ಲ್ಯಾ ಥಂಯ್ ಆಸ್‌ಲ್ಲೆಂ ಉಣೆಂಪಣ್ ಸ್ತ್ರೀಯೆನ್ ಭರ್ತಿ ಕರ‍್ನ್, ಸ್ತ್ರೀಯೆ ಥಂಯ್ ಆಸ್‌ಲ್ಲೆಂ ಉಣೆಂಪಣ್ ದಾದ್ಲ್ಯಾನ್ ಭರ್ತಿ ಕರ‍್ನ್ ಜಿಯೆಲ್ಯಾರ್ ಕಾಜಾರಿ ಜಿವಿತ್ ಸುಖಾಳ್ ಜಾತಾ ಆನಿ ಪರ್ಕಿ ದಾದ್ಲ್ಯಾ ಆನಿ ಸ್ತ್ರೀಯೆ ಥಂಯ್ ಆಕರ್ಷಣ್ ಉಣೆಂ ಕರುಂಕಿ ಆವ್ಕಾಸ್ ಲಾಭ್ತಾ.

ಕುಟ್ಮಾ ಆಯೋಗಾಚ್ಯಾ ತರ್ಫೆನ್ ಆಮ್ಚ್ಯಾ ಜಿವಿತಾಚ್ಯಾ ವಿವಿಧ್ ಪಾಂವ್ಡಾಕ್ ಕುಟ್ಮಾ ಜಿವಿತಾ ವಿಶಿಂ, ಲಗ್ನಾ ಭೆಸಾ ವಿಶಿಂ ಆಮ್ಕಾಂ ಲಾಬ್ಚಿ ತರ್ಬೆತಿ ಮುಖಾಂತ್ರ್ ಜಾಣ್ವಾಯ್ (ಕಾಜಾರಾಚಿ ಪಯ್ಶಿಲಿ ತಯಾರಾಯ್, ಲಾಗ್ಶಿಲಿಂ ತಯಾರಾಯ್ ಆನಿ ಲಗ್ನಾ ಪುರ್ವಿಲಿಂ ತಯಾರಾಯ್) ಆಮಿ  ರಾಜಾಂವಾರ್ ವಾಪ್ರುನ್ ಮುಕ್ಲ್ಯಾ ಜಿವಿತಾಕ್ ಸಾರ್ಕಿ ವಿಂಚೊವ್ಣ್ ಕರ‍್ನ್, ಬರೊ ಫುಡಾರ್ ಬಾಂಧುಂಕ್ ಪ್ರಯತ್ನ್ ಕರಿಜಾಯ್, ಆಮ್ಸೊರಾನ್, ದರ್ವಡೊನ್ ಸಾರ್ಕೆಂ  ವರೊವ್ನ್ ಪಳೆನಾಸ್ತಾನಾ, ಗ್ರೇಸ್ತ್‌ಕಾಯೆಕ್ ಆನಿ ಸವ್ಲಾತಾಯೆಕ್ ಪಿಸೊವ್ನ್ ಆಮ್ಚೊ ಫುಡಾರ್ ಆಮಿಂಚ್ ಹೊಗ್ಡಾವ್ನ್ ಘೆಂವ್ಚೊ ನ್ಹಂಯ್.

ದೆಕುನ್ ಹರ‍್ಯೇಕಾ ದಾದ್ಲ್ಯಾನ್ ಆನಿ ಸ್ತ್ರೀಯೆನ್ ಜಾಗ್ರೂತ್ ಜಾಯ್ಜಯ್. ಏಕ್ ಸ್ತ್ರೀ ದಾದ್ಲ್ಯಾಚ್ಯಾ ಪಯ್ಶಾಕ್ ಆಶೆತಾ ತರ್, ಏಕ್ ದಾದ್ಲೊ ಸ್ತ್ರೀಯೆಚ್ಯಾ ಕೂಡಿಕ್ ಆಶೆತಾ. ಹ್ಯಾ ಖಾತಿರ್, ಏಕ್ ದಾದ್ಲೊ ಚೆಡ್ವಾ ಖಾತಿರ್ ಆಪ್ಲ್ಯಾ ಪತಿಣೆಚಿ ಖುನ್ ಕರ‍್ತಾ ತಶೆಂಚ್, ಆಪುಣ್ ಆಶೆಲ್ಲ್ಯಾ ದಾದ್ಲ್ಯಾಕ್ ವೆಂಗುಂಕ್ ಆಪ್ಲ್ಯಾ ಪತಿಕ್ ಲಗಾಡ್ ಕಾಡುಂಕ್ ಮುಖಾರ್ ಸರ‍್ಚಿಂ ಆಯ್ಚ್ಯಾ ಸಮಾಜೆಂತ್ ಆಸಾತ್. “ಅಪ್ರಾದ್” ಖಂಯ್ಚ್ಯಾಯ್ ಭಿರಾತೆಂವಿಣೆಂ ಜಾಂವ್ಚ್ಯಾ ಹ್ಯಾ ಕಾಳಾರ್ ಆಮಿ ಆಸಾಂವ್. ದೆಕುನ್ ಆಮಿ ಜಾಗ್ರುತ್ ಜಾಯ್ಜಾಯ್. ಆಮ್ಚೊ ಆಮೂಲ್ಯ್ ಜೀವ್ ಆಮ್ಚ್ಯಾ ಹಾತಾಂತ್ ಆಸಾ. ಆಮಿಂಚ್  ತೊ ರಾಕೊನ್ ವರ್ನ್ ಆನಿ ಆಮ್ಚೆಂ ಲಗ್ನಾ ಜಿವಿತ್ ಸುಖಾಳ್ ಕರುಂಕ್ ಜಾಯ್.

ಲಗ್ನಾ ಬಾಂದಾಂತ್ ದೋನ್ ಕಾಳ್ಜಾಂ ಏಕ್ ಜಾಲ್ಲಿಂ ತಿ  ಮೊರ್ಣಾ ಪರ‍್ಯಾಂತ್ ಅಮರ್ ಉರಜಾಯ್. ದೆವಾನ್ ಜೊಡ್ಯಾಂಚೆರ್ ವಿಶ್ವಾಸ್ ದವರ್ನ್ ತಿಂ ಎಕಾಮೆಕಾಕ್ ಬರಿಂ ಸಾಂಗಾತಿ ವ ಸಾಂಗಾತಿಣ್ ಜಾಂವ್ಚ್ಯಾಕ್ ಎಕ್ವೊಟಾಂವ್ಕ್ ವಿಂಚ್ಲಾಂ, ದೆಕುನ್, ಲ್ಹಾನ್ ಲ್ಹಾನ್ ಸಂಗ್ತಿಂ ಖಾತಿರ್ ಲಗ್ನಾ ಸಾಕ್ರಾಮೆಂತಾಚೆಂ ಪವಿತ್ರ್‌ಪಣ್ ಹೊಗ್ಡಾವ್ನ್ ಘೆಂವ್ಚೆಂ ನ್ಹಂಯ್. ತ್ಯಾ ದೆಕುನ್ ಪವಿತ್ರ್ ಪುಸ್ತಕ್ ಸಾಂಗ್ತಾಂ “ದೆವಾನ್ ಜೊಡಿಲಾಂ ತೆಂ ಮನಿಸ್ ಮೊಡಿನಾ ಜಾಂವ್” (ಮಾರ್ಕ್ 10:9). ಹೆಂ ಉತರ್ ಆಮಿ ಆಮ್ಚ್ಯಾ ಮೊತಿಂತ್ ಆಟಾಪುನ್ ಜಿಯೆವ್ಯಾಂ ಆನಿ ಹೆರಾಂಕ್ ಆದರ್ಶ್ ವ್ಯಕ್ತಿ ಜಾವ್ಯಾಂ.

ಲವೀಟಾ ಡಿ’ಸೋಜ, ನಕ್ರೆ