ಸುವಿ

ಇಸಿಜಿ, ಬಿಪಿ, ಆಕ್ಸಿಜನ್ ಮೆಷಿನಾಚ್ಯಾ

ಬೀಪ್ ಬೀಪ್ ಸಬ್ದಾಮಧೆಂ

ಬಾವ್ಳ್ಯಾಕ್ ಪಟ್ಟಿ ಬಿಗ್ದುನ್

ನರ್ಸ್ ಅತುರಾಯೆನ್ ಶಿರ್ ಸೊಧ್ತಾ

ಹಾಲವ್ನ್, ದಾಂಬುನ್, ಪೊಶೆವ್ನ್,

ಹಳ್ವಾಯೆಚೊ ಏಕ್ ಮಾರ್ ದೀವ್ನ್

ತಿ ಸೊಧ್ತಾ, ತರೀ ತಿಚ್ಯಾ ಕಪಲಾರ್

ದುಬಾವಿ ದೆಂವ್ಚಾರಾಚ್ಯೊ ಮಿರಿಯೊ…

ಏಕ್ ಲ್ಹಾನ್ ಸುವಿ ಮ್ಹಣ್ ತಿಣೆ ಸಾಂಗ್ತಚ್

ಮಾಸಾಕ್ ಶಿಂದುನ್ ಸುವಿ ಕಾಳೊಕಾಂತ್

ಶಿರಾಂಚಿ ವಾಟ್ ಸೊಧ್ತಾ…

ಮುಕಾರ್ ಪಾಟಿಂ, ಹೆಣೆಂ ತೆಣೆಂ ಸಾಸ್ಪಲ್ಯಾರೀ

ಕಾಳೊಕಾಂತ್ ಸುವಿಯೆಕ್ ವಾಟ್ ಚುಕ್ತಾ

ಛೆ, ಶಿರ್ ಮೆಳ್ನಾ ಮ್ಹಳ್ಳ್ಯಾ ಉದ್ಗಾರಾಸವೆಂ

ಧಾಂಪ್ಲೆಲ್ಯಾ ಡಬ್ಬ್ಯಾಂತ್ ಫಾವೊ

ಸಿರಿಂಜಾಕ್ ಮರ್ಣಾಚಿ ಶಿಕ್ಷಾ…

ಹಾತಾಚಿ ಪಟ್ಟಿ ಪರ್ತುನ್ ಬಿಗ್ದಿತಾ

ಬೊಟಾಂಕ್ ಮ್ಹಜ್ಯಾ ಮೂಟ್ ಕರ್ನ್

ತಿ ಪರತ್ ಸೊಧ್ತಾ…

ಮ್ಹಜ್ಯಾ ಚಡ್ಲೆಲ್ಯಾ ಕಾಳ್ಜಾ ಉಡಿಯಾಂಕ್

ಇಸಿಜಿ ಮೆಶಿನ್ ವಯ್ರ್ ಸಕಯ್ಲ್ ನಾಚ್ತಾ

ತಿ ಪರ್ತುನ್ ಲ್ಹಾನ್ ಸುವಿ ಮ್ಹಣೊನ್

ಮಾಸಾಕ್ ಮ್ಹಜ್ಯಾ ಶಿಂದ್ತಾ.

ಬಚಾವ್… ಹ್ಯಾ ಪಾವ್ಟಿಂ ಶಿರ್ ಮೆಳ್ತಾ

ಖುಶೆನ್ ದೋನ್ ಸಿಸ್ಲಿ ರಗಾತ್ ಕಾಡ್ನ್

ಪಟ್ಟಿ ಸುಟಯ್ತಾ ಮೂಟ್ ಸೊಡಯ್ತಾ…

ಧವ್ಯಾ ಕಾಪ್ಸಾಕ್ ರಗ್ತಾಚೊ ತಿಳೊ ಲಾವ್ನ್

ಕಾಪ್ಸಾಕ್ ಕಾಳ್ಯಾ ತೊಟ್ಯಾಂತ್ ಬಂದಿ ಕರ್ತಾ…

ಮ್ಹಜಿ ಕಾಳ್ಜಾ ಉಡಿ ಅನಿಕೀ ನಾಚ್ತಾ

ಸರ್ಗಾಚ್ಯಾ ದಾರಾಕ್ ಠೊಕೆ ಮಾರ್ನ್

ಪಾಟಿಂ ಆಯ್ಲೊಂ ಮ್ಹಣ್ ಚಿಂತುನ್ ಅಮ್ರುಕೊ ಹಾಸ್ತಾನಾ

ಪಯ್ಶಿಲ್ಯಾನ್ ನರ್ಸ್ ಪರ್ತುನ್ ಯೆಂವ್ಚೆಂ ದಿಸ್ತಾ…

ಕಿರಣ್ ನಿರ್ಕಾಣ್

............................................

Suvi

isiji, bipi, aksizon mexinachea

bip bip sobdamodhem

baulleak pott'tti bigdun

nors oturayen xir sodhta

haloun, dambun, poxeun,

hollvayecho ek mar diun

ti sodhta, tori tichea kopolar

dubavi demvcharacheo mirio…

ek lhan suvi mhonn tinne sangtoch

masak xindun suvi kallokant

xiranchi vatt sodhta…

mukar pattim, hennem tennem saspoleari

kallokant suviek vatt chukta

chhe, xir mellna mholl'llea udgarasovem

dhamplelea ddobbeant favo

sirinzak mornnachi xikxa…

hatachi pott'tti portun bigdita

bottank mhojea mutt korn

ti porot sodhta…

mhojea choddlelea kallza uddiank

isiji mexin voir sokoil nachta

ti portun lhan suvi mhonnon

masak mhojea xindta.

Bochavo… hea pauttim xir mellta

khuxen don sisli rogat kaddn

pott'tti suttoita mutt soddoita…

dhovea kapsak rogtacho tillo laun

kapsak kallea totteant bondi korta…

mhoji kallza uddi oniki nachta

sorgachea darak tthoke marn

pattim ailom mhonn chintun omruko hastana

poixilean nors portun yemvchem dista…

Kiran Nirkan