Monica Mathias, Moodubelle.

ಮೊನಿಕಾ ಮಥಾಯಸ್, "ಮೊನಿಕಾ ಶಾಂತಿಪುರ್" ಆನಿ “ಮೊನಿಕಾ ಮಥಾಯಸ್ ಮೂಡುಬೆಳ್ಳೆ” ಲಿಖ್ಣೆನಾಂವಾಖಾಲ್ 1995 ವರ್ಸಾ ಥಾವ್ನ್ ಕೊಂಕ್ಣೆಚಾ ವೆವೆಗ್ಳ್ಯಾ ಪತ್ರಾಂನಿ ಕಾಣಿಯೊ ಬರೊವ್ನ್ ಆಸಾ. 1998 ತೆ 1999 ಹ್ಯಾ ಆವ್ಧೆಂತ್ ಪನ್ನಾಸಾಂಚಾಕೀ ಚಡಿತ್ ಮಟ್ವ್ಯೊ ಕಾಣಿಯೊ ಬರವ್ನ್, ಕೊಂಕ್ಣಿ ಕಥಾಸಾಹಿತ್ಯಾಕ್ ಬರ್ಪೂರ್ ಯೋಗ್‌ದಾನ್ ದಿಲ್ಲಿ ಮೊನಿಕಾ ಮಥಾಯಸ್, ಕೊಂಕ್ಣೆಂತ್ ಮಾತ್ ನಯ್, ಹಿಂದೀ ತಶೆಂ ಕನ್ನಡ ಭಾಶೇಂತೀ ತಿ ಕಾಣಿಯೊ ಬರಯ್ತಾ.

ಮೊನಿಕಾ ಡೆಸಾ ಮಥಾಯಾಸ್, ಗಾಂವಾನ್ ಪಾಂಬೂರ್‌, ಆತಾಂ ಮೂಡುಬೆಳ್ಳೆ (ಬೊಳಿಯೆ). ಪ್ರಸ್ತುತ್ ತಿ ಆಪ್ಲ್ಯಾ ಕುಟ್ಮಾಸಂಗಿ ಆಯರ್‌ಲೆಂಡಾಂತ್ಲ್ಯಾ ಡಬ್ಲಿನ್ ಶ್ಹೆರಾಂತ್ ವಸ್ತಿ ಕರುನ್ ಆಸಾ. ವ್ರತ್ತೆಂತ್ ತಿ ನರ್ಸ್, ಆನಿ ಆಯರ್‌ಲೆಂಡಾಂತ್ ಪ್ರತಿಶ್ಟಿತ್ ಹಾಸ್ಪಿಟಲಾಂತ್ ತಿಚಿ ಸೆವಾ ದಿವುನ್ ಆಸಾ.

ಫೊಟೊಗ್ರಾಫಿ, ರಾಂದಪ್, ಭಂವ್ಡಿ ಆಶೆಂ ವೆವೆಗ್ಳೆ ಹವ್ಯಾಸ್ ಆಸ್ಚಿ ಮೊನಿಕಾ, ಕವಿತಾ ಬರೊಂವ್ಚ್ಯಾಂತ್‌ಯ್ ಆಭಿರುಚ್ ದಾಕಯ್ಲ್ಯಾ. ತಿ ಡಿಜಿಟಲ್‌ ಮಾಧ್ಯಮಾಂನಿ ಸಯ್ತ್ ಸಕ್ರಿಯ್ ಜಾವ್ನಾಸಾ. ಕಿಟಳ್.ಕೊಮ್, ಪಯ್ಣಾರಿ.ಕೊಮ್ ಜಾಳಿ ಜಾಗ್ಯಾಂನಿ ತಿಚಿಂ ಬರ್ಪಾಂ ಪರ್ಗಟ್ ಜಾಲ್ಯಾಂತ್. "ಸುರ್ಯೊ ಉದೆಲಾ" ಮ್ಹಳ್ಳ್ಯಾ ಡಿಜಿಟಲ್ ಆಡಿಯೊ ಬುಕಾಂತ್ ಹಿಚಿ ಮಟ್ವಿಕಥಾ ಪ್ರಸಾರಿತ್ ಜಾಲ್ಯಾ. "ನವಿ ದಿಶಾ" ಹಿಚ್ಯಾ ಮಟ್ವ್ಯಾ ಕಾಣಿಯಾಂಚೊ ಪಯ್ಲೊ ಜಮೊ.

ಆಶೆಂ ಕೊಂಕ್ಣಿ ಸಾಹಿತ್ಯ್ ಕ್ಷೇತ್ರಾಂತ್ ಕ್ರೀಯಾಳ್ ಜಾವ್ನಾಸ್ಚ್ಯಾ ಮೊನಿಕಾ ಮಥಾಯಾಸ್ ಹಿಕಾ ಆಂಕ್ರಿ ಪಂಗಡ್ ಸ್ವಾಗತ್ ಕರ್ತಾ ಆನಿ ತಿಚೆ ಥಾವ್ನ್ ಆನಿಕಿ ಧಾರಾಳ್ ಮಾಪಾನ್ ಸಾಹಿತಿಕ್ ಕ್ರಷಿ ಜಾಂವ್ದಿ ಮುಣೊನ್ ಆಶೆತಾ.