"ಹಾಂವೆಂ ಆಂಗವ್ಣ್ ಕೆಲ್ಲಿ ಆಸಾ, ಮ್ಹಜ್ಯಾ ಪಾಂಯಾಂಚ್ಯಾ ಗಾಂಟಿಂಚಿ ದೂಕ್ ಉಣಿ ಜಾಯ್ತ್ ತರ್ ಹಾಂವ್ ಮಾಯೆಚ್ಯಾ ಥಳಾಕ್ ಭೆಟ್ ದಿತೆಲಿಂ ಮ್ಹಣ್. ತ್ಯಾ ಖಾತಿರ್ ಮ್ಹಾಕಾ ಏಕ್ ಪಾವ್ಟಿಂ ಥಳಾಕ್ ವಚಾಜಯ್”.
ರಾತ್ಚೆಂ ಜೆವಾಣ್ ಕರ್ನ್ ಆಸ್ತಾನಾ ತ್ರೇಸಿಯಮ್ಮಾನ್ ಆಪ್ಲಿ ಆಶಾ ಕಳಯ್ಲಿ. ಜೆವ್ಣಾಚ್ಯಾ ಮೆಜಾರ್ ಬಸುನ್ ಆಸ್ಲೆಲ್ಯಾ ಸುನೆನ್ ಆನಿ ಪುತಾನ್ ಎಕಾಮೆಕಾಚ್ಯಾ ತೊಂಡಾಕ್ ಪಳೆಲೆಂ. ಪವಿತ್ರ್ ಥಳಾಕ್ ವೆಚೆಂ ಮ್ಹಣ್ತಾಸ್ತಾನಾ ಎಕಾಚ್ ಫರಾ ನಾಕಾರ‍್ಚೆಂ ಧಯ್ರ್ ತಾಂಚೆ ಥಂಯ್ ನಾತ್‌ಲ್ಲೆಂ. ತಶೆಂ ಮ್ಹಣ್ ಅಸಲ್ಯಾ ತುರ್ತಾಚ್ಯಾ ತೊಟಾಚ್ಯಾ ಕಾಮಾಚ್ಯಾ ವೆಳಾರ್ ಕಾಮ್ಗಾರ್ ಮೆಳ್ಚೆಯ್ ಕಷ್ಟಾಂಚೆಂ ಆಸ್ತಾಂ ಎಕಾಚ್ ಫರಾ ಸಟ್ಟ್ ಕರ್ನ್ ನಿರ್ಧಾರ್ ಕರ್ನ್ ವೆಚೆಬರಿಯ್ ನಾತ್‌ಲ್ಲೆಂ.
“ತ್ರೇಸಿ, ಆತಾಂ ತೊಟಾಚ್ಯಾ ಕಾಮಾಚೊ ತುರ್ತ್ ಆಸಾ ತುಂ ರಾವ್‌ಲ್ಲ್ಯಾ ಪಾಂಯಾರ್ ಮ್ಹಾಕಾ ಥಳಾಕ್ ವಚಾಜಯ್ ಮ್ಹಣ್ ಸಾಂಗ್ಶಿ ತರ್ ಅಸಲ್ಯಾ ವೆಳಾರ್ ಕಷ್ಟ್ ಜಾತೆಲೆ. ಪಳೆವ್ಯಾಂ ಥೊಡೆ ದೀಸ್ ವಚೊಂದಿತ್ ಅಕ್ಟೋಬರ್ ಅಖೇರಿ ತಿತ್ಲ್ಯಾಕ್ ಕಾಮ್ ಥೊಡೆಂ ಉಣೆಂ ಜಾತಚ್, ಹ್ಯೆವಿಶಿಂ ಹಾಂವ್ ಕಾಂಯ್ ಪುಣೀ ವ್ಯವಸ್ಥಾ ಕರ್ತಾಂ”.
ಪುತಾ ಆನಿ ಸುನೆಚ್ಯಾ ತೊಂಡಾವಯ್ಲಿಂ ಭಾವನಾ ವಾಚ್‌ಲ್ಲೆ ಜಿನ್ಸಿಂ ಆಪ್ಲ್ಯಾ ಪತಿಣೆಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕೆಲೆಂ ಸೆಬೆಸ್ಟಿಯನಾನ್.
“ನಾ, ಹಾಂವ್ ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ತುಮ್ಚೆಲಾಗಿಂ ಮಾಗೊನ್ ಆಸಾಂ. ತುಮಿಂ ಹರ್ಯೆಕ್ ಪಾವ್ಟಿಂ ಅಶೆಂಚ್ ಸಾಂಗ್ಚೆಂ. ಗಿಮಾಂತ್ ತೊಟಾಕ್ ಉದಾಕ್ ದಿಂವ್ಕ್ ಆಸಾ, ಪೀಕ್ ಖುಂಟುಂಕ್ ಆಸಾ. ಪಾವ್ಸಾಂತ್ ತೊಟಾಕ್ ಮುಳಾಕ್ ಘಾಲುಂಕ್ ಆಸಾ. ಹಿಂವಾಂತ್ ಸ್ಪ್ರೇ ಕರುಂಕ್ ಆಸಾ. ವರ್ಸಾಚ್ಯಾ ಹರ್ಯೆಕಾ ವೆಳಾರ್ ಕಾಮ್ ಮುಗ್ದಾಲ್ಲೆಂನಾ. ಹಾಂವ್ ಕಾಂಯ್ ಮಹಿನ್ಯಾ ಗಟ್ಲ್ಯಾನ್ ವಚೊನ್ ಥಂಯ್ ರಾವ್ಯಾಂ ಮ್ಹಣ್ ಸಾಂಗಿನಾ. ಪೂಣ್ ಮ್ಹಾಕಾ ಏಕ್ ಪಾವ್ಟಿಂ ವಚೊನ್ ಯೇಜಯ್. ಮನ್ ಕೆಲ್ಯಾರ್ ದೋನ್ ದಿಸಾಂನಿ ವಚೊನ್ ಯೇಂವ್ಕ್ ಜಾತಾ”.
ತ್ರೇಸಿಯಮ್ಮಾಕ್ ಮಾಯೆ ಥಂಯ್ ವಿಶೇಸ್ ಭಕ್ತ್. ಪೂಣ್ ಮಾಗ್‌ಲ್ಲೆಂ ಜರ್ ಆಮ್ಕಾಂ ಫಾವೊ ಜಾತಾ ತರ್ ತ್ಯೆ ಖಾತಿರ್ ಖಂಚಾಯ್ ಥಳಾಕ್ ವೆಚಿ ಗರ್ಜ್ ಕಿತೆಂ? ಆಮಿಂ ಆಸ್ಲೆಲ್ಯಾಕಡೆನ್ ಥಾವ್ನ್ಂಚ್ ಮಾಗ್ಲ್ಯಾರೀ ದೇವ್ ಆಮ್ಚೆಂ ಮಾಗ್ಣೆಂ ಆಯ್ಕಾತಾ ಮ್ಹಣ್ಚೊ ವಾದ್ ಸೆಬಿಚೊ. ತರೀ ದೆವಾಸ್ಪಣಾಚ್ಯಾ ವಿಷ್ಯಾಂತ್ ಯೆತಾನಾ ತರ್ಕ್ ವಿತರ್ಕ್ ಕರ‍್ಚೆಂ ಧಯ್ರ್ ಕೊಣಾಯ್ ಲಾಗಿಂ ನಾತ್‌ಲ್ಲೆಂ ತ್ಯಾ ಖಾತಿರ್ ತಾಣಿಂ ಸೊಧ್‌ಲ್ಲಿ ಏಕ್‌ಚ್ ವಾಟ್ ಮ್ಹಳ್ಯಾರ್ ದೀಸ್ ಮುಕಾರ್ ಲೊಟ್ಚೆ!.
“ಅಮ್ಮಾ, ತುಂ ಕಿತ್ಯಾಕ್ ಅಶಿಯ್ ಹಠಾಕ್ ಪಡ್ಲ್ಯಾಯ್? ಹಾಂವ್ ಲ್ಹಾನ್ ಆಸ್ತಾನಾ ಖಂಚಾಯ್ ಥಳಾಕ್ ಹಾಂವ್ ವೆತಾಂಚ್ ಮ್ಹಣ್ ಹಟ್ ಧರುಂಕ್ ವ ತಶೆಂ ಉಚಾರುಂಕ್ ನಜೊ ಮ್ಹಣ್ ತುಂಚ್ ಮ್ಹಾಕಾ ಸಾಂಗ್ತಾಲಿಯ್ ತೆಂ ವಿಸರ್ಲಿಯ್!?”
“ಮ್ಹಾಕಾ ಕಳಿತ್ ಆಸಾ ಮೋನೆ...., ತುಂ ಭೆಷ್ಟೆಂಚ್ ನಿಬಾಂ ದೀನಾಕಾ...! ತುಜಿ ಆನಿ ತುಜ್ಯಾ ಅಚ್ಚಾಚಿ ಹಿಕ್ಮತ್ ಕಳಿತ್ ಆಸೊನ್ಂಚ್ ಹಾಂವೆಂ ಸಕ್ಕಡ್ ತಯಾರಾಯ್ ಕೆಲ್ಯಾ. ಎಕ್ಲಿಂ ತರ್ ಎಕ್ಲಿಂಚ್ ಸಯ್ ಮ್ಹಾಕಾ ವಚಾಜಯ್ ತೆಂ ವಚಾಜಯ್‌ಚ್!”
“ಅರೇ ಸಾಯ್ಬಿಣಿ, ತುಂ ಏಕ್ ಕಿತೆಂ ಲ್ಹಾನ್ ಭುರ್ಗ್ಯಾಂಬರಿ ಹಟ್ ಧರುಂಕ್ ಲಾಗ್ಲಾಂಯ್...? ಖಂಯ್ ವೆತಾಯ್ ತುಂ ಎಕ್ಲೆಂ...!?” ಸೆಬಿಕ್ ಆಪ್ಲ್ಯಾ ಪತಿಣಿಚೆಂ ಹಠ್ ವಿಚಿತ್ರ್ ದಿಸ್ಲೆಂ.
“ಆಂಟನಿ ತಾಚ್ಯಾ ಪತಿಣ್ ಭುರ್ಗ್ಯಾಂ ಸವೆಂ ಹ್ಯಾಚ್ ಸನ್ವಾರಾ ವೆಲಾಂಕಣಿ ವಚೊಂಕ್ ಭಾಯ್ರ್ ಸರ್ಲಾ. ತಿಂ ತಾಂಚ್ಯಾಚ್ ಗಾಡ್ಯೆರ್ ವೆತಾತ್. ಮ್ಹಾಕಾ ಎಕ್ಲ್ಯಾಕ್ ಯೆವ್ಯೆತ್ ಮ್ಹಣ್ ತಾಣೆಂ ಸಾಂಗ್ಲಾ. ತಶೆಂ ಹಾಂವ್ ತಾಚೆ ಸಾಂಗಾತಾ ವಚೊನ್ ಯೆತಾಂ”.
“ಅಮ್ಮಾ, ತುಂ ಕಿತ್ಯಾಕ್ ತಾಂಚೆ ಹಾಂಚೆ ಸಾಂಗಾತಾ ವೆತಾಯ್? ಅಕ್ಟೋಬರ್ ಸುರ‍್ವೆರ್ ತೊಟಾಕ್ ಸ್ಪ್ರೇ ದೀವ್ನ್ ಜಾತಚ್ ಹಾಂವ್‌ಚ್ ತುಕಾ ಆಪವ್ನ್ ವ್ಹರ್ತಾಂ...” ಐಸಾಕಾನ್ ಆವಯ್ಕ್ ಸಮ್ಜಂವ್ಚೆಂ ಪ್ರಯತ್ನ್ ಕೆಲೆಂ.
“ಮ್ಹಾಕಾ ತುಮ್ಚೆರ್ ಭರ್ವಸೊ ನಾಂ. ಆತಾಂ ಅಗೋಸ್ತಾಂತ್ ದಿಲ್ಲಿ ಭಾಸಾವ್ಣಿ ಅಕ್ಟೋಬರ್ ಯೆತಚ್ ವಿಸ್ರೊನ್ ವೆತೆಲಿ. ಮ್ಹಾಕಾ ಪರತ್ ಅನಿ ಪರತ್ ತುಮ್ಚೆಲಾಗಿಂ ಪರಾತುಂಕ್ ಜಾಯ್ನಾ...! ಆನಿ ಆಂಟನಿ ಮ್ಹಜೊ ಭಾಚೊ ಕಾಂಯ್, ಪರ್ಕೊ ವೆ...?”
“ತ್ರೇಸಿ, ಕಾಲ್ ಥಾವ್ನ್ ಮುಕ್ಲ್ಯಾ ದಿಸಾಂನಿ ಕಠೀಣ್ ಪಾವ್ಸ್ ಆಸಾ ಮ್ಹಣ್ಚಿ ಚೆತಾವ್ಣಿ ಖಬ್ರೆ ಪತ್ರಾನಿಂ ಅನಿ ಟಿವಿಚೆರ್ ದೀವ್ನ್ಂಚ್ ಆಸಾತ್. ಅಸಲ್ಯಾ ವೆಳಾರ್ ಪಯ್ಸ್ ಪಯ್ಣ್ ಕರ್ಚೆಂ ತಿತ್ಲೆಂ ಸುರಕ್ಷಿತ್ ನ್ಹಂಯ್. ಜಿದ್ದ್ ಸೊಡ್ ಐಸಾಕ್ ತುಕಾ ಆಪವ್ನ್ ವ್ಹರ‍್ತಾ ಮ್ಹಣ್ತಾ ನ್ಹಯ್..., ಖಂಡಿತ್ ಆಪವ್ನ್ ವ್ಹರ‍್ತಲೊ. ಅಕ್ಟೋಬರಾಂತ್ ತೊಟಾಚೆಂ ಕಿತ್ಲೆಂ ಕಾಮ್ ಆಸ್ಲ್ಯಾರೀ ಹಾಂವ್ ಪಳೆವ್ನ್ ಘೆತಾಂ..., ತುಂ ಕಾಂಯ್ ಟೆನ್ಶನ್ ಘೆನಾಕಾ...”
“ನಾ..., ಹಾಂವೆ ಆಂಟನಿಕ್ ತಾಂಚೆ ಬರಾಬರ್ ಹಾಂವ್ ಯೆತಾಂ ಮ್ಹಣ್ ಸಾಂಗೊನ್ ಜಾಲಾಂ. ಥಳಾಕ್ ಯೆತಾಂ ಮ್ಹಣ್ ಸಾಂಗ್‌ಲ್ಲೆಂ ಉತಾರ್ ಪಾಟಿಂ ಕಾಡುಂಕ್ ನಜೊ. ಆತಾಂ ಐಸಾಕಾನ್ ಅಕ್ಟೋಬರಾಂತ್ ಯಾ ಮ್ಹಣ್ ಸಾಂಗೊನ್ ಜಾಲೆಂ. ತಶೆಂ ಜಾವ್ನ್ ಪರತ್ ಅಕ್ಟೋಬರಾಂತ್ ವಚಾಜಯ್‌ಚ್”. ತ್ರೇಸಿನ್ ಆಪ್ಲೊ ವಾದ್ ಮಾಂಡ್ಲೊ.
“ತ್ರೇಸಿ, ತುಕಾ ವೆಚ್ಯಾಕ್ ಆಮಿಂ ಆಡಯ್ನಾಂವ್. ಪೂಣ್ ತುಕಾ ಭಲಾಯ್ಕಿ ಇಲ್ಲಿ ಉಣಿಂಚ್ ಆಸಾ ಆಸ್ತಾಂ, ಕೊಣಾಯ್ ಸಾಂಗಾತಾ ವಚೊನ್ ತುಕಾ ಕಾಂಯ್ ವಾಂದೆ ಜಾತಿತ್ ತರ್, ಭೆಶ್ಟೆಂಚ್ ತಾಂಕಾಂ ಕರ್ಕರೆ. ತೊಂಡಾಂತ್ ಉಚಾರಿನಾತ್ಲ್ಯಾರೀ ಮತಿಂತ್ ತೆಂ ಭೊಗಾಪ್ ಉರ್ತಲೆಂಚ್. ತ್ಯಾ ದೆಕುನ್ ಆಮಿಂಚ್ ಸಾಂಗಾತಾ ಯಾ ಮ್ಹಣ್ ಮ್ಹಜಿ ಅಭಿಪ್ರಾಯ್”.
ಕಿತೆಂಯ್ ಜಾಂವ್ ಅಸಲ್ಯಾ ವಿಕೋಪಾಚ್ಯಾ ಪರಿಸ್ಥಿತೆಂತ್ ಪತಿಣಿಕ್ ಪಯ್ಸ್ ಪಯ್ಣಾಕ್ ಧಾಡುಂಕ್ ಸೆಬಿಕ್ ಭಿರಾಂತ್ ದಿಸ್ತಾಲಿ. ಪೂಣ್ ತ್ರೇಸಿಯಮ್ಮಾ ಮಾತ್ರ್ ಕೊಣಾಯ್ಚೆಂ ಉತಾರ್ ಕಾನಾಕ್ ಘಾಲ್ಚ್ಯಾಬರಿ ದಿಸಾನಾತ್‌ಲ್ಲಿ.
“ಅಚ್ಚಾ, ಕಿತೆಂ ಕರ್ಚೆಂ ಮ್ಹಣ್ತಾಯ್ ತುಂ?” ಆವಯ್ ಕುಡಾಕ್ ಗೆಲ್ಲಿ ಪಳೆವ್ನ್ ಬಾಪಾಯ್‌ಲಾಗಿಂ ವಿಚಾರ್ಲೆಂ ಐಸಾಕಾನ್.
“ಮ್ಹಾಕಾಯ್ ತೆಂಚ್ ಸುಸ್ತಾನಾ ರೆ ಪುತಾ...,”
“ಅಚ್ಚಾ, ತುಂ ಏಕ್ ಪಾವ್ಟಿಂ ಆಂಟನಿಕ್ ಫೋನ್ ಕರ್ನ್ ಪಳೆ. ಅಸಲ್ಯಾ ವ್ಯತಿರಿಕ್ತ್ ಹವ್ಯಾಂತ್ ಪಯ್ಶಿಲೆಂ ಪಯ್ಣ್ ಬರೆಂ ನ್ಹಯ್ ತಶೆಂ ಜಾವ್ನ್ ಪಯ್ಣ್ ಥೊಡ್ಯಾ ದಿಸಾಂಕ್ ಮುಕಾರ್ ಘಾಲುಂಕ್ ಸಾಂಗ್...”
“ತೆಂಯ್ ವ್ಹಯ್..., ಏಕ್ ಉತಾರ್ ತಾಕಾಚ್ ಸಾಂಗೊನ್ ಪಳೆವ್ಯಾಂ...”
ಸೆಬಿ ಆಂಟನಿಕ್ ಫೋನ್ ಕರ್ಚ್ಯಾಕ್ ಭಿತರ್ ಗೆಲೊ ತಚೊಚ್ ಥೊಡ್ಯಾ ವೆಳಾನ್ ಭಾಯ್ರ್ ಆಯ್ಲೊ.
“ಕಾಂಯ್ ಫಾಯ್ದೊ ನಾ. ತೊಯ್ ತ್ರೇಸಿಬರಿಚ್ ಉಲಯ್ತಾ. ಏಕ್ ಪಾವ್ಟಿಂ ವಚೊಂಕ್ ದೀಸ್ ನಕ್ಕಿ ಕರ್ನ್ ಜಾಲ್ಯಾ ಉಪ್ರಾಂತ್ ಪಾಟಿಂ ಕರ‍್ಚೆಂ ಸಾರ್ಕೆಂ ನ್ಹಯ್, ಮಾಯ್ ರಾಕ್ತೆಲಿ ಅಶೆಂ ಮ್ಹಣ್ತಾ” ಸೆಬಿನ್ ಪುತಾ ಮುಕಾರ್ ಹಾತ್ ಉದಾರೆ ಕೆಲೆ.
“ತುಮಿಂ ಅನಿ ತಿಕಾ ಕಾಂಯ್ ಆಡಾಂವ್ಕ್ ವಚಾನಾಕಾತ್ ತಿ ವಚೊನ್ ಯೇಂವ್ದಿ...” ಸುನೆನ್ ಪತಿಕ್ ಅನಿ ಮಾವಾಕ್ ಸುಚನ್ ದಿಲೆಂ.
ಸನ್ವಾರಾ ಫಾಂತ್ಯಾರ್ ಪಾಂಚ್ ವರಾಂ ಭಿತರ್ ಭಾಯ್ರ್ ಸರ್ಲ್ಯಾರ್ ಸಾಂಜೆರ್ ಸ ವರಾರ್‌ಶೆಂ ಥಳಾಕ್ ಪಾವ್ಯೆತ್. ತ್ಯಾ ರಾತಿಕ್ ಲೋಡ್ಜಾಂತ್ ರಾವೊನ್ ದುಸ್ರ್ಯಾ ದಿಸಾ ದರ್ಶನ್ ಕರ್ನ್ ಆಂಗವ್ಣ್ ಫಾರಿಕ್ ಕರ್ನ್ ಥೊಡೊ ಸುಶೆಗ್ ಘೆವ್ನ್ ರಾತಿಕ್ ಭಾಯ್ರ್ ಸರ್ಲ್ಯಾರ್ ಸೊಮಾರಾ ಫಾಂತ್ಯಾರ್ ಪಾಟಿಂ ಪಾವ್ಯೆತ್... ಅಶೆಂ ಪಯ್ಣಾಚೆಂ ಯೋಜನ್ ಜಾಲ್ಲೆಂ.
ಸುಕ್ರಾರಾ ಸಕಾಳಿಂ ಥಾವ್ನ್ಂಚ್ ಶಿರಾಂಧಾರಿಚೊ ಪಾವ್ಸ್ ಧರ್‌ಲ್ಲೊ. ಸಾಂಜ್ ಜಾಲ್ಯಾರೀ ಪಾವ್ಸಾಚಿ ಧಾರ್ ಉಣಿ ಜಾಂವ್ಚಿ ಕಾಂಯ್ ನಿಶಾನಿ ನಾತ್‌ಲ್ಲಿ. ಸಾಂಜೆರ್ ದುಸ್ರ್ಯಾ ದಿಸಾಚ್ಯಾ ಪಯ್ಣಾಕ್ ವಸ್ತುರ್ ಅನಿ ಹೆರ್ ಗರ್ಜೆಚ್ಯೊ ವಸ್ತು ಬಾಂದ್ಚ್ಯಾ ಪತಿಣೆಚ್ಯಾ ಬಗ್ಲೆನ್ ವಚೊನ್ ಬಸ್ಲೊ ಸೆಬಿ.
“ಅಸಲ್ಯಾ ಪರಿಸ್ಥಿತೆಂತೀ ತುಕಾ ವಚಾಜಯ್‌ಚ್ ಗಿ...?”
“ಹಾಂವ್ ಭಾಯ್ರ್ ಸರೊನ್ ಜಾಲ್ಯಾಂ. ಆತಾಂ ತುಂ ಕಾಂಯ್ ಸಾಂಗಿನಾಕಾ...”
ತೋಂಡ್ ಉಘಡ್ನ್ ಹಿ ಉತ್ರಾಂ ತಾಣಿಂ ಎಕಾಮೆಕಾಲಾಗಿಂ ಉಚಾರ್ಲಿನಾಂತ್ ತರೀ ತಾಚ್ಯಾ ದಿಷ್ಟಿಂತ್‌ಚ್ ತಾಂಚಿಂ ಭೊಗ್ಣಾಂ ಆಶಾರ್ ಪಾಶಾರ್ ಜಾಲಿಂ.
“ಟೆಸ್ಸಿ, ಮ್ಹಜ್ಯೊ ಗುಳಿಯೊ ಚಿಕ್ಕೆಶೆ ವಿವಿಂಗಡ್ ಕರ್ನ್ ಬಾಂಧುನ್ ದಿ...”
ಸುನೆಕ್ ಆಪಯಿತ್ತ್ ತ್ರೇಸಿ ರಾಂದ್ಪಾ ಕುಡಾಕ್ ಗೆಲಿ. ಉಪಾವ್ ನಾಸ್ತಾಂ ಸೆಬಿ ಭಾಯ್ರ್ ಯೇವ್ನ್ ನ್ಯೂಸ್ ಪಳೆಂವ್ಕ್ ಲಾಗ್ಲೊ. ತ್ಯೆ ರಾತಿಕ್ ಘರ್ಚ್ಯಾ ಕೊಣಾಕ್‌ಚ್ ನೀದ್ ಯೇಂವ್ಕ್ ನಾತ್‌ಲ್ಲಿ. ತ್ರೇಸಿಯಮ್ಮಾಕ್ ಥಳಾಕ್ ವೆಚೆ ಉಮಾಳೆ ತರ್, ಘರಾಂತ್ಲ್ಯಾ ಹೆರಾಂಕ್ ಅಸಲ್ಯಾ ಹವ್ಯಾಂತ್ ತಿಕಾ ಧಾಡ್ನ್ ದಿಂವ್ಚೆ ತಳ್ಮಳೆ.
ಚ್ಯಾರ್ ವರಾರ್‌ಚ್ ತ್ರೇಸಿಯಮ್ಮ ತಯಾರ್ ಜಾಲಿ. ಸಾಡೆಚಾರ್ ಜಾಯ್ಜಾಯ್ ತರ್ ಆಂಟನಿ ಗಾಡಿ ಘೆವ್ನ್ ಹಾಂಚ್ಯಾ ಗೆಟಿಲಾಗಿಂ ಪಾವ್ಲೊ. ಘರಾ ಭಿತರ್ ಥಾವ್ನ್ ಗಾಡಿಯೆರ್ ಬಸ್ತಾ ಪರ್ಯಾಂತೀ ಸಬಾರ್ ಪಾವ್ಟಿಂ ಪತಿಣೆಕ್ ಜಾಗ್ರುತ್ಕಾಯ್ ಸಾಂಗ್ಲಿ ಸೆಬಿನ್.
“ಆಮಿಂ ಆಸಾಂವ್ ತಿಕಾ ಸಾಂಬಾಳ್ತಾಂವ್...”
ಸೆಬಿಚಿ ಭಿರಾಂತ್ ಪಳೆವ್ನ್ ಆಂಟನಿಚ್ಯಾ ಪತಿಣೆನ್ ಜೆಸ್ಸಿಲಿನ್ ತಾಕಾ ಧಯ್ರ್ ದಿಲೆಂ. ಘಡ್ಯೆನ್ ಗಾಡಿ ತಾಂಚ್ಯಾ ದಿಷ್ಟಿ ಭಾಯ್ರ್ ಗೆಲಿ. ಕಿತ್ಯಾಕ್‌ಗಿ ಕಳಿತ್‌ನಾ ಸೆಬಿಚೆಂ ಕಾಳಿಜ್ ಜೊರಾನ್ ದಢ್ದಡ್ತಾಲೆಂ.
“ಹಾಂವ್‌ಚ್ ವೆತೊಂ ಆಸ್‌ಲ್ಲೊಂ...”
ಆವಯ್ ಮ್ಹಳ್ಯಾರ್ ಜೀವ್ ದಿಂವ್ಚ್ಯಾ ಐಸಾಕಾಚೊ ತಾಳೊ ಕಾಂಪ್ಲೊ.
“ಆತಾಂ ತುಂ ಅನಿಕೀ ಭೆಶ್ಟಾಯ್ನಾಕಾ...”
ಟೆಸ್ಸಿನ್ ಮಾಂವಾತೆವ್ಶಿನ್ ಪಳೆವ್ನ್ ಪತಿಕ್ ಹಿಶಾರೊ ಕೆಲೊ.
ಉಜ್ವಾಡೊಂಕ್ ಅನಿಕೀ ವೇಳ್ ಆಸ್‌ಲ್ಲೊ ಜಾಲ್ಲ್ಯಾನ್ ತೆಗಾಂಯ್ ಪರತ್ ಖಾಟ್ಯೆರ್ ಆಡ್ ಪಡ್ಲಿಂ. ಐಸಾಕಾಕ್ ದೊಳೊ ಆಡ್ ಜಾಲ್ಲೊ ತಿತ್ಲೊಚ್, ಜೊರಾನ್ ಕುಡಾಚೆಂ ಬಾಗಿಲ್ ಥಾಪುಡ್ಚ್ಯಾ ಆವಾಜಾಕ್ ಉಡೊನ್ ಪಡೊನ್ ದಾರ್ ಉಘಡ್ತಾನಾ ಬಾಪುಯ್ ಹಾತಿಂ ಮೊಬಾಯ್ಲ್ ಆನಿ ಏಕ್ ಕಂರ್ಡೊ ಘೆವ್ನ್ ಉಬೊ ಆಸ್‌ಲ್ಲೊ. ಐಸಾಕಾಚೆಂ ಕಾಳಿಜ್ ಬಸ್‌ಲ್ಲ್ಯಾಬರಿ ಭೊಗ್ಲೆಂ.
“ಕಿತೆಂ ಜಾಲೆಂ...?”
ಭಿರಾಂತಿನ್ ಐಸಾಕಾಕ್ ತಾಳೊ ಸುಟಾನಾತ್‌ಲ್ಲೊ.
“ಭಿಂಯೆನಾಕಾ..., ಕಾಂಯ್ ಜಾಂವ್ಕ್ ನಾ..., ತುಜಿ ಅಮ್ಮಾ ಮೊಬಾಯ್ಲ್ ಸೊಡ್ನ್ ಗೆಲ್ಯಾ...”
“ಹೊ ತಿತ್ಲೆಂಚ್‌ಗಿ... ತಶೆಂ ಆಂಟನಿ ಆನಿ ತಾಚಿ ಪತಿಣ್ ಆಸಾತ್‌ನೆ ಗರ್ಜ್ ಪಡ್ಲ್ಯಾರ್ ತಾಂಚ್ಯಾ ಮೊಬಾಯ್ಲಾರ್‌ಥಾವ್ನ್ ಫೋನ್ ಕರ್ತೆಲಿ..., ತುಂ ಟೆನ್ಶನ್ ಘೆನಾಕಾ...”
“ಗುಳಿಯೊಯ್ ಸೊಡ್ನ್ ಗೆಲ್ಯಾರೆ ಪುತಾ..., ಕಾಲ್ ಸಕಾಳಿಂ ಸುರು ಕೆಲಾಂ ಭಾಯ್ರ್ ಸರೊಂಕ್ ಕಿತೆಂ ಘೆತ್ಲಾಂ ಅನಿ ಕಿತೆಂ ಸೊಡ್ಲಾಂ ತಾಕಾಚ್ ಕಳಿತ್..., ಆತಾಂ ಗುಳಿಯೊಚ್ ನಾ ಜಾಲ್ಯೊ ತರ್ ಕಿತೆಂ ಗತ್...?”
ಸೆಬಿಚ್ಯಾ ತಾಳ್ಯಾಂತ್ ಆಕಾಂತ್ ಆಸ್‌ಲ್ಲೊ.
“ತುಂ ತಕ್ಲಿ ತಾಪಯ್ನಾಕಾ, ಹಾಂವ್ ಆಂಟನಿಕ್ ಫೋನ್ ಕರ್ನ್ ಸಾಂಗ್ತಾಂ ಆನಿ ಗುಳಿಯಾಂಚಿಂ ನಾಂವಾಂ ಧಾಡ್ತಾಂ, ತೊ ಘೆವ್ನ್ ದಿತೊಲೊ”
ಬಾಪಾಯ್ಕ್ ಸಮಾಧಾನ್ ಕೆಲೆಂ ಐಸಾಕಾನ್.
ಭಾಯ್ರ್ ಪಾವ್ಸ್ ಅಜೂನ್ ಕೊಳ್ಶಾಂನಿ ಉದಾಕ್ ವೊತ್‌ಲ್ಲ್ಯಾಬರಿ ವೊತ್ತಾಲೊ. ಉದ್ಕಾಚೊ ಲೋಟ್ ಪಳೆಯ್ತಾನಾ ಅಸಹಾಯಕ್ ಭೊಗ್ಣಾನಿ ಸೆಬಿ ಮಾಂಡೊ ಖೊರ್ಪಿತಾಲೊ. ತಾಚಿ ಮತ್ ಥಿರಾರ್ ನಾತ್‌ಲ್ಲಿ. ಘಡ್ಯೆ ಪಾವ್ಟಿಂ ವಚೊನ್ ಟಿ.ವಿ.ರ್ ನ್ಯೂಸ್ ಪಳೆತಾಲೊ.
ಸುಮಾರ್ ಧಾ ವರಾರ್‌ಶೆಂ ಆಂಟನಿಚೆಂ ಫೋನ್ ಆಯ್ಲೆಂ ತಿಂ ಪಾವ್‌ಲ್ಲ್ಯಾ ಗಾಂವಾಂತ್ ಚಡ್ ಪಾವ್ಸ್ ನಾತ್‌ಲ್ಲೊ. ಮಾತ್ರ್ ನ್ಹಯ್ ಆಸ್ತಾಂ, ಪಯ್ಣಾಕ್ ಚಡ್ ಕಾಂಯ್ ವಾಂದೆ ಜಾಂವ್ಕ್ ನಾಂತ್ ಮ್ಹಣೊನ್ ಆಯ್ಕೊನ್ ಸೆಬಿಕ್ ಕಾಂಯ್ ಥೊಡೆಂ ಸಮಾಧಾನ್ ಭೊಗ್ಲೆಂ. ತರೀ ತ್ರೇಸಿಯಮ್ಮಾಚ್ಯೊ ಸರ್ವ್ ಗುಳಿಯೊ ಮೆಳೊಂಕ್ ನಾಂತ್ ಮ್ಹಣ್ಚೆಂ ಥೊಡ್ಯಾ ಚಿಂತ್ನಾಂಕ್ ಕಾರಣ್ ಜಾಲೆಂ. ಮುಕ್ಲ್ಯಾ ವಾಟೆರ್ ವ್ಹಡ್ ಪೇಂಟ್ ಮೆಳ್ತಾ ಜಾಲ್ಲ್ಯಾನ್ ಥಂಯ್ಸರ್ ಖಂಡಿತ್ ಗುಳಿಯೊ ಮೆಳ್ತೊಲ್ಯೊ ಮ್ಹಣ್ ಆಂಟನಿನ್ ಧಯ್ರ್ ದಿಲೆಂ. ತ್ರೇಸಿಯ್ ಸೆಬಿಲಾಗಿಂ ಫೊನಾರ್ ಉಲವ್ನ್ ಆಪುಣ್ ಸುಶೆಗಾನ್ ಆಸಾಂ ಪಯ್ಣಾರ್ ಕಿತೆಂಚ್ ತ್ರಾಸ್ ಭೊಗಾನಾಂತ್ ಮ್ಹಣ್ ಸಾಂಗ್ತಾನಾ ಸೆಬಿಕ್ ಸಮಾಧಾನ್ ಭೊಗ್ಲೆಂ ತರೀ ಪತಿಣೆಕ್ ಜಾಗ್ರುತ್ ಸಾಂಗೊಂಕ್ ತೊ ವಿಸ್ರಾಲೊನಾ.
“ಪಾವ್ಸ್ ಸುಟ್ಚೊ ದಿಸಾನಾಮು ರೆ ಪುತಾ...”
ದನ್ಪಾರಾಂ ತೊಟಾ ಥಾವ್ನ್ ಘರಾ ಆಯಿಲ್ಲ್ಯಾ ಪುತಾಕ್ ಉದ್ದೇಸುನ್ ಉಲಯ್ಲೊ ಸೆಬಿ.
“ವ್ಹಯ್ ಅಚ್ಚ..., ಅಂಗಮಲ್ಲಿಚೊ ರಸ್ತೊ ತುಟ್ಲಾ ಖಂಯ್ ದೆಕುನ್ ಆಳಾಂಕ್ ಘರಾ ಧಾಡ್ನ್ ಹಾಂವ್‌ಯ್ ಘರಾ ಆಯ್ಲೊಂ”.
ಐಸಾಕಾನ್ ಆಪ್ಣಾಚ್ಯಾ ಭಿತರ್ ಕಾಂತಂವ್ಚೊ ಆಕಾಂತ್ ಬಾಪಾಯ್ಕ್ ದಾಕಯ್ಲೊನಾ.
“ದೆವಾ ಮ್ಹಜ್ಯಾ...!, ಪಾವ್ಸ್ ರಾವ್ತಾ ಪರ್ಯಾಂತ್ ಆಳಾಂಕ್ ಯೆಂವ್ಚೆಂ ನಾಕಾ ಮ್ಹಣ್ ಸಾಂಗೊನ್ ಧಾಡಿಜಾಯ್ ಆಸ್‌ಲ್ಲೆಂ”.
“ಸಾಂಗ್ಲಾಂ...”
ಭಾಪಯ್ನ್ ಮುಕಾರ್ ಸವಾಲ್ ಕರ್ಚ್ಯೆ ಪಯ್ಲೆಂ ಥಂಯ್ ಥಾವ್ನ್ ನಿಕಳ್ಳೊ ಐಸಾಕ್.
“ಟೆಸ್ಸಿ..., ಪರಿಸ್ಥಿತಿ ಭಾರಿಚ್ ಪಾಡ್ ಆಸಾ. ಅಚ್ಚಾಕ್ ಸಾಂಗ್ಲ್ಯಾರ್ ತೊ ಅನಿಕೀ ಭಿಂಯೆತಾ. ತುಂ ತಾಕಾ ಕಳಿತ್ ಜಾಯ್ನಾತ್‌ಲ್ಲ್ಯಾಬರಿ ಆಮ್ಚಿ ಥೊಡಿ ಮುಸ್ತಾಯ್ಕಿ ಅನಿ ಮೊಲಾಧಿಕ್ ವಸ್ತು ಕಿತೆಂ ಆಸಾತ್ ತ್ಯೊ ಬಾಂಧ್. ಖಂಚ್ಯಾ ವೆಳಾರ್ ಆಮ್ಕಾಂ ಸುರಕ್ಷಿತ್ ಜಾಗ್ಯಾಕ್ ವಚೊಂಕ್ ಸಾಂಗ್ತಾತ್ ತೆಂ ಕಳಿತ್ ನಾ. ವಾಯ್ನಾಡ್ ಪರತ್ ಕೊಸಾಳ್ಳಾಂ...”
ಸಾಂಜೆರ್ ಸಾತ್ ವರಾರ್ ಕೊಣಾಲಾಗಿಂ ಫೋನಾರ್ ಉಲವ್ನ್ ಆಸ್‌ಲ್ಲ್ಯಾ ಐಸಾಕಾನ್ ಪತಿಣೆಕ್ ಹಿಶಾರೊ ದಿಲೊ.
“ಆಮಿಂ ಆತಾಂಚ್ ಹಾಂಗಾಥಾವ್ನ್ ಕಲ್ಲಿಕೋಟೆ ಮ್ಹಜ್ಯಾ ಕುಳಾರಾ ಯಾ..., ಮ್ಹಾಕಾ ಭ್ಯೆಂ ದಿಸ್ತಾ...”
ಭಿಂಯಾನ್ ಸಗ್ಳೆಂಚ್ ಗಳೊನ್ ಗೆಲೆಂ ಟೆಸ್ಸಿ.
“ಕಲ್ಲಿಕೋಟೆಚಿ ಪರಿಸ್ಥಿತಿ ಬರಿ ನಾ. ಪೊರ‍್ಚ್ಯಾ ದಿಸಾ ರನ್‌ವೇಚೆರ್ ಉದ್ಕಾಚೊ ಲೋಟ್ ಭರೊನ್ ವಿಮಾನ್ ದುರಂತ್ ಘಡ್ಲಾಂ ಮ್ಹಣ್ ಆಯ್ಕೊಂಕ್ ನಾಂಯ್ ತುವೆಂ...?”
ಹೆಂ ಆಯ್ಕಾತಾನಾ ಆಪ್ಲ್ಯಾ ಕುಳಾರ‍್ಚ್ಯಾಂಕ್ ಅನಿ ಕಿತೆಂ ಜಾಲಾಂಗಿ ಮ್ಹಣ್ ಬ್ಯೆಂ ಉಟ್ಲೆಂ ಟೆಸ್ಸಿಕ್.
“ಐಸಾಕ್ ಆಂಟನಿಕ್ ಫೋನ್ ಲಾಗಯ್ ಮ್ಹಜೆಂ ಫೋನ್ ಲಾಗ್ತೆತ್ ನಾ.... ತುಜ್ಯಾ ಫೊನಾರ್ ಥಾವ್ನ್ ಸಂಪರ್ಕ್ ಮೆಳ್ತಾಗಿ ಪಳೆ..., ಸಾಂಜೆರ್ ಸಾತ್ ವರಾಂ ಭಿತರ್ ಪಾವ್ಯೆತ್ ಮ್ಹಣ್ತಾಲೊ...’
ಬಾಪಾಯ್ಚೊ ಉಲೊ ಆಯ್ಕೊನ್ ದೊಗಾಯ್ನಿ ಉಲವ್ಣೆಂ ರಾವಯ್ಲೆಂ.
“ಫೋನ್ ಕೆಲೆಂಯ್‌ವೆ...?”
ಜಾಯ್ತೊವೇಳ್ ಜಾಲ್ಯಾರೀ ಪುತಾ ಥಾವ್ನ್ ಪ್ರತಿಕ್ರಿಯಾ ಯೇಂವ್ಕ್ ನಾತ್ಲಿ ಪಳೆವ್ನ್ ಪುತಾಕ್ ಪರತ್ ಉಲೊ ದಿಲೊ ಸೆಬಿನ್.
“ಅಚ್ಚಾ ಮ್ಹಜೆಂ ಫೋನ್‌ಯ್ ಲಾಗಾನಾ, ಟೆಸ್ಸಿಚ್ಯಾ ಫೋನಾರ್ ಥಾವ್ನ್ ಪ್ರಯತ್ನ್ ಕೆಲ್ಯಾರೀ ಸಂಪರ್ಕ್ ಜಾಯ್ನಾ ತೆಂಚ್ ಪ್ರಯತ್ನ್ ಕರ್ನ್ ಆಸ್‌ಲ್ಲೊಂ”.
“ಛೆ ಜಾತಾ ಕಿತೆಂ ಹೆಂ...? ಲ್ಯಾಂಡ್ ಫೋನ್ ದೊನ್ಪಾರಾಂಚ್ ಡೆಡ್ ಜಾಲಾಂ ಸಾಂಜೆರ್ ಥಾವ್ನ್ಂಚ್ ಟಿ.ವಿ. ಚಲಾನಾ..., ಕೊಣಾಯ್ಕಿ ಫೋನ್ ಕರ್ಯಾಂ ಮ್ಹಳ್ಯಾರ್ ಆತಾಂ ಹಿಂ ಮೊಬಾಯ್ಲಾಂಯ್ ಚಲಾನಾಂತ್.... ಖಂಯ್ ಪುಣೀ ಸುರಕ್ಷಿತ್ ಜಾಗ್ಯಾಕ್ ಯಾ ಮ್ಹಳ್ಯಾರ್ ಹೆಂ ತ್ರೇಸಿ ಹ್ಯಾಚ್ ವೆಳಾರ್ ಹಟ್ ಧರ್ನ್ ಥಳಾಕ್ ಗೆಲಾಂ..., ತಿ ಎಕಾ ಕಡೆನ್ ಅನಿ ಆಮಿಂ ಎಕಾಕಡೆನ್ ಜಾಲ್ಯಾಂವ್ ತರ್ ತೆಂ ಅನಿ ವ್ಹಡ್ ಸಮಸ್ಸ್ಯೆ ಜಾತಿತ್...!”
ಖಂತೀಷ್ಟ್ ಜಾಲೊ ಸೆಬಿ.
ಸಾಂಜೆರ್ ಥಳಾಕ್ ಪಾವ್‌ಲ್ಲ್ಯಾ ತವಳ್ ಥಾವ್ನ್ ಆಂಟನಿ ಐಸಾಕಾಕ್ ಅನಿ ಸೆಬಿ ಅಮ್ಮಾವನಾಕ್ ಫೋನ್ ಲಾಗವ್ನ್ ಆಸ್‌ಲ್ಲೊ ಪೂಣ್ ಸಂಪರ್ಕ್ ಮೆಳಾನಾತ್‌ಲ್ಲೊ. ಎಕಾವಾಟೆನ್ ತ್ರೇಸಿಯಮ್ಮಾ ಥಂಯ್ ಎಕಾ ಥರಾಚಿ ಅವ್ಯಕ್ತ್ ಭಿರಾಂತ್ ಧೊಸುಂಕ್ ಲಾಗ್ಲಿ.
“ಪಳೆವ್ಯಾಂ ಅಮ್ಮಾಯಿ ಆತಾಂ ಥೊಡ್ಯಾ ವೆಳಾನ್ ಪತರ್ ಪ್ರಯತ್ನ್ ಕರ್ತಾಂ”.
ಆಂಟನಿನ್ ತ್ರೆಸಿಯಮ್ಮಾಕ್ ಸಮಾಧಾನ್ ಕೆಲೆಂ.
ಲೊಡ್ಜಾಂತ್ ಗೆಲ್ಯಾ ಉಪ್ರಾಂತ್ ಆಂಟನಿನ್ ಟಿ.ವಿ. ಚಲಯ್ಲಿ. ಟಿ.ವಿ.ಚೆರ್ ಆಯಿಲ್ಲಿ ಖಬಾರ್ ಆಯ್ಕಾತಾನಾ ತೆಂಗಾಂಯ್ಚಿಂ ಅಂತರ್ಮಳಾಂ ಉಡ್ಲಿಂ. ರಾಜಮಲಾಂತ್ ಭುಂಯ್ ಕೊಸ್ಳೊನ್ ಎಕ್ರ್ಯಾಂಗಟ್ಲ್ಯಾನ್ ಚಾಯೆಚೆಂ ತೋಟ್ ನಪಂಯ್ಚ್ ಜಾಲ್ಲೆಂ. ಸುಮಾರ್ ಘರಾಂ ಆನಿ ಶೆಂಭರಾಂ ವಯ್ರ್ ಲೋಕ್ ಹಿಸಾಪ್ ನಾಸ್ತಾನಾ ಗೆಲ್ಲೊ. ತಾಂತುನ್ ಕಿತ್ಲೆ ಜಣ್ ಮಾತ್ಯೆ ಪಂದಾಕ್ ಶಿರ್ಕಾಲ್ಯಾತ್ ಮ್ಹಣ್ಚ್ಯಾಚೊ ಅಂದಾಜ್ ನಾತ್‌ಲ್ಲೊ. ಅನಿಕೀ ಗುಡೊ ಕೊಸಾಳ್ಚೊ ಸಂದ್ರಾಪ್ ಆಸ್‌ಲ್ಯಾನ್ ರಾಕಣೆ ಕಾಮಾಕ್ ಅಡ್ಚಣ್ ಜಾಲ್ಲಿ.
ಟಿ.ವಿ ಚಾಲು ಆಸ್ಲೆಲ್ಯೆಬರಿಚ್ ತ್ರೇಸಿಯಮ್ಮಾ ಮತ್ ಚುಕೊನ್ ಪಡ್‌ಲ್ಲಿ. ಆಂಟನಿಚೊ ಆನಿ ಜೆಸ್ಸಿಲಿಚೊ ಆಕಾಂತ್ ಸಾಂಗ್ಚೊ ನ್ಹಯ್.
ತೊಂಡಾಕ್ ಉದಾಕ್ ಶೆಣವ್ನ್ ವ್ಹಾರೆಂ ಘಾಲ್ನ್ ತ್ರೇಸಿಯಮ್ಮಕ್ ಸನಿನ್ ಕೆಲೆಂ ತರೀಪೂಣ್ ತಿಚೆಂ ರುದಾನ್ ಮೊಳ್ಬಾಕ್ ತೆಂಕ್ತಾಲೆಂ.
“ಮ್ಹಾಕಾ ತಾಣಿಂ ಪರಾತ್ಲೆಂ ಸಾಂಗಾತಾ ಯಾ ಮ್ಹಣ್... ಹಾಂವ್‌ಚ್ ಹಟ್ ಧರ್ನ್ ಭಾಯ್ರ್ ಸರೊನ್ ಆಯ್ಲಿಂ..., ಸಾಂಗ್‌ಲ್ಲೆಂ ಆಯ್ಕೊನ್ ರಾವ್‌ಲ್ಲಿಂ ತರ್ ತಾಂಚೆ ಬರಾಬರ್ ಮಾತ್ಯೆಕ್ ಪುಣೀ ವೆತಿಂ... ಆತಾಂ ಸರ್ವಾಂಕ್ ಹೊಗ್ಡಾವ್ನ್ ಹಾಂವೆಂ ಎಕ್ಲ್ಯಾನ್ ವಾಂಚೊನ್ ಕಿತೆಂ ಕರ್ಚೆಂ...!?”
ತಿಕಾ ಭುಜಂವ್ಕ್ ಆಂಟನಿಲಾಗಿಂ ಜಾಂವ್ ಜೆಸ್ಸಿಲಿಲಾಗಿಂ ಜಾಂವ್ ಉತ್ರಾಂ ನಾತ್‌ಲ್ಲಿಂ. ತ್ಯೆ ರಾತಿಂ ತಾಂಕಾಂ ಸುಶೆಗ್ ನಾ ಜಾಲೊ. ಜೆಸ್ಸಿಲಿಕ್ ಎಕಾ ಕುಶಿನ್ ತ್ರೇಸಿಯಮ್ಮಾಕ್ ಸಾಂಬಾಳ್ಚೆ ವಾಂದೆ ತರ್, ಅನ್ಯೇಕ್ಯೆ ಕುಶಿನ್ ರಾತಿಕ್ ವಿಶೆವ್ ನಾ ಜಾಲೊ ತರ್ ಫಾಲ್ಯಾಂ ಆಂಟನಿ ಕಶೆಂ ಗಾಡಿ ಚಲಯ್ತೊಲೊ ಮ್ಹಣ್ಚಿ ಖಂತ್ ಧೊಸ್ತಾಲಿ.
“ತುಂ ಥೊಡೊ ವಿಶೆವ್ ಘೆ. ನಾ ಜಾಲೆಂ ತರ್ ಫಾಲ್ಯಾಂ ಡ್ರೈವ್ ಕರುಂಕ್ ಜಾಂವ್ಚೆಂ ನಾ”
ಜೆಸ್ಸಿಲಿನ್ ಹಳೂ ಆಂಟನಿಕ್ ಸಲಹಾ ದಿಲಿ.
“ವೆಚೆಂ ಖಂಯ್ ಜೆಸ್ಸಿ...? ಮಾರೊಗ್ ಪೂರಾ ವ್ಹಾಳೊನ್ ಗೆಲ್ಯಾತ್...! ಆನಿ ಪಾಟಿಂ ವಚೊನ್ ಅಮ್ಮಾಯಿಕ್ ಖಂಯ್ ಸೊಡ್ಚಿ...? ಛೆ ಹಾಂವೆಂ ಅಮ್ಮಾವರಣಾನ್ ಸಾಂಗ್‌ಲ್ಲೆಂ ಆಯ್ಕಾಜಾಯ್ ಆಸ್‌ಲ್ಲೆಂ...”
ನಿರಾಶೆನ್ ಜವಾಬ್ ದಿಲಿ ಆಂಟನಿನ್. ಜೆಸ್ಸಿಲಿಲಾಗಿಂ ಜವಾಬ್ ನಾತ್‌ಲ್ಲಿ.
ತೆಗಾಂಯ್ಚಿ ಮನಸ್ಥಿತಿ ಸಾರ್ಕಿ ನಾತ್ಲೆಲ್ಯಾನ್ ತಿಂ ದುಸ್ರ್ಯಾ ದಿಸಾ ದರ್ಶನಾಕ್ ಗೆಲಿಂನಾಂತ್. ತ್ರೇಸಿಯಮ್ಮಾ ಪೊಟಾಕ್ ಕಿತೆಂಚ್ ಘೆನಾಸ್ತಾನಾ ಫಕತ್ ದುಖಾಂ ಗಳಯ್ತಾಲಿ. ಪೊಟಾಕ್ ಕಿತೆಂಚ್ ಘೆನಾಸ್ತಾನಾ ಅನಿ ವೊಕ್ತಾಂ ಸೆವಿನಾಸ್ತಾನಾ ತಿಚಿ ಭಲಾಯ್ಕಿ ಭಿಗ್ಡಾತ್ ಮ್ಹಣ್ ಆಂಟನಿಕ್ ಅನಿ ಜೆಸ್ಸಿಲಿಕ್ ಭೊಗ್ತಾಲೆಂ. ಎಕಾ ಹಂತಾರ್ ಆಮಿಂ ಹಿಕಾ ಸಾಂಗಾತಾ ಆಪವ್ನ್ ಹಾಡುಂಕ್‌ಚ್ ನಜೊ ಆಸ್‌ಲ್ಲಿ ಮ್ಹಣ್ಚಿಂ ಭೊಗ್ಣಾಂ ತಾಂಚ್ಯಾ ಮತಿಕ್ ಆಯ್ಲ್ಯಾ ಶಿವಾಯ್ ಗೆಲಿಂನಾಂತ್.
“ಅಮಿಂ ಆಜ್ ದರ್ಶನಾಕ್ ಯಾ”
ಸಕಾಳ್ ಜಾಲ್ಲಿಚ್ ತ್ರೇಸಿಯಮ್ಮಾನ್ ಆಂಟನಿಕ್ ಕಳಯ್ಲೆಂ. ತೆಂಪ್ಲಾಂತ್ ಪಾವ್‌ಲ್ಲಿಂಚ್ ತ್ರೇಸಿಯಮ್ಮಾ ಮಾಯೆ ಮುಕಾರ್ ಸರ್ಪಡುನ್ ಗಳ್ಗಳ್ಯಾಂ ರಡ್ಲಿ. ಹಾತ್ ಉದಾರೆ ಧರ್ನ್ “ಅಶೆಂ ಕಿತ್ಯಾಕ್ ಜಾಂವ್ಕ್ ಸೊಡ್ಲೆಂಯ್” ಮ್ಹಣ್ ತಿ ರುದಾನ್ ಕರುಂಕ್ ಲಾಗ್ಲಿ. ಆಂಟನಿಕ್ ಅನಿ ಜೆಸ್ಸಿಲಿಕ್ ತಿಕಾ ಭುಜಂವ್ಕೀ ನ್ಹಯ್, ವಿಚಾರ್ತೆಲ್ಯಾಂಚ್ಯಾ ಸವಾಲಾಂಕ್ ಜವಾಬ್ ದಿಂವ್ಕಿ ನ್ಹಯ್ ಮಾಗ್ಣೆ ಭೆಟಂವ್ಕ್‌ಯೀ ನ್ಹಯ್ ಮ್ಹಣ್ಚೆ ತಸಲೆಂ ಸಂದಿಗ್ಧ್.
ಕಶೆಂಯ್ ಸಮಾಧಾನ್ ಕರ್ನ್ ಆಂಟನಿ ಅನಿ ಜೆಸ್ಸಿಲಿ ತ್ರೇಸಿಯಮ್ಮಾಕ್ ಘೆವ್ನ್ ತೆಂಪ್ಲಾ ಭಾಯ್ರ್ ಆಯ್ಲಿಂ. ತೆಂಪ್ಲಾಚ್ಯಾ ಮುಕ್ಲ್ಯಾ ಆಂಗ್ಣಾಚ್ಯಾ ಕೊನ್ಶಾರ್ ಯೇವ್ನ್ ಬಸ್ಲಿ ತ್ರೇಸಿಯಮ್ಮಾ.
“ತುಮಿಂ ರೂಂ ಖಾಲಿ ಕರ್ನ್ ಪಾಟಿಂ ಘರಾ ವಚಾ. ಹಾಂವ್ ಹಾಂಗಾಚ್ ಮಾಯೆಚ್ಯಾ ಥಳಾರ್ ರಾವ್ತಾಂ”
ತ್ರೇಸಿಯಮ್ಮಾಚಿಂ ಉತ್ರಾಂ ಘಡ್ಗಡ್ಯಾಬರಿ ಯೇವ್ನ್ ಆಪ್ಟಾಲಿಂ ಆಂಟನಿಕ್.
“ಅಮ್ಮಾಯಿ ತುಂ ಹಾಂಗಾ ಕಶಿ ರಾವ್ತಾಯ್...!?, ಹಾಂಗಾ ಖಂಯ್ ರಾವ್ತಾಯ್...!?”
ಕಿತೆಂ ಸಾಂಗ್ಚೆಂ ಮ್ಹಣ್ ಆಂಟನಿಕ್ ಸುಸ್ತಾನಾತ್‌ಲ್ಲೆಂ.
“ಅಳೆ ತಿಂ ಕಶಿಂ ರಾವ್ತಾತ್ ಪಳೆ ತಶೆಂಚ್...”
ಆಂಗ್ಣಾಂತ್ ಭಿಕ್ ಮಾಗೊನ್ ಆಸ್‌ಲ್ಲ್ಯಾ ಭಿಕಾರ‍್ಯಾಂಕ್ ಬೋಟ್ ಜೊಕ್ಲೆಂ ತಿಣೆಂ.
“ಅಮ್ಮಾಯಿ ತಶೆಂ ಸಾಂಗಿನಾಕಾ..., ತುಕಾ ಆಮಿ ಆಸಾಂವ್..., ತುಂ ಆತಾಂ ಆಮ್ಚೆ ಬರಾಬರ್ ಚಲ್...”
ಜೆಸ್ಸಿಲಿನ್ ತ್ರೇಸಿಯಮ್ಮಾಕ್ ಆಪ್ಲ್ಯಾ ಬಾವ್ಳ್ಯಾನಿ ಆರಾಯ್ಲಿ.
ದನ್ಪಾರ್ ಪರ್ಯಾಂತ್ ತಿಂ ಥಂಯ್ಸರ್‌ಚ್ ಬಸ್ಲಿಂ ಕಶೆಂಯ್ ಒತ್ತಾಯ್ ಕರ್ನ್ ಆಂಟನಿ ತ್ರೇಸಿಯಮ್ಮಾಕ್ ರೂಮಾಕ್ ಹಾಡ್ನ್ ಆಯ್ಲೊ. ರಾತಿಕ್ ಪಾಟಿಂ ಭಾಯ್ರ್ ಸರ‍್ಚಿ ತಾಚಿ ಅಂದಾಜ್ ಆಸ್‌ಲ್ಲಿ.
“ಹಾಂವೆಂ ಕೊಣಾಖಾತಿರ್ ಥಂಯ್ ವೆಚೆಂ. ಆಮ್ಚೆಂ ಮ್ಹಳ್ಳೆಂ ಸಗ್ಳೆಂ ಮಾತ್ಯೆ ಭಿತರ್ ಪುರೊನ್ ಗೆಲಾಂ ಆಸ್ತಾಂ ಹಾಂವ್ ಥಂಯ್ ಗೆಲ್ಯಾರೀ ನಿರ್ಗತಿಕ್ ಹಾಂಗಾ ಉರ್ಲ್ಯಾರೀ ನಿರ್ಗತಿಕ್”
ತ್ರೇಸಿಯಮ್ಮಾ ಭಾಯ್ರ್ ಸರೊಂಕ್ ಕಬೂಲ್ ನಾತ್‌ಲ್ಲಿ.
“ಅಮ್ಮಾಯಿ ತುಂ ಮಾಯೆಚೆರ್ ಪಾತ್ಯೆ. ತಿ ತುಕಾ ಸೊಡ್ನ್ ಘಾಲಿಶಿನಾ..., ಆತಾಂ ಕೇವಲ್ ಧರ್ನ್ ಕೊಸಾಳ್ಳ್ಯಾ ಮ್ಹಣೊನ್ ಮಾತ್ರ್ ಖಬಾರ್ ಆಯ್ಲ್ಯಾ ನ್ಹಯ್ ಆಸ್ತಾಂ ಕೊಣಾಚ್ಯಾ ಜಿವಾಕ್ ಲುಕ್ಸಾಣ್ ಜಾಲಾಂ ತೆಂ ಕಳಿತ್ ಜಾಂವ್ಕ್ ನಾ..., ಮಾಯೆಚಿ ಖುಶಿ ತರ್ ಅಮ್ಮಾವರ್, ಐಸಾಕ್ ಅನಿ ಟೆಸ್ಸಿ ಸುರಕ್ಷಿತ್ ಆಸ್ತೆಲಿಂ”.
“ತಿಂ ಆಸ್‌ಲ್ಲಿಂ ತರ್ ಏಕ್ ಫೋನ್ ಕರ್ತಿಂ ವ ತುವೆಂ ಫೋನ್ ಕರ್ತಾನಾ ಉಲಯ್ತಿಂ...”
ತ್ರೇಸಿಯಮ್ಮಾ ಒಪ್ಪೊಂಕ್ ತಯಾರ್ ನಾತ್‌ಲ್ಲಿ.
“ಕಶೆಂಯ್ ಜಾಂವ್ ಆತಾಂ ಆಮಿಂ ಗಾವಾಕ್ ಪಾಟಿಂ ಯಾ..., ಥಂಯ್ಸರ್ ಗೆಲ್ಯಾ ಉಪ್ರಾಂತ್ ಕಿತೆಂ ಘಡ್ಲಾಂ ತೆಂ ಕಳ್ತೆಲೆಂ. ಟಿ.ವಿಚೆರ್ ಪಳೆಲ್ಲೆಂ ಸಕ್ಕಡ್ ಸತ್ ಪಾತ್ಯೆಂವ್ಕ್ ಕಷ್ಟ್”
ಧಯ್ರ್ ದೀವ್ನ್ ತ್ರೇಸಿಯಮ್ಮಾಕ್ ಘೆವ್ನ್ ಆಂಟನಿ ಅನಿ ಜೆಸ್ಸಿಲಿ ಭುರ್ಗ್ಯಾಂಸವೆಂ ರಾತ್ಚ್ಯಾ ಧಾ ವರಾರ್ ಪಾಟಿಂ ಭಾಯ್ರ್ ಸರ್ಲಿಂ.
ಘರಾ ಪಾವ್ಲ್ಯಾ ಉಪ್ರಾಂತ್ ಆಂಟನಿನ್ ಸೆಬಿ ಅನಿ ಕುಟ್ಮಾವಿಶಿಂ ಜಾಯ್ತೊ ವಿಚಾರ್ ಕೆಲೊ ತರೀ ತಾಕಾ ಕಸಲಿಚ್ ಮಾಹೆತ್ ಮೆಳ್ಳಿನಾ.
ಚ್ಯಾರ್ ದೀಸ್ ಸಂಪ್‌ಲ್ಲೆ. ಆದ್ಲ್ಯಾ ದಿಸಾಥಾವ್ನ್ ಪಾವ್ಸ್ ಮಾತ್ಸೊ ಉಣೊ ಜಾಲ್ಲೊ. ಆಂಟನಿ ಸಗ್ಳೊ ದೀಸ್ ಟಿ.ವಿ.ಮುಕಾರ್ ಬಸೊನ್ ಖಂಚ್ಯಾ ಪುಣೀ ನಿರಾಶ್ರಿತಾಂಚ್ಯಾ ಶಿಬಿರಾಂತ್ ಕೋಣ್ ಪುಣೀ ಒಳ್ಕಿಚಿಂ ದಿಸ್ತಾತ್‌ಗಿ ಮ್ಹಣ್ ಪಳೆವ್ನ್ಂಚ್ ಆಸ್‌ಲ್ಲೊ.
“ಥಂಯ್ಸರ್ ಕೊಣಾಕ್ ಸೊದ್ತಾಯ್ ಪುತಾ...!? ನಿರಾಶ್ರಿತ್ ತುಜ್ಯಾ ಬಾಗ್ಲಾರ್ ಯೇವ್ನ್ ಉಬಿಂ ಜಾಲ್ಯಾಂತ್...! ಥೊಡ್ಯಾ ದಿಸಾಂಕ್ ಆಸ್ರೊ ದಿತಾಯ್...?”
ಒಳ್ಕಿಚೊ ತಾಳೊ ಆಯ್ಕುನ್ ದಾರಾಕಡೆನ್ ಧಾಂವೊನ್ ಆಯ್ಲೊ ಆಂಟನಿ. ತಾಚೆ ದೊಳೆ ತಾಕಾಚ್ ಪಾತ್ಯೆಲೆನಾಂತ್.
“ಜೆಸ್ಸಿ, ಅಮ್ಮಾಯಿ ಧಾಂವೊನ್ ಯೆಯಾ...”
ದುಖಾಂ ಭರ್‌ಲ್ಲ್ಯಾ ದೊಳ್ಯಾನಿ ತಾಣೆ ಗಳ್ಯಾಂತ್ ಘಾಲ್ಲ್ಯಾ ಮಾಯೆಚ್ಯಾ ಅರ್ಲುಕೆಚೊ ಉಮೊ ಘೆತ್ಲೊ!.

ಲವಿ, ಗಂಜಿಮಠ