ಕಾಲ್ಚ್ಯಾ ಸಾಂಜೆರ್ ಸುರು ಜಾಲ್ಲೊ ಪಾವ್ಸ್ ಆಯ್ಚ್ಯಾ ಸಾಂಜೆ ಪರ್ಯಾಂತ್ ಏಕ್‍ಚ್  ಲೆಖಾರ್ ವೊತ್ತಾಲೊ. ಕಠೀಣ್ ಘಡ್ಗಡೊ, ಜಗ್ಲಾಣೆಂ, ಝಡ್ ವಾರೆಂ. ನ್ಹಂಯ್  ಆನಿ ಬೊಯ್ಲಾಂತ್ ಆವ್ರ್ ಚಡಲ್ಲೆಂ! ಏಕ್ ಸಾಗೊರ್ ತಶೆಂ ದಿಸ್ತಾಲೊ ಸಗ್ಳೊ ಗಾಂವ್. ಥೊಡ್ಯಾಂಚ್ಯಾ ಘರ್ಚ್ಯಾ ಆಂಗ್ಣಾಂಕ್ ಪಾವ್ಲೆಂ ಆವ್ರ್!

ಅನಿ ತೆಂ, ಧಾ ಬಾರಾ ಮ್ಹಾಡಾ ತೊಟಾ ಮಧೆಂ ಏಕ್ ಲ್ಹಾನ್ ಕೊಲ್ವಾಂಚೆಂ ಘರ್, ಭಿರಾಂಕುಳ್ ರಿತಿರ್ ವೊತ್ಚ್ಯಾ ಪಾವ್ಸಾಕ್ ಸೊಸುಂಕ್ ತಾಂಕಾನಾಸ್ತಾಂ ಸಗ್ಳ್ಯಾನಿಂ ಪೊಂವ್ಚ್ಯಾ ತ್ಯಾ ಪಾಕ್ಯಾಕ್ ವಯ್ಲ್ಯಾ ಘರ್ಚ್ಯಾ ಬೆಜ್ಮಿನ್ ಅನಿ ಶೀನಾ ಪೂಜಾರಿನ್ ಇಲ್ಲೆಂ ಸಮಾ ಕರುನ್ ದಿಲ್ಲೆಂ, ಸಗ್ಳ್ಯಾ ಪಾಕ್ಯಾಚೆ ವಾಶೆ ಸುರಿಯೆಲ್ಯಾತ್, ಯೆಂವ್ಚ್ಯಾ ವರ್ಸಾ ಪುಣಿ ಬದ್ಲಿ ಕರಿಜೆ ಮ್ಹುಣೊನ್ ಪಯ್ಲೆಂಚ್ಚ್ ತಾಕಿದ್ ದಿಲ್ಲಿ ತಾಣಿಂ!

ಕೊನ್ಶಾಂತ್ ಏಕ್ ಕುಂಕ್ಡಾಚೊ ಘುಡ್, ದೊನ್ ಕೊಂಬೆ, ಚಾರ್ ತಲ್ಕಾಂ ಅನಿ ಏಕ್ ಕೊಂಬಿ ಚಾರ್ ಪಿಲಾಂ ಗುಡಾ ಭಿತರ್ ಕುರ್ವಾತಾಲಿಂ. ಬಾಗ್ಲಾಕ್ ಫೊಳೆಂ ಆಡ್ ದವರುನ್ ಪಾತೊರ್ ತಾಕಾ ವೊಣ್ಕೊನ್ ದವರುಲ್ಲೊ! ಪಾಂಚ್ ದಿಸಾಂ ಆದಿಂ ಅಲ್‍ಪುಚ್ಚೆನ್ ವ್ಹಡ್ಲ್ಯಾ "ಕೆಂಪು‌ಉರ್ಯಾಕ್" ವೊಡ್ನ್ ವರ್ತಾನಾ, ಘುಡಾ ಪೊಳ್ಯಾಕ್ ಫಾತೊರ್ ಆಡ್ ದವರಿನಾತ್ಲ್ಯಾಚೊ ಉಗ್ಡಾಸ್ ಜಿವೊಚ್ಚ್ ಆಸ್‍ಲ್ಲೊ!

ಕುರ್ವ್ಯಾಂತ್ ಗೊಣಿ ಘಾಲ್ಲ್ಯಾ ಜಾಗ್ಯಾರ್ ಏಕ್ ಕೊಲ್ಗೆಂ ನಿದ್ಲಾಂ, ಪಾಂಚ್ ವರ್ಸಾಂಚೆಂ ತೆಂ! ತಾಚೊ ಜಾಗೊ ತೊಚ್ಚ್. ಸಾರ್ಕೆಂ ಪೊಟಾಕ್ ನಾಸ್ತಾನಾ ಭಾಗ್ಲಾಂ! ಭಿತರ್ ರಾಂದ್ಣಿ ಕೊನ್ಶ್ಯಾಂತ್ ಏಕ್ ಮಾಜಾರ್ ನಿದ್ಲಾಂ! ಬಾಯ್ಲ್ಯಾ ಹಿಂವಾಂಕ್ ರಾಂದ್ಣಿಚಿ ಊಬ್ ಸುಶೇಗ್ ದಿತಾಲಿ ತಾಕಾ! ಭಾಯ್ರ್ ಕೊಟಾರ್ಲಿ. ಮಾಣ್ಕೆ ಆರಾಬಾಯೊ ದಿತಾಲೆ! ದೆವಾಕ್ ಹೊಗಾಳ್ಸಿತಾತ್ ವಾ ದುರ್ಸಾತಾತ್ ತೆಂ ನೆಣಾಂ!

ಏಕ್ ಚಿಮ್ಣಿ ತ್ಯಾ ಸಗ್ಳ್ಯಾ ಘರಾಂತ್ ಉಜ್ವಾಡ್ ಫಾಂಕೊಂವ್ಚೆ ಏಕ್ ವ್ಯರ್ಥ್ ಸಾಹಸ್ ಕರ್ತೆ ಅಸಾ ಆನಿ ತಿ, ಏಕ್ ಪಾವಣ್ಶಿಂ ವರ್ಸಾಂ ಉತ್ರಾಲ್ಲಿ ಬಾಗೇಟಿ ಕೂಡ್, ಕಾತಿ ಸಗ್ಳ್ಯೊ ಮಿರಿಯೊ ಪಡೊನ್ ಪಾಟ್ ಬಾಗ್ವಾಲ್ಲಿ ಏಕ್ ಸ್ತ್ರೀ!. ಏಕ್ ಸುತಾಚೆಂ ಕಾಪಡ್ ಆಂಗ್‍ಭರ್ ರೆವ್ಡಾವ್ನ್ ಪಾಂಯ್ ಲಾಂಬ್ ಸೊಡುನ್ ಬಗ್ಲೆನ್ ಪಾನ್ ಪೊಡಿಚಿ ಪೊತಿ ದವರುನ್ ಅಲ್ತಾರಿಕ್ ಮುಖ್ ಕರುನ್ ಆಮೊರಿ ಕರ್ತೆ ಆಸಾ!

ತಿ ಸೊಭಿನಾಮಿ!

ಆಲ್ತಾರಿರ್ ಸಾಂತ್ ಆಂತೊನಿಚಿ ಇಮಾಜ್, ಏಕ್ ಖುರಿಸ್ ಅನಿ ಏಕ್ ಕೊನ್ವೆಂಟಾಚಾ ಸಿಸ್ಟರಿನ್ ದಿಲ್ಲೆಂ ಕೊಂತ್. ರಾಮಾಚ್ಯಾ ಆಯ್ತಾರಾಚೊ ರಾಮ್ ಆನಿ ಮೊಂತಿ ಫೆಸ್ತಾಚಿ ಕಣ್ಶಿಯ್ ಆಸಾ. ಪುಣ್ ಉಂದ್ರಾನ್ ಸಗ್ಳೆಂ ಭಾತ್ ಕರ್ಲಾಯ್ಲಾಂ. ಪವಿತ್ರ್ ತೆಂ, ತಾಚೊ ಜಾಗೊ ತೊಚ್ಚ್ ಅಲ್ತಾರಿಚೊ!

ಭಾಗೆವಂತ್ ಸಾಂತ್ ಅಂತೊಂನಿ, ಪಾವ್ ತುಂ ಮ್ಹಾಕಾ. ಅನಿಕೀ ಮ್ಹಕಾ ರಡಾಯ್ನಾಕಾ, ಕಿತ್ಲೆಂ ಜಾಯ್ತ್ ದುಃಖ್ ಹಾಂವೆಂ ಗಳಯಿಲ್ಲೆಂ, ಕಿತ್ಲಿಂ ಜಾಯ್ತ್ ಮಾಗ್ಣಿಂ ತುಕಾ ಭೆಟಯಿಲ್ಲಿಂ?! ಕಿತ್ಯಾಕ್ ತುಂ ತ್ಯಾ ಅಲ್ತಾರಿರ್ ಉಬೊ ಅಸಾಯ್?! ದೆವಾ ಸಾರ್ಕೊ ತುಂ! ಮ್ಹಜೊ ಪಾತ್ರೊನ್ ತುಂ! ಹಾಂವೆಂ ಕೆಲ್ಲಿಂ ಮಾಗ್ಣಿಂ, ತುಂ ದೆವಾ ಪರ್ಯಾಂತ್ ಪಾವಯ್ತಾಯ್ ವಾ ನಾಂ? ತುವೆಂ ತಾಕಾ ಸಾಂಗ್ಲ್ಯಾಂಯ್ ವಾ ನಾಂ? ಹಾಂವ್ ಮಾಗ್ತಾಂ ಮ್ಹಣ್ ತುಜ್ಯೆ ಲಾಗಿಂ? ಅನಿ ದೇವ್ ಕಿತ್ಯಾಕ್ ಮ್ಹಜೆಂ ಮಾಗ್ಣೆಂ ಆಯ್ಕಾನಾಂ? ಕಿತ್ಲೆಂ ಜಾಯ್ತ್ ಏ ಆಲ್ತಾರಿ ವಯ್ಲ್ಯಾ ಸಾಂತಾ ತುಜ್ಯೆ ಲಾಗಿಂ ಸಾಂಗ್ಲೆಲೆ ತೆ ಮೊಜೆ ಆಕ್ಲಾಸ್? ಸಂಸಾರಾಚ್ಯಾ ಸರ್ವ್ ರಚ್ನಾಂಕ್ ರಚ್‍ಲ್ಲ್ಯಾ ತ್ಯಾ ನಾಂ ದಿಸ್ಚ್ಯಾ ದೆವಾಕ್ ತರೀ ಕಳಿತ್ ನಾಂ ಆಪ್ಲ್ಯಾ ರಚ್ನೆಕ್ ಕಿತೆಂ ಜಾಯ್ ಮ್ಹುಳ್ಳೆಂ?

ಹಾಂವೆಂ ತರೀ ಖಂಚ್ಯಾಂತ್ ಚೂಕ್ ಆಧಾರ್ಲೆಲಿ? ಸಾಂಗ್ ಮ್ಹಾಕಾ ಹಾಂವ್ ಜಲ್ಮಾಲ್ಲಿ ಚೂಕ್? ಮ್ಹಜ್ಯಾ ಅವಯ್ ಬಾಪಾಯ್ನ್ ಹ್ಯಾ ದುಬ್ಳಾ ಕುಟ್ಮಾಂತ್ ಮ್ಹಾಕಾ ಕಾಜಾರ್ ಕರುನ್ ದಿಲ್ಲಿ ಚೂಕ್? ತಾಂತುಂಯ್ ಹಾಂವೆಂ ಸಾಕ್ರಾಮೆಂತ್ ಸ್ವೀಕಾರ್ ಕೆಲ್ಲೊ ಸಾತ್ವೊ. ತಿ ಚೂಕ್? ಸಂಸಾರಾಕ್ ನಿಯಮ್ ತರೀ ಅದಾಂವ್ ಅನಿ ಏವೆನ್ ಖೆಲ್ಲೆಂ ತೆಂಚ್ಚ್ ಫಳ್. ಮೀಟ್ ಮಿರ್ಸಾಂಗ್ ಖೆಲ್ಲ್ಯಾ ಜೀವಾನ್ ಪರತ್ ಅನಿ ಪರತ್ ಕೆಲ್ಲೆಂ ಚೂಕ್? ತ್ಯಾ ಆಡ್ವಾರ್ಲೆಲ್ಯಾ ಫಳಾಚಾ ಏಕಾ ಬಿಯೆನ್ ಮ್ಹಜ್ಯಾ ಗರ್ಬಾಂತ್ ವಾಡಾವಳ್ ಘೆವ್ನ್ ನೋವ್ ಮಹಿನ್ಯಾಚ್ಯಾ ಆವ್ದೆ ಉಪ್ರಾಂತ್ ಮನ್ಶಾ ರುಪಿಂ ಭುಂಯ್ ಪಡ್ತಾನಾ, ತಾಚಿ ಆವಯ್ ಜಾಲ್ಲಿ ಮ್ಹಜಿ ಚೂಕ್? ತ್ಯಾ ತುಜ್ಯಾ ದೆವಾನ್ ರಚ್‍ಲ್ಲ್ಯಾ ರಚ್ನಾಂ ಮಧ್ಲ್ಯಾ ಏಕಾ ಸೊರ್ಪಾನ್, ಮ್ಹಜ್ಯಾ ಘೊವಾಕ್ ಖೊಂಚಾವ್ನ್ ತೊ ಮೆಲೊ ಅನಿ ಮ್ಹಾಕಾ ತೆಶೆಂಚ್ ಮ್ಹಜಾ ಆನಿ ತಾಚ್ಯಾ ಮದ್ಲ್ಯಾ ಅಡ್ವಾರ್ಲೆಲ್ಯಾ ಫಳಾಕ್ ಸಾಂಡುನ್ ಗೆಲೊ.

ಅಲ್ತಾರಿ ವಯ್ಲ್ಯಾ ಏ ಸಾಂತ್ ಆಂತೊನೀ, ಸಾಂಗ್ ಮ್ಹಾಕಾ ದುಬ್ಳಿಕಾಯೆಂತ್ ಥಂಯ್ ಹಾಂಗಾ ಕಾಮ್ ಕರುನ್, ಕೊಣಾ ಘರಾ ಸಾರೆಂ ಕಾಡುಂಕ್ , ಬೆಸಾಯ್ , ಖೊಲಿ ಜಾಡುಂಕ್, ಕಾಂಟಿ ಕಾತ್ರುಂಕ್ , ಭಾತ್ ಲುವೊಂಕ್ ದೀಸ್ ಆನಿ ರಾತ್ ಮುಣೊನ್ ಲೆಖಿನಾಸ್ತಾನಾ  ಕುಟ್ಮಾ ಫಳಾಕ್ ಪೊಸ್ಚ್ಯಾ ಏಕಾಚ್ಚ್ ನಿಬಾನ್ ಜಿಯೆಲ್ಲಿ ಮ್ಹಜಿ ಚೂಕ್? ಅನಿ ತೊ ಇಸ್ಕೊಲಾಚೆಂ ಬೇಗ್ ಖಾಂದ್ಯಾರ್ ಘೆವ್ನ್ ಚ್ಯಾರ್ ವರ್ಸಾಂ ಪರ್ಯಾಂತ್ ಗೆಲೊ! ಹರ್ಯೆಕಾ ಪರಿಕ್ಷೇಂತ್ ತಾಂಬ್ಡೆ ಗೀಟ್ ಯೆತಾತ್ ಮ್ಹಣ್ ಶಾಸ್ತ್ರಿ ಮಾಸ್ಟೆರಾನ್ ಮಾರ್‌ಲ್ಲ್ಯಾ ಮಾರಾಂಕ್ ಭಿಯೆವ್ನ್ ಘರ್, ಇಸ್ಕೊಲ್ ತಶೆಂಚ್ ಗಾಂವ್ ಸೊಡ್ನ್ ಧಾಂವ್‍ಲ್ಲೊ ಮೊಜೊ ಕಾಳ್ಜಾ ಕುಡ್ಕೊ ವಿನ್ಸಿ ಪಾಟಿಂ ಯೆಂವ್ಕ್ ನಾಂ, ದೊಳ್ಯಾಂ ದಿಶ್ಟಿಕ್ ನಾಂ. ಅಕ್ಲಾಸಾಂತ್ ಹಾಂವ್ ರಡ್ಲಿಂ ಕಿತ್ಲಿಂ?! ತುಕಾಯ್ ಹಾಂವೆ ವಾತಿ ಪೆಟೆಯ್ಲೆಲ್ಯೊ. ಸಾಂತಾ ಉಗ್ಡಾಸ್ ಕರ್. ಹಾಂವೆ ತುಕಾ ಇಗರ್ಜೆಂತ್ ಆನಿ ಹಾಂಗಾ ದೊನಾಂಯ್ ಕಡೆನ್ ವಾತಿ ಪೆಟೆಯ್ಲೆಲ್ಯೊ. ತುಕಾ ಉಗ್ಡಾಸ್ ಜಾಂವ್ಚೆ ನಾಂ, ತುಂ ದಿಸಾಕ್ ಕಿತ್ಲ್ಯಾ ಲೊಕಾಚೆಂ ಮಾಗ್ಣೆಂ ಆಯ್ಕಾತಾಯ್ ಕೋಣ್ ಜಾಣಾಂ? ಕಿತ್ಲ್ಯಾ ಲೊಕಾಚ್ಯಾ ಗರ್ಜೆಕ್ ಪಾವ್ತಾಯ್ ಕೋಣ್ ಜಾಣಾಂ? ಪುಣ್ ಇತ್ಲ್ಯಾ ವರ್ಸಾನಿಂ ಮಜ್ಯಾ ವಾಂಟ್ಯಾಚೆಂ ಮಾಗ್ಣೆಂ ಆಯ್ಕೊಂಕ್ ತುಕಾ ವೇಳ್ ನಾಂ? ಸರ್ವ್ ಲೋಕ್ ತುಜ್ಯೆ ಲಾಗಿಂಚ್ಚ್ ಮಾಗ್ತಾತ್ಗೀ ಕಿತೆಂ? ತಾಂಕಾಂ ದುಸ್ರೊ ಸಾಂತ್ ನಾಂ? ಪುಣ್ ಆಲ್ತಾರಿ ವಯ್ಲ್ಯಾ ಏ ಸಾಂತಾ ಹಾಂವೆಂ ಆಜ್ ನಿಚೆವ್ ಕೆಲಾ. ಏಕ್‍ಚ್ಚ್ ಘರ್ ಆನಿ ಮ್ಹಾಕಾ ಸಾಂಡುನ್ ಗೆಲ್ಲ್ಯಾ ಮ್ಹಜ್ಯಾ ಪುತಾಕ್ ವಿನ್ಸಿಕ್ ಘರ್ಚಿ ವಾಟ್ ಪಾಟಿಂ ದಾಕಯ್! ನಾಂ ತರ್. ಹ್ಯಾ ಚಿಂತ್ನಾಂ ಥಾವ್ನ್ ಮುಕ್ತಿ ಜೊಡುಂಕ್ ಮ್ಹಾಕಾ ಮೊರ್ನ್ ಧಾಡ್! ಮ್ಹಾಕಾ ಮೊರ್ನ್ ಧಾಡ್! ಹೆಂ ಜಾಂವ್ಕ್ ನಾಂ ತರ್. ಫಾಲ್ಯಾಂಚಿ ಸಾಂಜೆಚಿ ಆವ್ಮರಿ ಆಯ್ಕೊಂಕ್ ತುಂ ಹ್ಯಾ ಆಲ್ತಾರಿರ್ ಅಸ್ಚೊ ನಾಂಯ್! ಮ್ಹಾಕಾ ನಾಕಾ ಧರ್ಮ್, ನಾಕಾ ತೆಂ ಮಾಗ್ಣೆಂ. ಜಿಣ್ಯೆ ಅಕೇರಿ ಪರ್ಯಾಂತ್ ಫಳ್ ದಿಂವ್ಕ್ ಸಕನಾತ್ಲೆಲೆಂ!!!

ಚಿಮ್ಣೆಕ್ ಏಕ್ ಪುಂಕ್ ಮಾರ್ಲಿ ತಿಣೆಂ. ಕಾಳೊಕ್ ಭರ್ಲೊ ತ್ಯಾ ಘರಾಂತ್. ಜಗ್ಲಾಣ್ಯಾಂತ್ ಘರಾಂತ್ ಉಜ್ವಾಡ್ ಭರ್ಲೊ.

ಪಾವ್ಸ್ ಶಿರಾಂಧಾರಿನಿಂ ವೊತ್ತಾಲೊ.

ಸೆಜಾರ್ಚೊ ಕೊಂಬೊ ಸಾದ್ ಘಾಲಿಲಾಗ್ಲೊ. ಹ್ಯಾ ಘರಾಂತ್ಲ್ಯಾ ಕೊಂಬ್ಯಾಂಚೊ ಸಾದ್ ಆಯ್ಕೊಲೊ ನಾಂ. ಘರಾಂತ್ ಕೊಲ್ಗೆಂ ನಾಂ! ಆಲ್ತಾರಿ ವಯ್ರ್ ಸಾಂತ್ ನಾಂ! ಜಿವಿ ಆಸಲ್ಲಿ ಮಾತಾರಿ ನಿರ್ಜಿವ್ ಕುಡಿರ್ ಪಾಂಕ್ಯಾ ಪಂದಾ ವಿಶೆವ್ ಘೆತಾ ಸಾಸ್ಣಚೊ ವಿಶೆವ್. ಪಾಕ್ಯಾ ವಯ್ರ್ ವ್ಹಡ್ ಜಯ್ತ್ ಮಾಡ್ ಕುಡ್ಕೆ ಜಾವ್ನ್ ಪಡ್ಲಾ!

ಕೋಣ್ ಜಾಣಾಂ, ಸಾಂತ್ ಭಿಯೆಲೊ?! ವಾ ತಾಣೆಂ ಸೊಭಿನಾಮ್ಯೆಚೆಂ ಮಾಗ್ಣೆಂ ಆಯ್ಕಾಲೆಂ?!

- ಸನ್ನು ಮೊನಿಸ್ ಬೊಳಿಯೆ