Author
Annu Kulshekarಗರ್ಭಾಂತ್ ಮ್ಹಜ್ಯಾ ಕಿರ್ಲೊನ್,
ವಾಡೊಂಕ್ ಜಾಯ್ ಆಸ್ಚಿ ಘಟಾಯ್ ದಿವುನ್,
ಸಾವ್ಳಿ ದಿಂವ್ಚ್ಯಾ ಮ್ಹಜ್ಯಾ ಬಾಳಾಕ್,
ತುಂವೆ ಕಾತರ್ತಾನಾ, ಮ್ಹಜೊ ಜೀವ್ ಯೆತಾ.
ತುಜ್ಯಾ ಕಾತಿಕ್ ಭಾದಾಕ್ ಜಾಯ್ನಾಶೆಂ ರಾಕ್ಚ್ಯಾಕ್,
ವಿಕಾಳ್ ಕಿರ್ಣಾಂ ಥಾವ್ನ್, ಪಾರೊತ್ ಕರ್ಚ್ಯಾಕ್,
ಮ್ಹಾಕಾಚ್ ಗುಟ್ಲಾವ್ನ್, ಪಾಂಗ್ರುನ್ ರಾವ್ಲೆಲ್ಯಾ,
ನಿಳ್ಯಾ ಪದರಾಕ್, ದೊಂಪ್ಳೊ ಕರ್ತಾನಾ, ಕಾಳಿಜ್ ಕಡ್ತಾ.
ಗಳೊ ಸುಕ್ತಾನಾ, ಆಂಗ್ ಮ್ಹೆಳ್ತಾನಾ,
ನಿತಳ್ ಕರ್ಚ್ಯಾಕ್, ತುಜ್ಯಾ ಪಿಳ್ಗೆನ್ ಧಾದೊಶಿ ಜಾಂವ್ಚ್ಯಾಕ್,
ತುಜೆರ್ ವೊತ್‍ಲ್ಲ್ಯಾ, ಮ್ಹಜ್ಯಾಚ್ ಅತ್ಮ್ಯಾ ಝರಿಕ್,
ತುವೆಂ ವಿದ್ರೂಪ್ ಕರ್ತಾನಾ, ಮ್ಹಜ್ಯಾ ರಾಗಾಚೊ ಭಾಂದ್ ತುಟ್ತಾ.
ತುಜ್ಯಾ ಸಂಪೂರ್ಣ್ ಯೆಳ್ಗೆಕ್, ಮ್ಹಾಕಾಚ್ ಖಾಲಿ ಕರ್ನ್,
ಸದಾಂಚ್ ತುಜೆಂ ಬರೆಪಣ್ ಆಶೆತಾನಾ,
ಮ್ಹಜೆರ್ ಚ್ ಹಲ್ಲೊ ಕರ್ನ್, ಮ್ಹಾಕಾ ದು:ಖಯ್ತಾನಾ,
ತುಜ್ಯಾ ಕರ್ನ್ಯಾಂಚೆರ್ ಹಾಂವ್ ರಾಗಾನ್ ಖತ್ಕತ್ತಾಂ.
ದಬಾವ್ ಚಡುನ್, ಹಾಂವೆ ರಾಗ್ ವೊಂಕ್ಲ್ಯಾರ್,
ತುಜೆ ಸಾಂಗಾತಾ, ತುಜಿ ಪಿಳ್ಗಿಚ್ ಕಾಂಪ್ತಾ!
ನಾಕಾ, ಮ್ಹಜ್ಯಾ ರಾಗಾಕ್ ತುಕುನ್ ವರಯ್ನಾಕಾ.
ತುಜೆ ಸಾಂಗಾತಾ, ಮೊಗಾನ್ ಜಿಯೆಂವ್ಚಿ ಆಶಾ ಮ್ಹಾಕಾ.
ಅನ್ನು ಕುಲ್ಶೇಕರ್
Leave a comment