Author
Preethi Seemaಸವಾಲಾಂ ಘಾಲ್ತಾತ್ ಮ್ಹಾಕಾ
ಖಂಯ್ ಥಾವ್ನ್ ಯೆತಾ ಮ್ಹಾಕಾ ಧನಾತ್ಮಕ್ಪಣ್?
ಕಶೆಂ ಹಾಂವ್ ಧಯ್ರಾದಿಕ್?
ಕಶೆಂ ಆಸ್ತಾಂ ಹಾಂವ್ ಸದಾಂಚ್ ಹಾಸೊನ್?
ಜಾಪ್ ದಿತಾಂ ಆಜ್ ಹಾಂವ್, ಆಯ್ಕಾ...
ಭ್ಯೆಂ ಮ್ಹಾಕಾಯ್ ದಿಸ್ತಾ
ವೊಜೆಂ ಖಾಂದ್ಯಾರ್ ಘೆವ್ನ್ ಹಾಂವ್ ಯೀ ಭೊಂವ್ತಾಂ
ಹಾಳ್ವಾಯ್ ಭೊಗ್ತಾ ಮ್ಹಜ್ಯಾ ವೊಜ್ಯಾಚೆ,
ದೆಕ್ತಾನಾ ದುಸ್ರ್ಯಾಂಚೆಂ ತೆಂ ವೊಜೆಂ ದೊಡ್ತ್ಯಾ ಜಡಾಯೆಚೆಂ
ಆರ್ಗಾಂ ದೀವ್ನ್ ಮುಕಾರ್ ಚಲ್ತಾ ಹಾಂವ್!
ಭೊಗ್ಣಾಂ ಮ್ಹಜಿಂಯ್ ದೊಳ್ಯಾಂತ್ಲ್ಯಾನ್ ವ್ಹಾಳ್ತಾತ್
ಉಶಿಂ ಹಾಂವ್ ಯೀ ಭಿಜಯ್ತಾಂ
ಮೊತಿಯಾಂ ಸಗ್ಳಿಂ ಜರವ್ನ್ ಜಾತಚ್
ದುಖಾಂ ಮ್ಹಜಿಂ ಖುದ್ದ್ ಪುಸ್ತಾಂ
ಉಟೊನ್ ಪರತ್ ಚಲ್ತಾಂ ಹಾಂವ್!
ಉಜೊ ಲಾಸ್ತಾ ಮ್ಹಜ್ಯಾಯ್ ಕಾಳ್ಜಾಂತ್
ಉಜ್ಯಾ ಧುಂವೊರಾಕ್ ಸ್ವಾಸ್ ಮ್ಹಜೊಯ್ ಬಾಂಧ್ತಾ
ಪಡ್ಲ್ಯಾರೀ ಪರತ್ ಉಟೊನ್
ತ್ಯಾ ಕಿಟಾಳಾಚ್ಯಾ ಹಾತಾಂತ್ ಸಂಪ್ಡಾನಾಸ್ತಾನಾ
ದಾರ್ವಾಟೊ ಸೊದುನ್ ಭಾಯ್ರ್ ಧಾಂವ್ತಾಂ ಹಾಂವ್!
ಚಿರ್ಡಲ್ಯಾಂತ್ ಮ್ಹಜಿಂಯ್ ಸಭಾರ್ ಸಪ್ಣಾಂ
ಮರೊನ್ ಪಡ್ಲಲ್ಯಾ ಭೊಗ್ಣಾಂಚಿ ಲೇಕ್ ನಾಂ
ಗುಂತ್ಲ್ಯಾಂತ್ ಸಭಾರ್ ನವಿಂ ಸಪ್ಣಾಂ
ವಿಭಾಡ್ ಕರುಂಕ್ ವೇಳ್ ನಾಂ,
ಚಿಂತುನ್ ಬಸೊನ್ ಫಾಯ್ದೊ ನಾಂ
ತಾಕಾಚ್ಚ್ ಹಾಸೊನ್ ಮುಕಾರ್ ವೆತಾಂ ಹಾಂವ್
ನೀಳ್ ಗಗನಾರ್ ಪರ್ಜಳ್ಚೆಂ ನಕ್ತಿರ್ ಹಾಂವ್
- ಪ್ರೀತಿ ಸೀಮಾ ಡಿ'ಸೋಜ, ಬಿಕರ್ನಕಟ್ಟೆ
Leave a comment