ಆರ್ಸೊ ಉಲಯ್ಲೊ

ಮಾಯಾಗ್ ಜಾಲೆಂಗೀ ಬಾಳ್ಪಣ್?

ಉಬೊನ್ ಗೆಲೆಂಗೀ ತರ್ನಾಟ್ಪಣ್?

ಆರ್ಸೊ ಮ್ಹಾಕಾ ಹೆಡಾಯ್ಲಾಗ್ಲೊ

ಲಾನ್ಪಣ್ ಭಾವ್ ಭಾಂವ್ಡಾಂಕ್ ಸಾಂಬಾಳ್ನ್ ಸಾರ್ಲೆಂ

ತರ್ನಾಟ್ಪಣ್ ಘೊವ್ ಭುರ್ಗ್ಯಾಂಚ್ಯಾ ಜತ್ನೆಂತ್ ಸಂಪ್ಲೆಂ

ಹಾಂವ್ ಗರ್ವಾನ್ ಉಲಯ್ಲಿಂ.

ದಾಂತ್ ನಾತ್ಲೆಂ ತೋಂಡ್, ಮಿರಿಯೆಲ್ಲಿ ಕಾತ್

ಅತಾಂ ಕಿತ್ಯಾಕ್ ಲಿಪಯ್ತಾಯ್?

ಸರ್ವಾಂ ಖಾತಿರ್ ಜಿಯೆವ್ನ್ ಜಾಲೆಂ,

ತುಜ್ಯಾ ಖಾತಿರ್ ಕೆದಾಳಾ ಜಿಯೆತಾಯ್?

ಆರ್ಸೊ ಹಾಸ್ಲೊ

ಅಸ್ತುರಿ ಹಾಂವ್ ಹಕ್ಕ್ ನಾಂ ಮ್ಹಾಕಾ

ಮ್ಹಜೆ ಖಾತಿರ್ ಜಿಯೆಂವ್ಕ್

ರಚ್ಲಾಂ ಮ್ಹಕಾ ದೆವಾನ್

ಮ್ಹಜ್ಯಾ ಕುಟ್ಮಾಕ್ ಸಾಂಬಾಳುಂಕ್.

ಹಾಂವೆಯ್ ಸೊಡ್ನ್ ದಿಲೆಂ ನಾಂ.

ತರ್ ಆಜ್ ತುಜೆಂ ಕುಟಾಮ್ ಖಂಯ್ ಪಾವ್ಲಾಂ?

ತುಕಾ ಎಕ್ಸುರ್ಯಾಕ್ ಸೊಡ್ನ್

ಕಾಂಯ್ ಪರ್ಗಾವಾಂಕ್ ಉಬ್ಲಾಂ?

ಆರ್ಶ್ಯಾನ್ ಖೆಳ್ಕುಳಾಂ ಕೆಲಿಂ.

ಮ್ಹಾಕಾ ತುಜೆರ್ ಸೊಡ್ಲ್ಯಾರ್

ಹೆರ್ ಕೊಣಾಚೆರ್ ಶಿಣ್ ನಾಂ

ದವ್ಶೆಲ್ಲ್ಯಾ ಕೆಸಾಂಕ್, ಫೊಂಡ್ಕುಲ್ಯಾಂ ತೊಂಡಾಕ್

ಆನಿ ತುಜಿಯ್ ಗರ್ಜ್ ನಾಂ

ಪಿಂರ್ಗಾಲಿಂ ಆರ್ಶ್ಯಾ ಕೊಂವ್ಚ್ಯೊ ವಿಂಚ್ತಾನಾ.

ಮೊನಿಕಾ ಮಥಾಯಸ್ ಮೂಡುಬೆಳ್ಳೆ (ಡಬ್ಲಿನ್).

………………

Arso uloilo

mayag zalengi ballponn?

ubon gelengi tornattponn?

arso mhaka heddailaglo

lanponn bhavo bhamvddank samballn sarlem

tornattponn ghovo bhurgeanchea zotnent somplem

hamv gorvan uloilim.

Dant natlem tondd, miriel'li kat

otam kiteak lipoitai?

sorvam khatir jieun zalem,

tujea khatir kedalla jietai?

arso haslo

osturi hamv hokk nam mhaka

mhoje khatir jieunko

rochlam mhoka devan

mhojea kuttmak samballunk.

Hamvey soddn dilem nam.

Tor az tujem kuttam' khoim paulam?

tuka eksureak soddn

kaim porgavank ublam?

arxean khellkullam kelim.

Mhaka tujer soddlear

her konnacher xinn nam

douxel'lea kesank, fonddkuleam tonddak

ani tujiy gorz nam

pimrgalim arxea komvcheo vinchtana.

Monica Mathias Moodubelle (Dublin)

………………

आर्सो उलयलो

मायाग जालेंगी बाळपण?

उबोन गेलेंगी तर्नाटपण?

आर्सो म्हाका हेडायलागलो

लानपण भाव भांवडांक सांबाळन सारलें

तर्नाटपण घोव भुर्ग्यांच्या जत्नेंत संपलें

हांव गर्वान उलयलीं.

दांत नातलें तोंड, मिरियेल्ली कात

अतां कित्याक लिपयताय?

सर्वां खातीर जियेवन जालें,

तुज्या खातीर केदाळा जियेताय?

आर्सो हासलो

असतुरी हांव हक्क नां म्हाका

म्हजे खातीर जियेवंक

रचलां म्हका देवान

म्हज्या कुटमाक सांबाळुंक.

हांवेय सोडन दिलें नां.

तर आज तुजें कुटाम खंय पावलां?

तुका एक्सूऱ्याक सोडन

कांय पर्गावांक उबलां?

आर्श्यान खेळकुळां केलीं.

म्हाका तुजेर सोडल्यार

हेर कोणाचेर शीण नां

दवशेल्ल्या केसांक, फोंडकुल्यां तोंडाक

आनी तुजीय गर्ज नां

पिंर्गालीं आर्श्या कोंवच्यो विंचताना.

मोनिका मथायस मूडुबेळ्ळे (डबलीन).