Author
Monica Mathias, Moodubelleಮದರ್
ಕಾಮಾರ್ ಮೆನೆಜರ್, ಘರಾಂತ್ ಹಾಂವ್ ಮದರ್.
ಜಿಣ್ಯೆ ರೊದಾಂ ಘುಂವ್ತಾತ್, ಜಶೆಂ ಧಾಂವ್ತಾ ರೈಲ್ ಪಾಟಾರ್.
ತ್ರಾಸ್ ಭೊಗ್ತಾ ಚಲೊಂಕ್, ಹ್ಯಾ ಆಧುನಿಕ್ ಸಂತತೆ ಬರಾಬರ್.
ಶಿಕ್ತಾಂ ಹಾಂವೀ ಧಾವೊಂಕ್, ಪಾಟಿಂ ಉರ್ತೆಲಿಂ ವೇಳ್ ಉತರ್ಲ್ಯಾರ್.
ಉದೆಲ್ಲೊ ಸುರ್ಯೊ ಕಸೊ ಬುಡ್ತಾ, ದೇವ್ ಜಾಣಾಂ.
ದೀಸ್ ಕೆದಾಳಾ ರಾತ್ ಜಾತಾ, ಹಾಂವ್ ನೆಣಾಂ.
ಕಾಮ್, ಘರ್, ಭುರ್ಗಿಂ, ಪುರೊ ಜಾಲೆಂ ಘಾಲ್ನ್ ಉಡ್ಕಾಣಾಂ.
ಕೆದಾಳಾ ಮೆಳಾತ್ ವಿರಾಮ್, ತುಕಾ ಭಾಗಿ ಆವಯ್ಪಣಾಂ.
ಘೊವ್ ಮ್ಹಣ್ತಾ ತುಂ ಗಾಡಾಂವ್, ತುಕಾ ಕಾಂಯ್ ಗೊತ್ತು ನಾಂ.
ಭುರ್ಗಿಂ ಮುಣ್ತಾತ್ ಹೊ ಡಿಜಿಟಲ್ ಎರಾ, ಮಮ್ಮಿ ತುಕಾ ಸಮ್ಜನಾಂ.
ಜಾಯ್ ಮಾತ್ರ್ ಮಮ್ಮಿ, ಪೋಟಾಕ್ ಭುಕ್ ಲಾಗ್ತಾನಾ.
ಕುಂಡ್ಲ್ಯಾಂತ್ಲಿ ಕಡಿ ರುಚನಾಂ, ಪಿಜ್ಜಾ ಬರ್ಗರ್ ಮೆಜಾರ್ ಅಸ್ತಾನಾ.
ಬ್ರೇಕ್ ಫಾಸ್ಟಾಕ್ ತೆಂ ಕರ್, ಲಂಚಾಕ್ ಹೆಂ ಕರ್, ಆದ್ಲೆ ರಾತಿಚ್ಚ್ ದಿತಾತ್ ಆರ್ಡರ್.
ತೋಂಡ್ ತಾಂಬ್ಡೆಂ ಜಾತಾ, ನಾಂ ತರ್ ಜೆವಾಣ್ ವೇಳಾರ್ ತಯಾರ್.
ಘರ್ಚೆಂ ಕಾಮ್ ಸಂಪವ್ನ್ ಪಾವ್ತಾನಾ ಕಾಮಾಕ್, ಜಾತಾತ್ ಮ್ಹಜೆ ಬಾರಾ ಬ್ರೇಸ್ತಾರ್.
ದಿಸ್ತಾ ಘರ್ಚ್ಯಾಕೀ ಚಡ್, ರೆಸ್ಟ್ ಮೆಳ್ತಾ ಮ್ಹಾಕಾ ಕಾಮಾರ್.
ಕಿತೇಂಯ್ ಜಾಂವ್, ಅವಯಾಂ ವಿಣೆಂ ಕುಟಾಮ್ ಚಲನಾ,
ಚಲಿಯೆಕ್ ಅಸ್ಚಿ ಸಕತ್, ದೇವಾನ್ ದಾದ್ಲ್ಯಾಕ್ ದೀಂವ್ಕ್ ನಾ.
ಪುನರ್ ಜನಮ್ ತಿಚೊ ಜಾತಾ, ನವ್ಯಾ ಜಿವಾಕ್ ಜಲ್ಮಾಯ್ತಾನಾ.
ನಶೀಬ್ವಂತ್ ತುಂ, ತಿಚ್ಯಾ ಪಾಲ್ವಾ ಸಾವ್ಳೆಂತ್ ರಕ್ಶಣ್ ತುಕಾ ಮೆಳ್ತಾನಾ.
ಮೊನಿಕ ಮತಾಯಸ್, ಬೊಳಿಯೆ.
Lavina Menezes L
ಆಜ್ಕಾಲ್ ಸಕ್ಕಡ್ ಆವಯಾಂನಿ ತಾಂಚಾ ಕಾಳ್ಜಾ ಥಾವ್ನ್ ಸಾಂಗ್ಚಿ ಹಿಂಚ್ ಉತ್ರಾಂ. ಮಕಾ ಆಯ್ಕೊನ್, ಪಳೆವ್ನ್ ಚಡ್ ದು:ಖ್ ಭೊಗ್ತಾ.ಮೊನಿಕಾ ಬಾಯೆನ್ ಸಬ್ದ್ ಸೊಭಯ್ಲ್ಯಾತ್ ಪರ್ಮಳ್ ಮೊಗ್ರೆ ವಕ್ಲೆಚಾ ಮಾತ್ಯಾಕ್ ಸೊಭಯ್ಲೆ ಬರಿ. ಆಮ್ಕಾ ಲಾನ್ ಥಾವ್ನ್ ದೆವಾನ್ ಕಿತೆಂ ದಿಲಾಂ ತೆ ಚಿಂತುನ್ ಸೊಂತೊಸ್ ಜಾತಾ.
ಖಾಂವ್ಕ್, ಜೇಂವ್ಕ್ ನಾಂ ತರೀ ರಾನಾಂತ್ಲಿ ಫಳಾಂ ಖಾವ್ನ್ ಕೆಲ್ಲಿ ಮಝಾ ಆತಾಂಚಾಕ್ ಅರ್ಥ್ ಜಾಯ್ನಾ. ಆತಾಂಚೊ ಕಾಲ್ ಆಮ್ಕಾ ಸಮ್ಜನಾಂ. ಆಜ್-ಕಾಲ್ ಖಾಣಾಚೆಂ ಚಿಂತುನ್ ರಾಗ್ ಯೆತಾ. ಆಮ್ಚೆ ನೀಜ್ ಪೇಜ್ best 👌 👍 😍
Lavina Menezes L
Reply
ಲುವಿಸ್ ಆಲ್ವ. ಬೊಳಿಯೆ
ಕಾಳ್ಜಾಚಾ ಗುಂಡಾಯೆ ಥಾವ್ನ್ ಆಯಿಲ್ಯಾ ಬೊಗ್ಣಾನಿo ಆನಿಂ ಬೋವ್ ಅಪುರ್ಬಾಯೆಚಾ ಉತ್ರಾನಿo ಹಿ ಕವಿತಾ ತುವೆಂ ಲಿಕ್ಲೆಲ್ಯಾ ಬಾಯ್ ಮೊನಿಕಾ ತುಕಾ ಶಾಬಾಸ್ಕಿ ಆನಿಂ ಉಲ್ಲಾಸ್... 👏👏
Reply
Maureen D'Arcy
Please translate Monica I love your work, You are so blessed and talented in so many fields of art Well done
Reply
Monica Mathias
ದೇವ್ ಬರೆಂ ಕರುಂ ನಾನು ಬಾಬ್ ಸೊಬಿತ್ ಉತ್ರಾಂ ಗುಂತುನ್ ಮಕಾ ಶಾಬಾಸ್ಕಿ ಪಾಟಯಿಲ್ಯಾಕ್ ಅನಿಂ ಆವಯ್ಪಣಾಚೆಂ ವರ್ಣನ್ ಕೆಲ್ಲ್ಯಾಕ್. ತುಮ್ಚಿಂ ಉತ್ತೇಜನಾನಾಚಿಂ ಉತ್ರಾಂ ಅಮ್ಕಾಂ ಮುಖಾರ್ ಸರೊಂಕ್ ವಾಟ್ ದಾಕಯ್ತಾತ್. ದೇವ್ ಬರೆಂ ಕರುಂ. 🙏
Reply
ನಾನು ಮರೊಲ್ ತೊಟ್ಟಾಮ್
ಕವಯಿತ್ರಿ ಬಾಯ್ ಮೊನಿಕಾ ಮಥಾಯಸ್ ಮೂಡ್‍ಬೆಳ್ಳೆ ಹಿಚ್ಯಾ ವಿಶಿಂ ಮ್ಹಾಕಾ ಭೊವ್ ಆಂವ್ಡೊಚಿ ಗಜಾಲ್ ಮುಳ್ಳ್ಯಾರ್ ಪಯ್ಶಿಲ್ಯಾ ಯುರೊಪಾಂತ್, ಥಂಯ್ ಕೊಂಕ್ಣೆಕ್ ವ್ಹಡ್ಲೆ ಖಾಯ್ಸ್ ಉಣೊ ಜಾಯ್ನಾತ್‍ಲ್ಲೊ ತಿಚೊ ಕೊಂಕ್ಣೆ ವಯ್ರ್ ಮೋಗ್. ಜಾಂವ್ದಿ ಕಾಣಿಯೊ, ಜಾಂವ್ದಿ ಕವಿತಾಂ ಗಾಂವಾಂತ್ ಆಸ್ಚ್ಯಾ ಯ್ಯಾ ಕೊಂಕ್ಣೆ ಥಂಯ್ ಸದಾಂಚ್ ಲಾಗಿಂ ಆಸ್ಚ್ಯಾ ಬರೊವ್ಪ್ಯಾಂಚ್ಯಾಕಿ ಇಲ್ಲೊ ಚಡ್‍ಚ್ ಮೋಗ್ ಮೊನಿಕಾ ಬಾಯೆಕ್ ಕೊಂಕ್ಣೆ ವಯ್ರ್ ಮುಣೊನ್ ಸಾಂಗ್ಯೇತ್.
ಪಾಟಿಂ ತಿಚ್ಯಾ ಕವಿತಾ ತೆವ್ಶಿಂ ಘುಂವ್ಲ್ಯಾರ್ ಆಮ್ಚ್ಯಾ ಬಹುತೇಕ್ ಕವಿ/ಕವಯಿತ್ರಿಂನಿ ಸಾಮಾನ್ಯ್ ಜಾವ್ನ್ ವಿಂಚ್ಚೊ ವಿಶಯ್ "ಆವಯ್" ಆಮ್ಚ್ಯಾ ಕವಯಿತ್ರಿನ್ ವಿಂಚ್ಲಾ. ವ್ಹಯ್ ಆವಯ್ಚೊ ಮೋಗ್ ಯ್ಯಾ ತಿಚೆಂ ವ್ಯಕ್ತಿತ್ವ್ ತಶೆಂಚ್ ಕೆದ್ನಾಂಯ್ ಆಮ್ಚ್ಯಾ ದೊಳ್ಯಾಂ ಮುಖಾರ್ ಉಬೆಂ ರಾವ್ತಾ. ಸ್ತ್ರೀ /ಆವಯ್ ಆಜ್ ಸರ್ವ್ ಕ್ಷೇತ್ರಾಂನಿ ಮುಕಾರ್ ಪಾವ್ಲ್ಯಾ ತೆಂ ವ್ಹಯ್ ತರೀ ಆಪ್ಲ್ಯಾ ಕುಟ್ಮಾ ಥಂಯ್ ತಿಚಿ ಜವಾಬ್ದಾರಿ ಬಿಲ್ಕುಲ್ ಉಣೆಂ ಜಾಂವ್ಕ್ ನಾ. ಶತಮಾನಾಂ ಆದಿಂ ಕಶಿ ಆಸ್‍ಲ್ಲಿ ತಿ ಆಜೂನೀ ಆಸಾ. ಆನಿ ತಿ ಕವಯಿತ್ರಿನ್ ಕುಂಡ್ಲ್ಯಾಂತ್ಲಿ ಕಡಿ ಆನಿ ಪಿಜ್ಜಾ ಬರ್ಗರ್ ಹೆಂ ದೋನ್ ಪಿಳ್ಗೆ ಮದ್ಲೆಂ ಮಾನಸಿಕ್ ಝುಜ್ ಮಾತ್ರ್ ನಂಯ್ ಆಸ್ತಾಂ ಸಂಸಾರ್ ಬದಾಲ್ಲ್ಯಾರಿ ಆವಯಾಚೆಂ ಕಾಮ್ / ಜವಾಬ್ದಾರಿ ಬದ್ಲಾನಾ ಮುಣ್ಚೆಂ ಭೋವ್ ಬೊರ‍್ಯಾ ರಿತಿನ್ ವರ್ಣಿಲಾಂ.
ಆಯ್ಚಿ ಸ್ತ್ರೀ ಹುಷಾರ್ ಜಾಲ್ಯಾ. ತ್ಯಾ ದೆಕುನ್ ತಿ ಮೆನೆಜರ್ ಜಾವ್ನ್ ಸೊಭ್ತಾ, ಬದ್ಲಾಲ್ಲ್ಯಾ ಕಾಳಾ ಸಾಂಗಾತಾ ತಿ ಬದ್ಲಾತಾ ತರೀ ಘರ್ ಪಾವ್ತಾನಾ ಮಾತ್ರ್ ತಿ ಗಾಡಾಂವ್ ಆನಿ ಡಿಜಿಟಲ್ ಎರಾ ಥಾವ್ನ್ ಪಾಟಿಂ ಉರ್‌ಲ್ಲಿ ಜಾವ್ನ್ ಬದ್ಲಾತಾ. ಕಾಮಾಚ್ಯಾ ಜಾಗ್ಯಾರ್ ತಿಕಾ ಘರ್ಚ್ಯಾಚ್ಯಾನಿ ಚಡ್ ವಿರಾಮ್ ಮೆಳ್ತಾ ವ್ಹಯ್ ತರೀ ಆಪ್ಲ್ಯಾ ಕುಟ್ಮಾ ಲಾಗೊನ್ ಸಗ್ಳೆಂ ತಿ ಮೌನ್‍ಪಣಿಂ ಆನಿ ಖುಶೆನ್ ಸೊಸುನ್ ವರ್ತಾ ಆನಿ ಎಕ್ ಬೊರೆಂ ಆದರ್ಶ್ ಕುಟಾಮ್ ರುತಾ ಕರ್ತಾ.
ಹಿಚ್ಚ್ ಜಾವ್ನಾಸಾ ಆವಯ್ಚಿ ಮಹಿಮಾಂ. ತಿ ಏಕ್ ಸೊಸ್ಣಿಕಾಯೆಚೆಂ ಭಂಡಾರ್, ಆಗಾಧ್ ಮೊಗಾ ಸಾಗೊರ್. ಸಗ್ಳೆಂ ಸೊಸುನ್ ಘೇವ್ನ್ , ಆಪ್ಲೊ ಜೀವ್ ರಿಸ್ಕೆರ್ ಘಾಲ್ನ್ ಆಮ್ಕಾಂ ಹ್ಯಾ ಸಂಸಾರಾಚೊ ಉಜ್ವಾಡ್ ಆಮ್ಕಾಂ ತಿಣೆಂ ದಾಕಯ್ಲಾ.
ಖಂಡಿತ್ ಜಾವ್ನ್ ಹಾಂವ್ ನಶೀಬ್ವಂತ್ ಕಿತ್ಯಾಕ್ ಮುಳ್ಳ್ಯಾರ್ ಮೊಜ್ಯಾ ಮಮ್ಮಿಚ್ಯಾ ಪಾಲ್ವಾ ಸಾವ್ಳೆಂತ್ ಮ್ಹಾಕಾ ಆಜೂನಿ ರಕ್ಷಣ್ ಮೆಳ್ತಾ.
ಆಭಿನಂದನ್ ಮೊನಿಕಾ ಬಾಯ್... ಬೊರೆಂ ಏಕ್ ಕವನ್ ಬೊರೊವ್ನ್ ಮಮ್ಮಿಚ್ಯಾ ಪಾಲ್ವಾಂತ್ ಮ್ಹಾಕಾ ಖೆಳಾಯ್ಲ್ಯಾ ಖಾತಿರ್.
- ನಾನು ಮರೋಲ್ ತೊಟ್ಟಾಮ್
Reply