Author
Melwin Kalakulಗಾಂವ್ಚೆ ಪೆಟೆ
ಆಮ್ಚ್ಯಾಂ ಗಾವಾಂತ್ ಪೆಟ್ಯಾಂಚೆ ಲಾಪ್ಡೆ
ಕಾಳೆ ಥೊಡೆ, ಧವೆ ಥೊಡೆ.
ಥೊಡೆ ಕಾಟ್, ಥೊಡೆ ಬ್ರೀಡ್
ಥೊಡ್ಯಾಂಕ್ ಸಂತೊಸ್, ಥೊಡ್ಯಾಂಕ್ ಜಾಲಾ ಮೊಸ್!
ಕಾಟ್ ಪೆಟ್ಯಾಂಕ್ ಬಸ್‌ಸ್ಟ್ಯಾಂಡ್, ಉಗ್ತಿಂ ಆಂಗ್ಣಾ,
ರಸ್ತ್ಯಾ ದೇಗ್, ಖಂಯ್ ತರಿ ತಾಂಕಾ ವೊಂಬ್ತಾ!
ಬ್ರೀಡಾಂಕ್ ತಶೆಂ ನ್ಹಯ್,
ಜಾಯ್ ವ್ಹಡ್ ರಾವ್ಳೆರಾಂ, ಎಸಿ ಘರಾಂ!
ದಿಸಾಕ್ ಮಾರ್ಗಾರ್ ಕಾಟ್ ಪೆಟ್ಯಾಂನಿ ಘೊಂಕ್ಚೆ-
ಆಮಿ ರಾಂದ್ವಯ್ ಖಾಂವ್ಚೆಂ!
ಸಾಂಜ್ ಜಾತಚ್... ದುಕೊರ್, ಬಕ್ರೊ, ಭಿಫಾಚಿ
ಹಾಡಾ ಲೆಂವ್ಚೆ
ಗರಿಬ್ ಪೆಟ್ಯಾಂಕ್ ಜಿವೆಶಿ ಮಾರ್ನ್
ಕೊಣಾಕೊಣಾಚ್ಯಾ ಗೊಮ್ಟ್ಯಾಕ್ ಭಾಂದ್ಚೆ!
ಸುಗ್ಗಿ-ಪಗ್ಗು, ಫೆಸ್ತಾಂ ಪರ್ಬೊ ಸಗ್ಳೆ ಮೊನೆಂ
ಎಲಿಸಾಂವ್ ಆಯ್ಲೆಂಚ್ ಜಾತಾ ರಗ್ಳೆ
ಕೋಣ್ ಮ್ಹಣಾಂ... ಆಮಾಸೆಕ್ ಚಾಳ್ವಾತಾ ತಾಂಕಾ?!
ಗಾವಾಂತ್ ಆಮ್ಚ್ಯಾಂ ಆಮಾಸ್ ಸದಾಂ!
ಕಾಟ್-ಕಾಟ್ ಚಾಬ್ಲೆ, ಪಡ್ಲೆಂ ಮೊಡೆಂ
ನಾಂ ಖಬಾರ್ ಗಾಂವಾರ್
ಮದ್ಗಾತ್ ಬ್ರೀಡ್ ಘುಸ್ಲೊ
ಗಾಂವ್ ಫಸ್ಲೊ, ಪಡ್ಲೊ ಉಜೊ!!
ಆಜಾದಿ ಮೆಳೊನ್ ವರ್ಸಾಂ ಪಾವಣ್ಶೆಂ ಸಂಪ್ಲಿ
ಉಗ್ತ್ಯಾನ್ ಘೊಂಕ್ಚೆಪರಿ ನಾಂ
ಗುಟಾನ್ ಸಾಂಗ್ಚೆಪರಿ ನಾಂ
ಕಾಟ್ ಪೆಟ್ಯಾಂಚೊ ಸಂಕೊ ಠಕ್ಕೆ-ಆಯ್ಶಿಂ!
ತಾಂತುನ್ ಆಮಿ-ತುಮಿ ಮಾತ್ಶೆ ಸಾರ್ಶಿ-ಭರ್ಶಿ!!
ಮೆಲ್ವಿನ್ ಕಲಾಕುಲ್
Nanu Marol - Thottam
" ಗಾಂವ್ಚೆ ಪೆಟೆ " - ಶಿಮ್ಟಿ ಧರ್ತಾನಾ....
ಕವಿ ಸಮಾಜೆಚಿ ನಾಡ್ ಆಸ್‍ಲ್ಲ್ಯಾಬರಿ.ಏಕ್ ಜವಾಬ್ದಾರಿಯುತ್ ಕವಿ ಆಪ್ಲೆ ಕಾನ್, ದೊಳೆ ಆನಿ ಆತ್ಮೊ ಉಗ್ತೊ ದವರುನ್ ಸಮಾಜೆ ವಯ್ರ್ ಆಪ್ಲಿ ತೀಕ್ಷ್ಣ್ ದೀಷ್ಟ್ ದವರುನ್ ಆಸ್ತಾ. ಬೊರೆಂ ಘಡ್ತಾನಾ ಉಲ್ಲಾಸಿತಾ , ಆನ್ಯಾಯ್ ಘಡ್ತಾನಾ ರಾಗಾರ್ ಜಾತಾ ಆನಿ ವಿಕೋಪಾಕ್ ವೆತಾನಾ ಕ್ರಾಂತಿಕಾರಿ ಜಾತಾ. ಆಸಲೆಂಚ್ ಏಕ್ ಪ್ರಯತ್ನ್ ಕೆಲಾಂ ಕವಿ ಮೆಲ್ವಿನ್ ಕಲಾಕುಲ್ ಹಾಣೆ ಆಪ್ಲ್ಯಾ "ಗಾಂವ್ಚೆ ಪೆಟೆ" ಕವಿತಾಂತ್. ಪೆಟ್ಯಾಂಕ್ ಕೇಂದ್ರ್ ಬಿಂದು ಜಾವ್ನ್ ಘೇವ್ನ್, ದೇಶಾಚಿ ಪರಿಸ್ಥಿತಿ ಆನಿ ಪ್ರತ್ಯೇಕ್ ಜಾವ್ನ್ ಆಮ್ಚ್ಯಾ ಪ್ರದೇಶಾಚಿ ಪರಿಸ್ಥಿತಿ ವಾಚ್ಪ್ಯಾಂ ಮುಕಾರ್ ದವರುಂಕ್ ಕವಿ ಸಫಲ್ ಜಾಲಾ ಮುಣ್ಯೇತ್.
ಕಶೆಂ ಆಜ್ ಉಂಚ್ಲ್ಯಾ ಜಾತಿಚೆ, ನಿಮ್ನ್ ಜಾತಿಂಚ್ಯಾಕ್ ಉಪಯೋಗ್ ಕರ್ನ್ ತಾಂಚೆ ಥಾವ್ನ್ ಆಪ್ಲೊ ಫಾಯ್ದೊ ಕಸೊ ಜೊಡ್ನ್ ಘೆತಾತ್ ಆನಿ ಕಾನೂನಾಚ್ಯಾ ಧಾವ್ಲ್ಯಾಂಕ್ ಆಪುಣ್ ಸಾಂಪಾಡ್ನಾಶೆಂ ಜಾಗ್ರುತ್ ಘೆವ್ನ್ ನಿಮ್ನ್ ಜಾತಿಚ್ಯಾಂಕ್ ಬಲಿಪಶು ಕರ್ತಾತ್ ತೆಂ ಕವಿನ್ ಭೊವ್ ಸುಂದರ್ ರಿತಿನ್ ವರ್ಣಿಲಾಂ.
ಆಜ್ ದುಬ್ಳೆ ಧರ್ಮಾಂದ್ ಯುವಜನಾಂಗ್ ಹಾಂಚ್ಯಾ ಥೊಡ್ಯಾ ಪಯ್ಶಾಂಚ್ಯಾ ಭುಲವ್ಣೆಕ್ ಬಲಿ ಜಾತಾ. ವಿದ್ಯಾಭ್ಯಾಸ್ ಕರುನ್ ಏಕ್ ಆದರ್ಶ್ ಆನಿ ಸಮಾಜೆಕ್ ಮಾನಾಚೊ ನಾಗರಿಕ್ ಜಾವ್ನ್ ಜಿಯೆಂವ್ಕ್ ಜಾಯ್ ಮುಣ್ಚಿ ದೂರ್‌ದ್ರಷ್ಟಿ ಹಾಂಕಾಂ ಬಿಲ್ಕುಲ್ ನಾ. ಕಿತ್ಯಾಕ್ ಮುಳ್ಳ್ಯಾರ್ ಉಂಚ್ಲ್ಯಾ ಜಾತಿಚ್ಯಾಂನಿ ಧರ್ಮಾಕ್ ಮುಖಾರ್ ದವರುನ್ ಹಾಂಚ್ಯಾ ಭವಿಷ್ಯಾಚ್ಯಾ ವಯ್ರ್ ತಿತ್ಲೊ ಪರಿಣಾಮ್ ಘಾಲಾ ತೆಂ ಬಿಲ್ಕುಲ್ ಚಿಂತುಂಕ್ ವಚನಾಂತ್. ತ್ಯಾಚ್ ದೆಕುನ್ ಕವಿ ಮುಣ್ತಾ " ದಿಸಾಕ್ ಕಾಟ್ ಪೆಟ್ಯಾಂನಿ ಘೊಂಕ್ಚೆಂ (ನಿಮ್ನ್ ಜಾತ್), ಆಮಿಂ ರಾಂದ್ವಾಯ್ ಖಾಂವ್ಚಿ (ಉಂಚ್ಲಿ ಜಾತ್). ಸಾಂಜ್ ಜಾತಾಚ್ ದುಕೊರ್, ಬಕ್ರೊ, ಭಿಪಾಚಿಂ ಹಾಡಾಂ ಲೆಂವ್ಚೆಂ. "ಹಾಂಗಾ ಕವಿ ಆನ್ಯೇಕ್ ಸತ್ ಉಗ್ಡಾಪೆಂ ಕರ್ತಾಕಿ ಆಮಿಂ ತೆಂ ಖಾಯ್ಜೆ, ಹೆಂ ಖಾಯ್ಜೆ ಮುಣೊನ್ ರಾಂದ್ವಯ್ ಖಾತೆಲ್ಯಾಂನಿ ಹಾಡ್‍ಲ್ಲೆ ಕಾಯ್ದೆ ತಾಂಚ್ಯಾ ಸ್ವಾರ್ಥಾಲಾಗೊನ್, ಸಮಾಜೆಂತ್ ಆಶಾಂತಿ ಆಸಾ ಕರುಂಕ್ ಶಿವಾಯ್ ಕೊಣಾಚೆಂ ಬೊರೆಪಣ್ ಕರ್ಚ್ಯಾ ಉದ್ದೇಶಾನ್ ಖಂಡಿತ್ ನಂಯ್.
ಇತ್ಲ್ಯಾಕ್‍ಚ್ ಹ್ಯಾ ನಿಮ್ನ್ ಜಾತಿಚ್ಯಾ ಲೊಕಾಚೊ ವಾವ್ರ್ ಸ್ಥಿಮಿತ್ ಜಾವ್ನಾಸಾನಾ, ಆರಾಜಕತಾ ಆಸಾ ಕರುಂಕ್ ಹೆ ಊಂಚ್ ಜಾತಿಚೆ ತಶೆಂಚ್ ಸ್ವಾರ್ಥಿ ರಾಜ್‍ಕಾರಣಿ ಕಶೆಂ ನಿಮ್ನ್ ಜಾತಿಚ್ಯಾಂಕ್ ಬಡ್ಕಾಯ್ತಾತ್ ಮುಣ್ಚ್ಯಾಕ್ ಆಮ್ಚ್ಯಾ ರಾಜ್ಯಾಂತ್, ವಿಶೇಷ್ ಕರುನ್ ದಕ್ಷಿಣ ಕನ್ನಡ ಜಿಲ್ಲ್ಯಾಂತ್ ಪಾಟ್ಲ್ಯಾ ಮಹಿನ್ಯಾಂನಿ ಘಡ್‍ಲ್ಲಿಂ ಕರಾಳ್ ಘಡಿತಾಂ ಸಾಕ್ಸ್ ಜಾವ್ನಾಸಾತ್. ಎಕಾಮೆಕಾಕ್ ದುಸ್ಮಾನ್ಕಾಯೆಚಿ ವ್ಹಳೊಕ್ ಸಯ್ತ್ ಆಸಾಜೆ ಮುಣೊನ್ ನಾ ಕೇವಲ್ ರಾಂದ್ವಾಯ್ ಖಾಂವ್ಚ್ಯಾ ಉಂಚ್ಲ್ಯಾ ಜಾತಿಚ್ಯಾ ಬ್ರೀಡ್ ಪೆಟ್ಯಾನ್ ಸಾಂಗ್ಲ್ಯಾರ್ ಪಾವ್ತಾ. ಹೆ ಗರಿಭ್ ಪೆಟೆ ಆನಿ ಕೊಣೀ ಗರಿಭ್ ಪೆಟ್ಯಾಕ್ ಜಿವೆಶಿಂ ಮಾರ್ನ್ ಉಪ್ರಾಂತ್ ಬ್ರೀಡ್ ಪೆಟೆ ಹ್ಯಾ ಆಪ್ರಾದಾಕ್ ಕೊಣಾ ಕೊಣಾಚ್ಯಾ ಗೊಮ್ಟ್ಯಾಕ್ ಬಾಂದ್ಚಿ ಪ್ರಕ್ರಿಯಾ ಕರ್ತಾತ್.
ಆನಿ ಆಶೆಂಚ್ ಜಾಂವ್ಕ್ ಜಾಯ್ ಮುಣೊನ್ ಆಶೆವ್ನ್ ಆಸ್‍ಲ್ಲೆ ಬ್ರೀಡ್ ಪೆಟೆ ಉಪ್ರಾಂತ್ ಗಾಂವಾಂತ್ ಜಾತಿ-ಕಾತಿ ಮದೆಂ ಉಜೊ ಪೆಟ್ತಾನಾ ಹೆ ಆಪ್ಲ್ಯಾ ವ್ಹಡ್ ರಾವ್ಳೆರಾಂನಿ, ಎಸಿ ಘರಾಂನಿ ಸಂತೊಸಾಚ್ಯೊ ಪಾರ್ಟ್ಯೊ ಕರುನ್ ಆಸ್ತಾತ್.
ಆಶೆಂ ಆಮ್ಚ್ಯಾ ಸುತ್ತುರಾಂತ್ ಕಿತೆಂ ಆನಿ ಕಶೆಂ ಘಡುನ್ ಆಸಾ ತೆಂ ಕವಿನ್ ಭೊವ್‍ಚ್ ಸೂಕ್ಷ್ಮ್ ರಿತಿನ್ ವಾಚ್ಪ್ಯಾ ಮುಕಾರ್ ಪ್ರಸ್ತುತ್ ಕೆಲಾಂ. ಜಾಯ್ತ್ಯಾ ಚಿಂತ್ನಾಂಕ್ ಇಡೆಂ ಕರುನ್ ದಿತಾ ಹಿ ಕವಿತಾ.ಕವಿತಾ ವಾಚುನ್ ಜಾಲ್ಲೆಂಚ್ ಏಕ್ ದಾಕ್ಟುಲೊ ಶಿಣ್ ಮ್ಹಾಕಾ ಕವಿ ವಯ್ರ್ ಆಸಾ. ಸಗ್ಳ್ಯಾ ಕವಿತೆಂತ್ ಕವಿನ್ ಸವಾಲಾಂಚೊ / ಜಾಂವ್ಚ್ಯಾ ಆನ್ಯಾಯಾಂಚಿ ಸಾಂಖಳ್‍ಚ್ ಉಬಿ ಕೆಲ್ಯಾ ಶಿವಾಯ್, ಆನ್ಯಾಯಾಕ್ ಪ್ರತಿರೋಧ್ ದಾಕೊಂವ್ಚ್ಯಾ ತೆವ್ಶಿನ್ ಕವಿನ್ ಕಾಂಯ್ ವ್ಹಡ್ಲೆಂ ಪ್ರಯತ್ನ್ ಕರುಂಕ್ ನಾ. ಹಾಚ್ಯಾ ವರ್ವಿಂ ಆಖೇರ್ ಜಾತಾ ಮುಣೊನ್ ಕಾಂಯ್ ಗ್ಯಾರಂಟಿ ನಾ. ತರೀ ಮುಳಾವ್ಯೊ ಗರ್ಜೊ ಜಾವ್ನಾಸ್ಚೆ ವಿಧ್ಯಾಭ್ಯಾಸ್, ಕಾಮಾಂ, ಸರ್ಕಾರಿ ಸೌವ್ಲತಾಯಂ ವಯ್ರ್ ಇಲ್ಲೊಸೊ ಉಜ್ವಾಡ್ ಫಾಂಕಯ್ಲೊಲೊ ತರ್ ಕವಿತಾ ದುಸ್ರ್ಯಾಚ್ ಹಂತಾಕ್ ಪಾವ್ತಿ ಆಸ್‍ಲ್ಲಿ ಮುಣೊನ್ ಮೊಜಿ ಆಭಿಪ್ರಾಯ್.
ಹೆಂ ಏಕ್ ಮೊಜೆಂ ಚಿಂತಾಪ್ ಮಾತ್ರ್ ವಿನ: ಕವಿತೆಕ್ ಖಂಚಾಚ್ ರಿತಿಚೆಂ ಆಯ್ಭ್ ನಂಯ್. ಹೆ "ಗಾಂವ್ಚೆ ಪೆಟೆ" ಆಮ್ಚ್ಯಾ ಗಾಂವಾಂ ಗಾಂವಾಂನಿ, ರಸ್ತ್ಯಾ-ರಸ್ತ್ಯಾಂನಿ ಥಾವ್ನ್ ವೆಗಿಂಚ್ ಮಾಯಾಗ್ ಜಾವ್ನ್ ಗಾಂವ್ಚೆ ಪೆಟೆ, ಬ್ರೀಡ್ ಪೆಟ್ಯಾಂಬರಿ ಜಿಯೆವ್ನ್, ರಾವ್ಳೆರಾಂನಿ, ಎಸಿ ಘರಾಂನಿ ವಸ್ತಿ ಕರುಂಕ್ ಸಕ್ತಾತ್ ಮುಣೊನ್ ರುತಾ ಕರ್ಚೊ ಕಾಳ್ ಯೆತಾಲೊ ಮುಳ್ಳ್ಯಾ ಭರ್ವಾಶ್ಯಾನ್.....
- ನಾನು ಮರೋಲ್ , ತೊಟ್ಟಾಮ್.
Reply
Diana Lobo
ದುಬಾಯ್ತ್ ಚಲ್ಲೆಲ್ಯಾ ಕವಿಘೋಷ್ಟಿಂತ್ ಮಕಾ ಖೂಬ್ ಅವಂಡ್ಲೆಲೆ ಕವನ್ ಹೆಂ. ಅಮ್ಚ್ಯಾಚ್ ಗಾವಾಂತ್ ಜಾಲ್ಲ್ಯಾ ಪ್ರಸ್ತುತ್ ಪರಿಗತೆವಯ್ರ್ ದುರ್ಭಿಣ್ ದವರುಂನ್ ಸಮ್ಜಾಲ್ಲೊ ವಿಶಯ್.. ಮಟ್ವ್ಯಾನ್ ತರೀ ಸುಕ್ಶ್ಮಿಕಾಯೆನ್ ಬರಯ್ಲೆಲಿ ರೀತ್ ವಾಚ್ತೆಲ್ಯಾಚಾ ಗಮನ್ ವೊಡುಂನ್ ಪರತ್ ಪರತ್ ವಾಚುಂಕ್ ಆನಿ ಬರೊಂವ್ಕ್ ಪ್ರೇರಣ್ ದಿಂವ್ಚೆ ತಸಲೆ. Poetry has the ability to address injustices and oppression in the unique ways ಮುಣೊಂನ್ ಹ್ಯಾ ಕವನಾ ಮುಖಾಂತ್ರ್ ತುವೆ ಅಮ್ಕಾಂ ಜಾಗಯ್ಲಾಂಯ್.
Reply