Author
Monica Mathias, Moodubelleಕುಟ್ಮಾ ಫೆಸ್ತ್
ಕುಟ್ಮಾ ಥಾವ್ನ್ ಪಯ್ಸ್ ಅಸ್ಲೆಲ್ಯಾನೊಂ,
ಕುಟ್ಮಾ ಫೆಸ್ತಾಕ್ ಯೆಯಾ!
ದಾದೊಶಿ ರಾಂದುನ್ ದವರ್ಲಾಂ,
ಮ್ಹಜೆಂ, ತುಮಿ ಕುಟಾಮ್ ಜಾಯಾ.
ಹಾವೆಂಯ್ ಕಣ್ಶಿ ಹಾಡ್ನ್,
ನವೆಂ ತಯಾರ್ ಕೆಲಾಂ!
ಭರ್‌ಲ್ಲೆಂ ಕುಟಾಮ್ ಮ್ಹಜೆಂ,
ಆಜ್ ರಿತೆಂ ಜಾಲಾಂ.
ಫುಲಾಂಚಿ ರಾಸ್‍ಚ್ಚ್ ತಯಾರ್ ಜಾತಾಲಿ,
ಮರಿಯೆಕ್ ಹೊಗೊಳ್ಸುಂಕ್!
ಆಜ್ ಕೊಣೀ ದೀನಾ ಏಕ್ ಫುಲ್,
ಮರಿಯೆ ಮಾನಾಕ್ ಅರ್ಪುಂಕ್.
ಕೊಬಾಚಿಂ ಚಿಂವ್ಡಾಂ ಚಿಂವೊನ್,
ದಾಂತ್ ಜಡೊನ್ ಗೆಲೆ!
ಕುಟ್ಮಾಚಿ ವಾಟ್ ರಾಕೊನ್,
ದೊಳೆ ತಶೇಯ್, ಗಯ್ರೆ ಜಾಲೆ!
ಹಾಂವೆಂಯ್ ಕೆಲ್ಲಿಂ ಏಕಾ ತೆಂಪಾರ್,
ರಾಂದ್ವಾಯೆಚಿಂ ನೋವ್ ಪಕ್ವನಾಂ!
ಅತಾಂ ಹಾಂವೆ ರಾಂದ್‍ಲ್ಲೆಂ,
ತಾಂಕಾ ತೆಂ ರುಚಾನಾಂ!
ಮಜ್ಯಾ ಕುಟ್ಮಾಕ್ ಆಸ್‍ಲ್ಲಿ,
ಅಳ್ವಾ-ಖೊಲ್ಯಾಂ ಪತ್ರಾಡ್ಯಾಂಚಿ ವೋಡ್!
ಆಜ್ ಜಾಲ್ಯಾಂ ಹಾಂವ್ ಎಕ್ಸುರಿಂ,
ಕುಟ್ಮಾಕ್ ಮ್ಹಜ್ಯಾ ಜಾಲ್ಯಾಂ ಜಡ್!
ಮಜ್ಯಾ ಕುಟ್ಮಾಕ್ ಆಂವಡ್ತಾಲೆಂ,
ವೋರ್ನ್ ಮುಗಾದಾಳಿಚೆಂ!
ಕಾಂಯ್ ಪರತ್ ನವೆಂ ಬೆಳೆಂ ಪಿಕ್ತೆಲೆಂ?
ಭಗಾಪ್ ಅಶೆಂ ಕುಟ್ಮಾ ಫೆಸ್ತ್ ಹೆಂ ಅಖ್ರೇಚೆಂ!
ಮೊನಿಕ ಮತಾಯಸ್ ಮೂಡುಬೆಳ್ಳೆ.
Leave a comment